1. Ũmũnthĩ Yeova endaa twĩke ata?

 ŨMŨNTHĨ, Ngai endaa ũvoo mũseo wa Ũsumbĩ ũtavanw’e nthĩ yonthe. (Mko. 13:10; 1 Tim. 2:3, 4) Wĩa ũsu nĩ wa Yeova, na nĩ ũndũ wa vata mũno kwona anyuvĩte Mwana wake mwendwa awũũngamĩe. Na nũndũ Yesũ nĩ mũsyaĩĩsya mũseo, no twĩkale tũte na nzika kana wĩa ũsu ũkeanĩw’a nesa vyũ o ũndũ Yeova wendaa, mũthya ũtanavika.—Mt. 24:14.

2. Twĩneenea kyaũ ĩsomonĩ yĩĩ?

² Ĩsomonĩ yĩĩ nĩtũkwona ũndũ Yesũ ũtũmĩaa “ngombo ndĩkĩĩku na mbũĩ” kũnenga aatĩĩi make lĩu wa kĩ-veva na kũmavanga nesa matethye wĩa wa kũtavany’a kwa nzĩa nene vyũ kwĩ ũndũ waatethw’a. (Mt. 24:45) O na nĩtũkwona maũndũ ala kĩla ũmwe witũ ũtonya kwĩka akwate mbau Yesũ na ngombo ĩsu ndĩkĩĩku.

3. Nĩ ũkũmũ wĩva Yesũ ũnengetwe?

³ Yesũ nĩwe ũũngamĩe wĩa wa kũtavany’a. Twĩsĩ ũu ata? Ĩvinda ĩkuvĩ atanamba kũsyoka ĩtunĩ, nĩwakomanĩie na aatĩĩi amwe make kĩĩmanĩ kĩmwe Kalilii. Ameie: “Nĩnĩnengetwe ũkũmũ w’onthe ĩtunĩ na kũũ nthĩ.” Ĩtina wa ũu ameie: “Endai ĩndĩ mũkatw’ĩkĩthye andũ ma mbaĩ syonthe amanyĩw’a.” (Mt. 28:18, 19) Kwoou ũkũmũ ũmwe Yesũ ũnengetwe nĩ wa kũtongoesya wĩa wa kũtavany’a.

4. Nĩkĩ tũte na nzika kana Yesũ nũendeee kũtongoesya wĩa wa kũtavany’a o na kũvika ũmũnthĩ?

⁴ Yesũ aisye kana wĩa wa kũtavany’a na kũtw’ĩkĩthya  andũ amanyĩw’a ũkatethw’a ‘mbaĩnĩ syonthe,’ na kana akeethĩawa vamwe na aatĩĩi make “mĩthenya yonthe nginya mũminũkĩlyo wa ĩvinda yĩĩ.” (Mt. 28:20) Ndeto isu sionany’a nesa kana o na kũvika ũmũnthĩ, no ũendeee kũtongoesya wĩa ũsu.

5. Tũtetheeasya ata kwĩanĩsya wathani ũla wĩ Savuli 110:3?

⁵ Yesũ ndaĩ na nzika kana mũminũkĩlyonĩ wa ĩvinda yĩĩ kũkeethĩwa na athũkũmi meanĩtye ma kũtethya wĩa ũsu. Nĩweesĩ kana ndeto ii syathaniwe nĩ mũandĩki wa Savuli ikeanĩa: “Andũ maku nĩmeĩthembaa na ngoo ya kwenda mũthenya wa vinya waku.” (Sav. 110:3) Ethĩwa nũtethasya wĩa wa kũtavany’a, wĩthĩawa ũikwata mbau Yesũ na ngombo ndĩkĩĩku na wĩthĩawa ũitetheesya kwĩanĩsya wathani ũsu. Wĩa ũsu no ũsongete na mbee, ĩndĩ wĩ o mawetu maw’o.

6. Thĩna ũmwe atavany’a ma Ũsumbĩ makomanaa naw’o nĩ wĩva?

⁶ Thĩna ũmwe tũkomanaa naw’o twĩ atavany’a ma Ũsumbĩ nĩ kũvĩngwa. Akaĩi ma mũĩkĩĩo na atongoi ma ndĩni na ma siasa nĩmatavĩtye aingĩ maũndũ ma ũvũngũ ĩũlũ wa wĩa witũ. Yĩla andũ maitũ ma mũsyĩ, anyanya maitũ, na ala tũthũkũmaa namo maĩkĩĩa ũvũngũ ũsu, no mambĩĩe kũtũthing’ĩĩsya tũeke kũmũthũkũma Yeova na kũtavany’a. Nthĩnĩ wa nthĩ imwe, ala matũvĩngaa nĩmatĩsasya ana-a-asa maitũ, makamavithũkĩa, makamakwata, o na makamekya yela. Maũndũ asu maitũseng’asya. Nĩkĩ? Nũndũ Yesũ athanie ũũ: “Mũkamenwa nĩ mbaĩ syonthe nũndũ wa ĩsyĩtwa yakwa.” (Mt. 24:9) O na ĩngĩ, kwona tũimenwa mũno wĩana ũu kwonanasya Yeova nĩwendeeaw’a nithyĩ. (Mt. 5:11, 12) Ndevili nĩwe ũtumaa tũvĩngwa. Ĩndĩ ndesa kũsindana na Yesũ! Nũndũ Yesũ e ngalĩ ĩ yitũ, ũvoo mũseo nũtavanĩtw’e kwa andũ ma mbaĩ syonthe.

7. Nĩ maũndũ meva meũkũĩkĩĩthya kana wathani ũla wĩ Ũvuany’o 14:6, 7 nũendeee kwĩanĩw’a?

⁷ Thĩna ũngĩ tũkomanaa naw’o yĩla tũũtavany’a nĩ kana andũ maneenaa ithyomo mbingĩ syĩ kĩvathũkany’o. Nthĩnĩ wa ũvuany’o ũla Yesũ wanengie mũtũmwa Yoana, oonanisye kana ĩvindanĩ yĩĩ yitũ ũvoo mũseo ndũkasiĩĩwa nĩ ivathũkany’o sya ithyomo. (Soma Ũvuany’o 14:6, 7.) Ũu ũtonyeka ata? Tũnengae andũ aingĩ ũndũ vatonyeka mwanya wa kwĩthukĩĩsya ũvoo wa Ũsumbĩ. Ũmũnthĩ, andũ ĩũlũ wa nthĩ no masome ũvoo ũneeneete Mbivilia nthĩnĩ wa jw.org, nũndũ vethĩawa na syĩndũ sya ithyomo mbee wa 1,000! Eka ũu, Nzama Ĩla Ĩtongoesye nĩnanenganie mwanya ĩvuku yĩla tũtũmĩaa mũno kũtw’ĩkĩthya andũ amanyĩw’a yĩtawa Tanĩa Thayũ Tene na Tene! yĩalyũlwe kwa ithyomo mbee wa 700! Ũndũ ũngĩ nĩ kana lĩu wa kĩ-veva no ũkwatĩkane kwĩsĩla vitio kwondũ wa ala matew’aa, na kwĩsĩla mavuku ma mũandĩko wa ala matonaa. Vate nzika, nĩtwĩyoneete mawathani ma Mbivilia maianĩw’a. Andũ “kuma ithyomonĩ syonthe sya i mbaĩ” nĩmemanyĩĩtye kũneena “kĩthyomo kĩtheu” kya ũw’o ũla wĩ Mbivilianĩ. (Nzek. 8:23; Nzev. 3:9) Maũndũ asu onthe meanĩĩtw’e ungu wa ũtongoi mũseo wa Yesũ Klĩsto.

8. Wĩa wa kũtavany’a ũtumĩte twĩanĩsya maũndũ meva?

⁸ Ũmũnthĩ, ũseũvyo wa Yeova wĩ na andũ mbee wa 8,000,000 nthĩnĩ wa nthĩ 240, na kĩla mwaka andũ ngili mbingĩ nĩmavatisawa! Ĩndĩ ũndũ ũla wa vata vyũ kwĩ ũtalo ũsu nĩ kana onthe ala mavatiswa nĩmethĩawa mekĩĩte kĩthito methĩwe na nguma sya Kĩklĩsto, kana kwa ndeto ingĩ,  mevw’ĩke “mwĩkalĩle mweũ.” (Ako. 3:8-10) Kwa ngelekany’o, aingĩ nĩmaekie kwĩthĩwa na mwĩkalĩle mũvuku, maekana na ũng’endu, kĩmena, na kũkumya nthĩ yoo. O na ĩngĩ, wathani ũla wĩ Isaia 2:4 nĩwĩanĩĩte nũndũ ‘mayĩmanyĩasya kaũ ĩngĩ.’ Na nũndũ nĩtwĩkĩĩte kĩthito twĩvw’ĩke mwĩkalĩle mweũ, nĩtũtetheesye aingĩ makoka ũseũvyonĩ wa Ngai na tũkonany’a kana nĩtũmũatĩĩe mũsyaĩĩsya witũ Klĩsto Yesũ. (Yoa. 13:35; 1 Vet. 2:12) Maũndũ asu mayĩkaa o kwĩyĩete. Yesũ nĩwe ũtũtetheeasya.

9. Kwosana na Mathayo 24:45-47, nĩ kyaũ kyathaniwe kĩkekĩka ĩvindanĩ ya mũminũkĩlyo?

⁹ Soma Mathayo 24:45-47. Yesũ athanie kana mĩthenyanĩ ya mũminũkĩlyo akanyuva “ngombo ndĩkĩĩku na mbũĩ” nĩ kana ĩnengae aatĩĩi make lĩu wa kĩ-veva. Kwoou ngombo ĩsu yaaĩlĩte kwĩthĩwa ĩithũkũma na kĩthito ĩvindanĩ yĩĩ yitũ. Na ũu now’o yĩthĩĩtwe ĩyĩka. Mũsyaĩĩsya witũ atũmĩaa kakundi kanini ka ana-a-asa etĩkĩw’a mauta kũnenga andũ ma Ngai na ala mekwendeew’a “lĩu [wa kĩ-veva] ĩvinda yĩla yaĩle.” Ĩndĩ ti atĩ aũme asu nĩmasumbĩkĩte mũĩkĩĩo wa Aklĩsto ala angĩ. (2 Ako. 1:24) Nĩmethĩawa mesĩ kana Yesũ Klĩsto nĩwe “mũtongoi na mwĩaĩi” wa andũ make.—Isa. 55:4.

10. Nĩ ĩvuku yĩva katĩ wa ala monanĩtw’e visanĩ yaũtetheeisye wambĩĩa kũmũthũkũma Yeova?

¹⁰ Kuma mwaka wa 1919, ngombo ndĩkĩĩku nĩyĩthĩĩtwe ĩiseũvya mavuku matetheesye ala mekwendeew’a kwĩsamĩa ya mbee ũw’o ũla wĩ Ndetonĩ ya Ngai. Mwakanĩ wa 1921, ngombo ĩsu nĩyaumĩthisye ĩvuku The Harp of God, nĩ kana yĩtetheesye ala mekwendeew’a kwĩmanyĩsya maũndũ ma mũsingi ala me Mbivilianĩ. Na o ũndũ maũndũ maendie maalyũkĩte, now’o mavuku  angĩ maumĩthiw’e. Nĩ ĩvuku yĩva yaũtetheeisye kũmũmanya Ĩthe witũ wa ĩtunĩ na kũmwenda? Watetheeiw’e nĩ “Let God Be True,” W’o Ũla Ũtongoasya kwa Thayũ Ũtathela, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Mbivilia Yo Ĩmanyĩasya Ata?, Mbivilia Ĩtũmanyĩasya Kyaũ?, kana nĩ ĩvuku Tanĩa Thayũ Tene na Tene!, yĩla yĩnaumie mĩtũkĩ? Mavuku asu onthe maseũviw’e nĩ kana matũtetheesye kũtw’ĩkĩthya andũ amanyĩw’a na maumĩthiw’e ĩvindanĩ yĩla yaĩle vyũ.

11. Nĩkĩ nĩ ũndũ wa vata ithyonthe tũkwate lĩu wa kĩ-veva?

¹¹ Ala mekwendeew’a ti mo me oka methĩawa na vata wa lĩu mũmũ wa kĩ-veva. Ithyonthe nĩtwaĩlĩte kũya lĩu ũsu. Mũtũmwa Vaulo aandĩkie: “Lĩu mũmũ nĩ wa andũ aima.” Ongelile kwasya kana yĩla twatũmĩa kĩla tũkwĩmanyĩsya Mbivilianĩ, twĩthĩawa tũtonya “kũvathũkany’a ũseo na ũthũku.” (Aevl. 5:14) Ti laisi kũlũmany’a na myolooto ya Yeova ĩvindanĩ yĩĩ yitũ nũndũ andũ aingĩ methĩawa na mĩkalĩle mĩthũku vyũ. Ĩndĩ Yesũ nũĩkĩĩthasya nĩtwakwata lĩu wĩ mũyo wa kĩ-veva nĩ kana mũĩkĩĩo witũ ũendeee kwĩthĩwa wĩ mũlũmu. Lĩu ũsu wĩthĩawa wumĩte Ndetonĩ ya Ngai mbeveee, Mbivilia. Na Yesũ atũmĩaa ngombo ndĩkĩĩku kũũseũvya na kũũnengane.

12. O ta Yesũ, twonanĩtye ata kana nĩtũnengete ĩsyĩtwa ya Ngai ndaĩa?

¹² O ta Yesũ, nĩtũnengete ĩsyĩtwa ya Ngai ndaĩa ĩla yaĩlĩte. (Yoa. 17:6, 26) Kwa ngelekany’o, mwakanĩ wa 1931 nĩtwambĩĩie kwĩtwa ĩsyĩtwa yĩ Maandĩkonĩ, nayo nĩ Ngũsĩ sya Yeova. Na nũndũ nĩtwatwie kwĩtanĩw’a na Ĩthe witũ wa ĩtunĩ, kĩu kĩonany’a kana nĩtwonaa ĩsyĩtwa yake yĩ ya vata. (Isa. 43:10-12) O na ĩngĩ, kuma Mwei wa 10  mwaka o ũsu, ĩsyĩtwa yĩu yĩthĩĩtwe yĩyumĩla ĩthangũnĩ ya mbee ya ĩkaseti yĩĩ. Eka ũu, Mbivilia ya New World Translation of the Holy Scriptures nĩtũngĩĩte ĩsyĩtwa ya Ngai kũla yaĩlĩte kwĩthĩwa yĩĩ Ndetonĩ yake. Kĩu kĩ kĩvathũkany’o vyũ na kĩla ndĩni ila syĩyĩtaa sya Kĩklĩsto syĩkaa, nũndũ nivetete ĩsyĩtwa ya Yeova Mbivilianĩ mbingĩ!

13. Nĩ kyaũ kĩkũĩkĩĩthasya kana Yesũ nũtũmĩaa ĩla “ngombo ndĩkĩĩku na mbũĩ” ũmũnthĩ? (Yoana 6:68)

¹³ Yesũ nũtũmĩĩte “ngombo ndĩkĩĩku na mbũĩ” ĩvindanĩ yĩĩ yitũ kũvanga ũseũvyo wa mwanya ĩũlũ wa nthĩ nĩ kana ũtwaĩĩsye ũthaithi wa w’o. We wonaa ata ũseũvyo ũsu? Nũtonya kwĩthĩwa wĩw’aa ta mũtũmwa Vetelo, ũla wamũtavisye Yesũ ũũ: “Mwĩaĩi, twĩthi kũla kwĩ ũũ? We wĩ na ndeto sya thayũ wa tene na tene.” (Yoa. 6:68) Ithyĩ twĩthĩwa va ũmũnthĩ ta keka tũyaamanya ũseũvyo wa Yeova? Klĩsto atũmĩaa ũseũvyo ũsu kũĩkĩĩthya kana nĩtwaĩthw’a nesa kĩ-veva. O na nĩtũmanyĩaw’a ũndũ tũtonya kwĩanĩsya ũtavany’a witũ nesa vyũ. Eka ũu, nĩtũtetheeaw’a kwĩvw’ĩka “mwĩkalĩle mweũ” nĩ kana tũmwendeesye Yeova.—Aev. 4:24.

14. Kwĩthĩwa ũseũvyonĩ wa Yeova ĩvindanĩ ya ũwau wa COVID-19 kũũtethetye ata?

¹⁴ Yesũ nũtũnengae myolooto yaĩlĩte ĩvindanĩ ya mathĩna. Nĩtwoonie myolooto ĩsu ĩitũtethya yĩla ũwau wa COVID-19 wambĩĩie. O na kau andũ aingĩ ĩũlũ wa nthĩ mayeesĩ nesa kĩla matonya kwĩka, Yesũ nĩwaĩkĩĩthisye kana nĩtwakwata myolooto yĩ ũtheinĩ ya kũtũsũvĩa. Nĩtweekĩiwe vinya twĩkĩae masiki yĩla twĩ andũnĩ na tũyĩsũvĩa tũikathengeanĩe na angĩ. Namo atumĩa nĩmalilikanilw’e vata wa kũeaa ngewa na  ala me kĩkundinĩ mavinda kwa mavinda, nĩ kana maĩkĩĩthye me na kyonthe kĩla kĩtonya kũmatetheesya mekale me aima kĩ-mwĩĩ na kĩ-veva. (Isa. 32:1, 2) O na ĩngĩ, nĩtwĩthĩĩtwe tũikwata myolooto myeũ na tũkekĩwa vinya nĩ livoti sya Nzama Ĩla Ĩtongoesye.

15. Twanengiwe myolooto yĩva ĩvindanĩ ya COVID-19 ĩkonetye kwĩka maũmbano na kũtavany’a, na ĩtũtethetye ata?

¹⁵ O na ĩngĩ, ĩvindanĩ ya ũwau ũsu nĩtwakwatie myolooto yĩ ũtheinĩ ĩtũtavĩtye ũndũ tũtonya kũtavany’a na kwĩka maũmbano ma kĩkundi. Na tũte kwananga saa, nĩtwambĩĩie kũtũmĩa Indaneti kwĩka maũmbano ma kĩkundi na kwĩthukĩĩsya maũmbano manene. Eka ũu, yu ũtavany’a no ta weethĩiwe wa kũandĩka valũa na kũkũna simũ. Ĩndĩ Yeova nũathimĩte kĩthito kitũ. Kwa ngelekany’o, ovisi mbingĩ sya ũvonge niwetete kana ũtalo wa atavany’a nĩwongelekete mũno. Kwongela ũu, aingĩ nĩmeyoneete maũndũ ma kwĩkĩa vinya ĩvindanĩ yĩĩ.—Sisya ĩsandũkũ “ Yeova Nũathimaa Ũtavany’a Witũ.”

16. Nĩ ũndũ wĩva tũte na nzika naw’o?

¹⁶ Ĩvindanĩ ya ũwau ũsu, amwe nĩmatonya kwĩthĩwa meew’aa ũseũvyo ta ũkumya tũmĩao twingĩ tũte na vata. Ĩndĩ kĩla ĩvinda nĩtweeyoneaa kana myolooto ĩla twanengwa nĩyo yaĩlĩte vyũ. (Mt. 11:19) Kũvindĩĩsya ũndũ Yesũ wĩthĩĩtwe aitongoesya andũ make nesa kũkatumaa twĩkala tũte na nzika kana o na kwathi ata ĩvinda yũkĩte, we na Ĩthe wake meendea kwĩthĩwa vamwe naitũ.—Soma Aevelania 13:5, 6.

17. Kũthũkũma ungu wa mũsyaĩĩsya witũ Yesũ kũtumaa wĩw’a ata?

¹⁷ Nĩtũtanaa mũno kũthũkũma twĩ ungu wa mũsyaĩĩsya witũ Yesũ! Twĩ ma ũseũvyo ũtaaanĩtw’e nĩ ivathũkany’o sya mbaĩ, nthĩ, kana ithyomo. Nĩtũĩthaw’a nesa kĩ-veva na nĩtũmanyĩĩtw’e nesa ũndũ tũtonya kũtavany’a. O na ĩngĩ, kĩla ũmwe witũ nũendeee kũtetheew’a kwĩvw’ĩka mwĩkalĩle mweũ. Na eka ũu, nĩtũendeee kwĩmanyĩsya kwenda ala angĩ. Vate nzika, twĩ na itumi mbingĩ sya kwĩkathĩĩa nthĩnĩ wa mũsyaĩĩsya witũ Yesũ!