ĨSOMO YA 14
Nĩkĩ Ngai Ũmbanĩtye Athũkũmi Make Ĩũlũ wa Nthĩ Methĩwe Kĩkundi?
1. Nĩkĩ Ngai wanyuvie Aisilaeli ma tene methĩwe andũ make??
Ngai anyuvie nzyawa sya Avalaamu na aitw’ĩkĩthya mbaĩ na ainenga mĩao. Mbaĩ ĩsu amĩtie “Isilaeli” na amĩtw’a mũsũvĩi wa ũthaithi wa w’o na ndeto yake. (Savuli 147:19, 20) Kwoou, andũ ma mbaĩ syonthe maĩ matonya kũunĩka kumana na Isilaeli.—Soma Mwambĩlĩlyo 22:18.
Ngai anyuvie Aisilaeli methĩwe ngũsĩ syake. Ũndũ Aisilaeli ma ĩvinda ya tene matwĩe wonanasya ũndũ andũ matonya kũathimĩka maatĩĩa mĩao ya Ngai. (Kũtũngĩlĩlwa Kwa Mĩao 4:6) Kwoou, kwĩsĩla Aisilaeli andũ angĩ maĩ matonya kũmũmanya Ngai ũla wa w’o.—Soma Isaia 43:10, 12.
2. Nĩkĩ Ngai wendaa athũkũmi make ũmũnthĩ methĩwe me ngwatanĩo?
Ĩtina wa ĩvinda, Ngai nĩwaleile Isilaeli, na vandũ vayo anyuva kĩkundi kya Kĩklĩsto. (Mathayo 21:43; 23:37, 38) Ũmũnthĩ, vandũ va Aisilaeli, Aklĩsto ma w’o nĩ mo ngũsĩ sya Yeova.—Soma Meko ma Atũmwa 15:14, 17.
Yesũ oombanisye aatĩĩi make matavany’e na maitw’ĩkĩthya andũ amanyĩw’a kuma mbaĩ syonthe. (Mathayo 10:7, 11; 24:14; 28:19, 20) Wĩa ũũ ũkilyĩ ũnathela mũminũkĩlyonĩ wa walany’o ũũ wa maũndũ. Yĩĩ nĩyo ĩvinda ya mbee Yeova ũmbanĩtye andũ milioni mbingĩ kuma mbaĩ syonthe na kũmaete ũthaithinĩ wa w’o. (Ũvuan’yo 7:9, 10) Aklĩsto ma w’o mombanĩtw’e nĩ kana mekĩane vinya na maitethany’a. Nthĩ yonthe, methĩawa na walany’o ũvw’anene wa momanyĩsyo ma Mbivilia mawũmbanonĩ moo.—Soma Aevelania 10:24, 25.
3. Ngũsĩ sya Yeova ĩvindanĩ yĩĩ syambĩlĩlye ata?
Myakanĩ ya 1870, kĩkundi kĩnini kya amanyĩw’a ma Mbivilia nĩkyambĩĩie kũkunĩkĩla ĩngĩ ũw’o wa Mbivilia ũla waĩ waaie. Nĩkyamanyie Yesũ oombanisye kĩkundi kya Kĩklĩsto nĩ kana kĩtavany’e, na kwoou kyambĩĩa kũtavany’a ĩũlũ wa Ũsumbĩ nthĩ yonthe. Mwakanĩ wa 1931 nĩkyambĩĩie kwĩyĩta Ngũsĩ sya Yeova.—Soma Meko ma Atũmwa 1:8; 2:1, 4; 5:42.
4. Ngũsĩ sya Yeova itongoeaw’a ata?
Ĩvinda ya atũmwa, ikundi sya Kĩklĩsto ila syaĩ nthĩ mbingĩ nĩsyatethekie kumana na nzama ĩla ĩtongoesye nũndũ nĩyamwĩnyivĩsye Yesũ ta we Mũtwe wa kĩkundi. (Meko ma Atũmwa 16:4, 5) O ta ũu ũmũnthĩ, Ngũsĩ sya Yeova ĩũlũ wa nthĩ yonthe nitethekaa kumana na Nzama Ĩla Ĩtongoesye yĩ na atumĩa me na ũmanyi. Nzama ĩsu ĩũngamĩe ovisi sya ũvonge sya Ngũsĩ sya Yeova ila syalyũlaa ithyomo, ikakũna kyava, na kũnyaĩĩkya mavuku na syĩndũ ingĩ sya kwĩmanyĩsya Mbivilia nthĩnĩ wa ithyomo mbee wa 600. Kwoou, Nzama Ĩla Ĩtongoesye nĩtonya kũtũmĩa Maandĩko kwĩkĩa vinya na kũtongoesya ikundi mbee wa 100,000 nthĩ yonthe. Nthĩnĩ wa kĩla kĩkundi, ve atumĩa, kana asyaĩĩsya, ala nĩ aũme meanĩsye maũndũ mana maĩle kwĩanĩw’a. Aũme asu masũvĩaa ĩĩthya ya Ngai kwa wendo.—Soma 1 Vetelo 5:2, 3.
Ngũsĩ sya Yeova syũmbanĩtw’e itavany’e ũvoo mũseo na iitw’ĩkĩthya amanyĩw’a. O ta atũmwa, ithyĩ tũtavanasya nyũmba na nyũmba. (Meko ma Atũmwa 20:20) Ĩngĩ, nĩtwĩyumasya tũmamanyĩsye Mbivilia andũ ala mendete ũw’o kuma ngoonĩ. Ĩndĩ, Ngũsĩ sya Yeova ti o kĩkundi tũ. Ithyĩ nĩ mũsyĩ wĩ na Ĩthe wĩ wendo. Ithyĩ twĩ ana-a-asa na eĩtu-a-asa na nĩtũthĩnĩkĩanĩaa. (2 Athesalonika 1:3) Nũndũ Ngũsĩ sya Yeova syũmbanĩtw’e vamwe ta kĩkundi nĩ kana imwendeesye Ngai na iitetheesya angĩ, nĩsyo andũ ala atanu vyũ ĩũlũ wa nthĩ.—Soma Savuli 33:12; Meko ma Atũmwa 20:35.
