Nthĩnĩ wa ĩandĩko ya 2 Akolintho 12:2, 3, Vaulo nũwetete mũndũ mũna ‘wambatiw’e kũvika ĩtu ya katatũ.’ We ũsu aĩ ũũ? Yĩla Vaulo waandĩkĩaa kĩkundi kya Kolintho valũa, nĩwakindĩlĩĩle kana Ngai amũtũmĩaa ta mũtũmwa. (2 Ako. 11:5, 23) Ĩtina wa vau, nĩwawetie ĩũlũ wa “mawoni na movuan’yo ma Mwĩaĩi.” Na mĩsoanĩ ĩla ĩthyũlũlũkĩte ndeto ĩsu, ndaaweta ana-a-asa angĩ. Nũndũ wa ũu, tũyĩthĩwa tũivĩtya tũkasya yĩla wawetaa mũndũ wooniw’e mawoni na movuany’o, eewetaa ewe mwene.​—2 Ako. 12:1, 5.

Kwoou veonekana Vaulo nĩwe ‘wambatiw’e kũvika ĩtu ya katatũ’ na “alikw’a Ũseonĩ.” (2 Ako. 12:2-4) Atũmĩie ndeto “movuan’yo” kwonany’a kana maũndũ ala wooniw’e maĩ meanĩe ĩvinda yũkĩte.

Ĩndĩ we Vaulo oonie kyaũ kĩu wakĩtie ‘ĩtu ya katatũ’?

Ndeto “ĩtu” nĩtũmĩawa Mbivilianĩ kwonany’a o ĩtu yĩla twĩthĩawa twene. (Mwa. 11:4; 27:28; Mt. 6:26) Ĩndĩ ndeto ĩsu no ĩtũmĩwe kwa nzĩa ingĩ. Kwa ngelekany’o, mavinda amwe nĩtũmĩawa kũweta mosumbĩ ma andũ. (Nda. 4:20-22) Na mavinda angĩ nĩtũmĩawa kũweta ũsumbĩki wa Ngai.​—Ũvu. 21:1.

Vaulo etw’ĩka nĩwoonie ‘ĩtu ya katatũ.’ Yo twĩenda kwĩwa ata? Mbivilia nĩwetaa ũndũ katatũ nĩ kana ĩũkindĩlĩle, yonany’e ũito waw’o, kana ĩũlũlũmĩĩlye. (Isa. 6:3; Esek. 21:27; Ũvu. 4:8) Kwoou veonekana Vaulo awetie ‘ĩtu ya katatũ’ ayenda kwonany’a ũsumbĩki wa mwanya na wĩ ĩũlũ mũno, ũla nĩ Ũsumbĩ wa Masia ũtongoew’e nĩ Yesũ Klĩsto na ala 144,000 makasumbĩka nake. (Sisya Insight on the Scriptures, Ĩvu. 1, ĩth. 1059, 1062.) Ũu wosanĩte na kĩĩ mũtũmwa Vetelo waandĩkie yĩla waisye kana kwĩanana na watho wa Ngai, “tweteele matu meũ.”​—2 Vet. 3:13.

Nayo Vaulo awetaa kyaũ yĩla watũmĩie ndeto “Ũseonĩ”?

O nayo ndeto “ũseo” no ĩtũmĩwe kwa nzĩa syĩ kĩvathũkany’o: (1) Wasũanĩa mũũnda ũla mũndũ wa mbee waseũvĩw’e, ndeto ĩsu no ĩtũmĩwe kwonany’a Nthĩ Nzaũ ĩla tweteele. (2) Ndeto ĩsu no yĩthĩwe ĩkonetye mũuo ũla andũ ma Ngai makatanĩa nesa vyũ yĩla Ngai ũkatw’a maũndũ onthe meũ. (3) O na ĩngĩ, ndeto ĩsu no yĩthĩwe ĩkonetye ũseo ũla wĩ ĩtunĩ, kana, “mũũndanĩ [valatisonĩ] wa Ngai,” kwosana na Ũvuan’yo 2:7.—Sisya ĩkaseti ya Mũsyaĩĩsya ya 15/07/2015, ĩth. 8. kal. 8.

Nĩvatonyeka ũkethĩa Vaulo aneeneaa maũndũ asu me atatũ yĩla wawetie ndeto ila syĩ ĩandĩkonĩ ya 2 Akolintho 12:4.

Kwa ũkuvĩ:

Nĩvatonyeka ũkethĩa ‘ĩtu ya katatũ’ yĩla yĩwetetwe nthĩnĩ wa 2 Akolintho 12:2 nĩ Ũsumbĩ wa Masia wĩ mokonĩ ma Yesũ Klĩsto na ala 144,000. Ũsumbĩ ũsu now’o wĩtĩtwe “matu meũ.”​—2 Vet. 3:13.

Ũsumbĩ ũsu wĩtĩtwe ‘ĩtu ya katatũ’ nũndũ nĩ wa mwanya na wĩ ĩũlũ mũno.

“Ũseonĩ,” kana Valatisonĩ, vala Vaulo ‘wambatiw’e,’ nĩvatonya kwĩthĩwa vayonany’a (1) Nthĩ Nzaũ ĩla tweteele, (2) mũuo mwingĩ ũla tũkatanĩa ĩvinda yĩu, ũla ũkethĩwa wĩ mwingĩ o na kwĩ ũla Ngai ũtũnengete ũmũnthĩ, na (3) ‘mũũnda wa Ngai’ kana valatiso ya Ngai ĩtunĩ, yĩla Ngai ũkatw’a maũndũ onthe meũ.

Kwoou Valatiso nĩ kyaũ? Valatiso nĩ matu meũ na nthĩ nzaũ ila twathĩtwe. Ũsu nĩ mũvango mweũ ũla ũkavĩndũa maũndũ vyũ, na amwe ma maũndũ asu meũ nĩ Ũsumbĩ wa ĩtunĩ vamwe na andũ ala makethĩwa maimũthũkũma Yeova ĩũlũ wa nthĩ nzaũ.