Elisavethi aĩ na mũndũ wa mũsyĩ waĩ mũninangi mbee wake ũla weetawa Meli. Meli ekalaa ndũanĩ ya Nasaleti ĩla yaĩ Kalilii, na eevaaĩtwʼe nĩ mũndũũme waĩ vundi wa mbwaũ weetawa Yosevu. Yĩla Elisavethi waĩ na ĩvu ya myei thanthatũ, mũlaĩka Kavilieli nĩwamumĩlĩĩle Meli. Kavilieli eeie Meli atĩĩ: ‘Ũvoo waku Meli. Yeova nũkwenda kũũnenga wĩa wa mwanya mũno.’ Meli ndaaelewa nĩ kĩla Kavilieli wamũtavisye. Nĩvo ĩndĩ Kavilieli waendeeie kũmũelesya amwĩa: ‘Ũkaitava na ũisyaa kana kavĩsĩ, na ũkaketa Yesũ. Ĩtina Yesũ akatwʼĩka Mũsumbĩ. Na Ũsumbĩ wake ũkekalaa tene na tene.’

Ĩndĩ Meli amũsũngĩa mũlaĩka Kavilieli amwĩa: ‘Nyie ndyaakoma na mũndũũme. Ndonya ata kũitava?’ Nake Kavilieli amwĩa: ‘Vaiĩ ũndũ ũtatonyeka kwa Yeova. Veva mũtheu ũkooka ĩũlũ waku na ũkaitava na ũisyaa kana kavĩsĩ. Elisavethi, ũla wa mũsyĩ wenyu, o nake nĩ mũito.’ Na ĩndĩ Meli asya: ‘Nyie nĩ mũthũkũmi wa Yeova. Ũu nĩwĩthĩwe kwakwa o tondũ wasya.’

 Ĩtina wa ĩvinda, Meli nĩwaendie ndũanĩ ĩmwe yaĩ iĩmanĩ akamwone Elisavethi. Yĩla Meli wavikie na amũkethya, Elisavethi nĩweewie kana kala ke ĩvu kathaka. Ĩtina wa ũu Elisavethi nĩwausũiwe nĩ veva mũtheu na asya: ‘Meli, Yeova nũkũathimĩte. Nĩ ndaĩa nene kwĩthĩwa na inyia wa Mwĩaĩi wakwa mũsyĩ kwakwa.’ Nake Meli asya: ‘Nĩngũmũtaĩa Yeova na ngoo yakwa yonthe.’ Na Meli ekala na Elisavethi myei ĩtatũ na ĩndĩ asyoka mũsyĩ Nasaleti.

Yĩla Yosevu wamanyie kana Meli nĩ mũito, nĩwendie kũeka kũmwĩvaasya. Ĩndĩ mũlaĩka amumĩlĩĩla ndotonĩ na amwĩa: ‘Ndũkakĩe kũmũtwaa Meli. Ndekĩte ũndũ o na ũmwe mũthũku.’ Kwoou Yosevu amũtwaa Meli.