Ĩsomonĩ yĩu nĩtweemanyĩisye kana ve ũndũ o ũmwe tu mũnene ũkonetye andũ na alaĩka, nawʼo nĩ kũthewʼa kwa ĩsyĩtwa ĩnene ya Yeova. Kalungu kamwe ka ũndũ ũsu mũnene nĩ kũtetewa kwa ũsumbĩ mũnene wa Yeova, kana kwa ndeto ingĩ, kwonanyʼa kana nzĩa yake ya kũsumbĩka nĩyo nzeo vyũ. O ta ũu, ũtwi wa mũndũ wa kũlũmanyʼa na Ngai kana kũlea kũlũmanyʼa nake no kalungu kangĩ ka ũndũ ũsu mũnene.

Nĩkĩ ĩndĩ yu tũũkindĩlĩĩla kana ũndũ ũla mũnene nĩ ĩsyĩtwa ya Yeova na kũthewʼa kwayo? Ekai twone itumi itatũ.

Mbee, Satani nĩwamwanangĩie Yeova ĩsyĩtwa mũũndanĩ wa Eteni. Ĩkũlyo yĩla Satani wamũkũlilye Eva yoonanisye kana Yeova ndaĩ mũlau na no ta wamanengete mĩao ĩkũmavinyĩĩa. Ĩtina wa ũu, Satani oonanisye Ngai nĩ mũkengani kwa kũtavya Eva ũndũ wĩ kĩvathũkanyʼo na ũla Yeova wamatavĩtye. Kwoou nĩwamwanangĩie Yeova ĩsyĩtwa. Kĩu kyatumie atwʼĩka “Ndevili,” na ũalyũlo wa ĩsyĩtwa yĩu nĩ “mũsukani.” (Yoa. 8:44) Nũndũ Eva nĩweetĩkĩlile ũvũngũ ũsu wa Satani, nĩwaekie kũmwĩwʼa Ngai na aleana na ũsumbĩ wake mũnene. (Mwa. 3:1-6) Na kũvika ũmũnthĩ, Satani nũendeeaa kũmwanangĩa Ngai ĩsyĩtwa nũndũ anyaĩĩkasya ũvũngũ ĩũlũ wake. Ala maĩkĩĩa ũvũngũ ũsu nĩ laisi mũno makalea kũmwĩwʼa Yeova. Kwoou andũ ma Yeova monaa kũmwanangĩa ĩsyĩtwa yake ĩtheu ne ũndũ welelũkĩtye vyũ ũsili wa katĩ. Kĩu nĩkyo kĩetete mathĩna na ũthũku wʼonthe ĩũlũ wa nthĩ.

Kelĩ, nĩ kana syũmbe syonthe itetheke, Yeova nũtwʼĩte kũtetea ĩsyĩtwa yake, kana kũyĩvetea ũthũku wʼonthe. Yeova onaa ũndũ ũsu newʼo wa vata vyũ. Nĩkyo kĩtumi waĩtye: “Ngavathanʼya [ngathesya] syĩtwa yakwa ĩnene.” (Esek. 36:23) O nake Yesũ nĩwoonanisye ũtheinĩ ũndũ ũla athũkũmi onthe aĩkĩĩku ma Yeova maĩle kwona wĩ wa vata vyũ mboyanĩ syoo, yĩla waisye: “Ĩsyĩtwa yaku yĩtaĩwe.” (Mt. 6:9) Eka ũu, Mbivilia nĩwetete ĩngĩ na ĩngĩ vata wa kũkumya ĩsyĩtwa ya Yeova. Kwoona ngelekanyʼo ii: “Mũnengei Yeova ndaĩa yaĩlĩte syĩtwa yake.” (1 Mav. 16:29; Sav. 96:8) “Ina ndaĩa ya syĩtwa yake.” (Sav. 66:2) “Ngataĩa syĩtwa yaku tene na tene.” (Sav. 86:12) Na ĩvinda yĩmwe Yeova waneenie kuma ĩtunĩ nĩ yĩla Yesũ waisye ũũ e ĩkalũnĩ yĩla yaĩ Yelusaleme: “Asa, yĩkumye ĩsyĩtwa yaku.” Nake Yeova asungĩie asya: “Nĩnĩyĩkumĩtye na ngayĩkumya ĩngĩ.”—Yoa. 12:28. a

Katatũ, mavinda onthe kĩeleelo kya Yeova kĩthĩawa kĩkonanĩtye na ĩsyĩtwa yake. Kwasũanĩa ũndũ ũũ: Nĩ kyaũ kĩkekĩka ĩtina wa yĩla ĩtatwa ya mũthya yĩkethĩwa mũthyanĩ wa Ũsumbĩ wa Myaka Ngili wa Klĩsto? Mo alaĩka na andũ makeewʼa ata ĩũlũ wa kũthewʼa kwayo? Nĩ kana tũsũngĩe  ĩkũlyo yĩu, ekai twone ala maũndũ elĩ makonanĩtye, namo nĩ wĩanĩu witũ na ũsumbĩ ũla mũnene vyũ. Mo ala makethĩwa manaĩkĩĩthya nĩ aĩkĩĩku makeethĩwa na vata wa kũendeea kũlũmanyʼa na wĩanĩu woo? Aiee. Makeethĩwa mavetewe naĩ na mavĩtĩte ĩtatwa yĩu. O na makeethĩwa makwatĩte thayũ wa tene na tene. Yo ĩvindanĩ yĩu andũ na alaĩka makeethĩwa na mũaanĩko ĩũlũ wa ũsumbĩ ũla mũnene vyũ? Aiee. Na kĩtumi nũndũ syũmbe syonthe ĩtunĩ na nthĩ ikeethĩwa iminĩte kwĩyĩĩkĩĩthya kana Yeova nĩwe waĩlĩte kũsumbĩka, na kana nzĩa yake ya kũsumbĩka nĩyo nzeo vyũ. Ĩndĩ yo-ĩ, ĩvindanĩ yĩu ĩsyĩtwa ya Yeova yĩkaendeea kwĩthĩwa neyo ũndũ ũla mũnene?

Kũvika vau, syũmbe syonthe ikeethĩwa syĩsĩ ũwʼo ĩũlũ wa Yeova, na ĩsyĩtwa yake yĩkeethĩwa yĩtheetwʼe vyũ. Ĩndĩ yĩkaendeea kwĩthĩwa neyo ũndũ ũla wa vata vyũ kwa alaĩka na andũ. Nĩkĩ? Nũndũ makeyonea Yeova aiendeea kwĩka maũndũ ma mwanya. Kwasũanĩa: Nũndũ Yesũ akamũtũngĩa Yeova ũsumbĩ wʼonthe, Ngai akeethĩwa “syĩndũ syonthe kwa onthe.” (1 Ako. 15:28) Ĩtina wa vau, andũ onthe ĩũlũ wa nthĩ makatanĩa “ũthasyo wa ũtheu mũtisu wa kwĩthĩwa syana sya Ngai.” (Alo. 8:21) Na Yeova akeanĩsya kĩeleelo kyake kya kũete andũ na alaĩka vamwe mamũthaithe me ta mũsyĩ ũmwe mũnene na wĩ ngwatanĩo.—Aev. 1:10.

Ĩtina wa maũndũ asu kwĩkĩka, syo syũmbe syonthe ĩtunĩ na kũũ nthĩ ikeewʼa ata? Kwa wʼo, ikeethĩwa na wendi mwingĩ wa kũendeea kũtaĩa ĩsyĩtwa ya Yeova. Mũandĩki wa Savuli, Ndaviti, aveveeiwe kũandĩka ũũ: “Nataĩwe Yeova Ngai, . . . na syĩtwa yake ĩtheu yĩtaĩwe tene na tene.” (Sav. 72:18, 19) Tũkaendeea kũkwata itumi sya kwĩka ũu kũvika tene na tene.

Ĩsyĩtwa ya Yeova yonanasya ũndũ we ũilye. Kwoou yĩla tweewʼa ĩsyĩtwa yĩu, tũsũanĩaa mũno mũno wendo wake. (1 Yoa. 4:8) Kĩla ĩvinda tũkalilikanaa wendo wa Yeova ũla watwonisye yĩla watũmbie, atũnenga nthembo ya wovosyo, na atũĩkĩĩthya kana asumbĩkaa kwa ũlũngalu. Ĩndĩ tũkaendeea kwĩyonea ũndũ Yeova ũtwendete tene na tene. Vate nzika, tũkeethĩawa na mea ma kũmũthengeea ta we Ĩthe witũ na kũtaĩa ĩsyĩtwa yake ya mwanya tene na tene.—Sav. 73:28.