Ngewa ya 30: Kakuthu Kakanĩte Mwaki
MOSE aendie kũasa nginya kĩĩma kya Olevu akamanthĩe malondu nyeki. Na e vau oona kakuthu kakanĩte mwaki, ĩndĩ kayavĩsaa!
Mose asũanĩa: ‘Ũũ nĩ ũndũ wa ũsengy’a. Nĩngũthengeea nĩ kana nĩkone nesanga.’ Na yĩla wathengeeie, wasya wauma kakuthunĩ kau ũyasya: ‘Ndũkathengee vaa kũthonoka vu. Ũmya iatũ syaku, nũndũ vau ũũngeme nĩ vandũ vatheu.’ Ũsu nĩ Ngai waneenaa kwa nzĩa ya mũlaĩka, kwoou Mose avitha ũthyũ wake.
Ngai ĩndĩ amwĩa: ‘Nĩnonete thĩna wa andũ makwa ala me Misili. Kwoou Nyie nĩngũmavonokya, na nue ngũtũma ũthi ũkamatongoesye na kũmaumya nthĩ ya Misili.’ Yeova aĩ amatwae andũ make nthĩ mbanake ya Kanaani.
Ĩndĩ Mose asya: ‘Nyie nĩ ũũ. Ndonya kwĩka ũu ata? Sisya, yĩla nĩendea ana ma Isilaeli. Namo maingũlya, “Ũtũmĩtwe nũũ?” Ngamea ata?’
Nake Ngai asũngĩa, ‘Ũũ nĩw’o wĩmatavya: “YEOVA Ngai wa Avalaamu, na Ngai wa Isaka, na Ngai wa Yakovo, nũndũmĩte kũla mũĩ.”’ Na Yeova ongela kwasya: ‘Yĩu nĩyo syĩtwa yakwa kũvika tene na tene.’
Ĩndĩ Mose asũngĩa na amwĩa, ‘Kũkeethĩwa ata ethĩwa makalea kũndĩkĩĩa yĩla nĩmatavya kana nũndũmĩte?’
Nake Ngai amũkũlya, ‘Kĩla kĩ kw’okonĩ kwaku nĩ kyaũ?’
Na Mose asũngĩa: ‘Nĩ ndata.’
Ngai amwĩa, ‘Mĩkye nthĩ.’ Na yĩla Mose wamĩkisye nthĩ, ndata ĩsu yatw’ĩka nzoka. Yeova ĩndĩ oony’a Mose kyama kĩngĩ. Amwĩa: ‘Likya kw’oko kwaku nthĩnĩ wa ngũa yaku kĩthũinĩ kyaku.’ Na Mose eeka ũu, na yĩla waumisye kw’oko kwake, kwaĩ kweũ ta ĩa! Kw’oko kũu kwailyĩ ta kwĩna ũwau mũthũku wĩtawa mangũ. Na Yeova asyoka amũnenga Mose ũtonyi wa kwĩka kyama kya katatũ. Na ĩtina amwĩa: ‘Woona weeka syama isu Aisilaeli makaĩkĩĩa kana ninyie ngũtũmĩte.’
Ĩtina wa maũndũ asu Mose athi mũsyĩ na eea Yethilo: ‘Nenga ũthei nĩthi kwa andũ maitũ ala me Misili, nĩmanye ũndũ mailyĩ.’ Kwoou Yethilo amwĩa athi na ũvoo, na Mose ambĩĩa kyalo kyake kya kũsyoka Misili.
Kuma 3:1-22; 4:1-20.
Makũlyo
- Kĩĩma kĩĩ kĩ visanĩ kĩtawa ata?
- Kwaelesya ũndũ mũeni ũla Mose woonie yĩla waendie kĩĩmanĩ vamwe na malondu make.
- Wasya ũla waumie kakuthunĩ kala kakanĩte mwaki waisye ata?
- Yĩla Ngai weeie Mose kana nĩwe ũkatongoeasya andũ ma Ngai amaumye nthĩ ya Misili, asũngĩie ata?
- Ngai eeie Mose etavya andũ ata ethĩwa makamũkũlya atũmĩtwe nũũ?
- Mose aĩ atonya kwonany’a ata kana Ngai nĩwe wamũtũmĩte?
Makũlyo ma kwongeleela
- Soma Kuma 3:1-22.
Ũvoo wa Mose ũtonya kũtũnenga ũĩkĩĩthyo mwaũ kana Yeova akatũtetheesya ethĩwa tũkeew’a tũteanĩe kũtethya wĩa ũla ũtũnengete? (Kuma 3:11, 13; 2 Ako. 3:5, 6)
- Soma Kuma 4:1-20.
Nĩ ũalyũku mwaũ wa woni wa maũndũ ũla Mose weethĩiwe naw’o ĩvinda ya myaka 40 ĩla wekalile nthĩ ya Mitiani, na ũu ũtonya kũmamanyĩsya kyaũ ala mekwenda kũvikĩa wĩa wa mũsyaĩĩsya kĩkundinĩ? (Kuma 2:11, 12; 4:10, 13; Mika 6:8; 1 Tim. 3:1, 6, 10)
O na ethĩwa Yeova akatũsilĩla kwĩsĩla ũseũvyonĩ wake, nĩ ũĩkĩĩthyo mwaũ ũla ngelekany’o ya Mose ĩnĩũtũnenga? (Kuma 4:12-14; Sav. 103:14; Aevl. 12:4-11)
