NĨ MBEE wa myaka 10 yu kuma yĩla Nevukatilesa wakuie Aisilaeli onthe ala asomu vyũ amatwaa Mbaviloni. Na yu kwasisya kĩla kĩendee! Yelusaleme ĩendee na kũvĩvw’a na mwaki. Namo Aisilaeli ala matanoawa makuĩtwe ta ovwa matwawe Mbaviloni.

Lilikana ũu nĩw’o athani ma Yeova maĩtye kũkethĩwa ethĩwa andũ maikalyũla mĩendele yoo mĩthũku. Ĩndĩ Aisilaeli mayaaĩthukĩĩsya athani asu. Maendeeie o na kũthaitha ngai sya ũvũngũ vandũ va kũmũthaitha Yeova. Kwoou andũ asu nĩmaĩlĩte kũsilĩlwa. Nĩtwĩsĩ ũu kĩtumi nũndũ mwathani wa Ngai Esekieli nũtũtavĩtye ĩũlũ wa maũndũ ala mathũku Aisilaeli mekaa.

We nĩwĩsĩ Esekieli nũũ? Aĩ ũmwe wa anake ala Mũsumbĩ Nevukatilesa watwaie Mbaviloni myaka ĩthonokete 10 mbee wa wanangĩko ũũ mũnene wa Yelusaleme. Ndanieli na anyanyae make atatũ, Satalaki, Mesaki, na Aveti-neko, matwaiwe Mbaviloni o ĩvinda yĩu.

Esekieli e o Mbaviloni, Yeova nĩwamwonisye maũndũ mathũku ala maendee kwĩkĩka ĩkalũnĩ kũu Yelusaleme. Yeova eekie ũu kwa nzĩa ya kyama. Kwa w’o Esekieli aĩ o Mbaviloni, ĩndĩ Yeova amwony’a maũndũ onthe ala maendee ĩkalũnĩ. Na kĩla Esekieli woonie kyaĩ kya kũtelemya!

Yeova amwĩie Esekieli: ‘Kwasisya mothatyo mathũku ala andũ maendee na kwĩkĩa vaa ĩkalũnĩ. Sisya ũndũ mokũta masoletwe mavisa ma nzoka na nyamũ sya mĩthemba ĩngĩ. Na kwasisya Aisilaeli maendee na kũithaitha!’ Esekieli nĩwaĩ atonya kwona maũndũ asu, nake nĩwaandikie kĩla kyaendee.

Na Yeova amũkũlya, ‘We nũkwona ũndũ atongoi ma Isilaeli meĩkĩa kĩmbithĩnĩ?’ Esekieli nĩwaĩ atonya kwona ũndũ ũsu o naw’o. Ĩkalũnĩ vaĩ atumĩa 70, na onthe mathaithaa ngai sya ũvũngũ. Mo maasya: ‘Yeova ndatwene. Nũtiĩte ĩ nthĩ.’

Na ĩndĩ Yeova amwony’a Esekieli aka amwe maĩ mbingĩlonĩ ya ngalĩko ya ĩũlũ ya ĩkalũ. Mekalĩte nthĩ maithaitha ngai ya ũvũngũ Tamusi. Na ĩngĩ Yeova amwĩa Esekieli asisye aũme maĩ mũomonĩ wa ũlika ĩkalũnĩ ya Yeova! Vaĩ aũme ta 25. Esekieli nĩwamonie. Aũme asu makumanĩte melekele wumĩlonĩ wa syũa maiyĩthaitha!

Na Yeova asya: ‘Andũ aa mainengete ndaĩa. Nũndũ o vamwe na kwĩka maũndũ mathũku, nĩmokaa ĩkalũnĩ yakwa na kũmekĩa vo!’ Kwoou Yeova athana ũũ: ‘Makeew’a ũito wa ũthilĩku wakwa. Na ndikamew’ĩa tei mayanangwa.’

Na o ta myaka ĩtatũ ĩtina wa Yeova kwony’a Esekieli maũndũ asu Aisilaeli nĩmang’endeie Mũsumbĩ Nevukatilesa. Kwoou athi kũkita namo. Na ĩtina wa mwaka ũmwe na nyusu, Ambaviloni mavũthũa mokũta ma Yelusaleme na malika, namo mavĩvya ĩ ndũa vyũ. Andũ aingĩ nĩmooaiwe kana matwawa ta ovwa Mbaviloni.

Yeova aekie wanangĩko ũthũkĩte ũu ũkwate Aisilaeli nĩkĩ? Kĩtumi nũndũ nĩmaleile kũmwĩthukĩĩsya na kwĩw’a mĩao yake. Ũndũ ũũ wĩonany’a kana nĩ ũndũ wa vata mũno ĩvinda yonthe ithyĩ kwĩkaa o ũndũ Ngai ũnũkwasya.

Mbee andũ o anini nĩmaekiwe mekale nthĩ ya Isilaeli. Mũsumbĩ Nevukatilesa nĩwaiie Mũyuti wĩtawa Ngendalia aũngamĩe andũ asu. Ĩndĩ Aislaeli amwe mooaa Ngendalia. Na ĩndĩ andũ makĩa mayona Ambaviloni ta mekũka na maimananga onthe nũndũ wa kũmũaa Ngendalia. Kwoou makua Yelemia na vinya na mathi nake, na masemba makĩĩa Misili.

Nthĩ ya Isilaeli yatiiwe ĩte mũndũ o na ũmwe. Kwa myaka 70 vayaĩ mũndũ watũaa ĩ nthĩ. Yaĩ nthei vyũ. Ĩndĩ Yeova athanĩte kana akamatũnga andũ make nthĩ ĩsu ĩtina wa myaka 70. Ĩndĩ yu, kũendee ata kwa andũ ma Ngai kũya nthĩ ya Mbaviloni matwaiwe? Ekai twone.

2 Asumbĩ 25:1-26; Yelemia 29:10; Esekieli 1:1-3; 8:1-18.