Yesũ aĩ na anyanyae atatũ mekalaa ndũanĩ ya Vethania. Anyanyae asu maĩ Lasalo na eĩtu-a-inyia make elĩ, namo nĩ Meli na Matha. Mũthenya ũmwe Yesũ e ngalĩko ĩla ĩngĩ ya Ũsĩ wa Yolotani, Meli na Matha nĩmatũmie mũndũ akamũtavye ũndũ mendaa eanĩsye mĩtũkĩ. Mamwĩie: ‘Lasalo nĩ mũwau mũno. Mwa ũka mĩtũkĩ!’ Ĩndĩ Yesũ nĩwekalangile. Ambie kweteela vandũ va mĩthenya ĩlĩ na ĩndĩ eea amanyĩwʼa make: ‘Tũendei Vethania. Lasalo nũkomete na nĩngũthi ngamũamũkye.’ Namo atũmwa make mamwĩa: ‘Ethĩwa Lasalo nũkomete, ũu nũũmũtetheesya avoe.’ Nĩvo ĩndĩ Yesũ wamatavisye ũtheinĩ amea: ‘Lasalo nũnakwie.’

Yĩla Yesũ wavikie Vethania, Lasalo nĩwaminĩte mĩthenya ĩna kuma athikwa. Andũ aingĩ maĩ mũsyĩ kwoo mokĩte kũkiakisya Matha na Meli. Yĩla Matha weewie kana Yesũ nĩwavika, nĩwasembie akakomane nake. Amwona amwĩie: “Mwĩaĩi, ta kethĩwa ũnaĩ vaa, mwana-a-ia ndethĩwa anakwie.” Nake Yesũ amwĩa: ‘Lasalo nũkũthayũũka. We nũkũĩkĩĩa ũu?’ Nake Matha amũsũngĩa amwĩa: ‘Ĩĩ nĩngũĩkĩĩa kana akeethĩwa thayũ ĩngĩ mũthenya wa ũthayũũkyo.’ Nĩvo ĩndĩ Yesũ wamwĩie: “Nyie ninyie ũthayũũkyo na ninyie thayũ.”

Ĩtina wa kũneena na Yesũ, Matha nĩwaendie vala ve Meli na amwĩa: ‘Yesũ nũvikie.’ Meli amanya ũu nĩwasembie vala Yesũ waĩ na aatĩĩwa nĩ andũ aingĩ. Nĩwatulilye ndu maaũnĩ ma Yesũ aĩĩte mũno. Na ĩndĩ eea Yesũ atĩĩ: ‘Mwĩaĩi, kethĩwa wĩĩ vaa Lasalo ethĩwa e o thayũ!’ Yesũ nĩwoonie ũndũ Meli waĩ na kyeva kingĩvĩte, na ũu watuma nake ambĩĩa kũĩa. Na yĩla andũ aingĩ ala maĩ vakuvĩ moonie Yesũ ayĩĩa masya: ‘Kwoonai ũndũ ũnendete Lasalo.’ Namo angĩ meekũlasya: ‘Nĩkĩ ũnaemie kũmũvosya?’ Ĩndĩ nĩ ũndũ wĩva Yesũ weekie?

Ĩtina wa ũu Yesũ nĩwaendie mbũanĩ vala Lasalo wathikĩtwe. Mbũa ĩsu yavingĩtwe na ĩvia ĩnene. Nĩvo ĩndĩ waisye: ‘Vetangai ĩvia yĩĩ vaa.’ Nake Matha amwĩa: ‘Nĩvathelete mĩthenya ĩna! Nũkũnyunga.’ Ĩndĩ o na ũu wĩ o vo, nĩmavetangie ĩvia yĩu mbũanĩ, na ĩndĩ Yesũ avoya  akyasya: ‘Asa, nĩngũũtũngĩa mũvea nũndũ nĩwambĩwʼa. Na nĩnĩsĩ mavinda onthe nũmbĩwʼaa, ĩndĩ nĩneena na wasya mũnene nĩ kana andũ aa me vaa mamanye kana nĩwandũmie.’ Na ĩndĩ aneena na wasya mũnene asya: “Lasalo, umaala!” Yĩla Yesũ waneenie ũu, ũndũ wa kũsengyʼa mũno nĩwoonekie: Lasalo nĩwaumaalile mbũanĩ alingĩtwe itambaa sya katane. Nĩvo ĩndĩ Yesũ wameie: “Mũthasyei na mũimũeka athi.”

Andũ aingĩ ala moonie kyama kĩu nĩmambĩĩie kũmũĩkĩĩa Yesũ. Ĩndĩ amwe nĩmaendie kũtavya Avalisi. Ũu watumie Avalisi mambĩĩa kwenda kũmũaa Lasalo na Yesũ. Ũmwe wa ala atũmwa 12, weetawa Yutasi Isikalioti nĩwaendie evithĩte kũla kwĩ Avalisi na amakũlya atĩĩ: ‘Mwĩnenga mbesa siana ata nĩ kana nĩmũtetheesye kũmũkwata Yesũ?’ Meeie Yutasi kana nĩmeũmũnenga ilungu 30 sya vetha, na ĩndĩ Yutasi ambĩĩa kũmantha ũndũ ũtonya kũmũvũnyanĩa Yesũ kũla kwĩ Avalisi.