KWONDŨ WA ANDŨ MA MŨIKA
11: Kĩthito
ŨU NĨ KWASYA ATA?
Andũ me kĩthito maikĩaa wĩa. Vandũ va ũu, nĩmatanĩaa kũthũkũma meyumĩtye nĩ kana meanĩsye mavata moo na maitetheesya andũ angĩ, o na ethĩwa wĩa ũla meũthũkũma ndwendekete nĩ andũ aingĩ.
NĨKĨ NĨ ŨNDŨ WA VATA?
Wĩtĩkĩle kana ũlee, mũndũ nĩwĩthĩawa na maũndũ maingĩ ala waĩlĩte kwĩanĩsya. Andũ aingĩ ĩũlũ wa nthĩ mayendete kũthũkũma meyumĩtye vyũ. Ĩndĩ yĩla watethya wĩa na kĩthito, ũndũ ũsu nũkũtethasya.—Mũtavan’ya 3:13.
“Nĩsĩte kũmanya kana yĩla wathũkũma na kĩthito, wĩw’aa weanĩsya ũndũ wa vata na wĩw’aa wĩ mwĩanĩe. Kwĩw’a ũu kũtumaa nendeew’a nĩ kũtethya wĩa. Wamanyĩa kũthũkũmaa na kĩthito, nũkwataa ĩsyĩtwa ĩseo.”—Reyon.
MWOLOOTO WĨ MBIVILIANĨ: “Wĩanĩ w’onthe ve ũtandĩthyo.”—Nthimo 14:23.
ŨNDŨ ŨTONYA KWĨKA
Tata kwĩthĩwa na woni mũseo ĩũlũ wa wĩa kwa kwĩka maũndũ aa maatĩĩe.
Endeew’a nĩ kwĩkaa maũndũ nesa. Wĩthĩwe wĩtethya mawĩa ma mũsyĩ, wĩa wa sukulu, kana wĩa wa kũandĩkwa, ĩyumye vyũ ũndũnĩ ũla ũkwĩka. Yĩla wamina kwĩka ũndũ mũna, sisya wone nĩ va ũtonya kwaĩlangya nĩ kana ũthũkũmae na mĩtũkĩ kana nesanga. O ũndũ waendeea kwĩthĩwa na ũtũĩka, now’o ũkatanĩaa wĩa waku.
MWOLOOTO WĨ MBIVILIANĨ: “Nũkwona mũndũ mũthingu wĩanĩ wake? Akaũngama mbee wa asumbĩ; ndakaũngama mbee wa andũ mate na nguma.”—Nthimo 22:29.
Sisya ũndũ kĩthito kyaku kĩtonya kũtethya angĩ. Vakuvĩ kĩla ũndũnĩ, yĩla watethya wĩa ũla ũnengetwe nesa, andũ ala angĩ nĩmatethekaa. Kwa ngelekany’o, yĩla watethya mawĩa ma mũsyĩ na kĩthito, andũ ala angĩ ma mũsyĩ nĩmavũthĩawa.
MWOLOOTO WĨ MBIVILIANĨ: “Kũnengane kwĩ ũtanu mwingĩ kwĩ kwosa.”—Meko ma Atũmwa 20:35.
Ĩyumye mũnango. Vandũ va kwĩka maũndũ o manini, ĩka maũndũ maingĩ mbee wa ala ũtaĩtwe kwĩka. Yĩla weeka ũu, we mwene ũkatanĩaa wĩa ũla weanĩsya nũndũ ndũnathing’ĩĩw’a, ĩndĩ nue weeka ũu na ngenda.—Mathayo 5:41.
MWOLOOTO WĨ MBIVILIANĨ: “Wĩke ũla ũseo na ngenda, ĩndĩ ti kwa kũthing’ĩĩw’a.”—Vilemona 14.
Ĩthĩwa na kĩthimo. Andũ me kĩthito mayĩthĩawa me atulu na maithũkũmaa masaa maingĩ kũvĩtũka. Vandũ va ũu, methĩawa na kĩthimo ũkethĩa nĩmeũtanĩa kũtethya wĩa o vamwe na kũthũmũa.
MWOLOOTO WĨ MBIVILIANĨ: “Ũvĩ ũmwe wusĩe, vamwe na ũuu, wĩ kavaa kwĩ mbĩ ilĩ susĩe wĩa na kũsemban’ya na kĩseve.”—Mũtavan’ya 4:6.
No Wendeewʼe Nĩ Ii
MŨSYAĨĨSYA
Ũndũ Ũtonya Kũtanĩa Wĩa Waku
Sũanĩa motao amwe kuma Mbivilianĩ ala mekwonany’a nzĩa imwe tũtonya kũtũmĩa tũkatanĩa wĩa na tũkew’a twĩ eanĩe.
AMKENI!
Ũndũ Ũtonya Kũtũmĩa Ĩvinda Yaku Nesa
Nzĩa ĩmwe ũtonya kũtũmĩa ĩvinda yaku nesa nĩ kwĩyĩosya kwa nzĩa siana ũna. Nĩ nzĩa syĩ va isu?
