KĨLUNGU KYA KATATŨ
Ĩla Twaũmĩw’a Ngoo Nĩ Mũndũ Ũngĩ—Ethĩwa twĩ na “Ũndũ na [Mũndũ] Ũngĩ”
“Mwĩĩtu-a-asa ũmwe kĩkundinĩ kitũ nĩwambilĩĩile kana nĩnooyĩte mbesa syake. Ĩla angĩ kĩkundinĩ mamanyie ngewa ĩsu, nĩmambĩĩie kwĩtĩkĩlana nake. Ĩtina wa ĩvinda, mwĩĩtu-a-asa ũsu nĩwandavisye kana nũmanyie ti inyie noosete mbesa isu. O na kau nĩwambĩtisye ũekeo, neew’aa wĩ ũndũ wĩ vinya kwĩsa kũmũekea nũndũ ũndũ ũsu nĩwambũmĩĩtye ngoonĩ.”—Linda.
WE NO ũelewe ũndũ Linda weew’aa ĩtina wa kũũmĩw’a nĩ mwĩĩtu-a-asa ũsu? Ũndũ wa kũmakya nĩ kana, amwe nĩmaũmĩĩtw’e nĩ meko ma angĩ nginya ũndũ ũsu ũkatuma masyoka ĩtina kĩ-veva. We no wĩthĩwe waakwatwa nĩ ũndũ ta ũsu?
Ve Mũndũ Ũtonya ‘Kũtũtaanany’a na Wendo wa Ngai’?
Kwa w’o no twone wĩ ũndũ wĩ vinya mũno kũekea mwana-a-asa kana mwĩĩtu-a-asa. Vethĩawa vailyĩ ũu nũndũ nĩtwĩsĩ kana Aklĩsto maĩlĩte kwendana. (Yoana 13:34, 35) Ĩla twavĩtĩw’a nĩ mwana-a-asa kana mwĩĩtu-a-asa, nĩtũũmĩaa na tũkew’a woo mũno.—Savuli 55:12.
Mbivilia nĩyĩtĩkĩlĩte kana mavinda amwe Mũklĩsto nĩwĩthĩawa na “ũndũ na ũngĩ.” (Akolosai 3:13) Ĩndĩ o na vailyĩ ũu, ĩla ũndũ ta ũsu watũkwata, no twĩw’e wĩ vinya kũmĩĩsya. Yo ve ũndũ ũtonya kũtũtetheesya ĩla ũndũ ta ũsu waumĩla? Kwasũanĩa myolooto ĩĩ ĩtatũ ya Mbivilia:
Ĩthe witũ wa ĩtunĩ nĩwĩsĩ maũndũ onthe. Yeova nĩwĩthĩawa ene kĩla kĩndũ kyonthe, o na yĩla tweekwa ũndũ ũtaĩle ũtonya kũtũũmĩsya mũno. (Aevelania 4:13) O na ĩngĩ, Yeova nũtwĩw’ĩaa tei ĩla twaũmĩa ngoonĩ. (Isaia 63:9) Ndesa kwĩtĩkĩlya “monyamao, kana woo” o na mũthũkũmi wake ‘atũtaanany’e na wendo wake.’ (Alomi 8:35, 38, 39) Yo tyo twaĩle kwĩthĩwa tũilyĩ ta Yeova kwa kũlea kwĩtĩkĩlya kĩndũ o na kĩva kana mũndũ o na wĩva atũtaanany’e na Yeova?
Kũekea mũndũ ti kwĩtĩkĩlya ĩvĩtyo. Ĩla twaekea ala matũvĩtĩsya, tũyĩthĩawa tũivũthĩĩsya, kũtetea, kana kwĩtĩkĩlya meko moo mathũku. Lilikana kana Yeova ndetĩkĩlasya naĩ yĩendeee, ĩndĩ nĩ ũekeaa ethĩwa ve kĩtumi kya kwĩka ũu. (Savuli 103:12, 13; Avakuki 1:13) Ĩla ũkũtwĩkĩa vinya tũekee ala matũvĩtĩsya, Yeova ethĩawa aitwĩa nĩtũatĩĩe ngelekany’o yake. Yeova “ndekalasya ũthatu wake tene na tene.”—Savuli 103:9; Mathayo 6:14.
Ĩla twaeka kwĩw’a woo nũndũ wa kũvĩtĩw’a, nĩtũtethekaa. Tũtethekaa kwa nzĩa yĩva? Kwasũanĩa ngelekany’o ĩno. Ĩla woosa ĩvia yĩ na ũito mũnini, na ũiyũkĩlya kwa ĩvinda ĩkuvĩ, nĩvatonyeka ũkalea kũnoa mũno. Nao nata ĩla waendeea kũkĩlya ĩvia yĩu kwa ĩvinda ĩasa? Yo no ũendeee kũyũkĩlya kwa ĩvinda ĩasanga ta ndatĩka siana ũndũ mũna, ĩsaa yĩmwe, kana o mbeange? Vai nzika kana ndũema kũnoa kw’oko! Ũito wa ĩvia yĩu ndũvĩndũkaa, ĩndĩ o ũndũ waendeea kũyũkĩlya kwa ĩvinda yĩasa now’o ũkwĩw’a yĩ yĩito. Ũu now’o vethĩawa vailyĩ twaendeea kwĩw’a woo nũndũ wa kũvĩtĩw’a. O ũndũ twaendeea kwia woo ngoonĩ sitũ nũndũ wa kũvĩtĩw’a, o na ethĩwa ti woo mwingĩ, now’o tũendeeaa na kwĩyĩũmĩsya. Na kĩu nĩkyo kĩtumi Yeova ũtwĩkĩaa vinya tũvete woo ngoonĩ sitũ. Kwa w’o, kũveta woo ngoonĩ nĩkũtũtetheeasya.—Nthimo 11:17.
Ĩla twaeka kwĩw’a woo nũndũ wa kũvĩtĩw’a, nĩtũtethekaa
“Neew’aa Yeova Mwene ta we Ũkũneena Nakwa”
Nĩ kyaũ kyatetheeisye Linda ndakaendeee kwia woo ngoonĩ ĩla wavĩtĩiw’e nĩ mwĩĩtu-a-asa ũngĩ? O na kau ve maũndũ angĩ mamũtetheeisye, kũsũanĩa ĩũlũ wa itumi ila Maandĩko manenganĩte sya kũekea ala angĩ nĩkwamũtetheeisye mũno. (Savuli 130:3, 4) Mũno mũno Linda nĩwatetheeiw’e nĩ kũmanya kana ĩla twaekea angĩ, o nake Yeova akatũekeaa ĩla twavĩtya. (Aeveso 4:32–5:2) Asũanĩa ũndũ maũndũ asu mamũtetheeisye, Linda aĩtye atĩĩ: “Neew’aa Yeova mwene ta we ũkũneena nakwa.”
Ĩtina wa ĩvinda Linda nĩwavetangie woo ũla waĩ ngoonĩ. Nĩwamũekeie kuma ngoonĩ mwĩĩtu-a-asa ũla wamũvĩtĩisye, na yu mendanĩte mũno. Linda nũendeee kũmũthũkũma Yeova. O naku ĩthĩwa na mũĩkĩĩo kana Yeova nũkwenda kũũtetheesya o tondũ watetheeisye Linda.
