YEOVA Ngai avevee athani aingĩ Mbivilianĩ kũelesya ĩũlũ wa kũsyawa na wĩa wa Masia nĩ kana atũtetheesye kũmũmanya Mwovosya ũsu wathanĩtwe. Wathani ũsu wa Mbivilia nĩweanĩie ĩũlũ wa Yesũ Klĩsto. Wathani ũsu wĩ maũndũ maingĩ  na ũndũ meanĩĩte nĩ ũndũ wa ũsengy’a. Kwa ngelekany’o, sisya wathani ũla wathanĩte ĩũlũ wa kũsyawa na kwĩana kwa Masia.

Mwathani Isaia athanie kana Masia akeethĩwa e wa nzyawa ya Mũsumbĩ Ndaviti. (Isaia 9:⁠7) Na kwa w’o Yesũ asyaiwe nzyawanĩ ya Ndaviti.​​—⁠Mathayo 1:​1, 6-​17.

Mika, mwathani ũngĩ wa Ngai athanie kana Yesũ akatw’ĩka mũsumbĩ na akasyaĩwa “Mbethi-leemu ya Evilatha.” (Mika 5:⁠2) Yĩla Yesũ wasyaiwe kwaĩ mĩsyĩ ĩlĩ kũya Isilaeli yeetawa Mbethi-leemu. Mũsyĩ ũmwe waĩ vakuvĩ na Nasaleti, na ũla ũngĩ waĩ vakuvĩ na Yelusaleme, ku Yutia. Mũsyĩ wa Mbethi-leemu ũla waĩ vakuvĩ na Yelusaleme, mbeenĩ weetawa Evilatha. Yesũ asyaĩwe mũsyĩ ũsu o tondũ kwathanĩtwe.​​—⁠Mathayo 2:⁠1.

Wathani ũngĩ wa Mbivilia wathanĩte kana mwana wa Ngai ‘akeetwa kuma Misili.’ Yesũ e kana nĩwatwaiwe Misili. Nĩwatũngiwe kuma nthĩ ĩsu ĩtina wa kĩkw’ũ kya Elote, na kwoou wathani weanĩa.​​—⁠Osea 11:1; Mathayo 2:​15.

Ĩthangũnĩ ya 200 ĩvukunĩ yĩĩ maandĩko ala me ĩtheo wa ndeto “Wathani” nĩmonanĩtye maũndũ maingĩ ĩũlũ wa Masia. Kwamasyaanĩsye na ala me ĩtheo wa ndeto “Kwĩanĩa.” Kwĩka ũu nĩkũũlũlũmĩlya mũĩkĩĩo waku kana Ndeto ya Ngai nĩ ya w’o.

Manya kana maandĩko asu ma wathani maandĩkiwe myaka maana maingĩ mbee wa Yesũ atanasyawa. Yesũ aisye: ‘No mũvaka maũndũ onthe meanĩw’e ala maandĩkĩtwe ũndũ wakwa Mĩaonĩ ya Mose, na mavukunĩ ma athani, na ĩvukunĩ ya Savuli.’ (Luka 24:44) Wasoma Mbivilianĩ yaku nũkwona kĩla ũndũ wathaniwe ĩũlũ wa Yesũ nĩweanĩie nesa vyũ!