Ɛsɩtɛɛrɩ 4:1-17
4 Mɔrɩdekayɩ+ nɩ mbʋ payɩ pɩlaba yɔ lɛ,+ ɛcɩyɩ e-tokonaa nɛ esuu fɔlɔtɔ nɛ ɛpɩyɩ tɔlɩma ɛ-yɔɔ. Nɛ ɛlɩɩ ewolo tɛtʋ hɛkʋ taa nɛ ɛmakɩ kubusi ɖoŋ nɛ laŋwɛɛkɩyɛ.
2 Ɛɖɛɛ nɛ ewolo ɛsɩŋ wiyaʋ nɔnɔɔ taa, mbʋ pʋyɔɔ yɔ pɩtaapɔzɩ se nɔɔyʋ esuu fɔlɔtɔ nɛ ɛtɛzɩ wiyaʋ nɔnɔɔ.
3 Nɛ ageeta wena a-taa payɩ+ wiyaʋ tɔm nɛ ɛ-paɣtʋ talaa yɔ, Yuuda mba kaawɛ kʋñɔwiye sɔsɔɖɛ taa, pɔhɔkaɣ nɔɔ+ nɛ pewiɣ nɛ pepeendiɣ. Sakɩyɛ kaahɩnɩ fɔlɔtɔnaa yɔɔ nɛ tɔlɩma taa.+
4 Abiɖe Ɛsɩtɛɛrɩ lɩmɖʋyaa halɩñɩma nɛ ɛ-aliŋga pɔkɔma nɛ peheyi-i lɛ, ɛwɛɛ laŋwɛɛkɩyɛ taa siŋŋ. Peeɖe etiyini tokonaa Mɔrɩdekayɩ se esuu-wɛ fɔlɔtɔ lone taa, ɛlɛ Mɔrɩdekayɩ kizi.
5 Nɛ Ɛsɩtɛɛrɩ yaa Ataakɩ, wiyaʋ aliŋga taa kʋɖʋm, weyi wiyaʋ kaalɩzaa se ɛɖʋ Ɛsɩtɛɛrɩ lɩm yɔ nɛ eheyi-i se ewolo nɛ ɛpɔzɩ Mɔrɩdekayɩ nɛ ɛna se pʋ-tɔbʋʋ lɛ suwe, nɛ ɛbɛ laba.
6 Nɛ Ataakɩ wolo Mɔrɩdekayɩ cɔlɔ tɛtʋ taa samaɣ kadaɣ taa, wiyaʋ nɔnɔɔ ɛsɩndaa.
7 Mɔrɩdekayɩ kɛdɩ-ɩ mbʋ payɩ pɩtalɩ-ɩ yɔ, nɛ eheyi-i liidiye nɖɩ ɖeyi ɖeyi+ Hamaanɩ yɔɔdaa se ɛhɛyɩɣ nɛ paɖʋ wiyaʋ koozaɣ taa se pɩsa nɛ paɖɩzɩ Yuuda ñɩma yɔ.+
8 Ɛcɛlɩ-ɩ ɖɔɖɔ takayaɣ ŋga ka-taa pama paɣtʋ ndʋ palɩzaa nɛ posusi-tʋ Suuzaŋ*+ se paɖɩzɩ-wɛ yɔ. Pɩwɛɛ se ɛwɩlɩ-kɛ Ɛsɩtɛɛrɩ nɛ ɛlɩzɩ-ɩ tɔm taa nɛ eheyi-i+ se ewolo wiyaʋ cɔlɔ nɛ etendi-i se ɛna pa-pʋtɔdɩyɛ nɛ ɛ-maɣmaɣ etendi-i ɛ-samaɣ yɔɔ.
9 Ataakɩ pɩsɩ ɛkɔɔ nɛ eheyi Ɛsɩtɛɛrɩ tɔm ndʋ Mɔrɩdekayɩ yɔɔdaa yɔ.
10 Ɛsɩtɛɛrɩ tiyi Ataakɩ se ewolo nɛ eheyi Mɔrɩdekayɩ+ se:
11 «Wiyaʋ lɩmɖʋyaa nɛ wiyaʋ ageeta taa ɛyaa kpeekpe sɩm mbʋ se ye abalʋ nɔɔyʋ yaa halʋ nɔɔyʋ ɛsʋ wiyaʋ tɛ pɩ-taa kadaɣ taa+ nɛ patɩyaa-ɩ yɔ, paɣtʋ kʋɖʋmtʋ lakɩnɩ tʋmɩyɛ: Pɩwɛɛ se pakʋ-ɩ; ye wiyaʋ ɛkpazɩ kewiyaɣ sika ɖaʋ nɛ ɛwɩlɩ-ɩ yɔ, pi-ɖeke piyekina nɛ ɛwɛɛ wezuu.+ Nɛ patɩya-m se mowolo wiyaʋ cɔlɔ pɩlakɩ kɩyakɩŋ 30 yɔ.»
12 Peheyi Mɔrɩdekayɩ tɔm ndʋ Ɛsɩtɛɛrɩ yɔɔdaa yɔ lɛ,
13 ecosi Ɛsɩtɛɛrɩ se: «Taamaɣzɩ se ŋwɛ wiyaʋ ɖɩɣa taa yɔ pʋyɔɔ lɛ, ŋhikiɣ ñʋʋ yabʋ nɛ pɩkazɩ Yuuda ñɩma lalaa.
14 Mbʋ pʋyɔɔ yɔ ye ŋsum tamɩyɛ alɩwaatʋ tʋnɛ tɩ-taa yɔ, pɩkaɣ tɩŋnʋʋ nʋmɔʋ lɛɛkʋ yɔɔ nɛ Yuuda ñɩma hiɣ sɩnʋʋ nɛ ñʋʋ yabʋ,+ ɛlɛ ña nɛ ña-caa ɖɩɣa taa ñɩma ɩkaɣ sɩbʋ. Nɛ ŋnanɩ we se pɩtɩla yɔ alɩwaatʋ ɛzɩ tʋnɛ yɔ tɩ-yɔɔ yɔɔ ŋpɩsɩ abiɖe?»+
15 Ðɩnɛ ɛlɛ Ɛsɩtɛɛrɩ cosi Mɔrɩdekayɩ se:
16 «Wolo nɛ ŋkpeɣli Yuuda ñɩma mba pɛwɛ Suuzaŋ* yɔ pa-tɩŋa nɛ ɩhɔkɩ nɔɔ+ mɔ-yɔɔ. Ɩtaatɔɔ nɛ ɩtaañɔɔ kɩyakɩŋ 3,+ ɖoo nɛ wɩsɩ. Ma nɛ ma-lɩmɖʋyaa halɩñɩma ɖɩkaɣ ɖɔɖɔ hɔkʋʋ nɔɔ. Mankaɣ wobu wiyaʋ cɔlɔ, paa pɩkaɖɩɣnɩ paɣtʋ yɔ, nɛ ye pɩwɛɛ se mansɩ yɔ, mansɩ.»
17 Peeɖe Mɔrɩdekayɩ ɖɛwa nɛ ɛla mbʋ payɩ Ɛsɩtɛɛrɩ pɔzɩ-ɩ se ɛla yɔ.
