Aiee, vaiĩ vandũ Mbivilianĩ kana mavukunĩ ma tene vonanĩtye kana ũndũ ta ũsu nĩweekawa.

Ũndũ mũsoa ũsu ũalyũlĩtwe Mbivilianĩ mbingĩ, nũtumĩte amwe masũanĩa kana ĩvindanĩ ya Vaulo ve andũ mavatisawa na kĩw’ũ kwondũ wa andũ maminie kũkw’a. Kwa ngelekany’o, Mbivilia ya The Bible in Kikamba, 1974, yaĩtye: “Ethĩwa akw’ũ maithayũũkw’a nongi, mavatisawa kwondũ wa akw’ũ nũndũ wa kĩ?”

Ĩndĩ o na ũu wĩ o vo, ekai tũsũanĩe maũndũ mawetetwe nĩ asomi elĩ ma Mbivilia ĩũlũ wa ũndũ ũsu. Ũmwe nĩ Dr. Gregory Lockwood, ũla waisye kana vaiĩ vandũ Mbivilianĩ kana mavukunĩ ma tene vonanĩtye ve mũndũ waavatiswa kwondũ wa mũndũ ũngĩ wakwie. O ta ũu, Vulovesa Gordon D. Fee aandĩkie: “Vaiĩ vandũ Mbivilianĩ kana mavukunĩ ma tene vonanĩtye kana vaaĩsa kwĩthĩwa na ũvatiso ta ũsu.” Aĩtye kana vaiĩ vandũ ũndũ ũsu ũwetetwe Ũtianĩonĩ Mweũ, na vaiĩ kĩndũ kĩkwonany’a kana nĩweekawa nĩ Aklĩsto ma mbee, kana nĩ makanisa ala mambĩĩiw’e ĩtina wa atũmwa kũkw’a.

Yesũ eeaĩe aatĩĩi make ũũ: “Endai ĩndĩ mũkatw’ĩkĩthye andũ ma mbaĩ syonthe amanyĩw’a, na kũmavatisa . . . , na mũimamanyĩsya kũkwata maũndũ onthe ala namwĩaĩe.” (Mt. 28:​19, 20) Kwoou mũndũ atanamba kũtw’ĩka mũmanyĩw’a mũvatise, nĩwaaĩle kwĩmanyĩsya ĩũlũ wa Yeova na Mwana wake, kũmaĩkĩĩa, na aimew’a. Vai mũndũ mũkw’ũ waĩ atonya kwĩka ũu e mbũanĩ, kana Mũklĩsto ũngĩ wĩ thayũ akeka ũu kwondũ wake.​—Mũta. 9:​5, 10; Yoa. 4:1; 1 Ako. 1:​14-​16.

Kwoou, ndeto sya Vaulo syoonanasya ata?

Akolintho amwe maasya kana akw’ũ maikathayũũkw’a. (1 Ako. 15:12) Ĩndĩ Vaulo nĩwamalũngile. Amaeleisye kana ‘kĩla mũthenya eethĩawa mũisyonĩ wa kũawa.’ Ĩndĩ o na kũtw’ĩka nĩwakwatawa nĩ mĩisyo, nĩweesĩ ki kana, o ta Yesũ, ĩtina wa kũkw’a akathayũũkw’a e kyũmbe kya veva kĩ vinya.​—1 Ako. 15:​30-​32, 42-​44.

Aklĩsto asu ma Kolintho maaĩle kũelewa kana nũndũ mo nĩ etĩkĩw’a mauta, makakomanaa na mĩisyo kĩla mũthenya, na maikalea kũkw’a nĩ kana mathayũũkw’e. Kwoou yĩla ‘mavatisiwe nthĩnĩ wa Klĩsto Yesũ,’ meethĩiwe ‘mavatiswa nthĩnĩ wa kĩkw’ũ kyake.’ (Alo. 6:⁠3) Kĩu kyoonanasya kana o ta Yesũ, no nginya makomane na mĩisyo na maikw’a nĩ kana mathayũũkw’e na maithi ĩtunĩ.

Myaka mbee wa ĩlĩ ĩtina wa Yesũ kũvatiswa na kĩw’ũ, eeie atũmwa make elĩ atĩĩ: “Ũvatiso ũũ ngũvatiswa, mũkavatiswa.” (Mko. 10:​38, 39) Yesũ ndaneeneaa ũvatiso wa kĩw’ũ, ĩndĩ aneeneaa kũvatiswa ‘nthĩnĩ wa kĩkw’ũ kyake.’ Kwoou oonanasya kana kũendeea kwĩthĩwa e mũĩkĩĩku kwa Ngai nĩkwesaa kũtuma oawa. Nake Vaulo aandĩkie kana etĩkĩw’a mauta ‘makathĩna vamwe [na Yesũ] nĩ kana methĩwe matonya kũkumw’a vamwe nake.’ (Alo. 8:​16, 17; 2 Ako. 4:​17) Kwoou, yaĩ no nginya o namo makw’e nĩ kana mathayũũkw’e na maithi ĩtunĩ.

Kwoou, kwosana na maũndũ asu twaneenea, no twasye tũte na nzika kana ndeto sya Vaulo mũsoanĩ ũsu syaĩlĩte kũalyũlwa atĩĩ: “Ethĩwa ũu tiw’o vailye, matonya kwĩka ata andũ ala meũvatiswa nĩ kana methĩwe akw’ũ? Nĩkĩ mavatisawa nĩ kana methĩwe akw’ũ, ethĩwa ala akw’ũ maikathayũũkw’a nongi?”