1 Akolintho 7:1-40
7 Yu ĩũlũ wa maũndũ ala mũnaandĩkĩte, nĩ ũseo mũndũũme ndakakiite* mũndũ mũka;
2 ĩndĩ nũndũ wa kwongeleka kwa ũlaalai,* eka kĩla mũndũũme ethĩwe na mũka wake na kĩla mũndũ mũka ethĩwe na mũũme wake.
3 Eka mũndũũme anenge mũka wake kĩla kĩmwaĩle, na mũka o nake eke oou kwelekela mũũme wake.
4 Mũndũ mũka nde na ũkũmũ ĩũlũ wa mwĩĩ wake mwene, ĩndĩ mũũme wake e naw’o; o ta ũu mũndũũme nde na ũkũmũ ĩũlũ wa mwĩĩ wake mwene, ĩndĩ mũka wake e naw’o.
5 Mũikethĩwe mũivatana ene kwa ene ate o yĩla inyw’elĩ mweetĩkĩlana kũeka kwa kavinda, nĩ kana mũkwate ĩvinda ya kũvoya na kũka vamwe ĩngĩ, nĩ kana Satani ndakaendeee kũmũtata nũndũ wa kwĩthĩwa mũte kwĩsiĩĩa.
6 No mũatĩĩe kĩla naweta, o na kau ti mwĩao.
7 Ĩndĩ wendi wakwa nĩ ta kethĩwa kĩla mũndũ no wĩkala o takwa. Ĩndĩ kĩla mũndũ e na mũthĩnzĩo wake kuma kwa Ngai, ũmwe mũthĩnzĩo wa mũthemba mũna na ũngĩ mũthĩnzĩo wa mũthemba ũngĩ.
8 Yu kwa ala matatwaanĩte na ala ndiwa nĩmea nĩ kavaa makekala ũndũ nyie nĩilye.
9 Ĩndĩ ethĩwa maitonya kwĩsiĩĩa, eka matwaane, nũndũ nĩ kavaa kũtwaana kwĩ kwakana mwaki.
10 Kwa ala matwaanĩte nĩngũmanenga ũtao, ĩndĩ tinyie nĩ Mwĩaĩi, kana mũndũ mũka ndaĩle kũtaanĩsya na mũũme wake.
11 Ĩndĩ ethĩwa nũkũtaanĩsya na mũũme wake, nĩekale ate mũtwae kana ethĩwa ti ũu ew’ane na mũũme wake; na mũndũũme o nake ndaĩle kũtia mũka wake.
12 Namo ala angĩ nĩmea, ĩĩ nyie, ĩndĩ ti Mwĩaĩi: Ethĩwa mwana-a-asa atwaĩte mũndũ mũka ũte mwĩtĩkĩli na mũndũ mũka ũsu nũkwenda kwĩkala nake, ndakamũtie;
13 na ethĩwa mũndũ mũka atwaĩtwe nĩ mũndũũme ũte mwĩtĩkĩli na mũndũũme ũsu nũkwenda kwĩkala nake, ndakatie mũũme wake.
14 Nũndũ mũndũũme ũla ũte mwĩtĩkĩli nũtheetw’e nũndũ wa mũka wake, na mũndũ mũka ũla ũte mwĩtĩkĩli nũtheetw’e nũndũ wa mwana-a-asa; ta kethĩwa ti ũu, syana syenyu syĩthĩwa ite ntheu, ĩndĩ yu nĩ ntheu.
15 Ĩndĩ ethĩwa ũla ũte mwĩtĩkĩli nĩwatw’a kũthi,* eka athi, mwana-a-asa kana mwĩĩtu-a-asa ndovetwe ũndũnĩ ũsu, ĩndĩ Ngai amwĩtie inyw’ĩ mwĩthĩwe na mũuo.
16 We kĩveti, wĩsĩ ata kana ndũkatangĩĩa mũemeu? Naku we mũndũũme, wĩsĩ ata kana ndũkatangĩĩa kĩveti kyaku?
17 O na ũu wĩ o vo, o tondũ Yeova wanengie kĩla ũmwe wenyu kĩanda, ekai kĩla ũmwe wenyu akinyae o ũndũ Ngai wamwĩtie ailye. Na ũu nĩw’o ngwĩaĩa ikundi syonthe.
18 Ve ũmwe wenyu weetiwe e mwaĩke? Eka ekale e mwaĩke. Ve ũmwe wenyu weetiwe ate mwaĩke? Ndakaĩkwe.
19 Kwaĩkwa ti kĩndũ, na kũlea kwaĩkwa ti kĩndũ; kĩla kya vata nĩ kũkwataa mĩao ya Ngai.
20 O ũndũ kĩla ũmwe weetiwe ailye, aendeee kwĩkala ailye oou.
21 Weetiwe wĩ ngombo? Ũndũ ũsu ndũkaũthĩny’e; ĩndĩ ethĩwa nĩvatonyeka ũkathaw’a, tũmĩa mwanya ũsu nesa.
22 Nũndũ mũndũ o na wĩva ũla weetiwe nthĩnĩ wa Mwĩaĩi e ngombo ethĩawa e mũndũ ũthaĩtw’e wa Mwĩaĩi; na o ta ũu ethĩwa mũndũ o na wĩva eetiwe e mũthasye, nĩ ngombo ya Klĩsto.
23 Mwathooiwe na thooa mũnene; ekai kwĩthĩwa mwĩ ngombo sya andũ.
24 O ũndũ kĩla ũmwe wenyu weetiwe ailye, ana-a-asa, aendeee kwĩkala ailye ũu mbee wa Ngai.
25 Na yu ĩũlũ wa eĩtu ala matesĩ mũndũũme,* ndi na mwĩao kuma kwa Mwĩaĩi, ĩndĩ nĩngumya woni wakwa ta ũmwe ũla wonetw’e tei nĩ Mwĩaĩi nĩthĩwe nĩ mũĩkĩĩku.
26 Kwoou, nĩona nũseo mũndũũme aendeee kwĩkala o ũndũ ũilye nũndũ wa mawũmũ ala me kw’o.
27 We wĩ mwove kwa mũka waku? Eka kũmantha kũthaw’a. Nĩwĩthĩwa ũte na kĩveti? Eka kũmantha kĩveti.
28 Ĩndĩ o na ethĩwa nũũtwaana, ndũkwĩka naĩ. Na ethĩwa mwĩĩtu ũtesĩ mũndũũme* nũkũtwawa, ndekwĩka naĩ. Ĩndĩ ala mekwĩka ũu makeethĩwa na thĩna mwĩĩnĩ woo. Ĩndĩ kĩeleelo kyakwa nĩ kũmũtethya.
29 O na ĩngĩ, ana-a-asa, nĩngũmwĩa kana ĩvinda yĩla yĩtiele nĩ ĩnini. Kuma yu ekai ala me na iveti mekale ta mate nasyo,
30 na ala mekũĩa ta ala mate kũĩa, na ala meũtana ta ala mateũtana, na ala meũthooa ta ala mate na kĩndũ,
31 na ala meũtũmĩa nthĩ ta ala mateũmĩtũmĩa vyũ; nũndũ maũndũ ala me ĩũlũ wa nthĩ maendeee kũalyũka.
32 Vate nzika, nĩenda mwĩthĩwe mũte na mawĩmakĩo. Mũndũũme ũla ũtatwaanĩte athĩnĩkĩaa maũndũ ma Mwĩaĩi, ũndũ ũtonya kũmwendeesya Mwĩaĩi.
33 Ĩndĩ mũndũũme ũla ũtwaanĩte athĩnĩkĩaa maũndũ ma nthĩ ĩno, ũndũ ũtonya kwendeesya kĩveti kyake,
34 na ethĩawa aaanĩkĩte. O na ĩngĩ, mũndũ mũka ũla ũte mũtwae, na mwĩĩtu ũla ũtesĩ mũndũũme, athĩnĩkĩaa maũndũ ma Mwĩaĩi, nĩ kana ethĩwe e mũtheu mwĩĩnĩ na vevanĩ wake. Ĩndĩ mũndũ mũka ũla mũtwae athĩnĩkĩaa maũndũ ma nthĩ, ũndũ ũtonya kũmwendeesya mũũme wake.
35 Ĩndĩ nĩneena maũndũ asu nĩ kana nĩmũtethye, na ti kwondũ wa kũmũsiĩĩa, ĩndĩ nĩ kana nĩmwony’e maũndũ ala ma vata na ũndũ mũtonya kũendeea kũmwĩyumĩsya Mwĩaĩi vyũ mũte na kĩndũ kĩũmũvĩngĩĩsa.
36 Ĩndĩ ethĩwa mũndũ o na wĩva nũkwona ta wĩ na mwĩkalĩle mũthũku nũndũ wa kwĩkala atatwaanĩte, na ethĩwa nũvĩtũkĩte myaka ya ũika, ũũ nĩw’o waĩle kwĩka: Nĩeke ũndũ ũkwenda; ndekwĩka naĩ. Eka atwaane.
37 Ĩndĩ ethĩwa mũndũ o na wĩva nĩ mwĩanĩe ngoonĩ yake na nde na vata, na e na ũkũmũ ĩũlũ wa wendi wake na nũtw’ĩte ngoonĩ yake kwĩkala atatwaanĩte, eĩka nesa.
38 Kwoou, mũndũ o na wĩva ũla watwaana ethĩawa eeka nesa, ĩndĩ mũndũ o na wĩva ũla wekala atatwaanĩte ethĩawa eeka nesanga.
39 Mũndũ mũka ethĩawa e mwove ĩvinda yonthe yĩla mũũme wĩ thayũ. Ĩndĩ ethĩwa mũũme nĩwakw’a, nĩ mũthasye kũtwawa nĩ ũla ũkwenda, ĩndĩ o nthĩnĩ wa Mwĩaĩi.
40 Ĩndĩ kwosana na woni wakwa, ethĩawa e mũtanu aendeea kwĩkala ũndũ ũilye; na nyie nĩona vate nzika o nakwa nĩ na veva wa Ngai.
Maelesyo ma kwongeleela
^ Ũu nĩ kwasya, ndakakome na.
^ Wingĩ wa ndeto ya Kĩkiliki por·neiʹa. Sisya Maelesyo ma Ndeto.
^ Kana “mataanĩsye.”
^ Ndeto ya Kĩkiliki ĩla ĩtũmĩĩtwe vaa no yonany’e mwĩĩtu ũte mũtwae kana mũndũũme ũtatwaanĩte.
^ Ndeto ya Kĩkiliki ĩla ĩtũmĩĩtwe vaa no yonany’e mwĩĩtu ũte mũtwae kana mũndũũme ũtatwaanĩte.
