1-2. Nĩ kyaũ kĩkĩkaa kaingĩ yĩla andũ meũvatiswa, na twĩneenea kyaũ?

 WE WAASYAĨĨSYA kĩkundi kya ala mekwenda kũvatiswa? Yĩla meũsũngĩa ala makũlyo elĩ makũlawʼa matanamba kũvatiswa, mawasya moo nĩmakũĩkĩĩthasya kana mai na nzika na kĩla makilyĩ kwĩka. Andũ moo ma mũsyĩ na anyanya methĩawa me atanu mũno. Yĩla mookĩlwʼa kuma kĩwʼũnĩ, mothyũ moo methĩawa makenete nĩ ũtanu, namo ala me vau ũtee nĩmakũnangaa moko me atanu. Andũ ngili mbingĩ kĩla kyumwa nĩmeyumasya mamũthũkũme Yeova Ngai na maivatiswa. Meeka ũu, methĩawa matwʼĩka Ngũsĩ syake.

² Nata naku? Ethĩwa nũsũanĩĩte kũvatiswa, wĩ mũndũ wa mwanya mũno nthĩnĩ wa nthĩ ĩno nthũku, nũndũ ‘nũmũmanthaa Ngai.’ (Sav. 14:1, 2) Ĩsomo yĩĩ yĩseũvĩtwʼe kwondũ waku, wĩthĩwe wĩ wa mũika kana wĩ mũkũũ. Ĩndĩ o na ala tũminĩte kũvatiswa, twĩenda kũendeea kũlũmanyʼa na ũtwi witũ wa kũmũthũkũma Yeova tene na tene. Kwoou ekai tũneenee maũndũ atatũ katĩ wa maingĩ ala matumaa tũmũthũkũma Yeova.

3. Nĩkĩ athũkũmi ma Yeova mendete ũla wʼo na ũlũngalu? (Savuli 119:128, 163)

³ Yeova eeaĩe andũ make ‘mende wʼo.’ (Nzek. 8:19) Nake Yesũ athuthisye aatĩĩi make mamanthe ũlũngalu. (Mt. 5:6) Kĩu kĩonanyʼa kana kĩla ũmwe aĩlĩte kwĩthĩwa na wendi mwingĩ wa kwĩka kĩla kyaĩle, kĩseo, na kĩtheu methonĩ ma Ngai. We nĩwendete ũla wʼo na ũlũngalu? Tũi na nzika na ũndũ ũsu. Nũmenete ũvũngũ na maũndũ onthe mathũku na mavuku. (Soma Savuli 119:128, 163.) Mũndũ ũkenganaa ethĩawa  aatĩĩe ngelekanyʼo ya Satani, ũla nĩwe mũnene wa nthĩ ĩno. (Yoa. 8:44; 12:31) Kĩeleelo kĩmwe kya Satani nĩ kwanangĩa Yeova Ngai ĩsyĩtwa yake ĩtheu. Ethĩĩtwe ainyaĩĩkya ũvũngũ kuma yĩla wambĩĩisye ũlei mũũndanĩ wa Eteni. Avangie Yeova nĩ Mũsumbĩ ũmanthaa kwĩyĩuna mwene, mũkengani, na ũimaa andũ maũndũ maseo. (Mwa. 3:1, 4, 5) Ũvũngũ ũsu Satani waneenie ũtumĩte andũ masũanĩa maũndũ mathũku ĩũlũ wa Yeova nginya ũmũnthĩ. Yĩla andũ matwʼa kũema ‘kwenda wʼo,’ Satani atumaa meka mĩthemba yonthe ya maũndũ mate malũngalu na mavuku.—Alo. 1:25-31.

4. Yeova aĩkĩĩthĩtye ata kana we nĩwe “Ngai wa wʼo,” kana ũtesa kũneena ũvũngũ? (O na ĩngĩ, sisya visa.)

⁴ Yeova nĩwe “Ngai wa wʼo,” kana kwa ndeto ingĩ, ndesa kũneena ũvũngũ, na nĩwĩthĩawa eyũmbanĩtye kũmanyĩsya ala mamwendete ũla wʼo. (Sav. 31:5) Eeka ũu ethĩawa aimatetheesya maikaendeee kwawʼa nĩ ũvũngũ wa Satani. O na ĩngĩ, nũmanyĩasya athũkũmi make kũneenaa ũla wʼo na kũatĩĩaa ũlũngalu. Kĩu kĩtumaa menenga ndaĩa na methĩwa na mũuo wa ngoo. (Nth. 13:5, 6) Nũndũ nĩwĩmanyĩĩtye Mbivilia, we nĩwĩyoneete kĩu? Nĩwĩmanyĩĩtye kana myolooto ya Yeova nĩyo mĩseo vyũ kwa andũ onthe, o na kwaku mwene. (Sav. 77:13) Na kwoou wĩ na mea ma kwĩka maũndũ ala Ngai wonaa me malũngalu. (Mt. 6:33) Nũkwenda kũtetea ũla wʼo, na kũĩkĩĩthya kana kĩla Satani wawetie ĩũlũ wa Ngai witũ, Yeova, ti kya wʼo. Ũtonya kwĩka ũu ata?

5. Ũtonya kwonanyʼa ata kana nũlũmanĩtye na ũla wʼo na ũlũngalu?

⁵ Maũndũ ala ũũtwʼa kwĩka thayũnĩ no methĩwe maiweta ũũ ĩũlũ waku: “Nĩnĩleanĩte na ũvũngũ wa Satani, na nĩnĩlũmanĩtye na ũla wʼo vyũ. Nĩenda kũtongoewʼa nĩ Yeova, na nĩenda kwĩka kĩla kyaĩlĩte methonĩ make.” Ũtonya kwĩka ũu ata? Nĩ kwa kũmwatha Yeova mboyanĩ kana nĩweeyumya ũmũthũkũmae tene na tene, na ĩndĩ ũyonanyʼa ũu kwa kũvatiswa. Kwenda ũla wʼo na ũlũngalu no kũtume ũtwʼa kũvatiswa.

6. Ĩandĩko ya Savuli 45:4 yĩũnengete itumi syĩva sya kũmwenda Yesũ Klĩsto?

⁶ Nĩkĩ ũmwendete Yesũ Klĩsto? Kwoona itumi imwe nzeo syĩ Savuli 45:4. (Soma.) Yesũ nũtũmanyĩasya vata wa ũla wʼo, wĩnyivyo, na ũlũngalu. Ethĩwa nĩwendete ũla wʼo  na ũlũngalu, ti ũsengyʼo kwona ũmwendete Yesũ Klĩsto. Kwasũanĩa ũndũ Yesũ wateteie ũla wʼo na ũlũngalu e na ũkũmbaũ. (Yoa. 18:37) Ĩndĩ we atũmanyĩasya ata vata wa kwĩthĩwa na wĩnyivyo?

7. Nĩ kyaũ kĩũkwendeesya wasũanĩa wĩnyivyo wa Yesũ?

⁷ Yesũ atũmanyĩasya vata wa kwĩthĩwa na wĩnyivyo kwĩsĩla ngelekanyʼo yake mwene. Kwa ngelekanyʼo, amũkumasya Ĩthe wake, vandũ va kwĩkumya mwene. (Mko. 10:17, 18; Yoa. 5:19) Kũmanya kana Yesũ e wĩnyivyo kwĩtuma wĩwʼa ata? Tyo kũũtuma ũmwenda Mwana wa Ngai na wenda kũmũatĩĩa? Vate nzika. Ĩndĩ nĩkĩ Yesũ wĩ wĩnyivyo? Nũndũ nũmwendete Ĩthe wake na nũatĩĩaa ngelekanyʼo yake ya kwĩthĩwa na wĩnyivyo. (Sav. 18:35; Aevl. 1:3) We tyo wĩwʼaa ũyenda kũmũthengeea Yesũ nũndũ onanasya nguma ta sya Yeova nesa vyũ?

8. Nĩkĩ tũmwendete Yesũ ta we Mũsumbĩ witũ?

⁸ Nĩtũmwendete Yesũ ta we Mũsumbĩ witũ nũndũ nĩwe Mũtongoi ũla waĩle vyũ. Yeova nĩwe wamanyĩisye Mwana wake na amũnyuva atwʼĩke Mũsumbĩ. (Isa. 50:4, 5) O na ĩngĩ, kwavindĩĩsya wendo mwingĩ ũla Yesũ watwonisye. (Yoa. 13:1) Nũndũ Yesũ nĩwe Mũsumbĩ waku, nĩwaĩle kũmwenda. Aisye kana etaa ala mamwendete na ngoo yonthe anyanyae, na kana monanasya ũndũ mamwendete mũno wĩana kwa kũkwata mĩao yake. (Yoa. 14:15; 15:14, 15) Mwa nĩ ndaĩa nene ta kĩ kwĩthĩwa wĩ mũnyanya wa Mwana wa Yeova!

9. Ũvatiso wa Aklĩsto ũvwʼanene ata na wa Klĩsto?

⁹ Mwĩao ũmwe Yesũ ũnengete aatĩĩi make nĩ wa kũvatiswa. (Mt. 28:19, 20) Na nĩwatũtiĩe ngelekanyʼo. Ũvatiso wa Yesũ wĩ kĩvathũkanyʼo na wa aatĩĩi make maũndũnĩ amwe. (Sisya ĩsandũkũ “ Ũndũ Ũvatiso wa Yesũ Ũvathũkene na wa Aatĩĩi Make.”) Ĩndĩ nũvwʼanene maũndũnĩ angĩ. Yĩla Yesũ wavatisiwe, oonanisye kana nĩweeyumya eke kwenda kwa Ĩthe wake. (Aevl. 10:7) O ta ũu, yĩla aatĩĩi ma Klĩsto mavatiswa, methĩawa moonanyʼa ũtheinĩ kana nĩmeyumĩtye mamũthũkũme Yeova Ngai. Yu ũndũ ũla wĩthĩawa wĩ wa vata thayũnĩ woo nĩ kwĩka kwenda kwa Ngai, ĩndĩ ti kwenda kwoo ene. Meeka ũu, methĩawa maatĩĩe ngelekanyʼo ya Vwana woo.

10. Nĩ maũndũ meva matumaa ũmwenda Yesũ, na wendo ũsu waĩlĩte kũtuma wĩka ata?

¹⁰ Nũĩkĩĩe kana Yesũ nĩwe Mwana wa Yeova e ũmwe, na nĩwe Mũsumbĩ ũla Ngai ũnyuvĩte atũtongoesye. Nĩwĩsĩ kana we e wĩnyivyo, na aatĩĩaa ngelekanyʼo ya Ĩthe wake nesa vyũ. Nĩwĩmanyĩĩtye kana nĩwaĩthisye andũ maĩ na nzaa, akiakisya ala matũlĩkĩte ngoo, na avosya ala awau. (Mt. 14:14-21) Nĩwonete ũndũ ũtongoeasya kĩkundi kyake ũmũnthĩ. (Mt. 23:10) Na nĩwĩsĩ nũkeanĩsya maũndũ maingangĩ ĩvinda yũkĩte e Mũsumbĩ wa Ũsumbĩ wa Ngai. Ĩndĩ ũtonya kwonanyʼa ata kana nũmwendete? Nĩ kwa kũatĩĩa ngelekanyʼo yake. (Yoa. 14:21) Na ũndũ ũmwe ũtonya kwĩka wonanyʼe nũatĩĩe ngelekanyʼo yake nĩ kwĩyumya ũmũthũkũme Yeova na ũivatiswa.

11. Ũtonya kwasya ũndũ ũla wa vata vyũ waĩlĩte kũtuma ũvatiswa nĩ wĩva?

¹¹ Ũndũ ũla wa vata vyũ waĩlĩte kũtuma ũvatiswa nĩ wĩva? Yesũ nĩwawetie mwĩao ũla mũnene mĩaonĩ ya Ngai, yĩla waisye: “No nginya ũmwende Yeova Ngai waku na ngoo yaku yonthe, na thayũ waku wʼonthe, na kĩlĩko kyaku kyonthe, na vinya waku wʼonthe.” (Mko. 12:30) We nũmwendete Ngai mũno wĩana ũu?

12. Nĩkĩ ũmwendete Yeova? (O na ĩngĩ, sisya visa.)

 ¹² Ve maũndũ maingĩ matumaa ũmwenda Yeova. Kwa ngelekanyʼo, nũeleetwe kana nĩwe “wĩ na mbuluti ya thayũ” na nĩwe Mũnengani wa “kĩla mũthĩnzĩo mũseo na mwĩanĩu.” (Sav. 36:9; Yak. 1:17) Maũndũ onthe maseo ala ũtanĩaa maumaa kwa Ngai witũ mũlau na ũtwendete.

13. Nĩkĩ wovosyo nĩ mũthĩnzĩo wa mwanya vyũ?

¹³ Wovosyo nĩ mũthĩnzĩo wa mwanya vyũ Yeova ũtũnengete. Nĩkĩ tũkwasya ũu? Kwasũanĩa ngwatanĩo nzeo ĩla Yeova na Mwana wake methĩawa nayo. Yesũ aisye: ‘Asa nũmbendete.’ O na ongelile kwasya: “Nĩnĩmwendete Asa.” (Yoa. 10:17; 14:31) Ngwatanĩo yoo yaendeeie kũlũlũmĩĩla o ũndũ maendeeie kwĩthĩwa vamwe myaka mbilioni mbingĩ. (Nth. 8:22, 23, 30) Na yu kwasũanĩa ũndũ Ngai ũtonya kwĩthĩwa aũmĩie mũno wĩana yĩla weetĩkĩlilye Mwana wake athĩne na aikwʼa. Yeova nĩwendete andũ onthe mũno vyũ, na nĩkyo kĩtumi waumisye Mwana wake mwendwa na ngenda ta nthembo nĩ kana we, na ala angĩ, mũkwate mwanya wa kwĩkala tene na tene. (Yoa. 3:16; Aka. 2:20) Vai ũndũ ũngĩ mũnene ta ũsu ũtumaa tũmwenda Ngai.

14. Nĩ ũndũ wĩva wa vata vyũ ũtonya kũtwʼa thayũnĩ?

¹⁴ O ũndũ waendeea kwĩmanyĩsya ĩũlũ wa Yeova, nowʼo ũendeeaa kũmwenda mũnango.  Kwa wʼo, wĩenda kũmũthengeea mũnango yu tũĩ, na ĩvindanĩ yũkĩte. Na no wĩke ũu. Nũkũthangaaĩtye ũtanĩthye ngoo yake. (Nth. 23:15, 16) No wĩke ũu kwĩsĩla ndeto syaku na meko maku. Na mwĩkalĩle waku no wonanyʼe ũndũ ũmwendete Yeova mũno wĩana. (1 Yoa. 5:3) Kwĩthĩwa na mwĩkalĩle ũũmwendeesya Yeova nĩwʼo ũndũ ũla wa vata vyũ ũtonya kũtwʼa thayũnĩ.

15. Ũtonya kwonanyʼa ata kana nũmwendete Yeova?

¹⁵ Ũtonya kwonanyʼa ata kana nũmwendete Yeova? Mbee, nĩ kwa kumya mboya ya mwanya ũmwathĩte Ngai ũla wa wʼo weka kana weeyumya ũmũthũkũme. (Sav. 40:8) Ĩtina wa ũu, nĩwaĩle kwonanyʼa ũu ũtheinĩ kwa kũvatiswa. O tondũ twonie mwambĩĩonĩ wa ĩsomo yĩĩ, ũvatiso waku nĩ ĩtambya ya kũtanĩthya na ya mwanya vyũ thayũnĩ waku. Yĩla wavatiswa, wambĩĩaa kwĩkala thayũ ũngĩ mweũ kwondũ wa Yeova, ĩndĩ ti kwondũ waku. (Alo. 14:8; 1 Vet. 4:1, 2) Ũsu no woneke ta ũtwi mũnene waĩle kwĩka, na kwa wʼo, nĩ mũnene. Ĩndĩ kwĩka ũu kũũvingũĩaa myanya mingĩ ya kwĩkala thayũ ũla mũseo vyũ. Ata?

16. Kwosana na Savuli 41:12, Yeova aathimaa ata ala meyumasya mamũthũkũme?

¹⁶ Vai ũngĩ mũlau ta Yeova. O na wĩthĩwe wamũnenga kyaũ, mavinda onthe akaũnengae mbingĩ vyũ. (Mko. 10:29, 30) Akatumaa wĩkala wĩ mũtanu vyũ na wĩ mwĩanĩe, o na oyu wĩ nthĩnĩ wa nthĩ ĩno nthũku. Na ũsu no mwambĩĩo. Kyalo kĩla wambĩĩsya ĩtina wa kũvatiswa kĩyaĩlĩte kũthela. No ũendeee kũmũthũkũma Ĩthe waku, ũla ũmwendete, tene na tene. Wendo ũla wĩ vo katĩ waku na Ĩthe waku wĩendeea kwongelekeela. Na o take, ũkeethĩwa ũtonya kwĩkala tene na tene.—Soma Savuli 41:12.

17. Nĩ kyaũ ũtonya kũmũnenga Yeova ũte nakyo?

¹⁷ Yĩla woosa ĩtambya ya kwĩyumya ũmũthũkũme Yeova na wavatiswa, wĩthĩawa wakwata mwanya wa kũmũnenga Ĩthe waku kĩndũ kya vata vyũ. Nĩwe ũtumĩte ũtanĩa maũndũ maingĩ maseo na ma kwendeesya. Naku no ũnenge Mwene ĩtu na nthĩ kĩndũ  ũte nakyo. No ũmũthũkũme na ngoo ya kwenda, wĩ mũĩkĩĩku. (Yovu 1:8; 41:11; Nth. 27:11) Na kwa wʼo, ve nzĩa ĩngĩ nzeango ũtonya kũtũmĩa thayũ waku eka ĩsu? Vate nzika, kũmwenda Yeova nĩwʼo ũndũ ũla wa vata vyũ ũtonya kũtuma ũvatiswa.

18. Ũtonya kwĩkũlya makũlyo meva?

¹⁸ Ĩndĩ yu ũtonya kũsũngĩa ata ĩkũlyo yĩĩ: We nĩwĩyũmbanĩtye kũvatiswa? No uwe mwene ũtonya kũsũngĩa. Ĩndĩ no ũtetheke weekũlya-ĩ, ‘Neteele kyaũ?’ (Meko 8:36) Lilikana ala maũndũ atatũ twaneenea. Mbee, nĩwendete ũla wʼo na ũlũngalu. Kwoou ĩkũlye-ĩ, ‘Nyie nĩngwenda kwona mũthenya ũla kĩla ũmwe ũkaneenaa ũla wʼo na ayĩkaa kĩla kyaĩlĩte?’ Kelĩ, nũmwendete Yesũ Klĩsto. Kwoou ĩkũlye-ĩ, ‘Nyie nĩngwenda Mwana wa Ngai ethĩwe Mũsumbĩ wakwa, na nĩngwenda kũatĩĩaa ngelekanyʼo yake?’ Na ũndũ wa katatũ na wa vata vyũ nĩ kana nũmwendete Yeova. Kwoou ĩkũlye-ĩ, ‘Nyie nĩngwenda kũtanĩthya ngoo ya Yeova kwa kũmũthũkũmaa ta we Ngai wakwa?’ Ethĩwa mosũngĩo ma makũlyo asu nĩ ĩĩ, nĩ kyaũ kĩũkũsiĩĩa kũvatiswa? Mwa ndũketeele.—Meko 16:33.

19. Nĩkĩ ũtaĩlĩte kũkĩa kũvatiswa? Nengane ngelekanyʼo. (Yoana 4:34)

¹⁹ Ethĩwa nũũkĩa kũvatiswa, kwasũanĩa ngelekanyʼo ĩmwe Yesũ watũmĩie. (Soma Yoana 4:34.) Vau Yesũ aelekanilye kwĩka kwenda kwa Ĩthe wake na lĩu. Nĩkĩ? Nũndũ lĩu wĩthĩawa wĩ wa vata thayũnĩ witũ. Yesũ nĩweesĩ kana kyonthe kĩla Yeova watũkũlya twĩke kĩthĩawa kĩ kĩseo kwitũ. Yeova ndendaa twĩke kĩndũ o na kĩmwe kĩtonya kũtũũmĩsya. Kwʼo nĩ kwenda kwake ũvatiswe? Ĩĩ. (Meko 2:38) Kwoou ĩkala ũte na nzika kana waatĩĩa mwĩao wa kũvatiswa nũũtetheka. Ethĩwa ndũkĩaa kũtanĩa lĩu ũla mũseo vyũ, nĩkĩ ũũkĩa kũvatiswa?

20. Twĩneenea kyaũ ĩsomonĩ yĩla yĩatĩĩe?

²⁰ Nĩkĩ amwe makũĩĩasya kũvatiswa? Aingĩ no masye, “Nyie ndyĩyũmbanĩtye.” Ũwʼo nĩ kana ũtwi wa kwĩyumya ũmũthũkũme Yeova na ũivatiswa nĩwʼo ũtwi ũla wa vata vyũ ũtonya kwĩka. Kwoou nĩwaĩlĩte kũsũanĩa nesa ũtanamba kũwĩka, na kĩu nĩkyendaa ĩvinda na kĩthito kingĩ. Ĩndĩ ethĩwa nũkwenda vyũ kũvatiswa kuma ngoonĩ, ũtonya kwĩka ata wĩyũmbanyʼe? Nĩtũũneenea ũsũngĩo wa ĩkũlyo yĩu ĩsomonĩ yĩla yĩatĩĩe.