1, 2. Naaũ matanaa ĩvinda ya ũvatiso?

ETHĨWA wĩthĩĩtwe wĩ mũthũkũmi wa Yeova kwa myaka mingĩ, nĩvatonyeka ũkethĩwa wĩw’ĩte maũvoo maingĩ ma ũvatiso nthĩnĩ wa maũmbano maitũ manene. Ĩndĩ, o na ethĩwa wĩthukĩĩsye maũvoo asu mavinda meana ata, nĩvatonyeka ũkethĩa kĩla ĩvinda nĩwĩw’aa weekĩwa vinya ĩla woona ala mekalĩte ivĩlanĩ sya mbee maũngama nĩ kana meyumye kwondũ wa ũvatiso. Ĩla mavatiswa, ala me ũmbanonĩ nĩmatanaa mũno na maikũnanga moko. Nĩvatonyeka ũkakelemya methoi woona andũ ta asu matw’a kwĩyumya methĩwe ngalĩko ya Yeova. Nĩtwĩw’aa mũyo mwingĩ mũno ĩvinda ta yĩu!

² O na vala isionĩ sitũ nĩtũtonya kwona movatiso o manini kwa mwaka, alaĩka monaa movatiso maingĩ mũno. Kwasũanĩa ‘ũtanu mwingĩ ũla wĩthĩawa ĩtunĩ’ ĩla moona andũ ngili mbingĩ kuma nthĩ yonthe mayongeleka kĩla kyumwa nthĩnĩ wa kĩkundi kya athaithi ma Yeova. (Luka 15:7, 10) Vai nzika kana alaĩka nĩmatanaa mũno kwona wongeleku ũsu!—Akai 2:7.

3. Nĩkĩ Satani wangangaa kũũ na kũũ “ta mũnyambũ ũkũluma,” na ethĩawa ayenda kwĩka ata?

³ O na vala alaĩka nĩmatanaw’a mũno nĩ movatiso asu, ve syũmbe ingĩ sya veva ithataa mũno syoona andũ maivatiswa. Nĩ ũndũ ũthatasya Satani na ndaimoni mũno  kwona andũ ngili mbingĩ maileana na maũndũ ma nthĩ ĩno nthũku. Mathataa nũndũ andũ asu methĩawa maileana na ndeto sya Satani ĩla weekathĩĩie ayasya kana vai mũndũ o nomwe ũmũthũkũmaa Yeova nũndũ nũmwendete kuma ngoonĩ, na kana vai ũmwe ũtonya kũendeea kwĩthĩwa e mũĩkĩĩku ĩla wakwatwa nĩ motato manene. (Soma Yovu 2:4, 5.) Kĩla ĩvinda mũndũ weeyumya kũmũthũkũma Yeova, ethĩawa oonany’a kana Satani nĩ mũkengani, na Satani ew’aa ta wakũnwa ĩkovi. Kwoou, Satani no ta wĩthĩawa aikũnwa makovi ngili mbingĩ mũno kĩla kyumwa, nũndũ andũ ala mavatisawa nĩ aingĩ mũno. Ti ũsengy’o kana “angangaa kũũ na kũũ ta mũnyambũ ũkũluma, aimantha mũndũ aye”! (1 Vetelo 5:8) “Mũnyambũ” ũsu wĩthĩawa ũyenda mũno kũtũya, kana kũtũmina kĩ-veva, nĩ kana ngwatanĩo yitũ na Ngai yanangĩke, kana ĩthele.—Savuli 7:1, 2; 2 Timotheo 3:12.

4, 5. (a) Nĩ maũndũ meva elĩ ma vata monanasya kana Yeova nũsiĩĩe ũtonyi wa Satani? (b) Aklĩsto ma w’o me na ũĩkĩĩthyo mwaũ?

 ⁴ O na kau twĩ na mũmaitha ũsu mũthũku mũno, vai kĩtumi kya kwĩthĩwa na wia mwingĩ. Nĩkĩ? Nũndũ Yeova nũsiĩĩe ũtonyi wa ‘mũnyambũ ũsu ũkũluma,’ na ve maũndũ elĩ ma vata mekũtũĩkĩĩthya ũu. Nĩ maũndũ meva asu? Ũndũ wa mbee nĩ wathani wa Yeova kana, “ĩkomano ĩnene” ya Aklĩsto ma w’o yĩkatangĩĩwa kuma “thĩnanĩ ũla mũnene.” (Ũvuan’yo 7:9, 14) Na nĩtwĩsĩ kana wathani wa Ngai ndũleaa kwĩanĩa. Kwoou, o na Satani no nginya ethĩwe esĩ kana ndatonya kwelelũkya andũ ma Ngai onthe.

⁵ Ũndũ wa kelĩ ũla ũkwonany’a kana Yeova nũsiĩĩe mũnyambũ ũsu no ũmanyĩke kwĩsĩla ũndũ mũna wa vata na wa w’o, ũla waneeniwe nĩ mwathani Asalia, ũmwe wa athũkũmi make ma tene aĩkĩĩku. Mwathani ũsu amwĩie Mũsumbĩ Asa ũũ: “Yeova e nenyu, yĩla mwĩ nake.” (2 Mavinda 15:2; soma 1 Akolintho 10:13.) Ngelekany’o mbingĩ Mbivilianĩ syĩonany’a kana ĩvinda ya tene, Satani ndaĩ atonya kũmina kĩ-veva mũthũkũmi o nomwe wa Ngai, ethĩwa mũthũkũmi ũsu e na ngwatanĩo ndũmu vamwe na Ngai. (Aevelania 11:4-40) Ũmũnthĩ, Mũklĩsto ũla wĩthĩawa na ngwatanĩo ndũmu na Ngai ethĩawa atonya kũmũsiĩĩa, o na kũmũsinda Ndevili. Ndeto ya Ngai ĩtũnengae ũĩkĩĩthyo ũũ: “Mũsiĩĩei [Ndevili], nake akamũkĩa.”—Yakovo 4:7.

6. Satani okitaa ata na Mũklĩsto ũmwe kwa ũmwe?

⁶ Nthĩnĩ wa kaũ witũ na Satani, we ndatonya kũtũkĩlya vinya twĩ kĩkundi, ĩndĩ no avalũkye mũndũ ũmwe kwa ũmwe ũla weethĩwa ate metho. Satani nĩwĩsĩ kana akatuma ngwatanĩo yitũ na Yeova yĩthĩwa ĩte na vinya, no atũmine kĩ-veva. Ekaa ũu ata? Ekaa ũu kwa kũtũkita ate na tei, na mavinda angĩ ĩmwe kwa ĩmwe, kana akatũmĩa nzĩa sya ũseleke. Ekai tũkunĩkĩle nzĩa isu Satani ũtũmĩaa mũno.

7. Nĩkĩ Satani wongeleele kĩthito nthĩnĩ wa kũmokita andũ ma Yeova?

 ⁷ Kũtũkita ate na tei. Mũtũmwa Yoana aĩtye: “Nthĩ yonthe ĩtwĩe nthĩnĩ wa ũla mũthũku.” (1 Yoana 5:19) Ndeto isu syĩ na ũtao kwa Aklĩsto onthe ma w’o. Ũmũnthĩ andũ onthe ala matamũkĩaa Ngai me ungu wa Satani, na kwoou yu elekelye kĩthito kyake na mosũanĩo make kwa andũ ala mamũvonokete, namo nĩ athaithi ma Yeova. (Mika 4:1; Yoana 15:19; Ũvuan’yo 12:12, 17) Satani e na ũthatu mwingĩ nũndũ nĩwĩsĩ e na kavinda kakũvĩ. Kwondũ wa ũu, nĩwongoleele mũno kĩthito kyake. Ũmũnthĩ ekavĩĩte vyũ kwananga ngwatanĩo yitũ na Ngai.

8. Mũtũmwa Vaulo eonany’a kyaũ ĩla ũkwasya kana twĩ na “kũkĩlan’ya vinya” na maveva mavuku?

⁸ Kũkĩlany’a vinya na maveva mavuku. Mũtũmwa Vaulo ameie Aklĩsto ala angĩ atĩĩ: ‘Twĩ na kũkĩlany’a vinya na nguthu sya maveva ma ũthũku ĩtunĩ.’ (Aeveso 6:12) Nĩkĩ Vaulo watũmĩie ndeto “kũkĩlan’ya vinya”? Nũndũ ndeto isu syonanasya kaũ wa andũ meũng’ang’ana makwatene. Kwoou, kwa kũtũmĩa ndeto isu, Vaulo oonanisye kana kĩla ũmwe nũkĩlanasya vinya na maveva mavuku. O na ethĩwa tũtwĩe nthĩ andũ aingĩ maĩkĩĩaa maveva mavuku kana matamaĩkĩĩaa, tũyaĩle kũlwa kana ĩla tweeyumisye kũmũthũkũma Yeova, nĩ ta twalikile kĩng’ang’anĩ kya kũkĩlany’a vinya. Kĩla Mũklĩsto nũlikaa kĩng’ang’anĩ kyu, mũno mũno amina kwĩyumya kũmũthũkũma Yeova. Nĩkyo kĩtumi Vaulo woonie ve vata wa kũneena na Aklĩsto ma Eveso mbee wa ĩvinda yĩmwe, aimekĩa vinya maũngame kwa ũlũmu!—Aeveso 6:11, 13, 14.

9. (a) Nĩkĩ Satani na ndaimoni syake matũmĩaa nzĩa sya “maũĩ” syĩ kĩvathũkany’o? (b) Nĩkĩ Satani ũtataa kwananga ilĩko sitũ, na tũtonya kwĩsiĩanĩa nake ata? (Sisya ĩsandũkũ ĩthangũnĩ ya 192-193.) (c) Nĩ nzĩa yĩva ya maũĩ ĩla yu tũũsisya?

⁹ Nzĩa sya ũseleke. Vaulo emekĩa vinya Aklĩsto maũngame kwa ũlũmu na kũlea vyũ “maũĩ” ma Satani. (Aeveso 6:11) Sisya wone kana Vaulo atũmĩĩte ndeto “maũĩ,” kwonany’a  wingĩ. Maveva mavuku maitũmĩaa nzĩa o ĩmwe, ĩndĩ matũmĩaa nzĩa mbingĩ sya maũĩ. Na ve kĩtumi kya kwĩka ũu. Kwa ngelekany’o, Aklĩsto amwe nĩmaũngamie kwa ũlũmu na masinda ĩtatwa ĩna, ĩndĩ maemwa nĩ kwĩka ũu makomana na ĩtatwa yĩngĩ yĩ kĩvathũkany’o. Kwoou, Ndevili na ndaimoni syake nĩmakunĩkĩlaa mũno mwĩkalĩle wa kĩla ũmwe witũ nĩ kana mamanye vala twĩ onzu vyũ. Na moona wonzu mũna wa kĩ-veva nthĩnĩ witũ, mayĩũtũmĩa. Ĩndĩ ũndũ wa kũtanĩthya nĩ kana, nĩtũtonya kũmanya nzĩa mbingĩ ila Ndevili ũtũmĩaa nũndũ Mbivilia nĩivuanĩtye. (2 Akolintho 2:11) Mwambĩlĩlyonĩ wa ĩvuku yĩĩ nĩtũneeneete nzĩa sya ũseleke ta wendi wa malĩ, itindo nthũku, na ũlaalai. Yu tũsisye nzĩa ĩngĩ ya maũĩ Satani ũtũmĩaa, nayo nĩ ũwe.

10. (a) Ũwe nĩ kyaũ? (b) Woni wa Yeova nĩ mwaũ ĩũlũ wa ũwe, naw’o waku nĩ wĩva?

¹⁰ Ĩla mũndũ weelikya maũndũnĩ ma ũwe kana makonetye ndaimoni, ethĩawa ambĩlĩlya ngwatanĩo na maveva mavuku. Kwaũsya, ũoi, kwĩkĩsya angĩ syama, na kũneena na akw’ũ, nĩ amwe ma meko ma ũwe. O tondũ twĩsĩ, Yeova ‘nũthataw’a’ nĩ ũwe. (Kũtũngĩlĩlwa Kwa Mĩao 18:10-12; Ũvuan’yo 21:8) Kwoou, nũndũ no nginya o naitũ ‘tũmene kĩla ũthũku,’ nĩ ũndũ ũtaĩle nongi kwenda kwĩthĩwa na ngwatanĩo na maveva mavuku. (Alomi 12:9) Kwĩthĩwa na ngwatanĩo ta ĩsu nĩ ũndũ mũthũku mũno ũla wonanasya kana tũi aĩkĩĩku kwa Ĩthe witũ wa ĩtunĩ, Yeova!

11. Satani akatuma tũlika maũndũnĩ ma ũwe, nĩkĩ ũsu wĩthĩwa wĩ ũsindi mũnene kwake? Nengane ngelekany’o.

¹¹ Ĩndĩ, Satani atataa ũndũ ũtonya nĩ kana alikye amwe maitũ maũndũnĩ ma ũwe nũndũ nĩwĩsĩ kana kwĩka ũu nĩ ũndũ mũthũku mũno, ũla wonanasya kana tũi aĩkĩĩku kwa Yeova. Kĩla ĩvinda Satani wamũtata Mũklĩsto alika  maũndũnĩ ma ũwe, ethĩawa akwata ũsindi mũnene. Nĩkĩ? Kwasũanĩa ngelekany’o ĩno: Mũsikalĩ akasesengwa atie na kũvũnyanĩa nguthu yake ya ita sya kaũ, na ailika nguthunĩ ĩngĩ ya ita sya amaitha, mũnene wa nguthu ĩsu ya amaitha no ew’e mũyo. O na mũnene ũsu no ekathĩĩe kwa kũmũũngamya mũsikalĩ ũsu mũvũnyanĩi, mbee wa nguthu ya ita syake e na kĩeleelo kya kũmũsonokya mũnene wa nguthu ĩla ĩngĩ ya ita. O ta ũu, Mũklĩsto akelikya maũndũnĩ ma ũwe, ethĩwa anyuva kwa ngenda kũmũtia Yeova na aitw’ĩka mũatĩĩi wa Satani. Kwasũanĩa ũndũ Satani ũtonya kũtanĩa kũtũmĩa mũndũ ũsu kwĩkathĩĩa ĩũlũ wa ũsindi wake! Yo ve ũmwe witũ wenda kũtuma Ndevili akwata ũsindi ta ũsu? Ai, aiee! Ithyĩ tũi avũnyanĩi.

12. Satani atũmĩaa nzĩa yĩva nĩ kana aalyũle mosũanĩo maitũ ĩũlũ wa ũwe?

¹² Ethĩwa tũkamena vyũ maũndũ ma ũwe, Satani ndakethĩwa atonya kũmatũmĩa kũtũvalũkya. Ĩndĩ nĩwĩsĩ kana no nginya avĩndũe mosũanĩo maitũ. Ata? Amanthaa nzĩa sya kũlingiisa ilĩko sya Aklĩsto nginya amwe makambĩĩa kwĩta “ũthũku ũseo, na ũseo ũthũku.” (Isaia 5:20) Nĩ kana eke ũu, Satani atũmĩaa nzĩa ũtũmĩĩte kwa ĩvinda ĩasa, nayo nĩ makũlyo ma kumĩlya nzika.

13. Satani atũmĩie ata makũlyo nĩ kana aumĩlye nzika?

¹³ Kwasisya ũndũ Satani watũmĩie nzĩa ĩsu ĩvinda ya tene. Ĩla waneenaa na Eva mũũndanĩ wa Eteni, Satani amũkũlilye atĩĩ: ‘Nĩ w’o, Ngai nĩwaisye, Mũtikaye ma mĩtĩ yonthe ya mũũndanĩ?’ O na mĩthenyanĩ ya Yovu, ĩla kwaĩ ũmbano wa alaĩka ĩtunĩ, Satani akũlilye atĩĩ: ‘Yovu amũkĩaa Ngai mana?’ O na ĩngĩ, mwambĩlĩlyonĩ wa ũthũkũmi wa Yesũ kũũ nthĩ, Satani amũtatie kwa kũmwĩa atĩĩ: ‘Ethĩwa nue mwana wa Ngai, ĩae kana mavia aa matw’ĩke kĩmũtũ.’ Kwa kũneena ndeto isu, Satani endaa kũvũthĩĩsya ndeto ii Yeova mwene waĩ ananeena syumwa ta thanthatũ  ila syaĩ inavĩta: ‘Ũũ nĩwe Mwana wakwa mwendwa, ũla nendeeaw’a nĩwe’!—Mwambĩlĩlyo 3:1; Yovu 1:9; Mathayo 3:17; 4:3.

14. (a) Satani atũmĩaa ata maũĩ make nĩ kana aumĩlye nzika ĩũlũ wa ũwe? (b) Yu twĩneenea maũndũ meva?

¹⁴ Ĩvindanĩ yĩĩ, Ndevili atũmĩaa nzĩa o ta ĩsu ya maũĩ nĩ kenda ekĩe andũ nzika maeke kwona kana ũwe nĩ mũthũku. Ũndũ wa kũmakya nĩ kana nũtumĩte athaithi amwe methĩwa na nzika, na nzika isu ikatuma maeka kũĩkĩĩa kana maũndũ onthe makonetye ũwe nĩ mathũku. (2 Akolintho 11:3) Tũtonya kũmatetheesya ata andũ ta asu maalyũle mosũanĩo moo? Tũtonya kwĩka ata nĩ kana maũĩ ma Satani maikalyũle mosũanĩo maitũ? Nĩ kana tũkwate ũsũngĩo wa makũlyo asu, ekai tũneenee ũndũ Satani ũtũmĩĩte ũwe kwa ũseleke nĩ kana avukye maũndũ ma kwĩtanĩthya na ma ũiiti.

15. (a) Andũ aingĩ nthĩnĩ wa nthĩ sya Ũlaya na America methĩawa na woni mwaũ ĩũlũ wa ũwe? (b) Nĩ kwa nzĩa yĩva woni wa Aklĩsto amwe ũalyũlĩtwe nĩ woni wa andũ ma nthĩ ĩũlũ wa ũwe?

¹⁵ Maũndũ ta kwĩkĩsya andũ syama, ũoi, na maũndũ angĩ makonetye ũwe mayosawa kwa ũito mũno nthĩ sya Ũlaya na America. Kwa ngelekany’o, nthĩnĩ wa sinema, mavuku, ivĩndĩ sya televiseni, na mathaũ ma kombiũta, maũndũ asu monekaa o ta maũndũ ma kũtanĩthya kana ma kwonany’a ũndũ mũndũ wũĩvĩte, na mayonekaa ta matonya kũete mũisyo. Sinema na mavuku ala methĩawa na maũndũ ma ũwe, nĩ syĩndũ syendetwe nĩ andũ aingĩ mũno. Vai nzika kana ndaimoni nitumĩte andũ amwe mambĩĩa kwona maũndũ ma ũwe ta matatonya kũete mũisyo. Mo Aklĩsto nĩmambĩĩte kwĩthĩwa na woni ũsu? Ĩĩ, woni wa amwe nũalyũkĩte. Ata? Kwasũanĩa ngelekany’o ĩno. Ĩtina wa kwĩloela sinema ĩkonetye ũwe, Mũklĩsto ũmwe aisye atĩĩ: “Nĩneekie o kũmĩloela, ĩndĩ ndĩneeĩka maũndũ  ala manoonanaw’a.” Nĩkĩ ũsu nĩ woni ũtonya kũete mũisyo?

16. Nĩkĩ nĩ ũndũ wa mũisyo kũnyuva kwĩtanĩthya na maũndũ makonetye ũwe?

¹⁶ Ve kĩvathũkany’o katĩ wa kwĩka maũndũ makonetye ũwe na kũmeloela. Ĩndĩ ũu ti kwasya kana kwĩloela maũndũ asu kũietae mũisyo. Nĩkĩ? Kwasũanĩa ũndũ ũũ: Ndeto ya Ngai yonanĩtye kana Satani na ndaimoni syake maitonya kũsoma ilĩko sitũ. * Kwoou, o tondũ twonie, maveva mavuku mamanyaa mesilya maitũ na wonzu wa kĩ-veva ũla twĩ naw’o kwa kũsisya meko maitũ, na maũndũ ala tũnyuvaa kwĩtanĩthya namo. Mũklĩsto ethĩawa aitetheesya ndaimoni imanye wonzu wake ĩla wambĩĩa kũtanĩa kwĩloela sinema kana kũsoma mavuku meũneena ĩũlũ wa andũ ala maneenaa na maveva, kwĩkĩsya andũ syama, na ĩũlũ wa ũndũ andũ makwatawa nĩ ndaimoni, na maũndũ angĩ ta asu! Syamanya wonzu ũsu, ndaimoni nitonya kũtata mũno kũũtũmĩa nĩ kana imũkĩlye vinya na kũmũvalũkya. O na andũ amwe ala mambĩĩie kwendeew’a nĩ ũwe nũndũ wa kwĩtanĩthya na maũndũ makonanĩtye na ũwe, nĩmesie kwĩlikya ũwenĩ.—Soma Akalatia 6:7.

17. Satani atonya kũtũmĩa nzĩa yĩva ya maũĩ amakenge ala awau?

¹⁷ Twaĩle kũmanya kana ti o wendi wa kwĩtanĩthya w’oka Satani ũtũmĩaa, ĩndĩ nũtũmĩaa wendi witũ wa kũkwata ũiiti. Ata? Mũklĩsto nũtonya kũtũlĩka ngoo ethĩwa ndeũvoa ũwau mũna ũtatĩte mũno kũũiitĩthya. (Maliko 5:25, 26) Satani na ndaimoni syake nĩmatonya kũkwata mwanya mũseo wa kũtũmĩa thĩna ũsu. Ndaimoni nitonya kũmũtata Mũklĩsto ũsu mũtũlĩku ngoo atw’e kũtũmĩa nzĩa sya ũiiti ĩkonanĩtye na “vinya wa ũwe.” (Isaia 1:13, NWT) Kwoou,  ndaimoni ikatũmĩa nzĩa ĩsu ya maũĩ na iituma Mũklĩsto amantha ũiiti wa mũthemba ta ũsu, ũndũ ũsu no wanange ngwatanĩo yake vamwe na Ngai. Kwa nzĩa yĩva?

18. Nĩ mĩthemba yĩva ya ũiiti ĩla Mũklĩsto ũtetĩkĩla, na nĩkĩ?

¹⁸ Yeova akanisye Aisilaeli ala matũmĩaa “vinya wa ũwe,” aimea atĩĩ: “Yĩla mwĩtambũũkya moko menyu, ngavitha metho makwa ndikamwone; ĩĩ, yĩla mwĩvoya mboya mbingĩ, ndikethukĩĩsya.” (Isaia 1:15) Nĩ w’o kana nĩtwendaa kwĩvathana na ũndũ o na wĩva ũla ũtonya kũtuma mboya sitũ itethukĩĩw’a na kũtuma Yeova aeka kũtũtetheesya. Nĩtwendaa kwĩka ũu mũno mũno ĩla twĩ awau. (Savuli 41:3) Kwoou, ethĩwa ve maũndũ mekwonany’a kana nzĩa ĩla ĩkũtũmĩwa kũthima kana kũiita ũwau nĩtonya kwĩthĩwa ĩkonanĩtye na ũwe, Mũklĩsto wa w’o nĩwaĩle kũmĩlea. * (Mathayo 6:13) Eeka ũu, akeethĩwa na mũĩkĩĩo kana Yeova akaendeea kũmũtetheesya.—Sisya ĩsandũkũ yĩ na kyongo, “W’o Ũndũ Ũũ Nũkonanĩtye na Ũwe?” ĩthangũnĩ ya 194.

19. (a) Ndevili akengete andũ aingĩ makethĩwa na woni mwaũ ĩũlũ wa vinya wake? (b) Aklĩsto ma w’o maĩle kwĩvathana na ngewa syĩva?

¹⁹ O na kau andũ ma nthĩ sya Ũlaya na America mayonaa Satani ta wĩ vinya ũtonya kũmalikya mũisyonĩ, woni  wa andũ ma nthĩ ingĩ wĩ kĩvathũkany’o. Nthĩnĩ wa nthĩ isu ingĩ, Ndevili nũkengete andũ aingĩ makona ta wĩ vinya mwingĩ mbee wa ũndũ we wĩany’a vinya. Amwe moo nĩ asumbĩke vyũ nĩ w’ĩa wa ndaimoni. Kwĩ ngewa mbingĩ mũno ĩũlũ wa ũndũ ndaimoni itonya kwĩka maũndũ ma kũsengy’a. Andũ ala mekũea ngewa isu masieaa matanĩte, na niseng’asya andũ mũno. Yo nĩtwaĩle kũnyaĩĩkya ngewa ta isu? Aiee, athũkũmi ma Ngai wa w’o mayĩkaa ũu nũndũ wa itumi ilĩ nene.

20. Nĩ kwa nzĩa yĩva mũndũ ũtonya kũnyaĩĩkya ũvũngũ wa Satani ate kũmanya?

²⁰ Kĩtumi kya mbee nĩ kana, ĩla mũndũ ũkũnyaĩĩkya ũvoo ĩũlũ wa maũndũ ma kũsengy’a ma ndaimoni, ethĩawa aimũtetheesya Satani wĩanĩ wake. Ata? Ndeto ya Ngai nĩyonanasya kana Satani no eke maũndũ ma kũsengy’a, ĩndĩ nĩsyokete ĩkonany’a kana ekaa ũu aitũmĩa “syama” na  “ũkengani.” (2 Athesalonika 2:9, 10) Nũndũ Satani nĩwe mũkengani ũla mũnene vyũ, nĩwĩsĩ ũndũ ũtonya kũalyũla ilĩko sya ala mendeeaw’a nĩ maũndũ ma ũwe, o na nĩwĩsĩ ũndũ ũtonya kũtuma maĩkĩĩa maũndũ mate ma w’o. Andũ ta asu nĩmatonya kwĩthĩwa maĩkĩĩte vyũ kana nĩmonete na makew’a maũndũ mana, na nĩmatonya kũea ngewa ĩũlũ wa maũndũ asu ta ma w’o. Ĩtina wa ĩvinda ĩna, ngewa isu nĩsyongeleelawa mautĩĩo o ũndũ iendeee na kũnyaĩĩkw’a. Mũklĩsto akanyaĩĩkya ngewa ta isu, ethĩwa aianĩsya kwenda kwa Ndevili, ũla nĩwe “ĩthe wa ũvũngũ.” O na ethĩwa ainyaĩĩkya ũvũngũ wa Satani.—Yoana 8:44; 2 Timotheo 2:16.

21. Twĩenda kũneenaa ĩũlũ maũndũ meva?

²¹ Kĩtumi kya kelĩ nĩ kana, o na ethĩwa ĩvinda ĩvĩtu Mũklĩsto nĩweelikanĩtye na maveva mavuku, ndaĩle kwĩthĩwa aimaeea athaithi ala angĩ ngewa ta isu. Nĩkĩ? Tũnengetwe ũtao ũũ: “Tũkĩmũsisya Yesũ, Mũtongoi Mũnene na Mwĩanĩsya wa mũĩkĩĩo witũ.” (Aevelania 12:2, NWT) Ĩĩ, twaĩle kũneenaa ĩũlũ wa Klĩsto, ĩndĩ ti Satani. Nĩ ũndũ wa vata kũmanya kana ĩla Yesũ waĩ kũũ nthĩ, we ndamaeeaa amanyĩw’a make ngewa ikonetye maveva mavuku, o na kau nĩweesĩ maũndũ maingĩ ĩũlũ wa ũtonyi wa Satani. Vandũ va ũu, Yesũ aneenaa ĩũlũ wa ũvoo wa Ũsumbĩ. Kwoou, kwa kũatĩĩa ngelekany’o ya Yesũ na atũmwa make, twĩenda kũneenaa ĩũlũ wa “maũndũ manene ma Ngai.”—Meko ma Atũmwa 2:11; Luka 8:1; Alomi 1:11, 12.

22. Tũtonya kwĩka ata nĩ kana kũendeee kwĩthĩwa “ũtanu ĩtunĩ”?

²² Vate nzika, Satani nũtũmĩaa maũĩ me kĩvathũkany’o, o vamwe na ũwe, nĩ kana anange ngwatanĩo yitũ na Yeova. Ĩndĩ, ĩla twamena ũthũku na twalũmany’a na ũla ũseo, twĩthĩawa twamũsiĩĩa Ndevili ndakese kũtuma tũlika maũndũnĩ o na meva makonetye ũwe. (Soma Aeveso 4:27.) Kwasũanĩa ‘ũtanu ũla wĩthĩawa ĩtunĩ’ twaendeea “kũsiĩĩa maũĩ ma [Ndevili]” nginya ĩla ũkavetangwa!—Luka 15:7; Aeveso 6:11.