Ɛsɩdrasɩ 1:1-11
1 Pɛrɩsɩ wiyaʋ Siiruusi+ pɩnaɣ kajalaɣ ñɩŋga taa, pɩsa nɛ tɔm ndʋ Yehowa kaatɩŋnɩ Yereemii yɔɔ nɛ ɛyɔɔdɩ yɔ+ tɩla lɛ, Yehowa seɣti Pɛrɩsɩ wiyaʋ Siiruusi* se ɛlɛ esusi tɔm natʋyʋ e-kewiyaɣ kpeekpe taa, nɛ ɛma tɔm ndʋ ɖɔɖɔ;+ tɩtɔŋaɣ se:
2 «Tɔm tʋnɛ Pɛrɩsɩ wiyaʋ Siiruusi yɔɔdʋʋ: “Ɛsɔdaa Ɛsɔ Yehowa cɛlɩ-m tɛtʋ yɔɔ kewiyisi kpeekpe,+ nɛ ɛɖʋ-m tʋmɩyɛ se mama-ɩ ɖɩɣa Yeruzalɛm,+ ŋgʋ kɩwɛ Yuuda yɔ.
3 Mɩ-taa mba pɛkɛ ɛ-samaɣ kpeekpe taa mba yɔ, tɛtɛ nɛ mɩ-Ɛsɔ wɛɛ mɩ-cɔlɔ, nɛ ɩɖɛɛ nɛ ɩkpa Yeruzalɛm, ŋgʋ kɩwɛ Yuuda yɔ, nɛ ɩɖaɣnɩ maʋ Izrayɛɛlɩ tɛ Ɛsɔ Yehowa ɖɩɣa, ɛkɛ Ɛsɔ toovenim tʋ, weyi ɛ-ɖɩɣa kaawɛ Yeruzalɛm yɔ.*
4 Weyi ɛkɛ ɛgɔm yɔ,+ paa le ɛwɛɛ yɔ, ɛ-cɔlɔ mba* ɩsɩnɩ-ɩ nɛ paha-ɩ liidiye nɛ sika, ñɩm nɛ kpɩna, nɛ pala sɔɔlɩm haɖɛ ɖɔɖɔ Ɛsɔ toovenim tʋ ɖɩɣa yɔɔ,+ ŋga kaawɛ Yeruzalɛm yɔ.”»
5 Ðɩnɛ ɛlɛ Yuuda nɛ Bɛnjamɛɛ pɔ-hɔŋ ñʋndɩnaa, cɔjɔnaa nɛ Leevi mba, mba payɩ Ɛsɔ toovenim tʋ kaaseɣti-wɛ yɔ,* pɔñɔɔzɩ pa-tɩ se pakʋyɩ nɛ pakpa nɛ paɖaɣnɩ maʋ Yehowa ɖɩɣa ŋga kaawɛ Yeruzalɛm yɔ.
6 Pɔ-cɔlɔ mba tɩŋa ɖʋ-wɛ nesi nɛ paha-wɛ* liidiye wondu nɛ sika wondu, ñɩm, kpɩna, wondu ndʋ tɩmʋ ñɩm yɔ nɛ pɩtasɩnɩ sɔɔlɩm haɖɛ tɩŋa.
7 Wiyaʋ Siiruusi lɩzɩ ɖɔɖɔ Yehowa ɖɩɣa taa wondu ndʋ Nabukodonozɔɔrɩ kaakpaɣ Yeruzalɛm nɛ ɛsɩɩ ɛ-ɛsɔ ɖɩɣa taa yɔ.+
8 Pɛrɩsɩ wiyaʋ Siiruusi yeba nɛ ñɩm yɔɔ cɔnɩyʋ Mitredaatɩ cɔnɩ pi-ɖeɖe nɛ palɩzɩ-tʋ, nɛ Mitredaatɩ kalɩ tɩ-ñʋʋ nɛ ɛɖʋzɩ-tʋ Yuuda mba ñʋʋdʋ Sɛsɩbazaarɩ*+ nesi tɛɛ.
9 Wondu ndʋ tɩ-ñʋʋ yɔ: Sika ñanzɩ nzɩ sɩwɛ ɛzɩ ɖɔkɩŋ yɔ 30, liidiye ñanzɩ nzɩ sɩwɛ ɛzɩ ɖɔkɩŋ yɔ 1 000, ñanzɩ lɛɛsɩ 29,
10 sika ñanzɩ cikpesi 30, liidiye ñanzɩ cikpesi 410, wondu lɛɛtʋ 1 000.
11 Sika wondu nɛ liidiye wondu tɩŋa kaakpɛndɩ 5 400. Sɛsɩbazaarɩ kpɛndɩnɩ wondu ndʋ tɩ-tɩŋa alɩwaatʋ ndʋ mba paawɛ yomiye taa Babilɔɔnɩ yɔ,+ pakʋyaa nɛ pɛɖɛɣ Yeruzalɛm yɔ.
Pɩ-tɛɛ tɔm
^ Piye piye, «seɣti Pɛrɩsɩ wiyaʋ Siiruusi fezuu.»
^ Pɩpɩzɩɣ pɩkɛ, «weyi ɛwɛ Yeruzalɛm yɔ.»
^ Yaa «peeɖe mba.»
^ Piye piye, «kaaseɣti pe-fezuu yɔ.»
^ Piye piye, «tɩŋa kpazɩ pe-nesi ɖoŋ nɛ.»
