Yesũ ookie ĩũlũ wa nthĩ nĩ kana atavanyʼe ũvoo mũseo wa Ũsumbĩ wa Ngai. Nĩ kana Yeova onanyʼe maũndũ ala Yesũ waĩ eke atwʼĩka Mũsumbĩ, nĩwamũnengie veva mũtheu nĩ kana eke syama. Aĩ atonya kũvosya mowau ma mĩthemba yonthe. Andũ awau nĩmaendaa maatĩĩe Yesũ kĩla vandũ wathi nĩ kana amatetheesye, na kwoou nĩwamavoasya onthe. Kwa ngelekanyʼo, nĩwavoasya ilalinda, ala au matũ, ala onzu mamutha, na ayumya ndaimoni ila syalikĩte andũnĩ. O na andũ makiita mũthya wa ngũa yake, nĩmavoaa. Andũ maendaa maatĩĩe Yesũ kĩla vandũ. O na yĩla ũkwenda kwĩthĩwa e weka, nĩmamũatĩĩaa na vaiĩ ĩvinda Yesũ waamalũngya.

Mũthenya ũmwe, andũ nĩmaetie mũndũ waĩ mwonzu mamutha vala Yesũ waĩ. Ĩndĩ nyũmba ĩla Yesũ waĩ yaĩ na andũ aingĩ ũkethĩa andũ asu maĩ na mũndũ ũsu mũwau maitonya kũlika. Kwoou, nĩmatonyie ĩima kĩalanĩ na matheeelya mũndũ ũsu vau nginya vala vaĩ Yesũ. Nĩvo ĩndĩ Yesũ watavisye mũndũ ũsu atĩĩ: ‘Ũkĩla na ũithi.’ Mũndũ ũsu nĩwookĩlile na athi, na andũ masengʼa.

Ĩvinda yĩngĩ, Yesũ akililye ailika ũtũinĩ ũmwe, aũme ĩkũmi mawaĩte mangũ maũngama vaasa na maneena na wasya mũnene mayasya: ‘Yesũ twĩwʼĩe tei.’ Ĩvindanĩ yĩu, ala mawaĩte mangũ mayeetĩkĩlĩtwʼe kũthengeanĩa na andũ ala angĩ. O na ũu wĩ o vo, Mĩao ya Yeova yaĩtye mũndũ ũwaĩte mangũ avowʼa aĩlĩte kũthi ĩkalũnĩ. Kwoou Yesũ nĩweeie aũme asu mathi ĩkalũnĩ. Aũme asu me nzĩanĩ maendete ĩkalũnĩ, nĩmavoiwʼe. Yĩla ũmwe wa andũ asu wamanyie  kana nĩwavowʼa, nĩwasyokie ooka amũtũngĩa Yesũ mũvea na amũtaĩa Ngai. Katĩ wa aũme asu mavoiwʼe ĩkũmi, no ũsu ũmwe watũngĩie Yesũ mũvea.

Ve mũndũ mũka ũmwe wawaĩte vandũ va myaka 12 wendaa mũno kũvowʼa. Kwoou Yesũ e ĩkomanonĩ ĩnene mũndũ mũka ũsu nĩwookie ĩtina wake na akiita mũthya wa ngũa yake. Na vau kwa vau, mũndũ mũka ũsu avowʼa. Yĩla ũu weethĩiwe, Yesũ akũlilye atĩĩ: “Nũũ wangiita?” Mũndũ mũka ũsu nĩwatelemile, ĩndĩ o vamwe na ũu, nĩwamũthengeeie Yesũ na amũtavya kĩla weeka. Nake Yesũ amũkiakisya kwa kũmwĩa: ‘Mwĩĩtu wakwa, enda na mũuo.’

Ĩvindanĩ o yĩu, mũnene ũmwe weetawa Yailu nĩwamwĩsũvie Yesũ akĩmwĩa: ‘Ũka mũsyĩ kwakwa. Kelĩtu kakwa nĩ kawau mũno.’ Ĩndĩ Yesũ atavikĩte mũsyĩ kwa Yailu, kelĩtu kau nĩkakwie. Yĩla Yesũ wesie kũvika, eethĩie andũ aingĩ mavikie na maiĩa vamwe na mũsyĩ wa Yailu. Nĩvo ĩndĩ Yesũ wameie atĩĩ: ‘Ekai kũĩa, kelĩtu kekĩte kũkoma.’ Ĩtina wa ũu nĩwakwatie kelĩtu kau kwʼoko na akea: “Kelĩtu, nĩkwĩa, ũkĩla!” Nĩkekalile nthĩ mĩtũkĩ, na Yesũ eea asyai mako makanenge kĩndũ kasame. Kwasũanĩa ũndũ asyai mako meewie.