Meko ma Atũmwa 13:1-52
13 Na kĩkundinĩ kĩla kyaĩ Andiokia kwaĩ athani na amanyĩsya, namo nĩ: Valanava, Simeoni ũla wĩtawa Nikeli, Lukio kuma Kulene, Saulo, na Manaene ũla wasomete ĩmwe na Mũsumbĩ Elote.
2 Na maendeee kũmũthũkũma Yeova na kũtĩĩa kũya, veva mũtheu wamea: “Nyuvai Valanava na Saulo kwondũ wa wĩa ũla nĩmetĩe matethye.”
3 Na ĩtina wa kũtĩĩa kũya na kũvoya, mamailĩĩla moko na mamaeka mathi.
4 Kwoou aũme asu, mamina kũtũmwa nĩ veva mũtheu, matheea Seleusi, na kuma vau malika melinĩ mathi Kuvolo.
5 Na yĩla mavikie Salamisi, mambĩĩa kũtavany’a ndeto ya Ngai masinakokenĩ ma Ayuti. Na Yoana nĩwe wamatetheeasya.*
6 Na ĩtina wa kũthi kĩla vandũ kĩthamanĩ kĩu nginya Vavo, nĩmakomanie na mũndũ ũmwe Mũyuti weetawa Vali-Yesũ, ũla waĩ mũoi na mwathani wa ũvũngũ.
7 Aĩ vamwe na mũnene* weetawa Selikio Vaulo, mũndũ mũĩ. Mũndũ ũsu nĩweetie Valanava na Saulo, nũndũ aĩ na mea maingĩ ma kwĩw’a ndeto ya Ngai.
8 Ĩndĩ Elumo ũla mũoi (ũsu nĩw’o ũalyũlo wa ĩsyĩtwa yake) nĩwambĩĩie kũmavĩnga ayenda kũmwelelũkya mũnene ũsu kuma mũĩkĩĩonĩ.
9 Na Saulo, ũla wĩtawa Vaulo, ausũwa nĩ veva mũtheu na amũketeea,
10 na amwĩa: “We mũndũ wusĩe kĩla mũthemba wa ũkengani na ũng’endu, mwana wa Ndevili, mũmaitha wa maũndũ onthe malũngalu, we ndũeka kũthyoekya nzĩa ndũngalu sya Yeova?
11 Sisya! Kw’oko kwa Yeova kwĩ ĩũlũ waku na nũũtw’ĩka kĩlalinda, na kwa ĩvinda ndwĩĩthwa ũtonya kwona kyeni kya syũa.” Na vau kwa vau metho make mamesya mũumbĩ mũito na mbindu, na ambĩĩa kũvavata aimantha mũndũ amũkwate kw’oko amũtongoesye.
12 Na yĩla ũla mũnene woonie kĩla kyaĩ kĩneekĩka, aĩkĩĩa nũndũ nĩwaseng’iw’e nĩ momanyĩsyo ma Yeova.
13 Na Vaulo na ala waĩ namo nĩmaendie na meli kuma Vavo nginya Velika ya Vambilia. Ĩndĩ Yoana amatia na asyoka Yelusaleme.
14 Namo maendeea na kyalo kuma Velika na mavika Andiokia ya Visitia. Na kũu nĩmalikile ĩsinakokenĩ mũthenya wa Savato na mekala nthĩ.
15 Ĩtina wa andũ onthe kũsomewa Mĩao na Mavuku ma Athani, aũngamĩi ma ĩsinakoke matũmana kũla maĩ, makyasya: “Ana-a-asa, ethĩwa mwĩ na ndeto ya kũmathangaasya andũ aa, mĩwetei.”
16 Kwoou Vaulo aũngama na amokĩlĩlya kw’oko, na amea:
“Aũme ma Isilaeli, na inyw’ĩ ala mũmũkĩaa Ngai, ĩthukĩĩsyei.
17 Ngai wa andũ ma Isilaeli nĩwamanyuvie aa-ũmae maitũ, na amanenevya andũ asu yĩla mekalaa me aeni nthĩ ya Misili, na amaumya kw’o na kw’oko kwake kwĩ vinya.
18 Na nĩwamomĩĩisye weũnĩ kwa ĩvinda ya myaka ta 40.
19 Amina kwananga mbaĩ mũonza ila syaĩ Kanaani, nĩwamanengie nthĩ ya mbaĩ isu yĩthĩwe ũtiĩwa woo.
20 Maũndũ asu onthe meekĩkie ĩvindanĩ ya myaka ta 450.
“Ĩtina wa ũu nĩwamanengie asili nginya ĩvinda ya mwathani Samueli.
21 Na ĩtina wa ũu masya meenda manengwe mũsumbĩ, na Ngai amanenga Saulo mwana wa Kisi, mũndũ wa mbaĩ ya Mbenyamini, ũla wamasumbĩkie myaka 40.
22 Na yĩla wamũvetangie, nĩwamokĩlĩilye Ndaviti ethĩwe mũsumbĩ, na aumya ũkũsĩ ĩũlũ wake, akyasya: ‘Nĩnonete Ndaviti mwana wa Yese e mũndũ wĩtĩkĩlĩkĩte ngoonĩ yakwa, nake akeeka maũndũ ala nendaa.’
23 Na kwosana na watho wake, Ngai nĩwanengie Isilaeli mũtangĩĩi kuma ũsyaonĩ wa mũndũ ũsu, na mũtangĩĩi ũsu nĩ Yesũ.
24 Nake atanamba kũvika, Yoana nĩwatavisye Aisilaeli onthe ũtheinĩ mavatiswe, nĩ kana monany’e kana nĩmelilĩte.
25 Na Yoana e vakuvĩ kũmina ũthũkũmi wake, nĩwaasya atĩĩ: ‘Inyw’ĩ mwĩona ta inyie ũũ? Tinyie we. Ĩndĩ sisya! Ve ũmwe wũkĩte, ũla ndii sya iatũ syake ndaĩlĩtwe nĩ kũthasya.’
26 “Ana-a-asa, inyw’ĩ nzyawa sya Avalaamu na ala angĩ onthe me katĩ wenyu ala makĩaa Ngai, ndeto ĩno ya ũtangĩĩo nĩtũmĩtwe kwitũ.
27 Nũndũ ekali ma Yelusaleme na atongoi moo mayaamũmanya, ĩndĩ yĩla mamũsilĩlaa meanĩisye kĩla kyaneeniwe Mavukunĩ ma Athani, ala o na yu masomawa na wasya mũnene kĩla mũthenya wa savato.
28 O na kau mayaaona ũndũ ũtonya kũtuma oawa, nĩmamũthing’ĩĩisye Vilato amũae.
29 Na yĩla meanĩisye maũndũ onthe ala maandĩkĩtwe ĩũlũ wake, nĩmamumisye mũtĩnĩ na mamwia mbũanĩ.
30 Ĩndĩ Ngai amũthayũũkya,
31 na kwa mĩthenya mingĩ nĩwoonekie nĩ ala maendanisye nake kuma Kalilii nginya Yelusaleme. Na yu asu nĩmo ngũsĩ syake mbee wa andũ.
32 “Kwoou yu nĩtũũmũtavya ũvoo mũseo ĩũlũ wa watho ũla aa-ũmae maitũ mathiwe.
33 Ngai nĩwĩanĩĩtye watho ũsu kwitũ, ithyĩ syana syoo, kwa kũmũthayũũkya Yesũ; o tondũ kũandĩkĩtwe nthĩnĩ wa savuli ya kelĩ: ‘We wĩ mwana wakwa; ũmũnthĩ nĩnatw’ĩka ĩthe waku.’
34 Na nũndũ nĩwamũthayũũkisye atakasyoka wanangĩkonĩ nongi, aĩtye ũũ: ‘Ngeethĩwa nĩ mũĩkĩĩku kũkwony’a wendo mũlũmu ũla namwathie Ndaviti.’
35 O na ve savuli ĩngĩ yaĩtye atĩĩ: ‘Ndũketĩkĩlya mũĩkĩĩku waku one wanangĩko.’
36 Kĩvathũkany’o na ũu, o na kau Ndaviti nĩwamũthũkũmie Ngai* nzyawanĩ ya ĩvinda yake, we nĩwakwie na athikwa na aa-ũmae make, na mwĩĩ wake waanangĩka.
37 Ĩndĩ ũla Ngai wathayũũkisye ndaaona wanangĩko.
38 “Ĩndĩ ekai ũndũ ũũ ũmanyĩke kwenyu ana-a-asa kana, kwĩsĩla ũsu ũekeo wa naĩ nũũtavanw’a kwenyu,
39 na kana, maũndũnĩ onthe ala kwosana na Mĩao ya Mose mwatalĩlawa kwĩthĩwa na mavĩtyo, yu kwĩsĩla Yesũ mũndũ o na wĩva ũla ũĩkĩĩaa nũtalawa kwĩthĩwa ate na mavĩtyo.
40 Kwoou ĩsũvĩei nĩ kana maũndũ aa maandĩkĩtwe Mavukunĩ ma Athani maikamũkwate:
41 ‘Sisyai, inyw’ĩ andũ me kĩvũthya, seng’ai na mũithela, nũndũ mĩthenyanĩ yenyu ngeeka ũndũ mũtesa kũĩkĩĩa, o na mũndũ amũelesya nesa ata.’”
42 Na maumaalĩte, andũ mamesũva nĩ kana meũka kũmatavya maũndũ asu Savato ĩla yaatĩĩe.
43 Na ĩtina wa andũ ala moombanĩte ĩsinakokenĩ kũmbũũka, Ayuti aingĩ na andũ angĩ ala maalyũlĩte mũĩkĩĩo na mamũthaithaa Ngai nĩmaatĩĩie Vaulo na Valanava, na atũmwa asu maneena namo makĩmesũva mekalae ũseonĩ mwingĩ wa Ngai.
44 Na Savato ĩla yaatĩĩe, vakuvĩ andũ onthe kuma ndũanĩ ĩsu moombana vamwe nĩ kana mew’e ndeto ya Yeova.
45 Yĩla Ayuti moonie ĩkomano yĩu, makwatwa nĩ kĩwĩu kingĩ na mambĩĩa kũneena ndeto nthũku, maikananĩsya ndeto ila Vaulo waneenaa.
46 Nĩvo ĩndĩ Vaulo na Valanava mamatavisye ũũ me na ũkũmbaũ: “Yaĩ no nginya ndeto ya Ngai ĩtavanw’e kwenyu mbee. Ĩndĩ nũndũ nĩmwamĩlea na mũikwona mwaĩlĩte kũkwata thayũ wa tene na tene, sisyai! nĩtũũthi kwa andũ ma mbaĩ ingĩ.
47 Nũndũ Yeova nũtwĩaĩe kwa ndeto ii: ‘Nĩngũnyuvĩte wĩthĩwe kyeni kwa andũ ma mbaĩ ingĩ, na ũitavany’a ĩũlũ wa ũtangĩĩo nginya itulu sya nthĩ.’”
48 Na yĩla andũ ma mbaĩ ingĩ meewie ũu, mambĩĩa kũtana na kũtaĩa ndeto ya Yeova, na onthe ala maĩ na ngoo nzeo kwondũ wa thayũ wa tene na tene, matw’ĩka etĩkĩli.
49 Na ndeto ya Yeova yaendeea kũnyaĩĩka kĩsionĩ kĩu kyonthe.
50 Ĩndĩ Ayuti mothoothea aka me nguma ala mamũkĩaa Ngai na aũme me nguma ma ndũa, na matuma andũ mambĩĩa kũthĩny’a Vaulo na Valanava na mamalũngya maume ndũanĩ ĩsu.
51 Na kwoou mamatuangĩa kĩtoo kya maaũ moo, na mathi Ikonio.
52 Na amanyĩw’a maendeea kusũwa nĩ ũtanu na veva mũtheu.
Maelesyo ma kwongeleela
^ Kana “wamathũkũmaa.”
^ Ngavana wa kĩsio kĩna kya Lomi. Sisya Maelesyo ma Ndeto.
^ Kana “nĩweekie kwenda kwa Ngai.”
