Kwasũanĩa ngelekany’o ĩno: Mwĩĩtu wĩtawa Heather ethĩĩtwe e ndũũ na Mike kwa ĩvinda ya myei ĩlĩ, na esũanĩa kana nũmwĩsĩ nesa vyũ. Maandĩkanĩaa mesengyi kĩla ĩvinda, o na nĩmaneenaa simũnĩ masaa maingĩ, na nĩmethĩawa mesĩ kĩla kĩ ngoonĩ ya ũla ũngĩ o na atanesa kũkĩweta! Ĩndĩ yu ve ũndũ ũngĩ Mike ũkwenda.

Myei ĩsu ĩlĩ mĩvĩtu, ũndũ ũla mũnene Mike na Heather maaĩka nĩ kũthi makwatene moko na kũkũnana kisi o vanini. Heather ndekwenda kwĩka ũndũ ũvĩtũkĩte maũndũ asu. Ĩndĩ o na ũu wĩ o vo, ndeenda ndũũ yake na Mike ĩithela nũndũ Mike nũmwendete na atumaa Heather ew’a e mwĩanĩe. Na ti ũu w’oka, Heather esũanĩa kana we na Mike nĩmendanĩte.

Ethĩwa nũvikĩtye myaka ĩla mũndũ wĩthĩawa atonya kũtuma ndũũ, na ũikwatwa nĩ ũndũ ta ũũ wamũkwatie Heather, ũtonya kwĩka ata?

Kwasũanĩa ũndũ ũũ: Mũndũ akalĩsa mũtĩnĩ na ayĩyĩkya aũlũke ta kasũni, vethĩwa vailyĩ ata? Vate nzika no aũmĩe. Ũu now’o vatonya kwĩthĩwa vailyĩ mũndũ akalea na ngũlũ mwolooto wa mwĩkalĩle, kwa ngelekany’o, ta mwolooto ũla waĩtye, ‘Ĩvathanei na ũlaalai.’—1 Athesalonika 4:3.

Mũndũ atonya kũkwatwa nĩ thĩna mwaũ nũndũ wa kũlea kũatĩĩa mwĩao ũsu? Mbivilia yaĩtye atĩĩ: “Ũla wĩkaa ũlaalai eyĩkaa mwĩĩ wake mwene naĩ.” (1 Akolintho 6:18) Nĩkĩ tũtonya kwasya kana ndeto isu nĩ sya w’o?

 Asomi maasyaa kana andũ aingĩ ma mũika ala mamanyanaa kĩ-mwĩĩ matanamba kũtwawa kana kũtwaana nĩmatonya kũkwatwa nĩ ũmwe katĩ wa maũndũ aa me vaa ĩtheo kana makakwatwa nĩ maingangĩ.

• KŨŨMĨA MŨNO NGOONĨ. Andũ aingĩ ma mũika ala mekĩte ũlaalai maasyaa kana ĩtina wa kwĩka ũu nĩmeelilile mũno.

• KŨEKA KŨĨKĨĨA ŨLA ŨNGĨ. Ĩtina wa mũndũ kwĩka ũlaalai na ũngĩ, kĩla ũmwe woo ambĩĩa kwĩkũlya-ĩ, ‘Ethĩwa eekie ũlaalai na ũngĩ ũũ?’

• KŨKW’A NGOO. Eĩtu aingĩ methĩawa mayendeew’a nĩ mũndũũme ũla ũtonya kũmasũvĩa, ĩndĩ ti amatũmĩe naĩ na aimatia. Na aũme aingĩ maasyaa kana ti laisi kwendeew’a nĩ mũndũ mũka ũla wĩtĩkĩlaa makome ĩmwe ĩla mamũkũlya.

• Ũndũ ũla wa vata: Weetĩkĩla kwĩka ũlaalai, wĩthĩawa weevũthya mũno kwa kũnengane mũthĩnzĩo wa vata vyũ. (Alomi 1:24) Mwĩĩ waku nĩ wa vata mũno ũkethĩa ti wa kũnenganwe oou!

Onany’a kana nũtw’ĩte vyũ kwĩsiĩĩa kwa ‘kwĩvathana na ũlaalai.’ (1 Athesalonika 4:3) Na ĩndĩ ethĩwa ũkatwaana kana ũtwawe ĩvinda yũkĩte, ũkakwata mũndũ wa kũmanyanaa nake kĩ-mwĩĩ. Na ũkeethĩwa ũtonya kũtanĩa kũmanyana kĩ-mwĩĩ ũte na nzika, ũte kwĩlila, na ũte kũkĩa kũkwatwa nĩ maũndũ mathũku ala mavinda maingĩ makwataa andũ ma mũika ala meeka ũlaalai.—Nthimo 7:22, 23; 1 Akolintho 7:3.

• Mũndũ ũkwendete vyũ no eke ũndũ ũtonya kũkũũmĩsya ngoonĩ kana mwĩĩ?

• Kwa w’o mũndũ ũkwendete no aũtate wĩke ũndũ ũtonya kwananga ngwatanĩo yaku na Ngai?—Aevelania 13:4.