Mathayo 23:1-39
23 Na ĩndĩ Yesũ aneena na ĩkomano na amanyĩw’a make, akyasya:
2 “Aandĩki na Avalisi nĩmeyoseete kĩvĩla kya Mose.
3 Kwoou, maũndũ onthe ala mamũtavasya, mekei na mũimaatĩĩa, ĩndĩ mũikeke kwosana na meko moo, nũndũ maũndũ ala mamũtavasya ti mo mekaa.
4 Nĩmovaa mĩio mĩito na kũmilĩĩla ituonĩ sya andũ, ĩndĩ mo ene mayendaa kũmĩkiita na kyaa.
5 Maũndũ onthe ala mekaa, mamekaa nĩ kana moneke nĩ andũ, nũndũ nĩmanenevasya tũsandũkũ twa kũmasũvĩa tũla twĩthĩawa na maandĩko na nĩmanenevasya nyenze sya ndiivo sya ngũa syoo.
6 Mendete kwĩkala vandũ vala va ndaĩa mbokanĩ na ivĩlanĩ sya mbee* masinakokenĩ
7 na kũkethaw’a masokonĩ na kwĩtwa Lavai* nĩ andũ.
8 Ĩndĩ inyw’ĩ mũiketwe Lavai, nũndũ Mũmanyĩsya wenyu nĩ ũmwe, na inyw’othe mwĩ ana-a-asa.
9 O na ĩngĩ, mũikete mũndũ o na wĩva asa wenyu ĩũlũ wa nthĩ, nũndũ Asa wenyu nĩ ũmwe, Ũla wĩ ĩtunĩ.
10 O na mũiketwe atongoi, nũndũ Mũtongoi wenyu nĩ ũmwe, nake nĩ Klĩsto.
11 Ĩndĩ ũla mũnene katĩ wenyu aĩle kwĩthĩwa e mũthũkũmi wenyu.
12 Mũndũ o na wĩva ũla wĩnenevasya akanyivw’a, na mũndũ o na wĩva ũla wĩnyivasya akanenevw’a.
13 “Kyeva nĩ kwenyu aandĩki na Avalisi, angangany’a! nũndũ nĩmũsiĩĩaa andũ kũlika Ũsumbĩnĩ wa ĩtu; nũndũ inyw’ĩ ene mũiũlika, na ala mekwenda kũlika mũimetĩkĩlasya.
14 *——
15 “Kyeva nĩ kwenyu aandĩki na Avalisi, angangany’a! nĩkwĩthĩwa nĩmũthyũũkaa ũkanganĩ na nthĩ nyũmũ mũkĩmantha mũndũ ũmwe mũalyũle mũĩkĩĩo wake, na mwamũalyũla mũmũtw’ĩkĩthasya mũndũ waĩle Ngiena* kũndũ kwĩlĩ kwĩ ũndũ inyw’ĩ mwaĩle.
16 “Kyeva nĩ kwenyu atongoi ilalinda, ala mwaasya, ‘Ethĩwa mũndũ o na wĩva akeevĩta na ĩkalũ, ũsu ti ũndũ, ĩndĩ ũla ũkevĩta na thaavu ũla wĩ ĩkalũnĩ no nginya eanĩsye wĩvĩto wake.’
17 Inyw’ĩ ndia na ilalinda! Kyo kĩla kĩnene nĩ kyaũ, nĩ thaavu kana nĩ ĩkalũ yĩla yĩtumaa ũ thaavu wĩthĩwa wĩ mũtheu?
18 O na ĩngĩ, ‘Ethĩwa mũndũ akeevĩta na kĩthembeo, ũsu ti ũndũ, ĩndĩ ũla ũkevĩta na nthembo ĩla yĩ kĩthembeonĩ, no nginya eanĩsye wĩvĩto wake.’
19 Inyw’ĩ ilalinda! Kĩla kĩnene nĩ kyaũ, nĩ nthembo kana nĩ kĩthembeo kĩla kĩtumaa ĩ nthembo yĩthĩwa yĩ ntheu?
20 Kwondũ wa ũu, mũndũ o na wĩva ũla weevĩta na kĩthembeo ethĩawa eevĩta nakyo vamwe na kyonthe kĩla kĩ vo;
21 na mũndũ o na wĩva ũla weevĩta na ĩkalũ, ethĩawa eevĩta nayo vamwe na Ũla wĩkalaa nthĩnĩ wayo;
22 na mũndũ o na wĩva ũla weevĩta na ĩtu, ethĩawa eevĩta na kĩvĩla kya ũsumbĩ kya Ngai vamwe na Ũla ũkĩkalĩle.
23 “Kyeva nĩ kwenyu aandĩki na Avalisi, angangany’a! nĩkwĩthĩwa nĩmumasya kĩlungu kya ĩkũmi kya mindi, anisi, na kumini, ĩndĩ nĩmũvũthĩĩasya maũndũ manene ma ĩla Mĩao, namo nĩ, ũsili wa katĩ, na tei, na ũĩkĩĩku. Nĩ ũndũ wa vata kwĩka maũndũ asu, ĩndĩ mũteũvũthĩĩsya maũndũ ala angĩ.
24 Atongoi ilalinda, ala mũsungaa ũmuu ĩndĩ mũimelya ngamĩle!
25 “Kyeva nĩ kwenyu aandĩki na Avalisi, angangany’a! nũndũ mũthambasya kĩkombe na ĩsaani nza, ĩndĩ nthĩnĩ syusĩe ĩtomo na wendi mũthonoku.
26 We Mũvalisi kĩlalinda, amba kũthambya kĩkombe na ĩsaani nthĩnĩ, na ikeethĩwa syĩ ntheu nza.
27 “Kyeva nĩ kwenyu aandĩki na Avalisi, angangany’a! nũndũ mũvw’anene na mbũa ivakĩtwe sokaa, ila syonekaa syĩ mbanake nza ĩndĩ nthĩnĩ syusĩe mavĩndĩ ma andũ akw’ũ na mĩthemba yonthe ya ũvuku.
28 O ta ũu, nza andũ mamwonaa mwĩ alũngalu, ĩndĩ nthĩnĩ musĩe wangangany’a na ũtũli wa mĩao.
29 “Kyeva nĩ kwenyu aandĩki na Avalisi, angangany’a! nũndũ mwakaa tũvulĩ twa athani na kwanakavya mbũa sya ala alũngalu,
30 na mũkyasya, ‘Ta kethĩwa ithyĩ twaĩ thayũ ĩvinda ya aa-ũmae maitũ, tũyĩthĩwa twaakwatana namo kwĩtĩkya nthakame ya athani.’
31 Kwoou, mũendeee kumya ũkũsĩ ĩũlũ wenyu ene kana mwĩ ana ma ala mooaie athani.
32 Kwoou ĩndĩ, minũkĩlĩĩlyai kĩla kyambĩlĩlw’e nĩ aa-ũmae menyu.
33 “Nzoka, ũsyao wa nzoka mbai, mũkakĩa ata ũsilĩlo wa kwĩkw’a Ngienanĩ?*
34 Kwondũ wa kĩtumi kĩu, nĩngũmũtũmĩa athani na andũ oĩ na amanyĩsya ma andũ. Amwe moo mũkamoaa na angĩ mũimoaĩa mĩtĩnĩ, na angĩ mũkamavũĩa masinakokenĩ menyu na kũmathĩny’a kuma ndũa ĩmwe kũthi ĩla ĩngĩ,
35 nĩ kana nthakame yonthe ya ala maĩ alũngalu yĩthĩwe ĩũlũ wenyu, kuma nthakame ya Aveli ũla waĩ mũlũngalu kũvika nthakame ya Nzekalia mwana wa Valakia, ũla mwamũaĩe katĩ wa vala vandũ vatheu na kĩthembeo.
36 Nĩ w’o nĩngũmwĩa, maũndũ aa onthe makakwata nzyawa ĩno.
37 “Yelusaleme, Yelusaleme, we ũla wũaaa athani na kũmakimanga na mavia ala matũmĩtwe kwake—nĩ mavinda meana ata nĩthĩĩtwe ndyenda kũmbany’a syana syaku vamwe o ũndũ ngũkũ yũmbanasya tũswii twayo nthwaunĩ syayo! Ĩndĩ inyw’ĩ mũyaaĩtĩkĩla.
38 Sisya! Nyũmba yenyu nĩtiĩtwe yĩ nthei.
39 Nũndũ nĩngũmwĩa kana mũikambona ĩngĩ nongi kuma yu nginya yĩla mũkasya, ‘Nĩ mũathime ũla wũkĩte ĩsyĩtwanĩ ya Yeova!’”
Maelesyo ma kwongeleela
^ Kana “ila nzeo.”
^ Kana “Mũmanyĩsya.”
^ Mũsoa ũũ wĩ Mbivilianĩ imwe, ĩndĩ ũyonekaa nthĩnĩ wa mavuku amwe ma tene ma Mbivilia.
^ Sisya Maelesyo ma Ndeto.
^ Sisya Maelesyo ma Ndeto.
