Ĩla Yeova wakwatanĩthisye andũ ma mbee nthĩnĩ wa mũtwaano, nĩwamanengie asyai ũkũmũ wa kũtongoesya syana syoo. (Akolosai 3:20) Kwoou, asyai mwĩ na kĩanda kya kũmanyĩsya syana syenyu imwende Yeova, na iyĩthĩwa andũ aima matonya kwĩkwatwʼa. (2 Timotheo 1:5; 3:15) O na ĩngĩ, nĩmwaĩle kũmanya kĩla kĩ ngoonĩ sya syana syenyu. Vate nzika, nĩ ũndũ wa vata mũno kwiĩa syana syaku ngelekanyʼo nzeo. Nĩ kana ũmanyĩsye syana syaku Ndeto ya Yeova nesa, no nginya wambe kũmĩkĩa ngoonĩ yaku.—Savuli 40:8.

ŨNDŨ MBIVILIA YAĨTYE: ‘Ĩthĩwa mwĩwi wa mĩtũkĩ, na kũlea kũneena mĩtũkĩ.’ (Yakovo 1:19) Ethĩwa nũkwenda syana syaku ineene naku iteũkũkĩa, no nginya syone kana nĩwĩyũmbanĩtye kũsyĩthukĩĩsya ĩla syĩkwenda kũneena naku. O na ĩngĩ, ĩkalanasya nasyo na mũuo, nĩ kana iikewʼe vinya kwĩyĩelesya mbee waku. (Yakovo 3:18) Syana syamanya kana nũtonya kwĩthĩwa wĩ mũkalĩ kana kũsyumya makosa, nitonya kwĩwʼa vinya kũkũelesya maũndũ ala me ngoonĩ. Ĩthĩwa na wũmĩĩsyo na mavinda onthe ũyĩĩkĩĩthya syana syaku kana nũsyendete.—Mathayo 3:17; 1 Akolintho 8:1.

ŨNDŨ ŨTONYA KWĨKA:

• Ĩla syana ikwenda kũneena naku, mantha ĩvinda ũsyĩthukĩĩsye

• Eaa ngewa na syana syaku, na ndũkekae ũu o ĩla syĩ na thĩna

ŨNDŨ MBIVILIA YAĨTYE: “Kĩla mũndũ wĩ kĩlĩko nũtethasya wĩa na ũmanyi.” (Nthimo 13:16) Mũsyai nĩwaĩle kũelewa kana ethĩwa nũkwenda kũmanya kĩla kĩ ngoonĩ ya kana kake, ndaĩle o kwĩthukĩĩsya ndeto ila kana keũneena syoka. Ti ũsengyʼo syana ikongeleela mautĩĩo maũndũ ala iũneena nĩ kana moneke me maito, kana kũneena syĩndũ itaumĩte ngoonĩ. Mbivilia yaĩtye kana “ũla ũsũngĩaa atanamba kwĩwʼa, kwake nĩ ũtumanu.” (Nthimo 18:13) Kwoou, ndũkethĩwe mũndũ wa kũthata mĩtũkĩ.—Nthimo 19:11.

ŨNDŨ ŨTONYA KWĨKA:

• Ĩthĩwa wĩyũmbanĩtye kwĩthukĩĩsya kana kaku ũteũkatilĩĩla na ũteũthilĩka, o na ethĩwa keasya ata

• Lilikana ũndũ weewʼaa ĩla weanaa tako, na ũililikana maũndũ ala woonaa me ma vata

ŨNDŨ MBIVILIA YAĨTYE: “Mwana wakwa, ĩwʼa ũmanyĩsyo wa ĩthe waku, na ndũkaatie mĩao ya inyia waku.” (Nthimo 1:8) Kwosana na ĩandĩko yĩu, Yeova nũmanengete asyai me elĩ ũkũmũ ĩũlũ wa syana syoo. Kwoou, no nginya maimanyĩsye syana syĩthĩwe iimanenga ndaĩa na kũmewʼa. (Aeveso 6:1-3) Syana nitonya kũmanya ethĩwa asyai masyo ‘mailũmanĩtwʼe vamwe kĩsũanĩonĩ kĩmwe.’ (1 Akolintho 1:10) Ethĩwa asyai nĩmaemanwa, mayaĩle kũeka syana syoo imanye, nũndũ ũu nũtonya kũtuma syambĩĩa kũmavũthya.

ŨNDŨ MŨTONYA KWĨKA:

• Neenai na mũyĩtĩkĩlana ũndũ mũtonya kũkanyʼa syana syenyu

• Ethĩwa mwĩ na woni wĩ kĩvathũkanyʼo ĩũlũ wa kũiea, kĩla ũmwe nĩ atate kũelewa woni wa ũla ũngĩ

ŨNDŨ MBIVILIA YAĨTYE: “Manyĩsya kana nzĩa ĩla kaĩle kũendaa nayo, o na akũa ndakamĩtia.” (Nthimo 22:6) Nĩwaĩle kwĩkĩa kĩthito kũmanyĩsya syana syaku ethĩwa nũkwenda itetheke kumana na maũndũ ala ũũimanyĩsya. Kwoou ĩthĩwa na mũvango mũseo wa kũmanyĩsya syana, na ũu nĩ vamwe na kũinenga ũkanyʼo. (Savuli 127:4; Nthimo 29:17) Kũkanyʼa syana ti o kũikũna kwʼoka ĩla syatũla mĩao ĩla ũsyumĩsye, ĩndĩ nĩwaĩle kũitetheesya ielewe kĩla kĩtumĩte ũsyumĩsya mĩao ĩsu. (Nthimo 28:7) O na ĩngĩ, nĩwaĩle kũimanyĩsya kwenda Ndeto ya Yeova, na iyĩthĩwa itonya kũmanya myolooto ĩla ĩkwatĩkanaa vo. (Savuli 1:2) Syeeka ũu ikeethĩwa itonya kũmanyĩsya wasya wasyo wa ngoo.—Aevelania 5:14.

ŨNDŨ ŨTONYA KWĨKA:

• Tetheesya syana syaku imanye kana Ngai nũtonya kwĩthĩwa mũnyanyae wasyo, o na no imwĩkwatye

• Itetheesye imanye kana nthĩnĩ wa Indaneti na isese sya Indaneti sya kũea ngewa, ve maũndũ matonya kwananga mwĩkalĩle wasyo. Imanyĩsye ũndũ itonya kwĩsiĩanĩa na andũ ala matonya kũitũmĩa nthĩnĩ wa maũndũ makonetye ũlaalai