1-3. (a) Twaĩle kwosa ata w’o wa Mbivilia? Nengane ngelekany’o. (Sisya visa ĩthangũnĩ yĩĩ.) (b) Twĩneenea makũlyo meva ĩsomonĩ yĩĩ?

MAVINDA maingĩ andũ nĩmatũngaa syĩndũ meĩ manathooa. O na livoti sya nthĩ imwe syĩonany’a kana ũtalo wa syĩndũ ila athooi matũngaa nĩ vakuvĩ 9 kwa 100. Na walika viasalanĩ ila ikũnawa Indanetinĩ, ũtalo ũsu nũthonokete 30 kwa 100. Andũ asu nĩmatonya kwĩthĩa kĩla meĩthooete kĩyĩilye ũndũ meũsũanĩaa, kĩ na mathĩna, kana makyona mainakyenda. Na nũndũ wa ũu, maivanga kũkĩkũany’a na kĩngĩ, kana maikũlya matũngĩwe mbesa.

² Ĩndĩ o na kau mũndũ no atũngĩwe mbesa atũnga kĩndũ ũthooie, vai mũndũ wĩsa kwenda kũtũnga, kana ‘kũthoosya,’ “w’o” wa Mbivilia, ũla ‘twathooie.’ (Soma Nthimo 23:23; 1 Tim. 2:4) Ĩsomo ĩvĩtu nĩyonanĩtye kana nĩtwatũmĩie ĩvinda yingĩ kũmantha ũla w’o. Na eka ũu, nĩtũtonya kwĩthĩwa twatiie mawĩa manene, tweetĩkĩla kũola ndũũ yitũ na andũ ma mũsyĩ kana anyanya maitũ, twaalyũla mosũanĩo na mĩkalĩle yitũ, o na twaekana na syĩthĩo na imanyĩo ila itosanĩte na Maandĩko. Ĩndĩ maũndũ ala twĩvatĩte ti kĩndũ maelekanw’a na moathimo ala tũkwatĩte.

³ No twasye tweemanyĩsya w’o ũla wĩ Mbivilianĩ twĩw’aa o ta ũla mũtandĩthya wawetiwe nĩ Yesũ. Yesũ anenganie ngelekany’o ĩsu  ayenda kwonany’a ũndũ w’o wa Ũsumbĩ wa Ngai ne wa vata kwa ala maũmanthaa. Aisye kana mũtandĩthya ũsu amanthaa malũlũ na oona ũmwe mũseo mũno. Lũlũ ũsu waĩ wa lato mũnene mũno nginya weethĩa mũtandĩthya ũsu ndekwona ta kĩndũ ‘kũthoosya’ na mĩtũkĩ syĩndũ syonthe ila waĩ nasyo nĩ kana aũthooe. (Mt. 13:45, 46) O naw’o w’o ũla tweemanyĩisye ĩũlũ wa Ũsumbĩ wa Ngai vamwe na maũndũ ala angĩ twĩmanyĩĩtye Ndetonĩ yake wĩ lato mũnene. Na waĩ wa vata nginya tweevata na mĩtũkĩ maũndũ maingĩ kwa ngenda nĩ kana tũũthooe. Twaendeea kwona w’o ũsu wĩ wa vata, ‘tũikothoosya.’ Ĩndĩ ũndũ ũmwe ũmakasya nĩ kana ve o athaithi amwe ma Ngai maekaa kwona w’o ũsu wĩ wa vata, na amwe o na nĩmaũthooetye. Mwa tũikaatate kwĩka ũu o na vanini! Nĩ kenda twonany’e kana nĩtwendete w’o vyũ na ngoo yonthe, no nginya tũatĩĩe ũtao ũla Mbivilia ĩtũnengete yĩla ĩkwasya ‘tũendae nthĩnĩ wa ũla w’o.’ (Soma 3 Yoana 2-4.) Mũndũ ũendaa nthĩnĩ wa ũla w’o awiaa mbee vyũ thayũnĩ wake, na eka ũu, mwĩkalĩle wake wĩthĩawa wosanĩte vyũ na kĩla wĩmanyĩĩtye. Ekai tũneenee makũlyo aa: Nĩkĩ amwe ‘mathooasya’ w’o na mekaa ũu ata? Nĩ kyaũ kĩtonya kũtũtetheesya tũikeke ũu? Na tũtonya ata kũlũlũmĩlya ũtwi witũ wa ‘kũendaa nthĩnĩ wa w’o’?

4. Nĩ kyaũ kyatumie amwe ‘mathoosya’ w’o ĩvindanĩ ya Yesũ?

⁴ Ĩvindanĩ ya Yesũ amwe nĩmeetĩkĩlile momanyĩsyo make, ĩndĩ maemwa nĩ kũendaa nthĩnĩ wa ũla w’o. Kwa ngelekany’o, yĩla Yesũ waĩthisye ĩkomano ĩnene, nĩyamũatĩĩie nginya mũingo ũla ũngĩ wa Ũkanga wa Kalilii. Me vau, Yesũ nĩwamatavisye ũndũ wamatelemya. Ameie: “Mũteũya nyama ya mwĩĩ wa Mwana wa mũndũ na kũmĩnyw’a nthakame yake, mũi na thayũ nthĩnĩ wenyu.” Vandũ va kũkũlya Yesũ amaelesye, meewie mataendeea kũmwĩthukĩĩsya, na masya: “Ndeto ĩno nĩ nyũmũ; ũla ũtonya ũmĩw’a nũũ?” Na nũndũ wa ũu, “amanyĩw’a make aingĩ masyoka na ĩtina, na matyaathi nake ĩngĩ.”—Yoa. 6:53-66.

5, 6. (a) Nĩ kyaũ kĩtumĩte amwe maemwa nĩ kũlũmany’a na w’o ũmũnthĩ? (b) Mũndũ atonya ata kũtia ũla w’o o kavola?

⁵ Ũndũ wa kũmakya nĩ kana amwe nĩmaemetwe nĩ kũlũmany’a na ũla w’o. Amwe malulutĩkie yĩla ũndũ mũna twamanyĩĩtw’e waeleiw’e kwa nzĩa ĩngĩ, kana nũndũ wa ũndũ mũna mwana-a-asa wĩsĩkĩe waneenie kana weekie. Angĩ namo matiie ũw’o nũndũ wa kũthata manengwa ũtao wa Maandĩko, kana no ũndũ wa kũemanwa na Mũklĩsto ũngĩ. Na ĩndĩ ve ala meetĩkĩlile kwelelũkw’a nĩ momanyĩsyo ma ũvũngũ, ala mamanyĩaw’a ĩũlũ witũ nĩ andũ ala makaĩĩte mũĩkĩĩo na andũ angĩ matũvĩngaa. Maũndũ asu nĩmatumĩte amwe mambĩĩa kwelelũka na ‘kũtia’ Yeova na kĩkundi o mesĩ. (Aevl. 3:12-14) Mwa ti kavaa keka no malũmanilye na mũĩkĩĩo woo na maiendeea kũmwĩkwatya Yesũ, o tondũ mũtũmwa Vetelo weekie! Yĩla Yesũ wakũlilye atũmwa kana nĩmekwenda kũmũtia, Vetelo asũngĩie na mĩtũkĩ asya: “Mwĩaĩi, tũende kwaũ? nue wĩ na ndeto sya thayũ ũtathela.”—Yoa. 6:67-69.

⁶ Angĩ namo nĩmatonya kwĩthĩwa matiĩte ũla w’o o kavola kavola o na mateũmanya kĩla kĩendeee. No tũelekany’e andũ asu na ĩsiwa yĩũkuwa nĩ kĩw’ũ o kavola kuma ũsĩnĩ ũtee yĩlikĩte nthĩnĩ. Nĩkyo kĩtumi Mbivilia ĩtũmĩĩte ndeto “kwelelũka” yonany’e ũndũ maaa. (Aevl. 2:1, NWT) Ala mekaa kwelelũka me kĩvathũkany’o na ala matiaa w’o mesĩ ũndũ mekwĩka. Ĩndĩ asu melelũkaa mateũmanya methĩawa mayananga ngwatanĩo yoo na Yeova, na maendeea ũu no mese kũmũtia vyũ. Kwoou tũtonya kwĩka ata tũikese kwĩyĩthĩĩla vau?

7. Nĩ ĩtambya yĩva ya mbee twaĩle kwosa nĩ kana tũikese kũthoosya ũla w’o?

⁷ Nĩ kana tũendae nthĩnĩ wa ũla w’o, no nginya twĩtĩkĩle na tũikwata ndeto syonthe sya Yeova. W’o nĩw’o waĩle kwĩthĩwa kĩndũ kĩla kya vata vyũ thayũnĩ witũ, na nĩtwaĩle kũatĩĩa myolooto ya Mbivilia maũndũnĩ onthe. Mũsumbĩ Ndaviti aimũvoya Yeova amwĩie atĩĩ: ‘Ngaendaa nthĩnĩ wa w’o waku.’ (Sav. 86:11) Ndaviti nĩwatw’ĩte vyũ kwĩka ũu. O naitũ no nginya twĩthĩwe tũtw’ĩte vyũ kũendaa nthĩnĩ wa w’o wa Ngai. Tũkaema kwĩka ũu, nĩtũtonya kwĩsa kwosa mũtwe ũngĩ twasũanĩa maũndũ ala tweeyĩimie nĩ kana tũlũmany’e na ũla w’o, na twavũa ngũĩ tũyambĩĩa kũmasyokea. Vandũ va kũtũnga mũtwe ĩtina, twaĩle kũlũmany’a na ũla w’o maũndũnĩ onthe. Nĩtwĩsĩ kana tũyĩsa kũnyuva nĩ ũw’o wĩva tũkwenda kũatĩĩa na nĩ wĩva tũtekwenda kũatĩĩa. Twaĩle kũlũmany’a na ‘w’o w’onthe.’ (Yoa. 16:13) Ekai tũneenee maũndũ atano tũtonya kwĩthĩwa tweevatie nĩ kana twĩmanyĩsye ũla w’o na tũilũmany’a naw’o. Kwĩka ũu nĩkũũtũtetheesya tũlũlũmĩlye ũtwi witũ wa kũlea kũsyokea ũndũ o na ũmwe katĩ wa maũndũ ala tweevatie nĩ kana tũthooe w’o.—Mt. 6:19.

8. Mũndũ atonya kwelelũka ata nũndũ wa kũtũmĩa ĩvinda yake naĩ? Nengane ngelekany’o.

⁸ Ĩvinda yaku. No nginya tũtũmĩe ĩvinda yitũ nesa ethĩwa tũikwenda kwĩsa kwĩthĩa twelelũkile twatia w’o. Tũkaema kwĩsũvĩa, no twĩse kwĩthĩa tũitũmĩa ĩvinda yitũ yingĩ tũyĩtanĩthya, tũyĩka tũmaũndũ tũla twendete, tũisisya syĩndũ Indanetinĩ, kana tũyĩloela televiseni. Tũikwasya maũndũ asu nĩ mathũku, ĩndĩ tũkatũmĩa ĩvinda yingĩ tũimeka, no twĩse kwĩthĩa twaĩwe nĩ ĩvinda ya kwĩmanyĩsya na kwĩka maũndũ angĩ ma kĩ-veva. Kwatwose ngelekany’o ya mwĩĩtu-a-asa wĩtawa Emma. * Kuma Emma e mũnini, endete mbalasi mũno. Kamwanya kaumĩla oou, wamwĩthĩaa mbalasinĩ ĩũlũ. Ĩtina wa ĩvinda nĩwambĩĩe kũthĩnĩka nũndũ oonaa ũndũ ũsu ũimũĩĩa ĩvinda yingĩ. Nĩweekie moalyũku, na avota kũolanga ĩvinda yĩla watũmĩaa na mbalasi. O na ĩngĩ nĩwatetheeiw’e nĩ ngewa ya mwĩĩtu-a-asa wĩtawa Cory Wells, ũla tene weethĩawa mathaũnĩ ma mbalasi. * Ũmũnthĩ Emma nũtanĩaa kũtũmĩa ĩvinda yake yingĩ e na andũ ma mũsyĩ na anyanyae kana ayĩka maũndũ ma kĩ-veva. Na yu nĩwĩw’aa e na ngwatanĩo ndũmu na Yeova, na e na mũuo wa kĩlĩko nũndũ nũtũmĩaa ĩvinda yake nesa.

9. Kũsembany’a na maũndũ ma kĩ-mwĩĩ kũtonya ata kũtuma mũndũ olwa nĩ maũndũ ma kĩ-veva?

⁹ Maũndũ ma kĩ-mwĩĩ. Ethĩwa nĩtũkwenda kũendaa nthĩnĩ wa ũla w’o, no nginya tũiketĩkĩlye maũndũ ma kĩ-mwĩĩ mose mwanya wa maũndũ ma kĩ-veva. Yĩla tweemanyĩisye w’o, nĩtwamanyie kana kũmũthũkũma Yeova nĩ kwa vata vyũ kwĩ maũndũ ma kĩ-mwĩĩ. Nĩtwatwie na ngenda kũtia maũndũ ma kĩ-mwĩĩ ĩtina nĩ kana tũendae nthĩnĩ wa ũla w’o. Ĩndĩ no kwĩthĩwa oyu twonaa andũ maithooa syĩndũ nzeo sya matukũ aa kana maitanĩa o maũndũ angĩ ma kĩ-mwĩĩ. Nũndũ wa ũu, no twambĩĩe kwĩw’a ta tweekoseie. Na kĩu kĩituma tũeka kwĩanĩwa nĩ syĩndũ ila sya lasima thayũnĩ, na tũyambĩĩa kũsembany’a na maũndũ ma kĩ-mwĩĩ nginya tũyũlwa nĩ maũndũ ma kĩ-veva. Mũndũ ũmwe weetawa Ndema nĩwakwatiwe nĩ ũndũ ũsu. Endie “nthĩ ĩno ya ĩvinda yĩĩ” nginya akola kũendeea kũtavany’a na mũtũmwa Vaulo. (2 Tim. 4:10) Kyo nĩ kyaũ kyatumie amũtia? We nĩwĩthĩwa eekie ũu nũndũ wa kwenda syĩndũ sya kĩ-mwĩĩ mbee wa maũndũ ma kĩ-veva? Kana nĩwĩthĩwa eekie ũu eew’a atekwenda  kũendeea kwĩyĩima maũndũ make nĩ kana aendeee kũthũkũma na Vaulo? Mbivilia ndĩwetete. Ĩndĩ ithyĩ tũyĩsa kwenda o na vanini twambĩĩe kwenda ĩngĩ syĩndũ sya kĩ-mwĩĩ nginya twĩse kũeka kwenda ũla w’o.

10. Nĩ kana tũendeee kũendaa nthĩnĩ wa ũla w’o, twaĩle kwĩsũvĩa tũikeke ata?

¹⁰ Ndũũ yitũ na andũ ma mũsyĩ na anyanya. Nĩ kana tũendeee kũendaa nthĩnĩ wa ũla w’o, no nginya twĩsũvĩe tũikese kwelelũkw’a nĩ angĩ. Ndũũ yitũ na ala mate Ngũsĩ, methĩwe nĩ andũ ma mũsyĩ kana nĩ anyanya, nĩyaolekile yĩla tweemanyĩisye w’o. Amwe nĩmatonya kwĩthĩwa matũeleiwe, ĩndĩ angĩ mambĩĩa kũtũvĩnga. (1 Vet. 4:4) O na kau nĩtũtataa mũno twĩkalany’e nesa na andũ ma mũsyĩ na tũimakua nesa, twaĩle kwĩthĩwa twĩ metho tũikese kũmenda nginya tũemwe nĩ kũlũmany’a na ũla w’o. Ti ũthũku kwĩthĩwa na ngwatanĩo nzeo na andũ ma mũsyĩ. Ĩndĩ ũkany’o ũla wĩ nthĩnĩ wa 1 Akolintho 15:33 nũtũlilikanasya kana andũ ala twaĩle kwĩthĩwa twĩ ndũũ namo vyũ nĩ ala mamwendete Yeova.

11. Tũtonya kwĩka ata nĩ kana twĩvathane na mwĩkalĩle ũla ũtosanĩte na Maandĩko?

¹¹ Mosũanĩo na mwĩkalĩle ũtaĩle. Onthe ala maendaa nthĩnĩ wa ũla w’o no nginya methĩwe me atheu. (Isa. 35:8; soma 1 Vetelo 1:14-16.) Kĩla ũmwe witũ nĩweekie moalyũku nĩ kana ekale kwosana na myolooto ya Mbivilia. O na amwe meekie moalyũku manene mũno. Ĩndĩ o na ethĩwa tweekie moalyũku meana ata, tũyaĩle o na vanini kũekana na mwĩkalĩle mũtheu ũla twĩ naw’o yu atĩ nĩ kana twĩthokoany’e na mwĩkalĩle mũthũku wa andũ ma nthĩ ĩno. Kwoou tũtonya kwĩka ata nĩ kana tũikese kũtatĩka twĩlikye mwĩkalĩlenĩ mũthũku? No tũtetheke twavindĩĩsya ũndũ Yeova weeyumisye mũno wĩana nĩ kana tũthew’e. Anenganie Mwana wake, Yesũ Klĩsto, etĩkye nthakame yake kwondũ witũ. (1 Vet. 1:18, 19) Nĩ kana tũendeee kwĩthĩwa na mwĩkalĩle ũla ũmwendeeasya Yeova, no nginya twĩkalae tũlilikene kana ĩla nthembo ya wovosyo Yesũ waumisye nĩ ya vata mũno.

12, 13. (a) Nĩkĩ nĩ ũndũ wa vata kũlilikanaa ũndũ Yeova wonaa sikũkũ ila itanĩawa? (b) Twĩenda kũneenea kyaũ?

¹² Syĩthĩo na imanyĩo itekwosana na Maandĩko. Nĩtũtonya kũthing’ĩĩw’a nĩ ala tũthũkũmaa ĩmwe, tũsomaa ĩmwe, kana andũ ma mũsyĩ tũtanĩe sikũkũ syoo vamwe namo. Tũtonya kwĩka ata nĩ kana twĩsũvĩe tũikese kũtatĩka twĩlikye sikũkũnĩ na syĩthĩonĩ ila itamwendeeasya Yeova? Kĩndũ kĩmwe kĩtonya kũtũtethya nĩ kwĩkalaa tũlilikene woni wa Yeova ĩũlũ wa maũndũ asu. O na ĩngĩ kũsoma mavuku maitũ ala monanĩtye ũndũ sikũkũ isu syambĩĩe no kũtũtethye. Tweelilikany’a nĩkĩ Maandĩko matũvatĩte kũtanĩa sikũkũ ta isu, tũkekalaa tũte na nzika kana nĩtũlũmanĩtye na maũndũ ala “mamwendeeasya Mwĩaĩi.” (Aev. 5:10) Nao twamwĩkwatya Yeova na Ndeto yake ya w’o, tũikesa kũkwatw’a nĩ kĩtei kya “kũkĩa mũndũ.”—Nth. 29:25.

¹³ Kũendaa nthĩnĩ wa ũla w’o ti ũndũ wa mũthenya ũmwe. Twĩenda kũendeea kwĩka ũu nginya tene na tene. Ĩndĩ tũtonya kwĩka ata nĩ kana tũlũlũmĩlye ũtwi witũ wa kũendaa nthĩnĩ wa ũla w’o? Ekai tũneenee maũndũ atatũ tũtonya kwĩka.

14. (a) Kũendeea kũthooa w’o kũtonya kũtũtetheesya ata tũikaaĩse kwĩw’a ta tũũthoosya? (b) Nĩkĩ twĩ na vata wa kwĩthĩwa na ũĩ, ũmanyĩsyo, na ũmanyi?

¹⁴ Ũndũ wa mbee ũla twaĩle kwĩka nĩ kũendeea kwĩmanyĩsya w’o ũla wĩ Ndetonĩ ya Ngai na kũvindĩĩsya maũndũ ala tũkwĩmanyĩsya. Thooa w’o kwa kũmanthaa mwanya kĩla ĩvinda wĩyĩĩthye Ndeto ya Ngai. Weeka ũu, ũkoonaa w’o wĩ wa vata mũnango, na  ndũkesa kwĩw’a ta ũũthoosya mũthenya o na ũmwe. Ĩandĩko ya Nthimo 23:23 nĩyĩwetete kĩndũ kĩngĩ twaĩle kũthooa eka o ũla w’o. Yĩtwĩĩte tũthooe “ũĩ, na ũmanyĩsyo [kana, ũkany’o], na ũmanyi.” Kwĩmanyĩsya kwĩ kw’oka kũitoetye. No nginya tũtũmĩe w’o ũla tweemanyĩsya. Ũmanyi nũtũtetheeasya kũelewa ũndũ kĩla tweemanyĩsya kĩkwatĩanĩe na kĩla tũtwĩe twĩsĩ. Naw’o ũĩ nĩw’o ũtũtetheeasya kũtũmĩa kĩla tweemanyĩsya. Na ve mavinda angĩ w’o ũtonya kũtũnenga ũkany’o nĩ kana twone moalyũku ala twaĩle kwĩka. Mwa ekai twĩtĩkĩlae ũkany’o ũla twakwata! Ũkany’o ũsu nĩ wa vata vyũ o na kwĩ vetha.—Nth. 8:10.

15. Mũsivi wa ũla w’o ũtũsũvĩaa ata?

¹⁵ Ũndũ wa kelĩ nĩ kũtw’a vyũ kĩla mũthenya kana ũkatũmĩaa w’o ũla weemanyĩsya. Ũu nĩ kwasya wĩkalae wĩvotoete ũla mũsivi wa w’o kĩnyunyunĩ kyaku. (Aev. 6:14) Mũsivi ũla weevotoawa nĩ mũsikalĩ ĩvindanĩ ya tene nĩwasũvĩaa kĩnyunyu kyake vamwe na syĩndũ sya nda. Ĩndĩ nĩ kana mũsivi ũsu ũmũsũvĩe nĩwaaĩle kũkaswa nesa. Mũsivi mũleelu ndwaĩ ũmũtethya mũno. Naw’o mũsivi wa ũla w’o ũtũsũvĩaa ata? Twalũmany’a na ũla w’o o tondũ mũsivi wĩthĩawa ũlũmĩte kĩnyunyunĩ, w’o ũsu ũkatũsũvĩaa tũikethĩwe na mawoni mataĩle, na ũkatũtetheeasya twĩkae motwi maseo ĩvinda yonthe. O na ĩngĩ w’o wa Mbivilia ũkatũtetheeasya twĩthĩwe tũtw’ĩte vyũ kwĩka kĩla kyaĩle, o na yĩla twatatwa twĩke kĩndũ kĩtaĩle kana twakwatwa nĩ mathĩna maito. Mũsikalĩ ndaĩ esa kũthi kaũnĩ ateyovete mũsivi. O ta ũu, tũyaĩle mũthenya o na ũmwe kũleelya kana kũthasya mũsivi ũla twĩvotoete wa ũla w’o. Vandũ va ũu, tũtataa ũndũ tũtonya twĩkalae tũkasĩte mũsivi ũsu vyũ kĩnyunyunĩ, na ũu nĩ kwasya tũkekalaa kwosana na kĩla twĩmanyĩĩtye. O vamwe na kũsũvĩa kĩnyunyu, mũsivi ũsu nĩwatumaa mũsikalĩ akwata vandũ vaseo va kũkolya ũvyũ wake. Na yu twĩenda kũneenea ũndũ ũvyũ ũsu ũtonya kũtũtetheesya tũlũlũmĩlye ũtwi witũ wa kũendaa nthĩnĩ wa ũla w’o.

16. Kũmanyĩsya ala angĩ w’o kũtũtetheeasya ata tũlũlũmĩlye ũtwi witũ wa kũendaa nthĩnĩ wa ũla w’o?

¹⁶ Ũndũ wa katatũ ũla twaĩle kwĩka nĩ kwĩkĩa kĩthito kingĩ ũndũ vatonyeka tũmanyĩsye angĩ w’o wa Mbivilia. Kwĩka ũu kũkatũtetheeasya tũkekalaa tũkwete tũkalũmya ũla ũvyũ witũ wa ngelekany’o, naw’o nĩ “ndeto ya Ngai.” (Aev. 6:17) Kĩla ũmwe no ongelange ũtũĩka wake wa kũmanyĩsya kwa ‘kũvathũkany’a [kana, kũtũmĩa] ũndũ waĩle ndeto ya ũla w’o.’ (2 Tim. 2:15) Kũtũmĩa Mbivilia nĩ kana tũtetheesye angĩ mathooe ũla w’o na maitia momanyĩsyo ma ũvũngũ, kũtumaa tũelewa ndeto sya Ngai mũnango na kũituma tũsyenda mũno. Kwa nzĩa ĩsu twĩthĩawa tũilũlũmĩlya ũtwi witũ wa kũendaa nthĩnĩ wa ũla w’o.

17. Nĩkĩ we mwene wonaa w’o wĩ wa vata?

¹⁷ W’o nĩ mũthĩnzĩo wa vata tũnengetwe nĩ Yeova. Mũthĩnzĩo ũsu nĩw’o ũtumĩte twĩthĩwa na ngwatanĩo nzeo vyũ na Asa waitũ wa ĩtunĩ, na vai ũndũ ũngĩ ũvĩtũkĩte ũsu. O na kau no twone Ngai ta ũtũmanyĩĩtye maũndũ maingĩ, maũndũ ala tweteele kwĩmanyĩsya maitalĩka! Ngai nũtwathĩte kana eendeea kũtũmanyĩsya ũla w’o kũvika tene na tene. Kwondũ wa ũu, ĩkalaa wendete w’o o tondũ ũtonya kwenda lũlũ wa thooa mũnene. Endeea ‘kũthooa w’o, na ndũkaaũthoosye’ mũthenya o na ũmwe. Weeka ũu, ũkeethĩawa ũtonya kwĩanĩsya ndeto ii Ndaviti wamũtavisye Yeova: “Ngaendaa nthĩnĩ wa w’o waku.”—Sav. 86:11.