Meko ma Atũmwa 22:1-30
22 “Ana-a-asa makwa na aa-ĩthe makwa, yu mbĩthukĩĩsyei ndyĩtetea mbee wenyu.”
2 Yĩla meewie aineena namo kwa kĩthyomo kya Kĩevelania mavindya ĩ ya mũno, nake asya:
3 “Nyie nĩ Mũyuti ũsyaĩwe Taliso ya Silisia, ĩndĩ namanyĩĩiw’e ndũanĩ ĩno maaũnĩ ma Kamalieli, na namanyĩiw’e nesa vyũ Mĩao ya aa-ũmae maitũ, na nĩ kĩthito kwondũ wa Ngai o tondũ inyw’onthe ũmũnthĩ mwĩ na kĩthito.
4 Nĩnathĩnisye aatĩĩi ma Nzĩa ĩno kũvikĩa kũmoaa, ndyova na kũmanengane yela aũme na aka,
5 o tondũ mũthembi mũnene na nzama yonthe ya atumĩa matonya kumya ũkũsĩ. Na nĩnakwatie mavalũa kuma kwoo nĩtwaĩe Ayuti ala maĩ Ndamasiku, na naĩ nzĩanĩ nĩendete kũlatya ala maĩ kw’o nĩmaete Yelusaleme me ove nĩ kana mosewe ĩtambya.
6 “Ĩndĩ nĩ kyalonĩ nĩthengeee Ndamasiku, ta saa sita sya mũthenya, kyeni kingĩ kuma ĩtunĩ nĩkyamulĩkile ngalĩko syonthe vala naĩ,
7 na navalũka nthĩ na neew’a wasya ũimbĩa: ‘Saulo, Saulo, nĩkĩ ũũnthĩny’a?’
8 Nakwa nakũlya: ‘Nue ũũ, Mwĩaĩi?’ Nake anzũngĩa: ‘Ninyie Yesũ Mũnasaleti, ũla ũũthĩny’a.’
9 Na aũme ala naĩ namo nĩmoonie kyeni kĩu, ĩndĩ mayaaĩw’a wasya wa ũla waneenaa nakwa.
10 Ĩtina wa ũu nakũlya: ‘Mwĩaĩi, naĩle kwĩka ata?’ Nake Mwĩaĩi ambĩa: ‘Ũkĩla, ũthi Ndamasiku, na kũu nũũtavw’a maũndũ onthe ala waĩle kwĩka.’
11 Ĩndĩ nũndũ ndyaĩ ndonya kwona kĩndũ nĩkwĩthĩwa kyeni kĩu kyaĩ kĩtisu mũno, nĩnavikie Ndamasiku nĩkwetwe kw’oko nĩ ala naĩ namo.
12 “Na ĩndĩ mũndũũme ũmwe weetawa Anania, mũndũ wamũkĩaa Ngai kwosana na Mĩao, na wawetawa nesa nĩ Ayuti onthe ala mekalaa kũu,
13 ooka vala naĩ, na aũngama vakuvĩ nakwa, na ambĩa: ‘Saulo, mwana-a-asa, ambĩĩa kwona ĩngĩ!’ Na vau kwa vau nookĩlya metho na namwona.
14 Na asya: ‘Ngai wa aa-ũmae maitũ nũkũnyuvĩte ũmanye kwenda kwake na ũimwona ũla mũlũngalu na ũyĩw’a wasya wa kanyw’a wake,
15 nũndũ ũkeethĩwa ngũsĩ yake kwa andũ onthe ĩũlũ wa maũndũ ala wonete na ũkew’a.
16 Na yu weteele kyaũ? Ũkĩla ũvatiswe, na ũithambya naĩ syaku kwa kwĩkaĩla ĩsyĩtwa yake.’
17 “Ĩndĩ nĩnasyokie Yelusaleme, na nĩ ĩkalũnĩ ngĩvoya, noona woni
18 na nthĩnĩ wa woni ũsu namwona aimbĩa: ‘Ĩkalaate umaale Yelusaleme mĩtũkĩ, nũndũ mayĩtĩkĩla ũkũsĩ waku ĩũlũ wakwa.’
19 Nakwa namwĩa: ‘Mwĩaĩi, mo nĩmesĩ nesa kana nĩnekasya andũ yela na nĩnavũaa ala makũĩkĩĩaa ĩsinakokenĩ yĩmwe kũthi yĩla yĩngĩ;
20 na yĩla nthakame ya Sitivini ngũsĩ yaku yetĩkaw’a, naũngamĩte vau ũtee na nĩneetĩkĩlanile na ũndũ ũsu na nasũvĩa ngũa sya ĩũlũ sya ala mamũaaa.’
21 Ĩndĩ ambĩa: ‘Enda, nũndũ nĩngũũtũma mbaĩnĩ syĩ kũasa.’”
22 Na maendeea kũmwĩthukĩĩsya nginya yĩla waneenie ndeto isu. Na ĩndĩ mookĩlya mawasya moo, makyasya: “Vetai mũndũ ũũ ĩũlũ wa nthĩ, nũndũ ndaĩle kwĩkala thayũ!”
23 Nĩkwĩthĩwa maneenaa mekĩtye ngũa syoo sya ĩũlũ kũũ na kũũ na mayĩkya mũthanga nzevenĩ,
24 mũnene wa ita nĩweeaie Vaulo aetwe kambinĩ ya asikalĩ na aikũlw’a makũlyo akũnĩtwe ivoko, nĩ kana o nake amanye nĩkĩ malonzanasya ũu ĩũlũ wa Vaulo.
25 Ĩndĩ yĩla mamwovie nĩ kana mamũkũne ivoko, Vaulo akũlya mũnene wa asikalĩ ũla waũngamĩte vau atĩĩ: “Nĩ ũndũ wosanĩte na mĩao kũvũa Mũlomi* atanamba kũsilĩlwa?”
26 Yĩla mũnene wa asikalĩ weewie ũu athi kũla kwĩ mũnene wa ita na amwĩa atĩĩ: “Ũvangĩte kwĩka ata? Nũndũ mũndũ ũũ nĩ Mũlomi.”
27 Kwoou mũnene wa ita amũthengeea, na amũkũlya: “Ndavye, we wĩ Mũlomi?” Nake asũngĩa: “Ĩĩ.”
28 Na mũnene ũsu wa ita amwĩa: “Nyie naĩvie mbesa mbingĩ nĩ kana nĩthĩwe Mũlomi.” Nake Vaulo amwĩa: “Nyie nĩ Mũlomi kwa kũsyawa.”
29 Na vau kwa vau aũme ala maĩ vakuvĩ kũmũkũlya makũlyo maimũthĩny’a nĩmaekanie nake na mathi; na mũnene wa ita akwatwa nĩ wia mwingĩ yĩla wamanyie kana Vaulo nĩ Mũlomi na eĩ anamwova na nyololo.
30 Na ũnĩ wake, nũndũ nĩwendaa kũmanya nesa nĩkĩ Ayuti mamũsikatĩte, amũthasya na eeaĩa anene ma athembi na Nzama yonthe ya Ayuti yũmbane. Na ĩndĩ atheesya Vaulo vala maĩ na amũũngamya katĩ woo.
Maelesyo ma kwongeleela
^ Kana “mũndũ wa Lomi.”
