Timotheo aĩ mwana-a-asa wa mũika nthĩnĩ wa kĩkundi kya Lisitela. Ĩthe wake aĩ Mũkiliki, ĩndĩ inyia wake aĩ Mũyuti. Timotheo amanyĩiwʼe ũvoo ĩũlũ wa Yeova kuma e kana kanini nĩ inyia wake Eunike, na ũsũe Loisi.

Yĩla Vaulo waendie Lisitela savalĩnĩ yake ya kelĩ ya kũtavanyʼa, nĩwamanyie kana Timotheo nĩwendete ana-a-asa mũno, na nĩwendete kũmatetheesya. Kwoou Vaulo nĩwamũthokisye Timotheo aendanyʼe nake savalĩnĩ ĩsu. Ĩtina wa ĩvinda, Vaulo nĩwamũtetheeisye Timotheo eethĩwa mũtavanyʼa mũseo na mwalimũ wa ũvoo mũseo.

Veva mũtheu nĩwamatongoeasya Vaulo na Timotheo kĩla vandũ maendaa. Ũtukũ ũmwe, Vaulo nĩwoonie woni wa mũndũũme ũmwe aimwĩa athi Masetonia akamatetheesye. Kwoou Vaulo, Timotheo, Sila, na Luka nĩmaendie Masetonia makatavanyʼe na mambĩĩsya ikundi.

Kĩsionĩ kĩu kya Masetonia, ndũanĩ ya Thesalonika, ve aũme na aka aingĩ matwʼĩkie Aklĩsto. Ayuti amwe nĩmewʼĩaa Vaulo, Timotheo, na Sila kĩwĩu. Kwoou, nĩmoombanisye andũ aingĩ mamakusũlanyʼa ana-a-asa asu na mamatwaa kũla kwĩ atongoi ma ndũa, mayasya: ‘Aũme aa nĩ amaitha ma silikalĩ ya Lomi.’ Yĩla Vaulo na Timotheo moonie ũu nĩmamanyie kana maĩ thĩnanĩ, na kwoou ũtukũ ũsu nĩmasembie mathi Velia.

Andũ ma Velia maĩ na wendi mwingĩ wa kwĩmanyĩsya ũvoo mũseo, na kwoou Akiliki vamwe na Ayuti nĩmatwʼĩkie etĩkĩli. Ĩndĩ ve Ayuti maumie Thesalonika mooka ndũanĩ ĩsu na maete ithokoo, na ũu watuma Vaulo athi Athene. O na ũu wĩ o vo, Timotheo na Sila nĩmaendeeie kwĩkala Velia nĩ kana mekĩe ana-a-asa vinya. Ĩtina wa ĩvinda, Vaulo nĩweeie Timotheo asyoke Thesalonika nĩ kana  akatetheesye ana-a-asa maendeee kũmĩĩsya nũndũ nĩmathĩnawʼa mũno. O na ĩngĩ, Vaulo nĩwesie kũtũma Timotheo athokee ikundi ingĩ mbingĩ nĩ kana asyĩkĩe vinya.

Vaulo eeie Timotheo atĩĩ: ‘Andũ ala mekwenda kũmũthũkũma Yeova no nginya mathĩnwʼe.’ O nake Timotheo nĩwathĩniwʼe na ekwʼa yela nũndũ wa mũĩkĩĩo wake. Ũndũ ũsu nĩwatumie ethĩwa e mũtanu nũndũ nĩwamũnengie mwanya wa kũĩkĩĩthya kana we nũmwendete Yeova.

Vaulo aandĩkĩie Avilivi atĩĩ: ‘Nĩngũmũtũma Timotheo kũla mũĩ. Nake akamũmanyĩsya mwĩkalĩle ũla athũkũmi ma Yeova maĩle kwĩthĩwa nawʼo, na aimũmanyĩsya kũtavanyʼa.’ Vaulo nĩweesĩ Timotheo nĩwĩanĩasya maũndũ ala watavwʼa. Vaulo na Timotheo nĩmathũkũmie ĩmwe me anyanya vandũ va myaka mingĩ.