Ɛsɩtɛɛrɩ 6:1-14
-
Wiyaʋ ɖʋ Mɔrɩdekayɩ hɩɖɛ (1-14)
6 Ðoo ana wiyaʋ tɩpɩzɩ nɛ eɖoo.* Pʋyɔɔ lɛ, ɛpɔzɩ se pɔkɔnɩ tɔm ndʋ tɩlaba nɛ pama-tʋ nɛ pasɩɩ yɔ tɩ-takayaɣ,+ nɛ pɔkɔnɩ-kɛ nɛ pakalɩ-kɛ wiyaʋ.
2 Pana pama takayaɣ ŋga ka-taa tɔm ndʋ Mɔrɩdekayɩ kaakɛdɩ Bikɩtaanɩ nɛ Terɛɛzɩ yɔɔ yɔ; paakɛ wiyaʋ kaɖɩsɩ 2 nzɩ sɩkɛ nɔnɔɔ yɔɔ ɖaŋɩyaa yɔ, nzɩ sɩɩkpɛyaa se sɩkʋʋ Wiyaʋ Asiyeruusi yɔ.*+
3 Wiyaʋ pɔzɩ se: «Hɩɖɛ ɖʋʋ nɛ kʋjɔʋ ŋgʋ palabɩ Mɔrɩdekayɩ pʋyɔɔ?» Peeɖe lɩmɖʋyaa mba paɖʋwaɣ wiyaʋ maɣmaɣ lɩm yɔ pocosaa se: «Patɩlabɩ-ɩ nabʋyʋ.»
4 Pʋwayɩ lɛ, wiyaʋ pɔzɩ se: «Awɛ kadaɣ taa?» Hamaanɩ kaakɔm wiyaʋ ɖɩɣa tɛ awayɩ kadaɣ taa+ se eheyi wiyaʋ se eyele nɛ popuzi Mɔrɩdekayɩ sizika ŋga ɛɛñɔɔzaa nɛ ɛsɩɩ yɔ kɔ-yɔɔ.+
5 Wiyaʋ lɩmɖʋyaa cosi-i se: «Hamaanɩ+ sɩŋnɩ kadaɣ taa.» Peeɖe wiyaʋ yɔɔdaa se: «Iheyi-i se ɛsʋʋ.»
6 Hamaanɩ sʋwa lɛ, wiyaʋ pɔzɩ-ɩ se: «Ɛbɛ pɩwɛɛ se pala ɛyʋ weyi wiyaʋ sɔɔlaa se ɛɖʋ-ɩ hɩɖɛ yɔ?» Hamaanɩ maɣzɩ ɛ-laŋɩyɛ taa se: «Anɩ wiyaʋ sɔɔlaa se ɛɖʋ hɩɖɛ nɛ pɩtɩkɛ ma?»+
7 Nɛ Hamaanɩ cosi wiyaʋ se: «Ɛyʋ weyi wiyaʋ sɔɔlaa se ɛɖʋ-ɩ hɩɖɛ yɔ,
8 yele nɛ pɔkɔnɩ awiya toko+ ŋgʋ wiyaʋ suu yɔ nɛ kpaŋnʋ weyi ɛ-yɔɔ wiyaʋ cakɩ yɔ, nɛ pete kpaŋnʋ ɛnʋ ɛ-ñʋʋ awiya ñʋʋ kitemuu.
9 Pʋwayɩ lɛ, yele nɛ paɖʋzɩ awiya toko ŋgʋ nɛ kpaŋnʋ ɛnʋ wiyaʋ awumbiya sɔsaa taa kʋɖʋm nesi taa, nɛ pɩwɛɛ se posuu toko ŋgʋ ɛyʋ weyi wiyaʋ sɔɔlaa se ɛɖʋ-ɩ hɩɖɛ yɔ nɛ pacaɣzɩ-ɩ kpaŋnʋ yɔɔ nɛ palɩnɩ-ɩ tɛtʋ taa samaɣ kadaɣ taa. Pɩwɛɛ se pama kubuka sɔsɔɔ ɛ-ɛsɩndaa nɛ pɔtɔ se: “Mbʋ palakɩ ɛyʋ weyi wiyaʋ sɔɔlaa se ɛɖʋ-ɩ hɩɖɛ yɔ!”»+
10 Kpaagbaa mbʋ lɛ, wiyaʋ heyi Hamaanɩ se: «La lɔŋ! Kpaɣ awiya toko nɛ kpaŋnʋ, nɛ ŋla Yuuda tʋ Mɔrɩdekayɩ weyi ɛcakɩ wiyaʋ nɔnɔɔ taa yɔ ɖeyi ɖeyi ɛzɩ ŋyɔɔdʋʋ yɔ. Tɔm ndʋ payɩ ŋyɔɔdaa yɔ taakazɩ tɩ-taa natʋyʋ.»
11 Peeɖe Hamaanɩ kpaɣ awiya toko nɛ kpaŋnʋ, nɛ esuu toko ŋgʋ Mɔrɩdekayɩ+ nɛ ɛcaɣzɩ-ɩ kpaŋnʋ yɔɔ nɛ ɛlɩnɩ-ɩ tɛtʋ taa samaɣ kadaɣ taa nɛ ɛma kubuka sɔsɔɔ ɛ-ɛsɩndaa se: «Mbʋ palakɩ ɛyʋ weyi wiyaʋ sɔɔlaa se ɛɖʋ-ɩ hɩɖɛ yɔ!»
12 Pʋwayɩ lɛ, Mɔrɩdekayɩ pɩsɩ wiyaʋ nɔnɔɔ taa, ɛlɛ Hamaanɩ ñekpe ɛ-tɛ lɛɛ lɛɛ, ɛwɛ laŋwɛɛkɩyɛ taa nɛ ehuuzi ɛ-ñʋʋ yɔɔ.
13 Hamaanɩ kɛdɩ ɛ-halʋ Zerɛɛsɩ+ nɛ ɛ-taabalaa tɩŋa mbʋ payɩ pɩtalɩ-ɩ yɔ lɛ, ɛ-lɔŋsɩnɖaa nɛ ɛ-halʋ Zerɛɛsɩ peheyi-i se: «Mɔrɩdekayɩ weyi ɛ-ɛsɩndaa ŋpaɣzɩ tɔlʋʋ yɔ, ye ɛkɛ Yuuda mba lʋlʋʋ taa tʋ* yɔ, ŋŋkaɣ-ɩ wabʋ; pɩtʋʋ fɛyɩ se ŋkaɣ tɔlʋʋ ɛ-ɛsɩndaa.»
14 Peɖiɣni-i yɔɔdɩnʋʋ mbʋ lɛ, wiyaʋ ɖɩɣa taa kaɖɩsɩ talɩ nɛ sɩkpaɣ Hamaanɩ lɛɛ lɛɛ nɛ sɩɖɛnɩ-ɩ kazandʋ ndʋ Ɛsɩtɛɛrɩ laba yɔ tɩ-taa.+
Pɩ-tɛɛ tɔm
^ Piye piye, «wiyaʋ ɖom sewa.»
^ Piye piye, «se sɩkpazɩɣ nesi Wiyaʋ Asiyeruusi yɔɔ yɔ.»
^ Piye piye, «ye ɛlɩnɩ Yuuda mba ɖomaɣ taa.»
