KĨLUNGU KYA KWĨMANYĨSYA KYA 8
WATHI 130 Ekeaa Andũ Ala Angĩ
Ũndũ Ũtonya Kũekeaa Ala Angĩ, o ta Yeova
“O tondũ Yeova wamũekeie inywʼĩ na ngenda, o nenyu no nginya mwĩke oou.”—AKO. 3:13.
KĨLA KĨNEENEWE
Ĩsomo yĩĩ nĩyĩũneenea maũndũ tũtonya kwĩka tũekee mũndũ ũtũvĩtĩsye.
1-2. (a) Nĩ ĩndĩĩ mũno mũno tũtonya kwĩwʼa ve vinya kũekea mũndũ ũngĩ? (b) Denise oonanisye ata kana nĩwaekeete mũndũ ũngĩ?
WE NĨWĨWʼAA ve vinya kũekea angĩ? Aingĩ maitũ nĩtwĩwʼaa ũu, na mũno mũno yĩla mũndũ waweta kana weeka ũndũ watũũmĩsya vyũ. Ĩndĩ ve maũndũ tũtonya kwĩka tũkaeka kwĩwʼa tũũmĩĩte na tũiekea mũndũ ũsu. Kwa ngelekanyʼo, kwasũanĩa ngewa ya mwĩĩtu-a-asa wĩtawa Denise, a ũla waekeie kwa nzĩa nene mũno. Mwakanĩ wa 2017, Denise, mũũme wake, syana syoo itano, na mwanake waĩ mũnyanya woo nĩmathokeie Ovisi Mũnene wa Ngũsĩ sya Yeova ũla waĩ ũnavingũwa. Me nzĩanĩ menũkĩte, ve ndeleva ũngĩ waaisye nzĩa na akonga ngalĩ yoo. Denise atiiwe ate kwĩmanya. Yĩla wesie kũamũka, eethĩie kana akisitendi ĩsu nĩyatumĩte mũũme wake, Brian, akwʼa na syana syake ikaũmĩa mũno vyũ. Denise avindĩĩsya ũndũ ũsu aĩtye, “Neewie nakwa ngoo na natuanĩwa nĩ nthĩ.” Ĩtina, nĩwesie kũmanya kana ti aĩ ndeleva ũsu aĩ mũmile na ti aĩ avĩngĩĩsiwe nĩ simũ kana maũndũ angĩ. Na kwoou Denise nĩwavoyie Yeova amũtetheesye ethĩwe na mũuo nĩ kana ndakoveee ũthatu ngoonĩ.
2 Ndeleva ũla wamakongie nĩwakwatiwe na asikatĩwa ĩvĩtyo ya kũaa mũũme. Koti wamwĩthĩa na mavĩtyo, esaa kwĩkwʼa yela. Ĩndĩ mũnene ũmwe wa koti nĩwatavisye Denise kana ũkũsĩ ũla ũkumya kotinĩ nĩwʼo ũũtuma mũndũũme ũsu ekwʼa yela kana aema kwĩkwʼa. Denise aĩtye, “Neewie ta ve mũndũ wathasya ndii sya kĩtau kyakwa na eekĩa mũnyũ mwingĩ kĩtaunĩ kĩu, nũndũ nalasimĩkaa kũelesya kyonthe kĩla kyeekĩkie mũthenya ũsu waĩ mũthũku vyũ thayũnĩ wakwa.” Syumwa mbũthũ ĩtina wa kũtavwʼa ũu, Denise nĩwaendie kotinĩ eyũmbanĩtye kũmya ũkũsĩ wake mbee wa mũndũũme ũsu watumĩte mũsyĩ wake wĩthĩwa na woo wingĩvĩte ũu. We aisye ata? Nĩwakũlilye mũsili ũla weethukĩĩasya ĩkoani yĩu ewʼĩe tei mũndũũme ũsu. b Yĩla waminie kũneena, mũsili ũsu nĩwambĩĩie kũĩa. Aisye: “Nĩthĩĩtwe nĩ mũsili kwa ĩvinda ya myaka 25, ĩndĩ ndyaaĩsa kwĩwʼa ũndũ ta ũsu vaa kotinĩ. Ndyaaĩsa kwĩwʼa mũsyĩ wa ala mavĩtĩwʼe mayĩtĩsya ũekeo ũla ũsikatĩtwe. O na ndyaaĩsa kwĩwʼa maiweta ũndũ ũkwonanyʼa kana nĩmendete mũndũ ũsu na nĩmatwʼĩte kũmũekea.”
3. Nĩ kyaũ kyatumie Denise atwʼa kũekea mũndũũme ũsu?
3 Nĩ kyaũ kyatetheeisye Denise kũekea mũndũũme ũsu? Nĩwavindĩĩisye ũndũ Yeova ũtũekeaa. (Mika 7:18) Kũtũnga mũvea mwingĩ nũndũ wa kwona Yeova atũekeete, kũtũtetheeasya o naitũ twĩthĩwe na wendi wa kũekea angĩ.
4. Yeova endaa twĩke ata? (Aeveso 4:32)
4 Yeova endaa tũekee angĩ na ngenda o ũndũ we mwene ũtũekeaa na ngenda. (Soma Aeveso 4:32.) Endaa twĩkale twĩyũmbanĩtye kũekea ala matũũmĩsya. (Sav. 86:5; Luka 17:4) Ĩsomonĩ yĩĩ nĩtũũneenea maũndũ atatũ meũtũtetheesya twĩthĩawe twĩyũmbanĩtye kũekea ala angĩ kwa nzĩa nenange.
NDŨKAVŨTHĨĨSYE ŨNDŨ ŨKWĨWʼA
5. Kwosana na Nthimo 12:18, tũtonya kwĩwʼa ata yĩla mũndũ ũngĩ watũvĩtĩsya?
5 No tũũmĩwʼe mũno nĩ kĩla mũndũ waweta kana weeka, na mũno mũno ethĩwa nĩ mũndũ twĩ ndũũ vyũ kana nĩ mũndũ wa mũsyĩ. (Sav. 55:12-14) Mavinda amwe, woo ũla tũkwĩwʼa no ũelekanwʼe na kũtonywa na kavyũ. (Soma Nthimo 12:18.) No tũtate kũolanga ũito wa kĩla tũneekiwe kana tũkavũthĩĩsya ũndũ tũkwĩwʼa tũũmĩĩte mũno wĩana. Ĩndĩ kwĩka ũu no ta ũndũ ũmwe na kũtonywa na kavyũ na kaitiwa vau kĩtaunĩ. O ta ũu, tũyĩsa kwĩkwatya maũndũ mathi nesa ethĩwa twĩĩka kũvũthĩĩsya ũndũ tũkwĩwʼa.
6. Tũtonya kwĩka ata yĩla mũndũ watũvĩtĩsya?
6 Yĩla mũndũ watũvĩtĩsya, ũndũ wa mbee ũla tũtonya kwĩka nĩ kũthata. Mbivilia nĩyonanĩtye kana no tũthate. Ĩndĩ nĩtũkanĩtye tũikaendeee kwoveea ũthatu ngoonĩ. (Sav. 4:4; Aev. 4:26) Nĩkĩ tũtaĩlĩte kwĩka ũu? Nũndũ kaingĩ kĩla tũkwĩwʼa nĩkyo kĩtumaa twosa ĩtambya ĩna. Na ũthatu ndwĩsaa kumĩlya mosyao maseo. (Yak. 1:20) Lilikana ũndũ ũũ: No ũthate yĩla wavĩtĩwʼa, ĩndĩ nue mwene ũtonya kũtwʼa ethĩwa nũkũendeea kwoveea ũthatu ũsu ngoonĩ.
No ũthate yĩla wavĩtĩwʼa, ĩndĩ nue mwene ũtonya kũtwʼa ethĩwa nũkũendeea kwoveea ũthatu ũsu ngoonĩ
7. Tũtonya kwĩwʼa ata yĩla mũndũ ũngĩ watũvĩtĩsya?
7 Yĩla tũkwĩwʼa twĩkĩtwe ũndũ mũthũku vyũ, no tũũmĩe mũno. Kwa ngelekanyʼo, mwĩĩtu-a-asa wĩtawa Ann aĩtye: “Yĩla naĩ mũnini, Tata nĩwatiie Mami na atwaa mũthũkũmi ũla wandeaa. Mwa neewie ta inyie watia. Na yĩla masyaie syana, neewie ta syoosa mwanya wakwa. Neanie ndyĩwʼa nde wa vata.” Nake mwĩĩtu-a-asa wĩtawa Georgette nũeleetye ũndũ weewie yĩla mũũme weekie ũlaalai. Aĩtye: “Twaĩ ndũũ kuma twĩ anini. O na twakũnaa ũvainia ĩmwe. Mwa neewie nakwʼa ngoo vyũ.” Mũthya, nĩmathaisye mũtwaano woo. Ũngĩ nĩ mwĩĩtu-a-asa wĩtawa Naomi, ũla waĩtye: “Ndyaĩ naasũanĩa kana mũemewa no anũmĩsye. Kwoou yĩla wesie kũndavya kana nĩweeloelaa mavisa ma ũlaalai kĩmbithĩnĩ, neewie nĩ mũvũnyanĩe mũno.”
8. (a) Nĩ maũndũ ta meva maĩle kũtuma tũekea angĩ? (b) Tũtethekaa ata yĩla twaekea angĩ? (Sisya ĩsandũkũ “ Nata Ethĩwa ve Mũndũ Ũtwĩkĩte Ũndũ Mũthũku Vyũ?”)
8 Tũyĩsa kũsiĩĩa kĩla angĩ meũweta ĩũlũ witũ kana meũtwʼĩka, ĩndĩ no tũsiĩĩe kĩla tũkwĩka ĩtina wa ũu. Na kaingĩ ũndũ ũla mũseo vyũ tũtonya kwĩka nĩ kũekea. Nĩkĩ? Nũndũ nĩtũmwendete Yeova na endaa tũekee. Twaendeea kũthata na twaema kũekea, nĩvatonyeka tũkeka ũndũ wa ũtumanu na tũyĩyĩũmĩsya. (Nth. 14:17, 29, 30) Kwasũanĩa ngelekanyʼo ya mwĩĩtu-a-asa wĩtawa Christine. Aĩtye: “Yĩla ngwĩwʼa nũũmĩĩte mũno, ndikothaa kũtheka. O na nĩkothaa kũya malĩu ala matesa kwaka mwĩĩ wakwa. Eka ũu, ndikwataa too wĩanĩtye, na nonaa ve vinya kũsiĩĩa ũndũ ngwĩwʼa. Kĩu kĩtumaa ndakua mũemewa nesa, o vamwe na ala angĩ.”
9. Nĩkĩ tũtaĩle kwoveea ũthatu ngoonĩ?
9 O na ethĩwa mũndũ ũla ũtũvĩtĩsye ndakesa kũtwĩtya ũekeo, no tũtwʼe kana tũithatwʼa mũno nĩ ũndũ ũla ũnatwʼĩkie. Ũu ũtonyeka ata? Ũla Georgette twĩĩ tũnamũweta aĩtye: “Nĩvavĩtie ĩvinda, ĩndĩ mũthya nĩnaekie kũthatĩa mũndũũme ũsu wandwaĩte. Nũndũ wa ũu, nĩnakwatie mũuo mwingĩ.” Yĩla twaeka kwoveea ũthatu ngoonĩ, tũyĩtĩkĩlasya woo ũla tũkwĩwʼa ũtume tũkua ala angĩ naĩ. O na ĩngĩ, twĩthĩawa tweenenga mũthĩnzĩo, na ũu nĩ kwasya, nĩtũekaa kũtinda tũsũanĩĩe ũndũ ũsu na tũyĩthĩwa tũtonya kũtanĩa thayũ witũ ĩngĩ. (Nth. 11:17) Ĩndĩ waĩle kwĩka ata ethĩwa ndũkwĩwʼa wĩyũmbanĩtye kũekea?
KĨLA ŨTONYA KWĨKA ŨEKE KWĨWʼA ŨŨMĨĨTE
10. Nĩkĩ twaĩlĩte kũeka ĩvinda yĩvĩte nĩ kana tũeke kwĩwʼa tũũmĩĩte mũno? (O na ĩngĩ, sisya visa.)
10 Ũtonya kwĩka ata ũeke kwĩwʼa ũũmĩĩte mũno? Ũndũ ũmwe ũtonya kũũtetheesya nĩ kũeka ĩvinda yĩvĩte. Yĩla mũndũ waũmĩa mũno na akwata ũiiti, ethĩawa aĩle kũeka ĩvinda yĩvĩte nĩ kana avoe. O ta ũu, no tũkue ĩvinda tũyĩsa kũtwʼĩka nĩtweewʼa twĩyũmbanĩtye kũekea mũndũ vyũ kuma ngoonĩ.—Mũta. 3:3; 1 Vet. 1:22.
O tondũ mũndũ ũũmĩĩte wendaa kũsũvĩwa nesa na kũeka ĩvinda yĩvĩte nĩ kana avoe, ũu nowʼo vethĩawa vailye yĩla mũndũ watũũmĩsya (Sisya kalungu ka 10)
11. Mboya ĩtonya kũũtetheesya ata wĩthĩwe wĩyũmbanĩtye kũekea angĩ?
11 Mũvoye Yeova na ũimũkũlya aũtetheesye wĩthĩwe wĩyũmbanĩtye kũekea angĩ. c Ũla Ann twamũweta nũeleetye ũndũ mboya yamũtethisye. Aĩtye: “Nĩnamũkũlilye Yeova aekee kĩla ũmwe nthĩnĩ wa mũsyĩ witũ nũndũ wa maũndũ mate maseo ala twawetete kana tũkeka. Ĩtina wa ũu, nĩnaandĩkĩie Tata na kĩveti kyake valũa nĩmatavĩtye kana nĩnamaekeete.” Ann aĩtye kana kwĩka ũu kũyaĩ laisi. Ĩndĩ ongelete kwasya ũũ: “Nĩĩkwatya kũtata kũatĩĩa ngelekanyʼo ya Yeova ya kũekea angĩ nĩkũũtuma Tata na kĩveti kyake menda kwĩmanyĩsya maũndũ maingangĩ ĩũlũ wa Yeova.”
12. Nĩkĩ twaĩlĩte kũmwĩkwatya Yeova vandũ va kũĩkĩĩa kana kĩla tũkwĩwʼa nĩkyo kyaĩlĩte? (Nthimo 3:5, 6)
12 Mwĩkwatye Yeova vandũ va kũĩkĩĩa kana kĩla ũkwĩwʼa nĩkyo kyaĩlĩte. (Soma Nthimo 3:5, 6.) Mavinda onthe Yeova nĩwĩthĩawa esĩ kĩla kĩseo vyũ kwitũ. (Isa. 55:8, 9) Na ndesa kũtũkũlya twĩke kĩndũ kĩtonya kũtũũmĩsya. Kwoou yĩla watwĩkĩa vinya tũekeae angĩ, no twĩkale tũte na nzika kana kwĩka ũu nĩkũtũunaa. (Sav. 40:4; Isa. 48:17, 18) Kĩvathũkanyʼo na ũu, twaĩkĩĩa kana kĩla tũkwĩwʼa nĩkyo kyaĩlĩte, no tũeme kwĩsa kũekea ala angĩ. (Nth. 14:12; Yel. 17:9) Ũla Naomi tũmũwetie aĩtye: “Mbeenĩ, ndyoonaa naĩlĩte kũekea mũemewa nũndũ wa kwĩloela mavisa ma ũlaalai. Nakĩaa ndyona ta ũkũmbũmĩsya ĩngĩ kana ta ũkũlwa nĩ ũndũ wambũmĩĩtye mũno wĩana. Na neetavasya kana Yeova nũeleawa ũndũ ngwĩwʼa. Ĩndĩ nĩnambĩĩie kũmanya kana kwĩthĩwa Yeova aielewa ũndũ ngwĩwʼa ti kwonanyʼa kana nĩwĩtĩkĩlanaa nakwa. Nĩwĩthĩawa esĩ ũndũ ngwĩwʼa na nĩwĩsĩ no nĩkue ĩvinda ndyĩsa kũtwʼĩka nĩnaeka kũthata, ĩndĩ o na vailye ũu, nĩwendaa nĩekee.” d
ĨKĨA KĨTHITO WĨTHĨWE NA WONI MŨSEO
13. Kwosana na Alomi 12:18-21, twaĩlĩte kwĩka ata?
13 Yĩla twaekea mũndũ ũtũvĩtĩsye mũno, twaĩlĩte kwĩka maũndũ maingangĩ eka o kũtwʼa kana tũitinda tũneeneete kĩla kĩneekĩkie. Ethĩwa ũla ũnatũũmĩisye nĩ mwana-a-asa kana mwĩĩtu-a-asa witũ, kĩeleelo kitũ kyaĩlĩte kwĩthĩwa ne kũmantha mũuo. (Mt. 5:23, 24) Kwoou vandũ va kũmũthatĩa, twaĩlĩte kũmwĩwʼĩa tei na vandũ va kwoveea ũthatu ngoonĩ, twaĩlĩte kũmũekea. (Soma Alomi 12:18-21; 1 Vet. 3:9) Nĩ kyaũ kĩtonya kũtũtetheesya twĩke ũu?
14. Twaĩlĩte kwĩkĩa kĩthito twĩke ata, na nĩkĩ?
14 Twaĩlĩte kwĩkĩa kĩthito twonae ũla ũtũvĩtĩsye o ũndũ Yeova ũmwonaa. Yeova asiasya nguma nzeo sya andũ. (2 Mav. 16:9; Sav. 130:3) Kaingĩ, ethĩwa twĩmantha nguma nthũku sya mũndũ, nosyo twonaa, na ethĩwa twĩmantha nzeo, isu nosyo twonaa. Kwoou twasiasya nguma ila nzeo andũnĩ, tũkonaa ve laisi kũmaekea. Kwa ngelekanyʼo, mwana-a-asa wĩtawa Jarrod aĩtye, “Nonaa ve laisi kũekea mwana-a-asa yĩla nasianĩsya ũndũ mũthũku ũla ũmbĩkĩte na maũndũ maingĩ ala nendete ĩũlũ wake.”
15. Nĩkĩ ũtonya kwĩthĩwa wĩ ũndũ mũseo kũtavya mũndũ kana nũmũekeete?
15 Ũndũ ũngĩ wa vata ũtonya kwĩka nĩ kũtavya mũndũ ũla ũkũvĩtĩsye kana nũmũekeete. Nĩkĩ? Kwoona ũndũ ũla Naomi tũmũwetie waĩtye: “Mũemewa angũlilye, ‘Nĩwandekea?’ Yĩla naathamisye kanywʼa wakwa nĩmũtavye, ‘Nĩnakũekea,’ neewie naitwa nĩ wasya. Nĩnamanyie kana kwa wʼo, ndyamũekeete kuma ngoonĩ. Ĩtina wa ĩvinda, nĩnavotie kũmũtavya ndeto [ĩsu ĩmwe, ĩndĩ yĩ] vinya mũno, ‘Nĩnakũekea.’ Ndyaaĩkĩĩa ũndũ kĩu kyatumie mũemewa ewʼa ausya nginya akelemya methoi, na ũndũ nyie mwene natiiwe ndyĩwʼa kavaa. Kuma ĩvinda yĩu, nĩnĩmanyĩĩtye kũmũĩkĩĩa ĩngĩ, na yu twĩ ndũũ vyũ ta tene.”
16. Weemanyĩsya kyaũ ĩũlũ wa kũekea angĩ?
16 Yeova endaa tũekeae ala angĩ. (Ako. 3:13) O na vailye ũu, no twĩwʼe ve vinya kwĩka ũu. Ĩndĩ no tũvote kwĩka ũu twaema kũvũthĩĩsya ũndũ tũkwĩwʼa na tweekĩa kĩthito tũeke kwĩwʼa tũũmĩĩte. Ĩtina wa ũu, no twĩkĩe kĩthito twĩthĩwe na woni mũseo.—Sisya ĩsandũkũ “ Maũndũ Atatũ Tũtonya Kwĩka Tũekee Angĩ.”
SŨANĨA ŨNDŨ ŨTETHEKAA WAEKEA ANGĨ
17. Nĩkĩ twaĩlĩte kũekea angĩ?
17 Twĩ na itumi mbingĩ sya kũekea angĩ. Kwasũanĩa imwe. Mbee, twĩthĩawa tũatĩĩe ngelekanyʼo ya Ĩthe witũ wĩ tei, Yeova, na nĩtũmũtanĩthasya. (Luka 6:36) Kelĩ, twĩthĩawa tũyonanyʼa kana nĩtũũmũtũngĩa mũvea nũndũ wa kwĩthĩwa atũekeete. (Mt. 6:12) Na katatũ, nĩtũtanĩaa ũima wa mwĩĩ na ũnyanya witũ na ala angĩ nũendeeaa kũlũlũmĩĩla.
18-19. Vatonya kũthi ata yĩla twaekea ala angĩ?
18 Yĩla twaekea ala angĩ, no tũkwate moathimo tũteĩtaĩĩe. Kwa ngelekanyʼo, kwoona ũndũ vaendie ĩtina wa ũla Denise tũmũwetie mwambĩĩonĩ kũekea ũla mũndũũme wamakongie na ngalĩ. Atanamba kũmũekea, ndeesĩ kana avangĩte kwĩyũaa atwʼĩĩwa kyovo. Ĩndĩ mũndũũme ũsu atanie mũno yĩla Denise wamũekeie nginya ambĩĩa kwĩmanyĩsya Mbivilia na Ngũsĩ sya Yeova.
19 No twĩwʼe kũekea mũndũ ũngĩ ne ũndũ ũla wĩ vinya vyũ tũtonya kwĩka thayũnĩ, ĩndĩ no kũtũtethye mũno vyũ. (Mt. 5:7) Kwoou, ekai twĩkae kyonthe kĩla tũtonya tũekeae angĩ, o ta Yeova.
WATHI 125 ‘Nĩ Atanu Ala me Tei!’
a Masyĩtwa amwe nĩ mavĩndũe.
b Ũndũnĩ ta ũsu, no nginya kĩla Mũklĩsto etwʼĩĩe mwene ĩtambya yĩla ũkwosa.
c Sisya nthĩnĩ wa jw.org/kam vitio sya mbathi ite ĩvukunĩ ya mbathi syĩ na kyongo, “Ekeaa Kuma Ngoonĩ,” na “Ndũũ Yitũ Ndĩkathele.”
d O na kau kwĩloela mavisa ma ũlaalai nĩ naĩ na nĩkũũmĩasya, kĩu kĩinengete Mũklĩsto ũla ũvĩtĩwʼe mwanya wa kũthasya mũtwaano.
