Maveva me kw’o! Nthĩnĩ wa wĩkalo wa maveva, kwĩ maveva maseo o na mathũku. Atĩĩ, maveva asu nĩ andũ ala maaĩkala ĩũlũ wa nthĩ na kũkw’ĩĩa vo?

Aiee, ti mo. Yĩla mũndũ wakw’a, ndaingaa aendete ũtũonĩ wa maveva, tondũ andũ aingĩ mesilasya. Twĩsĩ ata ũvoo ũsu? Nĩ kwoondũ Mbivilia ĩwetaa ũu. Mbivilia nĩ ĩvuku ya w’o yĩla yumĩte kwa Ngai ũla wa w’o weka, ũla syĩtwa yake nĩ Yeova. Yeova nĩwe woombie andũ; we nĩwĩsĩ nesa kĩla kĩmakwataa yĩla makw’a.—Savuli 83:18; 2 Timotheo 3:16.

Mbivilia ĩwetaa kana Ngai oombie Atamu, mũndũ wa mbee, “na kĩtoo kya nthĩ.” (Mwambĩlĩlyo 2:7) Ngai amwiie nthĩnĩ wa Valatiso, mũũnda wa Eteni. Kethĩwa Atamu nĩweewie mwĩao wa Yeova, ndethĩwa aakw’a; ethĩwa e thayũ o na ũmũnthĩ. Ĩndĩ yĩla Atamu watũlile mwĩao wa Ngai kwa kwenda, Ngai amwĩie: “Ũkasyoka mũthanganĩ; nũndũ wĩ kĩtoo, na nũkasyoka kĩtoonĩ.”—Mwambĩlĩlyo 3:19.

Ũu wĩonany’a ata? Yo tene-ĩ, Atamu aĩ va Yeova atanamba kũmũmba kuma kĩtoonĩ? Ndaĩ vandũ. Ndaĩ ĩtunĩ e veva ũte mũsyae. Ndaĩ kw’o. Kwoou yĩla Yeova waisye Atamu ‘akasyoka mũthanganĩ,’ oonanasya kana Atamu akakw’a. Ndaakĩla mũingo ũya ũngĩ wa wĩkalo wa maveva. Yĩla wakwie, Atamu asyokie atw’ĩka kĩndũ kĩte thayũ, kĩte kw’o. Kĩkw’ũ nĩ wau wa thayũ.

Ĩndĩ kũilyĩ ata ũvoonĩ wa ala angĩ makw’ĩte? Aĩ o na mo  ti kw’o maĩ? Mbivilia ĩsũngĩaa atĩĩ:

• “Onthe [andũ o na nyamũ] maendaa vandũ vamwe; onthe nĩ ma kĩtoo, na onthe masyokaa ĩngĩ kĩtoonĩ.”—Mũtavany’a 3:20.

• “Akw’ũ matyĩsĩ ũndũ o na wĩva.”—Mũtavany’a 9:5.

• “Wendo woo, o na kĩmena kyoo na kĩwĩu kyoo, nĩsyaaie tene mũno.”—Mũtavany’a 9:6.

• “Kũti wĩa kana ũsũanĩo, kana ũmanyi, kana ũĩ, Seoli [mbũanĩ] vala ũendete.”—Mũtavany’a 9:10.

• “[Mũndũ] nũsyokaa mũthanganĩ wake; mũthenya o ũsu mosũanĩo make nĩmaaa.”—Savuli 146:4.

We wĩona nĩ vinya kwĩtĩkĩla maandĩko asu? Ethĩwa nũu, ĩsilye atĩĩ: Nthĩnĩ wa mĩsyĩ ya andũ aingĩ, mũndũ mũũme nĩwe ũthũkũmĩaa mbesa sya kũendeesya mũsyĩ wake. Yĩla mũndũ mũũme ũsu wakw’a, mavinda  maingĩ andũ ma mũsyĩ wake nĩmathĩnaa. Mavinda amwe mũka na syana syake o na mayĩthĩawa na mbesa mbĩanĩu kũthooa lĩu. No kwĩthĩwa amaitha ma mũndũ mũũme ũsu matonya kũmeka maũndũ mathũku. Yuyu kweekũlye atĩĩ: ‘Ethĩwa mũndũ mũũme ũsu e thayũ nthĩnĩ wa ũtũo wa maveva, nĩkĩ ũtaendeeaa kũmanthĩa andũ ma mũsyĩ wake mavata moo? Nĩkĩ ũtasũvĩaa andũ ma mũsyĩ wake na andũ athũku?’ Nĩkwĩthĩwa maandĩko meneena w’o. Mũndũ mũũme ũsu nde thayũ, ndatonya kwĩka ũndũ o na wĩva.—Savuli 115:17.

Atĩĩ, ũu nĩ kwonany’a kana akw’ũ maikasyoka kwĩthwa thayũ ĩngĩ? Aiee. Nĩtũkwĩsa kũneena ũvoo wa ũthayũũkyo ĩtina. Ĩndĩ ũndũ ũsu wĩonany’a kana akw’ũ mayĩsĩ kĩla we ũkwĩka. Maitonya kũkwona, kũkwĩw’a, kana kũneena naku. Ndwĩ na vata wa kũmakĩa. Maitonya kũkũtethya, na maitonya kũkwĩka naĩ.—Mũtavany’a 9:4; Isaia 26:14.