Moseo Ala Tũkilyĩ Kwona Nthĩ Nzaũ!
Ngai oombie nthĩ ĩtũwe nĩ andũ alũngalu tene na tene. (Savuli 37:29) Oomba asyai maitũ ma mbee, Atamu na Eva, amaiie mũũndanĩ mwanake wa Eteni, na amanenga wĩa me na nzyawa syoo wa kũima nthĩ na kũmĩsũvĩa.—Mwambĩlĩlyo 1:28; 2:15.
Ũmũnthĩ, nthĩ ndĩilye ũndũ Ngai wendaa yĩkale. Ĩndĩ ndaavĩndũa mesilya make. Kwoou avangĩte kwĩka ata nĩ kana eanĩsye kĩeleelo kyake? O tondũ ilungu ila ingĩ syoonany’a, Ngai ndakananga ĩ nthĩ. Kĩla ũvangĩte kwĩka nĩ kwĩtĩkĩlya ala aĩkĩĩku matũe vo. Nthĩ ĩkeethĩwa ĩilye ata Ngai eanĩsya mawatho make?
Kũkeethĩwa na silikalĩ o ĩmwe nthĩ yonthe
O mĩtũkĩ, yĩla silikalĩ ya Ngai ĩkũsumbĩka nthĩ yonthe, andũ makekalaa me ngwatanĩo na makatanĩaa kũtethya wĩa mũseo. Yesũ Klĩsto nĩwe ũnyuvĩtwe nĩ Ngai esumbĩka nthĩ. Kĩvathũkany’o na asumbĩ aingĩ, Yesũ akeekaa maũndũ onthe e na kĩeleelo kya kũuna ala ũsumbĩkĩte. Akeethĩwa e Mũsumbĩ wĩ tei, mũlũngalu, wendete ala ũsumbĩkĩte, na ũtw’ĩte kũmeka nesa.—Isaia 11:4.
Andũ kĩla vandũ makeethĩwa na ngwatanĩo
Kũikethĩwa na ivathũkany’o sya nthĩ kana mbaĩ. Andũ onthe makeethĩwa kĩndũ kĩmwe. (Ũvuany’o 7:9, 10) Kĩla mũndũ ũtwĩe kw’o akamwenda Ngai na mũtũi wake, na andũ onthe makakwatana moko nĩ kana matetheanĩsye kwĩanĩsya kĩeleelo kya Ngai kya kũsũvĩa nthĩ ĩno ũmanengete.—Savuli 115:16.
Kũikethĩwa mĩisyo kana kwanangana
Yĩla Ũsumbĩ wa Ngai ũkasumbĩka nthĩ, Mũmbi witũ akaĩkĩĩthya kana kĩla vandũ nzeve ĩilye ũndũ yaĩlĩte kwĩthĩwa ĩilye. (Savuli 24:1, 2) Yĩla Yesũ waĩ kũũ nthĩ, nĩwatumie kĩuutani kĩnene kĩusya, na kĩu kĩtũtetheeasya kũmanya kana Ngai nũmũnengete ũtonyi wa kwĩka maũndũ manene mũno. (Maliko 4:39, 41) Kwoou yĩla ũkasumbĩka nthĩ, vai mũndũ ũkatelemaa ayona ta ve mũisyo ũtonya kumĩla, ta ithingitho sya nthĩ. O na ĩngĩ, kũikethĩwa na ũmaitha katĩ wa andũ na nyamũ, na andũ maikanangaa mawĩthyũlũlũko.—Osea 2:18.
Andũ makeethĩwa na ũima wa mwĩĩ na lĩu mwingĩ
Vai mũndũ ũkethĩwa na kathĩna o na kamwe ka mwĩĩ. Vai mũndũ ũkawaaa, ũkakũaa, kana kũkw’a. (Isaia 35:5, 6) O tondũ asyai maitũ ma mbee matanĩaa kwĩkala mũũndanĩ wa Eteni, now’o andũ makatanĩaa kwĩkala ĩũlũ wa nthĩ nũndũ ĩkeethĩwa yĩ ntheu na mbanake. O tondũ kwailye mũũndanĩ wa Eteni, nthĩ ĩkasyaaa lĩu kwa wingĩ na vai mũndũ o na ũmwe ũkanyivĩwa nĩ lĩu. (Mwambĩlĩlyo 2:9) Na o tondũ kwailye mbaĩnĩ ya Isilaeli, kĩla mũndũ ‘akaĩsaa lĩu wake na kũvũna.’—Alivai 26:4, 5.
Kũkeethĩwa na mũuo wa w’o
Silikalĩ ya Ngai yasumbĩka nthĩ, kũkeethĩwa na mũuo kĩla vandũ na kĩla ũmwe akakuaa ũla ũngĩ nesa vyũ. Kũikethĩwa na makaũ, vai mũndũ ũkatũmĩaa ũkũmũ wake naĩ, na tũikethĩwa na vata wa kũng’ang’ana twĩanĩsye mavata ala ma lasima. Mbivilia yathanĩte ũũ ĩũlũ wa andũ: “Makekalaa kĩla mũndũ ĩtina wa mũsavivũ wake na ĩtina wa mũkũyũ wake; na vati ũmwe ũkatuma makĩa.”—Mika 4:3, 4.
Kĩla mũndũ akeethĩwa na nyũmba nzeo na akatanĩaa wĩa wake
Andũ maikakĩaa kũvenwa mĩsyĩ yoo, na tũkakwataa mosyao maseo ma mawĩa onthe ala tũũtethya. O tondũ Mbivilia ĩwetete, ala makatũaa nthĩ nzaũ ya Ngai “matikathĩnĩa wĩa mana,” kana kwa ndeto ingĩ, maikathũkũmaa mana.—Isaia 65:21-23.
Andũ makeemanyĩsya maũndũ maingĩ vyũ maseo
Mbivilia yathanĩte ũũ: “Nthĩ ĩkausũw’a nĩ kũmũmanya Yeova.” (Isaia 11:9) Mũmbi wa andũ, Yeova, e ũĩ mwingĩ mũno ũte maela, na kwoou akamanyĩsya ala makethĩwa kw’o maũndũ maingĩ mũno. Eka ũu, makeemanyĩsya maũndũ maingĩ kwa kwĩloela syĩndũ nzeo ila wũmbĩte. Andũ maikatũmĩa ũmanyi ũsu kũseũvya mĩio ya kaũ kana kũũmĩsya angĩ. (Isaia 2:4) Vandũ va ũu, makaũtũmĩa kwĩmanyĩsya ũndũ matonya kwĩkalany’a nesa, na ũndũ matonya kũsũvĩa nthĩ.—Savuli 37:11.
Andũ makekala tene na tene
Ngai oombie nthĩ na ũtũĩka wĩ ĩũlũ mũno nĩ kana tũtanĩe kwĩkala vo kĩla mũthenya. Wendi wake nĩ andũ mekale ĩũlũ wa nthĩ tene na tene. (Savuli 37:29; Isaia 45:18) Nĩ kana eanĩsye kĩu, ‘akamelya kĩkw’ũ tene na tene.’ (Isaia 25:8) Mbivilia yathanĩte kana “kĩkw’ũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.” (Ũvuany’o 21:4) Ngai akanenga andũ onthe mwanya wa kwĩkala tene na tene, methĩwe nĩ ala ũkatangĩĩa ayananga nthĩ ĩno nthũku, kana nĩ ala ũkathayũũkya aete nthĩ ĩsu nzaũ.—Yoana 5:28, 29; Meko ma Atũmwa 24:15.
Yu tũũneena, andũ milioni mbingĩ nthĩ yonthe nĩmaendeee kwĩyũmbany’a nĩ kana mevota kũlika nthĩ ĩsu nzaũ yĩ vakuvĩ mũno. O na kau nĩ ene naĩ, nĩmatataa ũndũ matonya methĩwe na mwĩkalĩle ũla Ngai wendaa ala makekala nthĩ ĩsu nzaũ meĩthĩwa naw’o. Nĩ kyaũ kĩmatetheeasya? Nĩ kwĩmanyĩsya ĩũlũ wa Yeova Ngai, na ĩũlũ wa ũla wamũtũmie, nake nĩ Yesũ Klĩsto.—Yoana 17:3.
O naku ĩkĩa kĩthito ũmanye ũndũ ũtonya kũvonoka mũminũkĩlyo wa nthĩ ĩno na ũyĩkala ĩla nthĩ nzeo ĩkilyĩ kũka. No wĩtĩkĩlye ũmwe wa Ngũsĩ sya Yeova aũmanyĩsye Mbivilia vate ndĩvi, kana wĩmanyĩsye vate ndĩvi ũtũmĩĩte kĩlungu kĩthĩawa jw.org kĩtawa Online Bible Study Lessons.
No Wendeewʼe Nĩ Ii
MŨSYAĨĨSYA
Ũsumbĩ wa Ngai Ũkeanĩsya Maũndũ Meva?
Yesũ nĩweesĩ kana no Ũsumbĩ wa Ngai ũtonya kũmina mathĩna ala me ĩũlũ wa nthĩ. Nĩ maũndũ meva ala Ũsumbĩ ũsu wĩkĩte meũtũĩkĩĩthya ũu?
MŨSYAĨĨSYA
Ũsumbĩ wa Ngai nĩ Silikalĩ Ndĩkĩĩku
Maũndũ thanthatũ ala matũĩkĩĩthasya kana Ũsumbĩ wa Ngai ndũkethĩwa na ũlũsani
