Asyai ala mekĩĩaa syana syoo ngelekany’o mekaa kwosana na ũndũ meũimanyĩsya. Kwa ngelekany’o, nĩ vinya mũno kwa mwana waku kũneena ũla w’o ethĩwa ve ĩvinda wakwĩwie ũyasya, “Mũtavye ndikw’o,” nũndũ ve mũndũ wamũthokeie, na ndwendaa kũneena nake.

“Andũ nĩmakothaa kwasya, ‘Ĩka ũndũ ngũũtavya na ũieka kũsisya ũndũ ngwĩka.’ Ĩndĩ kĩu kĩyĩsa kũtethya syana syaku. Syana nikwatasya maũndũ onthe ala tũũweta na ala tũkwĩka, na no itũtavye ethĩwa ithyĩ twĩ asyai nĩtwĩkaa kwosana na kĩla tũimanyĩasya.”—David.

MWOLOOTO WĨ MBIVILIANĨ: “We ũũtavany’a, ũkyasya, “Ndũkoye,” we nĩwũyaa?”—Alomi 2:21.

Syana o vamwe na andũ ma mũika, onthe maatĩĩaa mũno ngelekany’o ya asyai kwĩ ya mũndũ ũngĩ o na wĩva. Ũu wĩonany’a kana no uw’e ũtonya kũtongoesya syana syaku nesa vyũ. Ĩndĩ ũu ũkatonyeka ethĩwa ũkekaa maũndũ ala ũkũimanyĩsya.

“No tũsyokeleele ũndũ ũmwe mavinda ĩana na ũkethĩa twĩona syana sitũ ta itakwetye ũu. Ĩndĩ mũthenya ũla tũkeka kĩvathũkany’o na ũndũ tũitavasya, iikaema kũweta. Syana syĩthĩawa isyaĩĩsye maũndũ onthe ala tũkwĩka o na yĩla tũũsũanĩa ta itakwetye ũu.”—Nicole.

MWOLOOTO WĨ MBIVILIANĨ: “Ũĩ ũla wumaa ĩũlũ . . . ndwĩ wangangany’a.”—Yakovo 3:17.

Ĩyĩosye ũndũ we mwene wĩkalaa. Nĩ syĩndũ ta syĩva sya kwĩtanĩthya we mwene wĩloelaa? We wĩkalanasya ata na ũla ũtwaanĩte nake na syana syaku? Anyanya maku methĩawa mailyĩ ata? Nũsũanĩaa andũ ala angĩ? Kwa ũkuvĩ, we ũilyĩ ũndũ ũkwenda syana syaku syĩĩthĩwa siilyĩ?

“Nĩ na mũemewa tũithĩng’ĩĩasya syana sitũ syĩkale kwosana na myolooto ithyĩ ene tũtamĩatĩĩaa.”—Christine.

Ĩtya ũekeo yĩla wavĩtya. Syana syaku nĩsyĩthĩawa syĩsĩ kana nũvĩtasya. Ĩndĩ yĩla wavĩtĩsya ũla ũtwaanĩte nake kana syana syaku na ũyasya “Nĩ vole,” wĩthĩawa wamanyĩsya syana syaku ĩsomo ya vata mũno ĩũlũ wa kũneena ũla w’o na kwĩthĩwa na wĩnyivyo.

“Syana sitũ nĩsyaĩle kwĩw’a tũyĩtĩkĩla mavĩtyo maitũ na kwĩtya ũekeo. Twaema kwĩka ũu, o nasyo iiketĩkĩlaa yĩla syavĩtya.”—Robin.