Ngewa ya 105: Kweteela me Yelusaleme
ANDŨ aa me vaa nĩ aatĩĩi ma Yesũ. Nĩmamwĩwie na mekala Yelusaleme. Na onthe meteele vamwe, wasya mũnene wausũa nyũmba yonthe. Waambaa ta kĩseve kĩna vinya kĩuutanĩte. Na ĩndĩ nĩmĩ sya mwaki syambĩĩa kwoneka ĩũlũ wa mũtw’e wa kĩla mũmanyĩw’a. We nũtonya kwona mwaki ũsu ĩũlũ wa kĩla ũmwe woo? Wĩonany’a kyaũ?
Kyaĩ kyama! Yesũ asyoka ĩtunĩ kwa Ĩthe wake, nĩwoonoisye veva mũtheu wa Ngai ĩũlũ wa aatĩĩi make. We nĩwĩsĩ veva ũsu watumie meka ata? Onthe mambĩĩie kũneena na ithyomo syĩ kĩvathũkany’o.
Andũ aingĩ kũu Yelusaleme nĩmeewie wasya ũsu waambaa ta kĩseve kĩnene kĩkũuutana, na mooka kwona kĩla kyaendee na kwĩkĩka. Amwe ma andũ asu maumĩte nthĩ ingĩ na mookĩte kũu mbokanĩ ya Aisilaeli ya Vendekosito. Aeni asu maseng’ie ta kĩ! Nĩmew’aa amanyĩw’a maineena na ithyomo syoo ene ĩũlũ wa maũndũ maũsengy’a ala Ngai wĩkĩte.
Namo masya: ‘Andũ aa onthe nĩ ma kuma Kalilii. Nĩ ata, ĩndĩ, matonya kũneena na ithyomo ii syĩ kĩvathũkany’o sya nthĩ ila ithyĩ tumĩte?’
Ĩndĩno Vetelo aũngama amaelesye. Nake ookĩlya wasya na atavya andũ ũndũ Yesũ wooaiwe na kana Yeova nĩwamũthayũũkisye. Na Vetelo amea: ‘Yu Yesũ e ĩtunĩ kw’okonĩ kwa aũme kwa Ngai. Na nĩwoonosya veva mũtheu ũla wathaniwe. Kĩu nĩkyo kĩtumi mwoona na kwĩw’a syama ii.’
Vetelo aneena maũndũ asu, andũ aingĩ nĩmeewie woo nũndũ Yesũ weekiwe. Na makũlya, ‘Twaĩlĩte kwĩka ata?’ Nake Vetelo amea: ‘Mwaĩlĩte kũalyũla mathayũ menyu na mũivatiswa.’ Kwoou mũthenya o ũsu andũ ta 3,000 mavatiswa na matw’ĩka aatĩĩi ma Yesũ.
Meko 2:1-47.
Makũlyo
- O tondũ visa ĩkwonany’a, nata kweekĩkie kwa aatĩĩi ma Yesũ ala meteelete Yelusaleme?
- Nĩ ũndũ mwaũ wa ũsengy’a ũla aeni ala mookĩte Yelusaleme moonie?
- Vetelo amaeleisye andũ kyaũ?
- Andũ meewie ata ĩtina wa kwĩmwĩthukĩĩsya Vetelo, nake ameie nĩmeke ata?
- Nĩ andũ meana ala mavatisiwe mũthenyanĩ ũsu wa Vendekosito, mwaka wa 33 I.Y.?
Makũlyo ma kwongeleela
- Soma Meko 2:1-47.
Ndeto sya Vetelo ila syonekaa nthĩnĩ wa Meko 2:23, 36 syoonanisye ata kana mbaĩ yonthe ya Ayuti nĩyaaĩlĩte kũtalĩlwa mavĩtyo nũndũ wa kĩkw’ũ kya Yesũ? (1 Ath. 2:14, 15)
Vetelo oonanisye ngelekany’o nzeo ata ya kũsũanĩa maũndũ kuma Maandĩkonĩ vamwe na andũ? (Meko 2:16, 17, 29, 31, 36, 39; Ako. 4:6)
Vetelo atũmĩie ata ũvungũo wa mbee katĩ wa “mbungũo sya ũsumbĩ wa ĩtunĩ” ila Yesũ wamwathie kana akamũnenga? (Meko 2:14, 22-24, 37, 38; Mt. 16:19)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Andũ Maana Maingĩ Nĩmamwonie Yesũ Mbee wa Vendekosito
Ĩtina wa kũthayũũkw’a na atielye mĩthenya mĩnini ambate ĩtunĩ, Yesũ nĩwatũngĩlĩĩile kũtavya amanyĩw’a kĩla makakwata na ũndũ makatũmĩa kĩndũ kĩu.
