Meko ma Atũmwa 16:1-40
16 Na Vaulo avika Ndelive na Lisitela. Na kũu kwaĩ mũmanyĩw’a weetawa Timotheo, na inyia wake aĩ Mũyuti na aĩ mwĩtĩkĩli, ĩndĩ ĩthe aĩ Mũkiliki,
2 nĩwawetawa nesa nĩ ana-a-asa ma Lisitela na Ikonio.
3 Vaulo nĩwendie kũendany’a na Timotheo, na kwoou amwosa na amwaĩka nũndũ wa Ayuti ala maĩ isionĩ isu, nĩkwĩthĩwa onthe nĩmeesĩ kana ĩthe wake aĩ Mũkiliki.
4 Na kĩla ndũa mathi, nĩmamatavasya ana-a-asa kĩla atũmwa na atumĩa ala maĩ Yelusaleme matw’ĩte nĩ kana makĩatĩĩe.
5 Na ikundi syaendeea kũlũlũmĩĩlw’a mũĩkĩĩonĩ na kwongeleka kĩla mũthenya.
6 O na ĩngĩ, nĩmavĩtĩile Velikia na Kalatia nũndũ veva mũtheu nĩwamavatie kũneena ĩla ndeto kĩsionĩ kya Asia.
7 Na yĩla mavikie Misia nĩmatatie kũlika Vithinia, ĩndĩ veva wa Yesũ ndwaametĩkĩlya.
8 Kwoou meeka kũvĩtĩla Misia na matheea nginya Teloa.
9 Na kwĩ ũtukũ, Vaulo nĩwoonie woninĩ mũndũũme wa Masetonia aũngamĩte aimwĩsũva, akĩmwĩa: “Inga wũke Masetonia nĩ kana ũtũtetheesye.”
10 Na amina kwona woni ũsu oou, nĩtwavangie kũthi Masetonia nũndũ nĩtwamanyie kana Ngai nĩwatwĩaĩe tũmatavye ũvoo mũseo.
11 Kwoou twalika melinĩ twauma Teloa, na twathi ĩmwe kwa ĩmwe nginya Samothelake, ĩndĩ ũnĩ wake twathi Neavoli;
12 na kuma vau, twathi ndũanĩ ĩmwe ya Alomi yeetawa Vilivi, na ĩsu nĩyo yaĩ ndũa ĩla nene kĩsionĩ kya Masetonia, na twekala ndũanĩ ĩsu mĩthenya kauta.
13 Na mũthenya wa Savato twaumaala nza wa mũvĩa wa ndũa na twathi ũtee wa ũsĩ, vala tweeĩtwe kana nĩ vo vavoyeawa, na twekala nthĩ na twaneena na iveti syoombene vo.
14 Na mũndũ mũka ũmwe waumĩte ndũanĩ ya Thiatila weetawa Litia, ũla wathooasya ngũa sya langi wa nzambalaũ na waĩ mũthaithi wa Ngai, nĩwatwĩthukĩĩisye, na Yeova avingũa ngoo yake nĩ kana ethukĩĩsye maũndũ ala Vaulo waneenaa.
15 Na yĩla we na andũ ma mũsyĩ wake mavatisiwe, nĩwatwĩsũvie, atwĩa: “Ethĩwa nĩmwoona nĩ mũĩkĩĩku kwa Yeova, ũkai mwĩkale nyũmba kwakwa.” Na atũthing’ĩĩsya nginya tweetĩkĩla.
16 Na tũendete vandũ vau va kũvoyea, nĩtwakomanie na mũthũkũmi mwĩĩtu waĩ na ndaimoni ya kwaũsya, na nĩwamaeteae mavwana make ũthwii mwingĩ nũndũ wa kwaũsya.
17 Mwĩĩtu ũsu nĩwaendeeie kũatĩĩa Vaulo vamwe naitũ aineena ndeto ii na wasya mũnene: “Andũ aa nĩ ngombo sya Ngai Ũla wĩ Ĩũlũ wa Onthe, na memũtavya nzĩa ya ũtangĩĩo.”
18 Mwĩĩtu ũsu nĩwaendeeie kwĩka ũu kwa mĩthenya mingĩ. Ĩndĩ Vaulo eew’a anow’a nĩ ũndũ ũsu, na eethyũũa na eea ĩla ndaimoni atĩĩ: “Nĩngũkwĩaĩa ĩsyĩtwanĩ ya Yesũ Klĩsto, uma nthĩnĩ wake.” Na ndaimoni ĩsu yauma saanĩ o ũsu.
19 Yĩla mavwana make moonie kana wĩkwatyo woo wa kũkwata ũthwii nĩwathela, makwata Vaulo na Sila na mamakusũlany’a mamatwaa sokonĩ kũla kwĩ atongoi.
20 Na mamavikya kwa asili ma makoani, masya: “Aũme aa nĩmaetete ithokoo mbingĩ ndũanĩ yitũ. Mo nĩ Ayuti,
21 na metavany’a ĩũlũ wa syĩthĩo tũtaĩle kũiatĩĩa kwosana na mĩao yitũ, nũndũ ithyĩ twĩ Alomi.”
22 Na ĩkomano yonthe yamokĩlĩla, na asili ma makoani mamatembũangĩa ngũa, na ĩndĩ maumya mwĩao makũnwe ivoko.
23 Na ĩtina wa kũmavũa mũno, mamekya yela na meeaĩa mũsikalĩ wa yela amasunge nesa.
24 Na nũndũ wa mwĩao ũsu, amekya kasũmbanĩ ka yela kala ke nthĩnĩ vyũ, na ooveea maaũ moo katĩ wa mbwaũ ilĩ ngito.
25 Na ta ũtukũ katĩ, Vaulo na Sila nĩmaendeee na kũvoya na kũmwinĩa Ngai mbathi sya kũmũtaĩa, na ovwa ala angĩ nĩmamethukĩĩsye.
26 Na o mĩtũkĩ, kweethĩwa na kĩthingitho kĩnene kya nthĩ nginya mĩsingi ya yela yathingitha. Na vau kwa vau mĩomo yonthe yavingũkanga, na syĩndũ ila moovetwe nasyo syathalĩka.
27 Na yĩla mũsikalĩ wa yela waamũkie na oona mĩomo ya yela yĩ mbingũku, akũa ũvyũ wake ayenda kwĩyũaa, nũndũ oonaa ovwa ta matolokile.
28 Ĩndĩ Vaulo aneena na wasya mũnene na amwĩa: “Ndũkeyĩũmĩsye, nũndũ ithyonthe twĩ vaa!”
29 Kwoou eetya taa na asemba alika vala Vaulo na Sila maĩ, na avalũka mbee woo atetemete.
30 Na amaumaalya nza, na amakũlya: “Naĩle kwĩka ata nĩ kana nĩtangĩĩwe?”
31 Namo mamwĩa: “Mũĩkĩĩe Mwĩaĩi Yesũ na nũũtangĩĩwa, we na andũ ma mũsyĩ waku.”
32 Na mamũtavya ndeto ya Yeova e na onthe ala maĩ nyũmba kwake.
33 Na athi namo ũtukũ o ũsu na athambya itau syoo. Na ĩndĩ we na andũ onthe ma mũsyĩ wake mavatiswa vau kwa vau.
34 Na amatwaa nyũmba kwake na amanenga lĩu, na atana mũno nũndũ andũ ma mũsyĩ wake nĩmamũĩkĩĩie Ngai.
35 Na kwakya, asili ma makoani matũma asikalĩ, makyasya: “Lekyai aũme asu mathi.”
36 Nake mũsikalĩ wa yela atavya Vaulo ndeto syoo, akĩmwĩa: “Asili ma makoani matũma andũ na masya inywelĩ mũthaw’e. Kwoou umaalai yu na mũithi na mũuo.”
37 Ĩndĩ Vaulo amea: “Matũvũĩe mbee wa andũ tũte asilĩle na matwĩkya yela, na ithyĩ twĩ Alomi. Yu meenda kũtũthasya kwa kĩmbithĩ? Vaitonyeka! Ekai moke mo ene matumye.”
38 Asikalĩ nĩmamatavisye asili ma makoani ndeto isu. Na asili asu makwatwa nĩ wia mwingĩ yĩla meewie kana aũme asu nĩ Alomi.
39 Kwoou mooka na mamesũva, na mamina kũmaumaalya nza, mamesũva maume ndũanĩ ĩsu.
40 Ĩndĩ mauma yela nĩmaendie mũsyĩ kwa Litia; na yĩla moonie ana-a-asa, mamathangaasya na mauma vau mathi.
