Ũvuany’o 8:1-13
8 Yĩla woombũie ũsiĩlo wa mũonza, nĩkwavindisye ki ĩtunĩ ta nusu saa.
2 Na noona alaĩka mũonza maũngamĩte mbee wa Ngai, na manengwa masoo mũonza.
3 Na mũlaĩka ũngĩ avika akwete kĩndũ kya thaavu kya kũtoeesya ũvani na aũngama kĩthembeonĩ, na anengwa ũvani mwingĩ nĩ kana awumye vamwe na mboya sya atheu onthe kĩthembeonĩ kya thaavu, kĩla kyaĩ mbee wa kĩvĩla kya ũsumbĩ.
4 Na syũki ya ũvani kuma kw’okonĩ kwa mũlaĩka ũsu vamwe na mboya sya ala atheu syambata kwa Ngai.
5 Ĩndĩ vau kwa vau ũla mũlaĩka oosa kĩndũ kya kũtoeesya ũvani na akĩkĩa mwaki kuma vau kĩthembeonĩ na awĩkya ĩũlũ wa nthĩ. Na kweethĩwa itundumo na mawasya na ũtisi na kĩthingitho kya nthĩ.
6 Na alaĩka mũonza ala maĩ na ala masoo mũonza meeyũmbany’a kũmavuva.
7 Na wa mbee avuva soo wake. Na mbua ya mavia na mwaki ivulanĩte na nthakame, syekw’a nthĩ; na kĩlungu kya katatũ kya nthĩ kyavya, na kĩlungu kya katatũ kya mĩtĩ kyavya, na mĩtĩ yonthe mĩũ yavya.
8 Na mũlaĩka wa kelĩ avuva soo wake. Na kĩndũ kĩilye kĩĩma kĩnene kyakanĩte mwaki kyekw’a ũkanganĩ. Na kĩlungu kya katatũ kya ũkanga kyatw’ĩka nthakame;
9 na kĩlungu kya katatũ kya syũmbe syĩ thayũ ila syĩ ũkanganĩ kyakw’a, na kĩlungu kya katatũ kya meli ila syaĩ ũkanganĩ kyaanangĩka.
10 Na mũlaĩka wa katatũ avuva soo wake. Na ndata nene yakanĩte ta taa yavalũka kuma ĩtunĩ, na yavalũkĩla kĩlungu kya katatũ kya mbũsĩ na kya nthongo* sya kĩw’ũ.
11 Ĩsyĩtwa ya ndata ĩsu nĩ mũtĩ wĩ ũũ. Na kĩlungu kya katatũ kya kĩw’ũ kyeethĩwa na ũũ, na andũ aingĩ makw’a kumana na kĩw’ũ kĩu, nũndũ kyaĩ ũũ.
12 Na mũlaĩka wa kana avuva soo wake. Na kĩlungu kya katatũ kya syũa na kĩlungu kya katatũ kya mwei na kĩlungu kya katatũ kya ndata syakũnwa, nĩ kana kĩlungu kya katatũ kyasyo kĩtw’ĩke kĩvindu na kĩlungu kya katatũ kya mũthenya kĩikethĩwe na kyeni, na ũtukũ o naw’o.
13 Na noona, na neew’a ndiũ ĩũlũkĩte ĩtunĩ katĩ ĩkyasya ũũ na wasya mũnene: “Kyeva, kyeva, kyeva nĩ kwa ala matwĩe ĩũlũ wa nthĩ nũndũ wa mawasya ma masoo ala angĩ makilyĩ kũvuvwa nĩ alaĩka ala angĩ atatũ!”
Maelesyo ma kwongeleela
^ Kana “mbuluti.”
