Nũtonya kũsũngĩa makũlyo aa me makasetinĩ ma Mũsyaĩĩsya ma 2019?

Ngai aasya ata yĩla watwathie ũũ: “Mũio o na wĩva ũla ũseũvĩtw’e ũkũkite ndũkaĩla”? (Isa. 54:17)

Tũi na nzika kana Ngai akatũsũvĩaa tũikakimwe nĩ “kĩseve kya ala ma kũtĩsya.” (Isa. 25:4, 5) Vaiĩ ũthũku amaitha maitũ matonya kũtwĩka ũkatũũmĩsya tene na tene.—w19.01, ĩth. 6-7.

Maũndũ ala Ngai weekie Akanaani na Aisilaeli ala matamwĩw’aa moonanisye ata kana e ũsili wa katĩ?

Ngai nĩwasilĩile ala meekaa syĩko nthũku mũno sya ũlaalai kana ala mathĩnasya aka na syana. Nĩwaathimie ala mamwĩw’aa na meevathanaa na kwĩka ala angĩ maũndũ matekwosana na ũsili wa katĩ.—w19.02, ĩth. 22-23.

Twaĩle kwĩka ata ethĩwa ũla ũkũvoya ti mwĩtĩkĩli?

No twĩkale tũkilĩtye ĩndĩ twĩ na ndaĩa, na tũyaĩle kwasya “ameni” kana kũkwatana moko na ala angĩ me vo. No tumye mboya yitũ ngoonĩ.—w19.03, ĩth. 31.

Kũtũmĩa kana maũndũnĩ makonetye kũmanyana kĩ-mwĩĩ nĩ naĩ ngito mũno wĩana ata?

Mũndũ eeka ũu ethĩawa akeka naĩ, na ethĩawa eeka kĩkundi, silikalĩ, na Ngai naĩ. Atumĩa nĩmaatĩĩaa mĩao ya silikalĩ ĩla ĩkonetye kũkũna livoti ĩũlũ wa mũndũ ũkũwetanĩw’a na kũtũmĩa mwana maũndũnĩ asu.—w19.05, ĩth. 9-10.

Ũtonya ata kũalyũla vinya ũla ũtongoeasya kĩlĩko kyaku?

Maũndũ ma vata ũtonya kwĩka nĩ aa: Voya Yeova ũneene nake. Sũanĩa maũndũ wĩ na kĩeleelo kya kwĩkuũa. Nyuva nesa ala ũũtindany’a namo.—w19.06, ĩth. 11.

Tũtonya kwĩyũmbany’a ata oyu kwondũ wa kwĩsa kũthĩnw’a?

Nĩtwaĩle kũlũlũmĩlya ngwatanĩo yitũ na Yeova. Ĩthĩwa na mũĩkĩĩo kana nũkwendete na ndakakũtia nongi. Soma Mbivilia kĩla mũthenya, na ũivoyaa ũteũtĩĩa. Ĩthĩwa na mũĩkĩĩo kana moathimo onthe ma Ũsumbĩ wa Ngai makeanĩa. Ĩkĩa kĩlĩkonĩ maandĩko ala wendete na mbathi sya kũmũtaĩa Yeova.—w19.07, ĩth. 2-4.

Tũtonya kũtetheesya andũ maitũ ma mũsyĩ ata nĩ kana metangĩĩwa?

Nĩ ũndũ wa vata tũtate kũelewa ũndũ mekwĩw’a, tumye ũkũsĩ kwa kwĩthĩwa twĩ ngelekany’o nzeo, na tũimomĩĩsya na kũmakua nesa.—w19.08, ĩth. 15-17.

Tũkwataa ũthũmũo ata, o tondũ Yesũ watwathie ĩvukunĩ ya Mathayo 11:28?

Twĩthĩawa na asyaĩĩsya Aklĩsto matwendete, twĩthĩawa na anyanya ala aseo vyũ, na tũtethasya wĩa ũla mũseo vyũ.—w19.09, ĩth. 23.

Ngai atonya kũtũnenga ata wendi na ũtonyi wa kwĩanĩsya maũndũ? (Avi. 2:13)

Yĩla twasoma Ndeto ya Ngai na twamĩvindĩĩsya, Ngai no atũnenge vinya, na aitũtetheesya twĩthĩwe na wendi wa kwĩka kwenda kwake na ũtonyi wa kwĩanĩsya maũndũ. Veva wake no ũtũtetheesye kwaĩlangya inengo ila twĩ nasyo.—w19.10, ĩth. 21.

Nĩ matambya meva ma ũĩ twaĩle kwosa tũtaneka ũtwi mũito?

Ve matambya atano, namo nĩ: Ĩka ũkunĩkĩli nesa. Voya ũkwate ũĩ. Sũanĩa nesa kĩla kĩũtuma wenda kwĩka ũtwi waku. Ĩthĩwa wĩsĩ nesa ũvangĩte kwĩanĩsya ũtwi waku ata. Tw’a kwĩka maũndũ ala ũtonya.—w19.11, ĩth. 27-29.

Yĩsilya ya kana thayũ ndũkusaa yaumanie na kĩla Satani watavisye Eva?

No twasye ũu ti w’o. Satani eeie Eva ndakakw’a, ĩndĩ ndaamwĩa atĩ mwĩĩ wake nĩw’o ũkakw’a na ũyĩthĩa ve kĩndũ kĩ nthĩnĩ wake kĩtenekee kyauma. Momanyĩsyo onthe ma ũvũngũ maminiwe nĩ ĩla mbua mbingĩ ya ĩvinda ya Noa. Ũmanyĩsyo wa kana thayũ wa mũndũ ndũkusaa nũtonya kwĩthĩwa wambĩĩe Ngai atanamba kũnyaĩĩkya ala andũ maakaa mwako wa Mbaveli.—w19.12, ĩth. 15.