1 Yoana 2:1-29
2 Inyw’ĩ syana syakwa nini, nĩmũandĩkĩa maũndũ aa nĩ kana mũikeke naĩ. Ĩndĩ ethĩwa mũndũ nĩweeka naĩ, twĩ na mũtetheesya* ũla wĩ vamwe na Asa, nake nĩ Yesũ Klĩsto, na nĩ mũlũngalu.
2 Na nĩwe nthembo ya wĩw’anĩthyo kwondũ wa naĩ sitũ, na ti kwondũ wa naĩ sitũ twĩ ithyoka ĩndĩ kwondũ wa naĩ sya nthĩ yonthe.
3 Na nũndũ wa ũu, nĩtwĩsĩ kana nĩtũmũmanyĩte, na ũu nĩ kwasya, ethĩwa nĩtũkũendeea kũkwata mĩao yake.
4 Ũla waasya, “Nyie nĩnĩmwĩsĩ,” ĩndĩ ndaatĩĩaa mĩao yake nĩ mũkengani, na ũla w’o ndwĩ nthĩnĩ wa mũndũ ũsu.
5 Ĩndĩ ũla ũkwataa ndeto yake, vate nzika wendo wa Ngai nĩwĩanĩĩtw’e nthĩnĩ wa mũndũ ũsu. Kwa nzĩa ĩsu nĩtwĩsĩ kana twĩ ngwatanĩo vamwe nake.
6 Ũla waasya kana e ngwatanĩo vamwe nake no nginya we mwene aendae o ũndũ ũsu waendaa.
7 Endwa, ndiũmũandĩkĩa ĩũlũ wa mwĩao mweũ, ĩndĩ nĩmũandĩkĩa ĩũlũ wa mwĩao wa tene ũla mwaĩ naw’o kuma mwambĩlĩlyonĩ. Mwĩao ũsu wa tene nĩ ndeto ĩla mweewie.
8 O na ĩngĩ, nĩmũandĩkĩa ĩũlũ wa mwĩao mweũ ũla we mwene waatĩĩie o nenyu mũatĩĩaa, nũndũ kĩvindu nĩkĩvĩtĩte na kyeni kya w’o nĩkĩmulĩkĩte.
9 Ũla waasya e kyeninĩ ĩndĩ nũmenaa mwana-a-asa wake e kĩvindunĩ o na yu.
10 Ũla wendete mwana-a-asa wake ekalaa kyeninĩ, na nthĩnĩ wake vaiĩ kĩndũ kya kũlulutĩkya.
11 Ĩndĩ ũla ũmenete mwana-a-asa wake e kĩvindunĩ na aendelaa kĩvindunĩ, na ndesĩ kũla ũendete nũndũ kĩvindu nĩkĩmũtw’ĩte kĩlalinda.
12 Inyw’ĩ syana nini, nĩmũandĩkĩa nũndũ nĩmũekeetwe naĩ syenyu kwondũ wa ĩsyĩtwa yake.
13 Inyw’ĩ aa-ĩthe, nĩmũandĩkĩa nũndũ nĩmũmũmanyĩte ũla wa kuma mwambĩlĩlyonĩ. Inyw’ĩ anake, nĩmũandĩkĩa nũndũ nĩmũmũsindĩte ũla mũthũku. Inyw’ĩ syana nini, nĩmũandĩkĩa nũndũ nĩmũmũmanyĩte Asa.
14 Inyw’ĩ aa-ĩthe, nĩmũandĩkĩa nũndũ nĩmũmũmanyĩte ũla wa kuma mwambĩlĩlyonĩ. Inyw’ĩ anake, nĩmũandĩkĩa nũndũ mwĩ na vinya na ndeto ya Ngai yĩkalaa nthĩnĩ wenyu na nĩmũsindĩte ũla mũthũku.
15 Mũikende nthĩ kana syĩndũ ila syĩ ĩũlũ wa nthĩ. Ethĩwa mũndũ o na wĩva nũmyendete nthĩ, wendo wa Asa ndwĩ nthĩnĩ wake;
16 nĩkwĩthĩwa syĩndũ syonthe ila syĩ ĩũlũ wa nthĩ—wendi wa mwĩĩ na wendi wa metho na mũndũ kwonany’a syĩndũ ila wĩ nasyo*—iyumanĩte na Asa, ĩndĩ syumanĩte na nthĩ.
17 O na ĩngĩ, nthĩ nĩkũvĩta vamwe na mawendi mayo, ĩndĩ ũla wĩkaa kwenda kwa Ngai ekalaa tene na tene.
18 Inyw’ĩ syana nini, nĩ saa wa mũthya, na o tondũ mwĩw’ĩte kana nthũ ya Klĩsto nĩyũkĩte, o na yu kwĩ nthũ mbingĩ sya Klĩsto, na nũndũ wa ũu nĩtwĩsĩ kana nĩ saa wa mũthya.
19 Nĩmaumie kwitũ, ĩndĩ mayaĩ ma mũthemba witũ; nũndũ ta kethĩwa maĩ ma mũthemba witũ methĩwa mekalile vamwe naitũ. Ĩndĩ maumie kwitũ nĩ kana vamanyĩke nesa kana ti onthe maĩ ma mũthemba witũ.
20 Na nĩmwĩtĩkĩw’e mauta nĩ ũla mũtheu, na inyw’onthe mwĩ na ũmanyi.
21 Ndiũmũandĩkĩa nĩkwĩthĩwa mũyĩsĩ ũla w’o, ĩndĩ nĩmũandĩkĩa nũndũ nĩmũwĩsĩ, na nũndũ vaiĩ ũvũngũ wumanaa na ũla w’o.
22 Ũla mũkengani nũũ ate o ũla ũkaĩaa kana Yesũ nĩwe Klĩsto? Ũsu nĩwe nthũ ya Klĩsto, ĩĩ, ũla ũkaĩaa Asa na Mwana.
23 Kĩla mũndũ ũmũkaĩaa Mwana ndetĩkĩlĩtwe nĩ Asa. Ĩndĩ mũndũ o na wĩva ũla ũmwĩtĩkĩlaa Mwana nĩwĩtĩkĩlawa nĩ Asa o nake.
24 O nenyu, no nginya kĩla mweewie kuma mwambĩlĩlyonĩ kĩkalae nthĩnĩ wenyu. Ethĩwa kĩla mweewie kuma mwambĩlĩlyonĩ kĩkalaa nthĩnĩ wenyu, o nenyu mũkekalaa nthĩnĩ wa ngwatanĩo vamwe na Mwana na vamwe na Asa.
25 O na ĩngĩ, kĩĩ nĩkyo we mwene watwathie, nakyo nĩ thayũ wa tene na tene.
26 Nĩmũandĩkĩa maũndũ aa ĩũlũ wa ala mekwenda kũmwasya.
27 Ĩndĩ inyw’ĩ, kwĩtĩkĩw’a mauta kũla wamwĩtĩkĩisye kwĩkalaa nthĩnĩ wenyu, na mũi na vata wa mũndũ o na wĩva kũmũmanyĩsya; ĩndĩ kwĩtĩkĩw’a mauta kũla wamwĩtĩkĩisye nĩkũmũmanyĩasya ĩũlũ wa maũndũ onthe, na ũu nĩ w’o na ti ũvũngũ. Na o tondũ kũmũmanyĩĩtye, ĩkalai mwĩ ngwatanĩo vamwe nake.
28 Kwoou yu, inyw’ĩ syana nini, ĩkalai mwĩ ngwatanĩo vamwe nake, nĩ kana yĩla ũkaumĩlw’a twĩthĩwe na ũthasyo wa kũneena na tũikaume vala ũĩ nũndũ wa nthoni ĩvindanĩ ya kwĩthĩwa vo kwake.
29 Ethĩwa nĩmwĩsĩ kana nĩ mũlũngalu, nĩmwĩsĩ kana kĩla mũndũ wĩkaa ũlũngalu nũtw’ĩkĩte mwana wake.
