ĨSOMO YA 18
Ũndũ Ũtonya Kũmanya Aklĩsto Ala ma Wʼo
Ũmũnthĩ andũ mbilioni mbingĩ meyĩtaa Aklĩsto. Ĩndĩ o na vailye ũu, onthe mayĩthĩawa na mũĩkĩĩo ũvwʼanene, na meko moo me kĩvathũkanyʼo. Kwoou tũtonya kũmanya Aklĩsto ma wʼo ata?
1. We Mũklĩsto nũũ?
Aklĩsto nĩ aatĩĩi ma wʼo ma Yesũ Klĩsto. (Soma Meko ma Atũmwa 11:26.) Maĩkĩĩthasya ata kana kwa wʼo nĩ aatĩĩi ma Yesũ? Yesũ aisye atĩĩ: “Ethĩwa mũkekalaa ndetonĩ yakwa, inywʼĩ kwa wʼo mwĩ amanyĩwʼa makwa.” (Yoana 8:31) Ũu nĩ kwasya kana Aklĩsto ma wʼo no nginya maatĩĩae momanyĩsyo ma Yesũ. Na o tondũ Yesũ wamanyĩasya kĩla kĩ Maandĩkonĩ, o namo Aklĩsto ma wʼo nĩmaĩkĩĩthasya kana momanyĩsyo moo maumĩte Mbivilianĩ.—Soma Luka 24:27.
2. Aklĩsto ma wʼo monanasya wendo ata?
Yesũ eeie aatĩĩi make atĩĩ: “Inywʼĩ mwendane o tondũ namwendie.” (Yoana 15:12) Yesũ oonanisye ata kana nĩwendete amanyĩwʼa make? Nĩwatũmĩaa ĩvinda vamwe namo, akamekĩa vinya, na akamatetheesya. O na nĩweeyumisye akwʼa kwondũ woo. (1 Yoana 3:16) O ta ũu, Aklĩsto ma wʼo nĩmaĩlĩte kwĩka maũndũ maingĩ, eka o kũmanyĩsya ĩũlũ wa wendo. Nĩmaĩle kwonanyʼa kana kwa wʼo nĩmendanĩte kwĩsĩla ndeto na meko moo.
3. Aklĩsto ma wʼo matethasya wĩa wĩva wa vata?
Yesũ nĩwanengie amanyĩwʼa make wĩa wa kũtethya. Nĩwamatũmie “makatavanyʼe Ũsumbĩ wa Ngai.” (Luka 9:2) Aklĩsto ma ĩvinda ya atũmwa mayatavanasya o kũla mathaithĩaa kwĩ kwʼoka, ĩndĩ matavanasya o na kũla kweethĩawa andũ aingĩ, o na mĩsyĩ kwa andũ. (Soma Meko ma Atũmwa 5:42; 17:17.) O namo Aklĩsto ma wʼo ũmũnthĩ, matavanasya ũwʼo ũla wĩ Mbivilianĩ kwʼonthe kũla meethĩa andũ. Nĩmendete atũi moo, na kwoou nĩmatanĩaa kũtũmĩa ĩvinda na vinya woo, nĩ kana mamatavye ũvoo ũla wĩ Mbivilianĩ ũtonya kũmanenga wĩkwatyo na ũkiakisyo.—Maliko 12:31.
ĨMANYĨSYE MŨNANGO
Ĩmanyĩsye wone ũndũ ũtonya kũvathũkanyʼa Aklĩsto ma wʼo, na andũ ala mataatĩĩaa momanyĩsyo ma Yesũ na ngelekanyʼo yake.
4. Nĩmamanthaa ũwʼo Mbivilianĩ
Aklĩsto ma ĩvinda ya atũmwa nĩmoonaa Ndeto ya Ngai yĩ ya vata
Ti andũ onthe ala meyĩtaa Aklĩsto maatĩĩaa ũwʼo ũla wĩ Mbivilianĩ. Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Nĩ kwa nzĩa yĩva makanisa ala meyĩtaa ma Kĩklĩsto matumĩte andũ matamanya ũwʼo ũla Yesũ wamanyĩasya?
Yesũ amanyĩasya ũwʼo ũla umĩte Ndetonĩ ya Ngai. Somai Yoana 18:37, na ĩndĩ mũineenea ĩkũlyo yĩĩ:
-
Kwosana na ũndũ Yesũ wamanyĩisye, tũtonya kũmanya ata Aklĩsto ala ‘metĩkĩlaa ũla wʼo’?
5. Nĩmatavanasya ũwʼo ũla wĩ Mbivilianĩ
Aklĩsto ma ĩvinda ya atũmwa nĩmatavasya ala angĩ
Yesũ atanamba kũsyoka ĩtunĩ, nĩwanengie aatĩĩi make wĩa matethasye, na wĩa ũsu ũendeee nginya ũmũnthĩ. Somai Mathayo 28:19, 20 na Meko ma Atũmwa 1:8, na ĩndĩ mũineenea ĩkũlyo yĩĩ:
-
Wĩa wa kũtavanyʼa waĩ ũtethwʼe mũno wĩana ata?
6. Nĩmekalaa kwosana na kĩla matavanasya
Nĩ kyaũ kyaĩkĩĩthisye mũndũũme ũmwe wĩtawa Tom kana nĩwakwatĩte Ũklĩsto ũla wa wʼo? Ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩ kyaũ kyatumie Tom aeka kũĩkĩĩa ndĩni?
-
Nĩkĩ yu ũte na nzika kana nĩwakwatie ũwʼo?
Meko nĩmaneenaa mũno kwĩ ndeto. Somai Mathayo 7:21, na ĩndĩ mũineenea ĩkũlyo yĩĩ:
-
Yesũ amanyĩisye nĩ ũndũ wĩva wa vata mũnango, nĩ kĩla twaasya nĩtũĩkĩĩaa-ĩ, kana nĩ kĩla tũĩkĩĩthasya na meko maitũ?
7. Nĩmethĩawa mendanĩte
Aklĩsto ma ĩvinda ya atũmwa nĩmendanĩte mo ene
Aklĩsto ma wʼo nĩmalikasya mathayũ moo mũisyonĩ kwondũ wa Aklĩsto ala angĩ? Ĩloelei VITIO, na ĩndĩ mũineenea makũlyo ala maatĩĩe.
-
Kwosana na ũndũ twoona vitionĩ, nĩ kyaũ kyasukumie Lloyd eethĩwa eyũmbanĩtye kũkwʼa kwondũ wa Mwana-a-asa Johansson?
-
We nũkwona ta weekie ũndũ Mũklĩsto wa wʼo waĩle kwĩka?
Somai Yoana 13:34, 35, na ĩndĩ mũineenea makũlyo aa:
-
Mo Aklĩsto ma wʼo maĩle kwonaa andũ ma mbaĩ kana nthĩ ĩngĩ ata?
-
Matonya kwĩka ũu ata ĩvindanĩ ya kaũ?
ANDŨ AMWE MAASYA: “Ngai nĩwĩtĩkĩlaa ndĩni syonthe.”
-
Nĩ ĩandĩko yĩva ũtonya kũtũmĩa kwonanyʼa ũndũ tũtonya kũmanya Aklĩsto ma wʼo?
KĨLA TWEEMANYĨSYA
Aklĩsto ma wʼo nĩmaatĩĩaa momanyĩsyo ma Mbivilia, nĩmonanasya wendo wa wʼo mate na ũseleke, na nĩmatavanasya ũwʼo ũla wĩ Mbivilianĩ.
Makũlyo ma Kũsyokeleela
-
Maũndũ ala Aklĩsto ma wʼo maĩkĩĩaa maumĩte va?
-
Nĩ nguma yĩva ĩtumaa Aklĩsto ma wʼo mamanyĩka?
-
Aklĩsto ma wʼo matethasya wĩa wĩva?
MAŨNDŨ ANGĨ MA KWĨMANYĨSYA
Ĩmanyĩsye mũnango ĩũlũ wa andũ amwe matataa ũndũ matonya maatĩĩe ngelekanyʼo ya Yesũ na momanyĩsyo make.
Soma wone kĩla kyatumie mũndũ mũka ũmwe waĩ wa ndĩni akwata “mũsyĩ wa wʼo wa kĩ-veva.”
“Matũmĩie Mbivilia Kũsũngĩa Makũlyo Onthe Ala Naĩ Namo!” (Mũsyaĩĩsya, Ĩtukũ 1, Mwei wa 4, 2014)
Ĩmanyĩsye wone ũndũ Aklĩsto ma wʼo monasya ala angĩ wendo yĩla me thĩnanĩ.
Kũtetheesya Ana-a-asa Maitũ Yĩla Kweethĩwa Mĩisyo—Kalungu ka Vitio (3:57)
Soma wone ũndũ Aklĩsto ma wʼo ma ĩvinda ya atũmwa na ma ĩvinda yĩĩ, monanĩtye kana mo nĩ aatĩĩi ma wʼo ma Klĩsto.
“Nĩ Maũndũ Meva Monanasya Aklĩsto ma Wʼo?” (Mũsyaĩĩsya, Ĩtukũ 1, Mwei wa 3, 2012)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
