Yesũ nĩwanoie mũno ĩtina wa kũmanyĩsya mũthenya w’onthe. Yĩla kwavikie wĩoo eeie amanyĩw’a make atĩĩ: “Ekai tũinge mũingo ũya ũngĩ wa ũkanga.” Yesũ ameaa mainge kuma ndũanĩ ya Kavelinaumi mathi kĩsionĩ kĩngĩ.—Maliko 4:35.

Kĩsio kĩu maendie kyeetawa Kelasene, na kyaĩ ngalĩko ya wumĩlonĩ wa syũa ya Ũkanga wa Kalilii. Kĩsio kĩu nokyo kyeetawa Ndekavoli na kyaĩ na ndũa mbingĩ. Kĩsio kĩu kyaĩ na syĩthĩo mbingĩ sya Kĩkiliki, o na kau ve Ayuti aingĩ mekalaa vo.

Andũ nĩmamanyie kana Yesũ nĩwauma Kavelinaumi athi kĩsionĩ kĩngĩ. Eka o ĩsiwa yĩla yakuĩte Yesũ na amanyĩw’a make, ve o masiwa angĩ maingaa mũingo wa ũkanga. (Maliko 4:36) Vala maingaa vayaĩ vaasa mũno. Ũkanga wa Kalilii wailyĩ ta ĩia ya kĩw’ũ na kĩw’ũ kyaw’o kĩyaĩ mũnyũ, na waĩ na ũasa wa kĩlomita ta 21 na ũthanthau wa kĩlomita ta 12. Ĩndĩ ũkanga ũsu waĩ mũliku mũno.

O na kau Yesũ ndaĩ na naĩ, nĩwanoete mũno nũndũ wa kũtinda atavanĩtye mũthenya w’onthe. Yĩla Yesũ na amanyĩw’a make malikile ĩsiwanĩ, nĩmambĩĩie kũinga ũkanga. Ĩndĩ Yesũ aendie ĩtina wa ĩsiwa na aaĩĩsya mũtwe wake kamũtonĩ na akoma.

Amwe ma amanyĩw’a make nĩmeesĩ nesa kũtwaa ĩsiwa, ĩndĩ savalĩ ĩsu yoo ndyesaa kwĩthĩwa yĩ laisi. Ve iĩma syathyũlũlũkĩte Ũkanga wa Kalilii, na mavinda maingĩ kĩw’ũ kya ũkanga ũsu kyeethĩawa kĩ kĩvyũ. Mavinda amwe, nzeve nthithu kuma iĩmanĩ isu nĩyatheeaa ĩkethĩana na ũvyũvu wa kĩw’ũ kya ũkanga, na ũu ũituma kwĩthĩwa na kĩseve kingĩ na iuutani syĩ vinya ũkanganĩ. Ũu nĩw’o kweethĩiwe ĩvindanĩ yĩu Yesũ na amanyĩw’a make maingaa ũkanga. Ĩtina wa ĩvinda ĩnini, ĩsiwa nĩyambĩĩie kũkimwa nĩ iuutani sya ũkanga. Ĩsiwa yĩu nĩyambĩĩie “kũlika kĩw’ũ nginya weethĩa yĩ vakuvĩ kũvota kĩw’ũnĩ.” (Luka 8:23) Ĩndĩ o na maũndũ mailyĩ ũu, Yesũ aendeeie kũkoma!

Amanyĩw’a ala matwaĩte ĩsiwa maendeee kũng’ang’ana vyũ nĩ kana yĩikavote kĩw’ũnĩ, na meekaa ũu matũmĩĩte ũmanyi ũla maĩ naw’o wa ũndũ maĩle kwĩka yĩla meethĩana na iuutani ũkanganĩ. Ĩndĩ maũndũ mayaĩ laisi ĩvindanĩ yĩĩ. Yĩla moonie kana mathayũ moo me mũisyonĩ, nĩmamũamũkisye Yesũ na mamwĩa atĩĩ: “Mwĩaĩi, tũtangĩĩe, nĩtũũthela!” (Mathayo 8:25) Amanyĩw’a nĩmakĩaa nũndũ moonaa nĩmeũvota kĩw’ũnĩ makw’e!

Yĩla Yesũ waamũkie, akũlilye atũmwa make atĩĩ: “Nĩkĩ mwĩ na wia wingĩvĩte ũu inyw’ĩ mwĩ na mũĩkĩĩo mũnini?” (Mathayo 8:26) Ĩtina wa ũu, nĩwakanisye kĩuutani na ũkanga akyasya, “Usya! Kilya!” (Maliko 4:39) Kĩseve nĩkyauisye na ũkanga nĩwakililye. (Maliko na Luka maielesya ĩũlũ wa ũndũ ũsu waĩ wa kũsengy’a, mambie kũkindĩlĩĩla kyama kĩla Yesũ weekie, na ĩndĩ ĩtina maweta kana amanyĩw’a maĩ na mũĩkĩĩo mũnini.)

Kwasũanĩa ũndũ kyama kĩu Yesũ weekie kyatetheeisye amanyĩw’a make! Amanyĩw’a nĩmeeyoneie na metho moo ũkanga ũyĩusya vyũ. Na nũndũ wa ũu nĩmakwatiwe nĩ wia mwingĩ. Makũlanilye atĩĩ: “We ũũ kwa w’o nũũ? O na kĩseve na ũkanga nikũmwĩw’a.” Kyama kĩla Yesũ weekie nĩkyatumie mavika mũingo wa ũkanga me aima. (Maliko 4:41–5:1) Nĩvatonyeka andũ ala angĩ maĩ na masiwa ũkanganĩ ũsu makethĩwa mang’ang’anie nginya mesa kũsyoka vala maumĩte.

Nĩ ũndũ wa kũkiakisya mũno kũmanya kana Mwana wa Ngai e na ũtonyi wa kũsiĩĩa syĩndũ ta iseve syĩ vinya iikaete wasyo! Yĩla Yesũ ũkethĩwa asumbĩkĩte ĩũlũ wa nthĩ, andũ onthe makekalaa na mũuo nũndũ kũikethĩwa kĩndũ kĩtonya kũmatelemya!