Ũvuany’o 7:1-17
7 Ĩtina wa maũndũ asu nĩnoonie alaĩka ana maũngamĩte konanĩ* inya sya nthĩ, makwete makalũmya vyũ iseve inya sya nthĩ, nĩ kana kĩseve o na kĩva kĩikauutane ĩũlũ wa nthĩ kana ũkanganĩ kana mũtĩnĩ o na wĩva.
2 Na noona mũlaĩka ũngĩ ambatĩte kuma wumĩlonĩ wa syũa, e na ũsiĩlo wa Ngai ũla wĩ thayũ; na eeta ala alaĩka ana na wasya mũnene, ala manengetwe ũkũmũ wa kwananga nthĩ na ũkanga,
3 akyasya: “Mũikanange nthĩ kana ũkanga kana mĩtĩ, nginya twambe kwĩkĩa ũsiĩlo itulyanĩ sya ngombo sya Ngai waitũ.”
4 Na neew’a ũtalo wa ala meekĩiwe ũsiĩlo, namo maĩ 144,000, na meekĩiwe ũsiĩlo kuma kĩla mbaĩ ya ana ma Isilaeli:
5 Ala meekĩiwe ũsiĩlo kuma mbaĩnĩ ya Yuta maĩ 12,000;
kuma mbaĩnĩ ya Leuveni maĩ 12,000;
kuma mbaĩnĩ ya Ngati maĩ 12,000;
6 kuma mbaĩnĩ ya Aseli maĩ 12,000;
kuma mbaĩnĩ ya Navitali maĩ 12,000;
kuma mbaĩnĩ ya Manase maĩ 12,000;
7 kuma mbaĩnĩ ya Simeoni maĩ 12,000;
kuma mbaĩnĩ ya Livai maĩ 12,000;
kuma mbaĩnĩ ya Isakali maĩ 12,000;
8 kuma mbaĩnĩ ya Nzevuluni maĩ 12,000;
kuma mbaĩnĩ ya Yosevu maĩ 12,000;
na kuma mbaĩnĩ ya Mbenyamini 12,000 meekĩwa ũsiĩlo.
9 Ĩtina wa maũndũ asu noona, na sisya! ĩkomano ĩnene yĩla vataĩ mũndũ o na ũmwe ũtonya kũyĩtala, kuma mbaĩnĩ syonthe na ngo na andũ na ithyomo, maũngamĩte mbee wa kĩla kĩvĩla kya ũsumbĩ na mbee wa kala Kalondu, mekĩĩte kanzũ nzaũ; na maĩ na mbonge sya makĩndũ mokonĩ moo.
10 Na maneenaa na wasya mũnene, makyasya: “Ũtangĩĩo wumaa kwa Ngai, ũla wĩkalĩte kĩvĩlanĩ kya ũsumbĩ, na kwa kala Kalondu.”
11 Alaĩka onthe maũngamĩte mathyũlũlũkĩte kĩla kĩvĩla kya ũsumbĩ, na ala atumĩa na ila syũmbe inya syĩ thayũ, na mavalũka nthĩ na ũthyũ mbee wa kĩvĩla kĩu kya ũsumbĩ na mamũthaitha Ngai,
12 makyasya: “Ameni! Ngatho, nguma, ũĩ, mũvea, ndaĩa, ũtonyi, na vinya nĩ sya Ngai waitũ tene na tene. Ameni.”
13 Na ũmwe wa ala atumĩa angũlya: “Aa mekĩĩte kanzũ nzaũ naaũ, na maumĩte va?”
14 Na vau kwa vau namũsũngĩa, namwĩa: “Mwĩaĩi wakwa, we nue wĩsĩ.” Nake ambĩa: “Aa nĩ ala maumĩte ũla thĩnanĩ mũnene, na mathambĩtye kanzũ syoo na makaitw’ĩkĩthya nzaũ na nthakame ya kala Kalondu.
15 Nĩkyo kĩtumi me mbee wa kĩvĩla kya ũsumbĩ kya Ngai, na mamũthũkũmaa ũthũkũmi mũtheu mũthenya na ũtukũ ĩkalũnĩ yake; na Ũla wĩkalĩte kĩvĩlanĩ kya ũsumbĩ akatambũũkya ĩeema yake ĩũlũ woo.
16 Maikew’a nzaa ĩngĩ o na maikew’a waũni ĩngĩ, na syũa yĩikamavĩvya kana ũvyũvu o na wĩva,
17 nũndũ kala Kalondu, ũla wĩ vakuvĩ na kĩla kĩvĩla kya ũsumbĩ, akamaĩthya na akamatongoesya nthongonĩ sya kĩw’ũ kya thayũ. Na Ngai akavangũla methoi onthe methonĩ moo.”
Maelesyo ma kwongeleela
^ Kana “ikotonĩ.”
