Ngewa ya 79: Ndanieli e Ngunganĩ ya Mĩnyambũ
ASI-I-SI! Ndanieli e oneka ta wĩ thĩnanĩ mũnene mũno. Ĩndĩ mĩnyambũ ndĩũmwĩka ũndũ! We nĩwĩsĩ nĩkĩ? Nũũ ũla ũmwĩkisye Ndanieli vaa mĩnyambũnĩ ĩno yonthe? Ekai twone.
Mũsumbĩ wa Mbaviloni eetawa Ndalio. Nĩwamwendete Ndanieli mũno nũndũ aĩ mũndũ mũseo na mũĩ. Ndalio nĩwamũnyuvie Ndanieli atw’ĩke mũsumbĩki mũnene ũsumbĩnĩ wake. Ũu nĩwatumie andũ angĩ ũsumbĩnĩ ũsu mamwĩw’ĩa Ndanieli kĩwĩu. Kwoou ũũ nĩw’o meekie.
Maendie kwa Ndalio na mamwĩa: ‘Nĩtw’ĩwanĩte, we mũsumbĩ, ũseũvye mwĩao ũkwasya kana kwa ĩvinda ya matukũ 30 vaiĩ mũndũ ũkavoya ngai o na yĩva kana mũndũ ateo we, we mũsumbĩ. Na mũndũ o na wĩva alea kwĩw’a, no nginya ekw’e ngunganĩ ya mĩnyambũ.’ Ndalio ndeesĩ andũ asu mendaa mwĩao ũsu ũseũvw’e nĩkĩ. Ĩndĩ we asũanĩa ũsu nĩ woni mũseo, kwoou aũandĩkĩthya. Mwĩao ũsu ndwaĩ ũtonya kũalyũlwa.
Yĩla Ndanieli wamanyie ĩũlũ wa mwĩao ũsu, we aenda mũsyĩ na avoya, o tondũ weekaa ĩvinda yonthe. Andũ asu athũku nĩmeesĩ kana Ndanieli ndesa kũeka kũvoya Yeova. Maĩ na ũtanu, nũndũ moonaa kana mũvango woo wa kũmũaa nũkwĩanĩa.
Yĩla Mũsumbĩ Ndalio wamanyie kĩtumi kya andũ asu kwenda mwĩao ũsu ũseũvw’e, eew’a kyeva mũno. Ĩndĩ ndaĩ atonya kũũalyũla, kwoou yaĩ no nginya eĩae Ndanieli ekw’e ngunganĩ ya mĩnyambũ. Ĩndĩ mũsumbĩ amwĩa: ‘Nyie nĩĩkwatya kana Ngai waku, ũla ũmũthũkũmaa mavinda onthe, nũkũũtangĩĩa.’
Ndalio aĩ na woo mwingĩ mũno o na ndaatonya kũkoma ũtukũ ũsu. Kĩoko kĩla kyaatĩĩe nĩwasembie ngunganĩ ya mĩnyambũ. Nũtonya kũmwona vaaya ĩũlũ. Nĩwaneenie na wasya mũnene: ‘Ndanieli, mũthũkũmi wa Ngai ũla wĩ thayũ! Ngai waku ũla ũmũthũkũmaa mavinda onthe, nũtonyie ũkũtangĩĩa mĩnyambũnĩ?’
Nake Ndanieli asũngĩa, ‘Ngai nũtũmie mũlaĩka wake, na atumya makanyw’a ma mĩnyambũ na ndĩnambĩka ũndũ.’
Mũsumbĩ nĩwatanie mũno. Nake eeĩaa Ndanieli aumw’e ngunganĩ ya mĩnyambũ. Na ĩndĩ asya andũ ala athũku mendaa kũmũaa Ndanieli mekw’e ngunganĩ ĩsu. Na o na matanavika nthĩ, mĩnyambũ yamakwata na yatũlanga mavĩndĩ moo onthe.
Nĩvo ĩndĩ Ndalio waandĩkĩie andũ onthe ũsumbĩnĩ wake ayasya: ‘Nĩngumya mwĩao kana kĩla mũndũ no nginya anenge Ngai wa Ndanieli ndaĩa. We nĩwĩkaa syama nene na nũnatangĩĩie Ndanieli ndakalĩke nĩ mĩnyambũ.’
Ndanieli 6:1-28.
Makũlyo
- Ndalio nũũ, na oonaa Ndanieli ailyĩ ata?
- Andũ amwe me kĩw’ĩu mataie Ndalio eke ata?
- Ndanieli eekie ata amanya ũvoo wa mwĩao ũsu mweũ?
- Ndalio eewie woo mũno nginya aaĩwa nĩ too nĩkĩ, na eekie ata kĩoko kĩla kyaatĩĩe?
- Ndanieli asũngĩie Ndalio ata?
- Kweethĩiwe ata kwa andũ ala athũku matatie kũmũaa Ndanieli, na Ndalio aandĩkie ata kwa andũ onthe ũsumbĩnĩ wake?
Makũlyo ma kwongeleela
- Soma Ndanieli 6:1-28
Ũla wĩw’ano mũthũku wa kũmũũa Ndanieli wĩtũlilikany’a kyaũ ĩũlũ wa ũndũ amaitha mekaa nĩ kana matate kũsiĩĩa wĩa wa Ngũsĩ sya Yeova ĩvindanĩ yitũ? (Nda. 6:7; Sav. 94:20; Isa. 10:1; Alo. 8:31)
Athũkũmi ma Ngai ũmũnthĩ matonya ata kwĩyĩelekany’a na Ndanieli nthĩnĩ wa kwĩkala menyivĩtye kwa “ala me na ũkũmũ”? (Nda. 6:5, 10; Alo. 13:1; Meko 5:29)
Tũtonya ata kũatĩĩa ngelekany’o ya Ndanieli ya kũthũkũma Yeova “mavinda onthe”? (Nda. 6:16, 20; Avi. 3:16; Ũvu. 7:15)
