НтІэ, щыІэщ. Библиер абы щыхьэт тохъуэ. Тхыгъэ ЛъапІэм зэрыжиІэмкІэ, дэ Алыхьыр ди фІэщ щІэхъун хуейр дин гуэрым абы зэрыхуригъаджэ къудейракъым. Библием дыхуегъэуш «ди акъылыр дгъэлэжьэну» (Рим 12:1, ДЩІ; 1 Иуан 5:20). Абы теухуауэ Библием мыпхуэдэ гупсысэхэр итщ:

•   Алыхьыр зэрыщыІэм щыхьэт тохъуэ Дунеишхуэм гъащІэ зэрыщыІэр икІи псори щхьэж и пІэ зэритыр. Библием итщ: «ЦІыху гуэрым имыщІа унэ щыІэкъым, ауэ псори зыщІар Тхьэращ» (Еврейхэм 3:4). Мы гупсысэр къыбгурыІуэну тыншщ икІи щІэныгъэ зыбгъэдэлъ куэдыр абы арэзы тохъуэ a.

•   «ГъащІэм и мыхьэнэр сыт?»— жиІэу дэтхэнэ зы цІыхури зоупщІыж икІи ар зыхуейр игъуэту псэуми, а упщІэм и жэуапыр абы адэкІи къелъыхъуэ. Библием зэрыжиІэмкІэ, «гурэ псэкІэ тхьэмыщкІэхэм» Алыхьыр къалъыхъуэ икІи абы хуэлэжьэну хуейщ (Маттэ 5:3; Апокалипсис 4:11). Алыхьым зэрыхуэныкъуэр цІыхум къызэрыгурыІуэр щыхьэт тохъуэ пэж дыдэу Алыхьыр зэрыщыІэм, абы фІыуэ дыкъызэрилъагъум икІи езым теухуауэ къэтщІэну зэрыхуейм (Маттэ 4:4).

•   Къэхъун хуей псалъэхэу Библием итхэр илъэс щэ бжыгъэ ипэ ятхами, ахэр къыщыхъун хуей зэманым зы къэмынэу гъэзэщІа хъуащ. ГурыІуэгъуэщ апхуэдэ псалъэхэр цІыхум къызэрыбгъэдэмыкІыр (2 Петр 1:21).

•   Библиер зытхахэм щІэныгъэ куу ябгъэдэлът. Абыхэм я зэманым псэуа цІыхухэм апхуэдэ щІэныгъэ яІэтэкъым. Псалъэм папщІэ, пасэ зэманым куэдым я фІэщ хъут щІыр пылым, кхъуэпІащэм, гуум е нэгъуэщІ псэущхьэ гуэрым тету. Ауэ Библием щатхат щІыр «зыми фІэдзауэ» зэрыщымытыр (Иов 26:7). Абы нэмыщІ Библием щыжыІащ щІыр хъурейуэ зэрыщытыр (Исаия 40:22). Куэдым къагуроІуэ Библиер зытхахэм апхуэдэ щІэныгъэ къезытар Алыхьырауэ зэрыщытыр.

•   УпщІэ гугъу куэдым я жэуапхэр Библием итщ. А жэуапхэр зымыщІэ цІыхум Алыхьыр зэрыщыІэр и фІэщ мыхъужу хъуфынущ. Псалъэм папщІэ: Алыхьым лъэкІыныгъэшхуэрэ лъагъуныгъэрэ иІэмэ, щхьэ апхуэдиз гуауэрэ гузэвэгъуэрэ щыІэ? Диным цІыхухэр фІым хуимыгъэушу, Іейм щхьэ хуигъэушрэ? (Тит 1:16).