ĨSOMO YA 41
Mbivilia Yaĩtye Ata Ĩũlũ wa Kũmanyana Kĩ-mwĩĩ?
Andũ aingĩ mewʼaa mate eanĩe yĩla meũneenea maũndũ makonetye kũmanyana kĩ-mwĩĩ. Ĩndĩ o na ũu wĩ o vo, yĩla Mbivilia ĩkũneenea maũndũ makonetye kũmanyana kĩ-mwĩĩ, yĩkaa ũu ĩte kũvithanyʼa kĩndũ, ĩndĩ kwa nzĩa ya ndaĩa. Na kĩla yaĩtye nĩkĩtũtethasya. Vate nzika ũsu nĩ ũndũ ũkwosana na kĩlĩko, nũndũ Mbivilia yumĩte kwa Yeova, ũla nĩwe Mũmbi witũ. Nĩwĩsĩ kĩla kĩtwaĩlĩte vyũ. Na nũndũ wa ũu, nũtũtavasya kĩla twaĩle kwĩka nĩ kana tũmwendeesye, na nĩ kana twĩtanĩa thayũ tene na tene.
1. Yeova ethĩawa na woni wĩva ĩũlũ wa kũmanyana kĩ-mwĩĩ?
Yeova nĩwe ũnengete andũ mũthĩnzĩo wa kũmanyana kĩ-mwĩĩ. Endaa mũthĩnzĩo ũsu ũtanĩwe nĩ aũme na aka o ala matwaanĩte. Mũthĩnzĩo ũsu nũtumaa ala matwaanĩte methĩwa na syana, na ũkatuma monanyʼa wendo kwa nzĩa ĩla yaĩlĩte na ya kũtanĩthya. Na nĩkyo kĩtumi Ndeto ya Ngai yaĩtye atĩĩ: “Noitanĩa kĩveti kyaku kya ũthoo.” (Nthimo 5:18, 19) Yeova endaa Aklĩsto ala matwaanĩte methĩwe me aĩkĩĩku kwa ũla matwaanĩte nake, na kwoou mayaĩle kwĩka ũlaalai.—Soma Aevelania 13:4.
2. Ũlaalai nĩ kyaũ?
Mbivilia ĩtwĩĩte kana “andũ ala ilaalai . . . maikatiĩwa Ũsumbĩ wa Ngai.” (1 Akolintho 6:9, 10) Aandĩki ma Mbivilia ala maandĩkie na Kĩkiliki matũmĩie ndeto por·neiʹa kũelesya ũlaalai. Ndeto ĩsu yonanasya (1) kũmanyana kĩ-mwĩĩ a katĩ wa andũ matatwaanĩte, (2) mũndũũme kũkoma na mũndũũme kana mũndũ mũka na mũndũ mũka, na (3) mũndũ kũmanyana kĩ-mwĩĩ na nyamũ. Nĩtũmũtanĩthasya Yeova, naitũ ene tũkatetheka ‘tweevathana na ũlaalai.’—1 Athesalonika 4:3.
ĨMANYĨSYE MŨNANGO
Ĩmanyĩsye wone ũndũ ũtonya kwĩvathana na ũlaalai na ũndũ ũtonya kũtetheka weethĩwa na mwĩkalĩle mũtheu.
3. Kĩai ũlaalai
Mũndũũme ũmwe waĩ mũĩkĩĩku weetawa Yosevu, nĩwangʼangʼanie mũno nĩ kana aendeee kwĩthĩwa na mwĩkalĩle mũtheu. Somai Mwambĩlĩlyo 39:1-12, na ĩndĩ mũineenea makũlyo aa:
-
Nĩ kyaũ kyatumie Yosevu akuthũka na kũthi nza?—Sisya mũsoa wa 9.
-
We nũkwona Yosevu ta weekie ũtwi ũla waĩle? Nĩkĩ wasũngĩa ũu?
Ũmũnthĩ andũ ma mũika matonya kũatĩĩa ngelekanyʼo ya Yosevu ata nĩ kana makĩe ũlaalai? Ĩloelei VITIO.
Yeova eenda ithyonthe tũleane na ũlaalai. Somai 1 Akolintho 6:18, na ĩndĩ mũineenea makũlyo aa:
-
Nĩ maũndũ meva matonya kũtuma mũndũ eka ũlaalai?
-
Ũtonya ata kũkĩa ũlaalai?
4. Nũtonya kũsinda motato
Nĩ kyaũ kĩtonya kũtuma wĩthĩwa ũte ũndũ wĩ laisi kũsinda ĩtatwa ya kwĩka ũlaalai? Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Yĩla mwana-a-asa ũsu twoona vitionĩ wamanyie kana mosũanĩo na meko make mesaa kũtuma ethĩwa ate mũĩkĩĩku kwa mũka eekie ata?
O na Aklĩsto aĩkĩĩku nĩmangʼangʼanaa mavinda amwe nĩ kana methĩwe na mosũanĩo matheu. Ũtonya kwĩka ata nĩ kana ndũkaendeee kũsũanĩa maũndũ mate matheu? Somai Avilivi 4:8, na ĩndĩ mũineenea makũlyo aa:
-
Twaĩlĩte kũsũanĩaa ĩũlũ wa maũndũ ta meva?
-
Kũsoma Mbivilia na kwĩthĩwa na maũndũ maingĩ ma kwĩka ũthũkũminĩ wa Yeova, kũtonya kũtũtetheesya ata tũsinde ĩtatwa ya kwĩka naĩ?
5. Myolooto ya Yeova nĩtũtethasya
Yeova nĩwĩthĩawa esĩ kĩla kĩtwaĩlĩte vyũ. Nũtũtavasya ũndũ tũtonya kwĩthĩwa na mwĩkalĩle mũtheu, na ũndũ tũtonya kũtetheka tweeka ũu. Somai Nthimo 7:7-27 kana mwĩloele VITIO, na ĩndĩ mũineenea makũlyo ala maatĩĩe.
-
Mwanake ũsu eekie ũndũ wĩva watuma alika ĩtatwanĩ?—Sisya Nthimo 7:7-9.
-
Kwosana na Nthimo 7:23, 26, ũlaalai no ũlikye mũndũ mathĩnanĩ manene. Tũtonya kwĩvathana na mathĩna ta meva tweethĩwa na mwĩkalĩle mũtheu?
-
Tweethĩwa na mwĩkalĩle mũtheu tũkakwata moathimo meva ĩvinda yũkĩte?
Andũ amwe maasya kana ti ũndũ wa wendo kwĩthĩwa Mbivilia ĩleete aũme maikoma na aũme na aka maikoma na aka. Ĩndĩ Yeova, ũla nĩ Ngai wĩ wendo, endaa andũ onthe metanĩa thayũ tene na tene. Nĩ kana twĩtanĩa ũathimo ũsu, no nginya twĩkalae kwosana na mĩao yake. Somai 1 Akolintho 6:9-11, na ĩndĩ mũineenea ĩkũlyo yĩĩ:
-
Kwosana na Ngai, wendi wa aũme kũkoma na aũme kana aka kũkoma na aka, nowʼo mũthũku wĩ wʼoka?
Nĩ kana tũmwendeesye Ngai, ithyonthe nĩtwaĩle kwĩka moalyũku. Tũkatetheka tweeka ũu? Somai Savuli 19:8, 11, na ĩndĩ mũineenea makũlyo aa:
-
We nũkwona mĩao ya Yeova ya mwĩkalĩle ta yĩ vinya mũno kũatĩĩa? Nĩkĩ wasũngĩa ũu?
Yeova nũtetheesye andũ aingĩ makambĩĩa kwĩkala kwosana na myolooto yake ya mwĩkalĩle. O naku no aũtetheesye
ANDŨ AMWE MAASYA: “Vai ũthũku andũ elĩ mendanĩte kũmanyana kĩ-mwĩĩ.”
-
We ũtonya kwasya ata?
KĨLA TWEEMANYĨSYA
Yeova nĩwe ũnengete mũũme na mũka mũthĩnzĩo wa kũmanyana kĩ-mwĩĩ nĩ kana maũtanĩe.
Makũlyo ma Kũsyokeleela
-
Ũlaalai ũkonetye maũndũ meva?
-
Nĩ kyaũ kĩtonya kũtũtetheesya twĩvathane na ũlaalai?
-
Tũtethekaa ata yĩla twaatĩĩa myolooto ya Yeova ya mwĩkalĩle?
MAŨNDŨ ANGĨ MA KWĨMANYĨSYA
Ĩmanyĩsye wone nĩkĩ Ngai wendaa mũndũũme na mũndũ mũka, ala mekwenda kwĩkalanyʼa ĩmwe, matwaane kwosana na mĩao.
Ĩmanyĩsye wone nĩkĩ mwolooto wa Mbivilia ũla ũkonetye aũme kũkoma na aũme na aka kũkoma na aka, ũtonanasya kana twaĩle kũmena ala mekaa ũu.
“Ve Ũthũku Aũme Kũkoma na Aũme Kana Aka Kũkoma na Aka?” (Ũvoo wĩ kĩsesenĩ)
Ĩmanyĩsye wone ũndũ mĩao ya Ngai ĩla ĩkonetye kũmanyana kĩ-mwĩĩ ĩtũsũvĩaa.
“Kwʼo Kũmanyana Kĩ-mwĩĩ Kwĩsĩla Mũnuka Nĩ Kũthũku?” (Ũvoo wĩ kĩsesenĩ)
Nthĩnĩ wa ngewa yĩ na kyongo, “Manguie Nesa Mũno,” soma wone kĩla kyatetheeisye mũndũũme ũmwe wakomaa na aũme avĩndũa mwĩkalĩle wake nĩ kana amwendeesye Ngai.
“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 4, 2011)
a Ũu nĩ vamwe na kũmanyana kĩ-mwĩĩ kwĩsĩla mamutha ma ũsyai, kwĩsĩla mũnuka, kĩtimba, na kũkwatanga mamutha ma ũsyai ma mũndũ nĩ kana wĩanĩsye wendi wa kũmanyana kĩ-mwĩĩ.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
