Yesũ aitũma atũmwa make me ikundi thanthatũ sya andũ elĩ elĩ, nĩwamanengie motao maseo ĩũlũ wa ũndũ makatethasya wĩa wa kũtavany’a. Ĩndĩ ndaamatavya maũndũ asu tũ. Nĩwasyokie amakany’a ĩũlũ wa andũ ala matonya kũmavĩnga me ũtavany’anĩ. Ameie atĩĩ: “Sisyai! nĩngũmũtũma ta malondu katĩ wa nzũi; . . . Ĩsũvĩanei na andũ, nũndũ makamũnengane kotinĩ na makamũvũĩa masinakokenĩ moo. Na mũkatwawa mbee wa makavana na asumbĩ kwondũ wakwa.”—Mathayo 10:16-18.

Nĩvatonyeka aatĩĩi ma Yesũ makethĩwa mesaa kũvĩngwa mũno, ĩndĩ Yesũ amekĩie vinya kwa kũmea atĩĩ: “Mamũtwaa kũu, mũikavũavũane ĩũlũ wa ũndũ mwĩneena kana kĩla mwĩneena, nũndũ kĩla mwĩneena mũkanengwa saanĩ o ũsu, nũndũ ti o inyw’ĩ mwĩĩthĩwa mũineena, ĩndĩ nĩ veva wa Ĩthe wenyu ũla wĩ ĩtunĩ wĩĩthĩwa ũineena kwĩsĩla inyw’ĩ.” Yesũ aendeeie kũmea-ĩ: “Mũndũ akanengane mwana-a-inyia oawe, na ĩthe mwana wake, na syana ikamokĩlĩla asyai masyo na kũmoaĩthya. Na mũkamenwa nĩ andũ onthe kwondũ wa ĩsyĩtwa yakwa, ĩndĩ ũla ũkomĩĩsya kũvika mũthya, ũsu akatangĩĩwa.”—Mathayo 10:19-22.

Nũndũ wĩa wa kũtavany’a nĩ wa vata mũno, Yesũ nĩwakindĩlĩĩile kana amanyĩw’a make maĩle kwĩthĩwa me oĩ nĩ kana maendeee kwĩthĩwa na ũthasyo wa kũtethya wĩa ũsu. Aisye atĩĩ: “Mamũthĩny’a ndũanĩ ĩmwe, kĩai mũthi ĩngĩ; nũndũ nĩ w’o nĩngũmwĩa kana mũikakomany’a nongi ndũa syonthe sya Isilaeli Mwana wa mũndũ atavikĩte.”—Mathayo 10:23.

Ndeto ila Yesũ watavisye atũmwa make 12 syaĩ sya kwĩkĩa vinya mũno! Maũndũ ala wamatavisye mekae me ũtavany’anĩ, na mokany’o ala wamanengie ĩũlũ wa wĩa woo maĩ ma vata vyũ. Nĩ ũndũ wa kwendeesya kũmanya kana ndeto isu no syakonetye ala mesaa kũendeea na wĩa wa kũtavany’a ĩtina wa Yesũ kũkw’a na kũthayũũka. Ũndũ ũsu wonanĩtw’e nesa ndetonĩ ila watavisye amanyĩw’a make kana ‘makamenwa nĩ andũ onthe,’ ĩndĩ ti o andũ ala atũmwa matũmiwe makatavye ũvoo ĩvindanĩ yĩu. Na ũndũ ũngĩ nĩ kana vai vandũ tũsomaa Mbivilianĩ tũkona atũmwa maitwawa mbee wa makavana na asumbĩ ĩvindanĩ yĩu ĩnini matavanisye Kalilii, kana tũkasoma vandũ manenganiwe nĩ andũ ma mĩsyĩ yoo moawe.

Kwa w’o, Yesũ aneenaa ĩũlũ wa maũndũ makekĩka ĩvinda yũkĩte yĩla watavasya atũmwa ndeto isu. Kwasũanĩa ndeto ila watavisye amanyĩw’a make yĩla wameie kana maikakomany’a nongi ndũa syonthe “Mwana wa mũndũ atavikĩte.”  Ndeto isu syoonanasya kana amanyĩw’a maikamina wĩa wa kũtavany’a ĩũlũ wa Ũsumbĩ wa Ngai, Yesũ Klĩsto, ũla yu nĩ Mũsumbĩ, atokĩte ta mũsili wa Ngai.

Atũmwa mayaaĩle kũseng’a mavĩngwa me wĩanĩ woo wa kũtavany’a nĩkwĩthĩwa Yesũ ameie atĩĩ: “Mũmanyĩw’a ti mũnene kwĩ mũmanyĩsya wake, o na ngombo ti nene kwĩ vwana wayo.” Ndeto isu sya Yesũ syaĩ sya w’o ki. We mwene nĩwaneeneiwe naĩ na avĩngwa nũndũ wa kũtavany’a ũvoo mũseo wa Ũsumbĩ, na now’o kwesaa kwĩthĩwa kũilyĩ kwa amanyĩw’a make. Ĩndĩ o na ũu wĩ o vo, Yesũ ameie atĩĩ: “Mũikamakĩe ala moaaa mwĩĩ ĩndĩ maitonya kũaa thayũ; vandũ va ũu, mũkĩei ũla ũtonya kwananga thayũ o vamwe na mwĩĩ Ngienanĩ.”—Mathayo 10:24, 28.

Yesũ aĩ ngelekany’o nzeo ũndũnĩ ũsu. Ate na wia, nĩwoomĩĩisye kũkw’a kĩkw’ũ kĩ woo vandũ va kwĩtĩkĩlya andũ matume ethĩwa ate mũĩkĩĩku kwa mwene vinya w’onthe, Yeova. No Ngai Mwene Vinya W’onthe ũtonya kwananga “thayũ” wa mũndũ (wĩkwatyo wake wa kwĩthĩwa thayũ ĩvinda yũkĩte) kana ũtonya kũthayũũkya mũndũ atanĩe kwĩkala tene na tene. No nginya ũndũ ũsu wĩthĩwe weekĩie atũmwa vinya mũno!

Yesũ nĩwasyokie aelesya ũndũ aatĩĩi make methĩawa me andũ ma vata methonĩ ma Ngai. Aisye atĩĩ: “Tũsũni twĩlĩ tũitesawa ĩsendi o yĩmwe? Ĩndĩ vaiĩ kamwe katw’o kakavalũka nthĩ Ĩthe wenyu atesĩ. . . . Kwoou mũikethĩwe na wia; mwĩ ma vata mũno kwĩ tũsũni twingĩ.”—Mathayo 10:29, 31.

Ũvoo ũla amanyĩw’a matavanasya nĩwesaa kũaany’a andũ ma mũsyĩ, amwe mawĩtĩkĩle na angĩ maiũlea. Ũu nĩw’o nũndũ Yesũ aisye: “Mũikasũanĩe kana nookie kũete mũuo kũũ nthĩ.” Kwa w’o, no nginya mũndũ ethĩwe na ũkũmbaũ nĩ kana ende ũw’o wa Mbivilia o na ethĩwa andũ angĩ ma mũsyĩ maiwendete. Nĩkyo kĩtumi Yesũ waisye atĩĩ: “Mũndũ o na wĩva ũla wendaa ĩthe kana inyia kwĩ nyie ndambaĩle; na mũndũ o na wĩva ũla wendaa mwana kana mwĩĩtu wake kwĩ nyie ndambaĩle.”—Mathayo 10:34, 37.

Ĩndĩ andũ amwe maĩ metĩkĩle ũvoo ũla amanyĩw’a matavanasya. Yesũ aisye: “Mũndũ o na wĩva ũla ũnengae ũmwe wa aa anini kĩkombe kya kĩw’ũ kĩthithu anyw’e nũndũ ũsu nĩ mũmanyĩw’a, nĩmũtavya w’o kana ndakasya ĩtuvi yake nongi.”—Mathayo 10:42.

Atũmwa nĩmoombanĩtw’e nesa nĩ Yesũ kwa kũmanyĩw’a ũndũ meũthi kũneena na andũ ũtavany’anĩ, na kũnengwa motao na kwĩkĩwa vinya, na kwoou nĩmaendie mesĩle “kĩsionĩ na motũinĩ, maitavany’a ũvoo mũseo na kũvosya andũ kĩla vandũ.”—Luka 9:6.