«Pɩtaanɩɩ-ɖʋ nɛ mbʋ pɩwɛ ɖeu yɔ pɩ-labʋ, mbʋ pʋyɔɔ yɔ alɩwaatʋ talɩɣ lɛ, ɖɩkaɣ kʋm ye pɩtɩnɩɩ-ɖʋ yɔ.»—Galaatii mba 6:9, Ɛjaɖɛ kɩfaɖɛ tɔm ɖɛzʋʋ.

 «Pɩtaaɖɛɛ-ɖʋ nɛ kɩbandʋ labʋ, mbʋ pʋyɔɔ yɔ kɩyakʋ talɩɣ lɛ, ɖɩkʋŋ kaahɛzaɣ.» Takayaɣ Kiɖeɖea, Kinshasa, Verbum Bible.

 Apostoloo Pɔɔlɩ seɣti Krɩstʋ mba se powolo pɩ-yɔɔ nɛ palakɩ mbʋ pɩwɛ ɖeu yaa pɩkɛ kɩbam Ɛsɔ ɛsɩndaa yɔ. Ye palakɩ mbʋ yɔ pa-taa pɩzɩɣ nɛ pɩtɛ se Ɛsɔ kaɣ-wɛ wazʋʋ.

 «Pɩtaanɩɩ-ɖʋ.» Papɩzɩɣ nɛ pɛɖɛzɩ tɔm loyaɣ ŋga se «pɩtaaɖɛɛ-ɖʋ.» Kiɖe tɛɛ kʋnʋŋ taa lɛ, tɔm loyaɣ ŋga kapɩzɩɣ ɖɔɖɔ nɛ kawɩlɩ se ɛyʋ etaayele nɛ pitibi-i yɔɔɔ yaa etaalesi kpekpeka ŋga ɛɛwɛna yɔ. Apostoloo Pɔɔlɩ yɔɔdʋʋ se «pɩtaanɩ-ɖʋ» yɔ, pɩwɩlɩɣ se ɛnʋ ɖɔɖɔ nabʋyʋ taa pitiki-i yɔɔɔ.—Roma mba 7:21-24.

 «Mbʋ pɩwɛ ɖeu yɔ» yaa kɩbandʋ labʋ, wɩlɩɣ mbʋ payɩ pɩwɛɛ se Krɩstʋ tʋ nɔɔyʋ ɛla ɛ-Ɛsɔ sɛtʋ taa yɔ. Pɩ-taa nabʋyʋ lɛ mbʋ ɛlakɩ se ɛsɩnɩ e-koobiya Krɩstʋ mba nɛ ɛyaa lalaa yɔ.—Galaatii mba 6:10.

 «Alɩwaatʋ talɩɣ lɛ, ɖɩkaɣ kʋm ye pɩtɩnɩɩ-ɖʋ yɔ.» Pɔɔlɩ ñɩnaɣ se ɛtɔzɩ mba pakaɣ tɔm ndʋ kalʋʋ yɔ se ɛzɩma pɩkpakɩɣ alɩwaatʋ pʋcɔ nɛ haɖʋ nɔɔyʋ tɔɔnaɣ pɩɩ yɔ, mbʋ ɖɔɖɔ alɩwaatʋ ndʋ palakɩ kɩbandʋ natʋyʋ yɔ, pɩpɩzɩɣ nɛ pɩkpaɣ alɩwaatʋ pʋcɔ nɛ pana pɩ-wazasɩ. Pɔɔlɩ yɔɔdʋʋ kʋmtʋ tɔm yɔ, ɛñɩnaɣ se ɛwɩlɩ nɔɔ kʋɖʋmaɣ ŋga kɛwɛ mayaɣ ŋga nɛ toovenim tɔm ndʋ tɩwɛ kalɩtʋ 7 taa yɔ pɛ-hɛkʋ taa yɔ. Tɩtɔŋ se: «Mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm.» Pʋ-tɔbʋʋ ɖɔɖɔ lɛ se alɩwaatʋ ndʋ Krɩstʋ tʋ nɔɔyʋ lakɩ mbʋ pɩwɛ ɖeu Ɛsɔ ɛsɩndaa yɔ, ɛkaɣ hiɣu wazasɩ sakɩyɛ, sɩ-taa nakɛyɛ lɛ wezuu maatɛŋ.—Roma mba 2:6, 7; Galaatii mba 6:8.

 Apostoloo Pɔɔlɩ ma takayaɣ ŋga Galaatii Krɩstʋ mba pɩnaɣ 50 nɛ piwolo panaɣ 52 taa mbʋ yɔ. Ɛma-wɛ kɛ se ɛkandɩyɩ pɔ-yɔɔ nɛ ɛyaa mba pɔyɔɔdʋʋ se pɛkɛ Krɩstʋ mba ɛlɛ papɩsɩɣ Yesu yɔɔ toovenim tɔm tuluŋa yɔ pataawɛɛnɩ ɖoŋ pɔ-yɔɔ. (Galaatii mba 1:6, 7) Cɛtɩm tɔm wɩlɩyaa mba, paawɛɛ nɛ pɔhɔŋ tɔm se pɩpɔzʋʋ se Krɩstʋ mba ɩɖɔ Paɣtʋ ndʋ Ɛsɔ kaatɩŋnɩ Moyizi yɔɔ nɛ ɛcɛlɩ caanaʋ taa Izrayɛɛlɩ ɛjaɖɛ yɔ tɩ-yɔɔ. (Galaatii mba 2:15, 16) Pɔɔlɩ lɩzɩ pɩ-taa se Paɣtʋ ndʋ tɩtalɩ kaɖʋwa ŋga kɔ-yɔɔ paaɖʋ-tʋ yɔ nɛ pɩtɩtasɩ cɛyʋʋ se Ɛsɔ sɛyaa ɩɖɔ tɩ-yɔɔ.—Roma mba 10:4; Galaatii mba 3:23-25.

 Alɩwaatʋ Pɔɔlɩ seɣti Krɩstʋ mba se powolo pɩ-yɔɔ nɛ ‘palakɩ mbʋ pɩwɛ ɖeu yɔ,’ pɩtɩkɛ Moyizi Paɣtʋ eseɣtaɣ-wɛ se paña. Ɛlɛ ɛɛwɛɛ nɛ eseɣtiɣ-wɛ se ‘pɔɖɔ Krɩstʋ paɣtʋ yɔɔ’na, tɩ-taa natʋyʋ lɛ tɔm ndʋ payɩ Yesu wɩlaa pɩlɩɩnɩ kɩbandʋ labʋ ɛyaa lalaa yɔɔ yɔ.—Galaatii mba 6:2; Maatiyee 7:12; Yohanɛɛsɩ 13:34.

 Cɔnɩ video cikpeluu kʋnɛ nɛ ŋtɩlɩ Galaatii mba takayaɣ taa lɩmaɣza sɔsɔna.