Samɩyɛɛlɩ takayaɣ kajalaɣ ñɩŋga 21:1-15
21 Pʋwayɩ lɛ, Daviid wolo Noob,+ cɔjɔ Ahimelɛɛkɩ cɔlɔ. Ahimelɛɛkɩ katɩ Daviid lɛ, ɛpaɣzɩ seluu nɛ ɛpɔzɩ-ɩ se: «Ɛbɛ yɔɔ ŋwɛ ñe-ɖeke nɛ nɔɔyʋ fɛyɩ ñɔ-cɔlɔ?»+
2 Daviid cosi cɔjɔ Ahimelɛɛkɩ se: «Wiyaʋ pɔzɩ-m se mala nabʋyʋ, ɛlɛ eheyi-m se: “Taayele nɛ nɔɔyʋ nɩɩ tɔm natʋyʋ pɩlɩɩnɩ mbʋ mentiyiɣ-ŋ se ŋla yɔ pɩ-yɔɔ, nɛ paɣtʋ ndʋ manɖʋ-ŋ yɔ tɩ-yɔɔ.” Meheyi me-evebiya se ɖɩkatɩ ɖama lone naɖɩyɛ taa.
3 Lɛɛlɛɛyɔ lɛ, ye kpɔnɔnaa 5 ɩwɛ ñɔ-cɔlɔ yɔ, ha-m wɛ, yaa ha-m mbʋ payɩ pɩwɛɛ yɔ.»
4 Ɛlɛ cɔjɔ cosi Daviid se: «Kpɔnɔ yem ñɩŋgʋ nakʋyʋ fɛyɩ mɔn-cɔlɔ, ɛlɛ kpɔnɔ kiɖeɖeu+ wɛna—evebiya pɩzɩɣ nɛ pɔtɔɔ-kʋ ye patiwolo halaa cɔlɔ yɔ.»*+
5 Daviid cosi cɔjɔ se: «Poposini-ɖʋ nɛ halaa ɛzɩ alɩwaatʋ ndʋ tɩ-taa payɩ maalɩ you labʋ yɔ.+ Ye evebiya tomnasɩ ɩkɛ kiɖeɖesi halɩ pɩkpɛndɩnɩ alɩwaatʋ ndʋ ɖɩlakɩ tʋmɩyɛ naɖɩyɛ yem yɔ, pɩtʋʋ fɛyɩ se sɩkɛɣ kiɖeɖesi sɔnɔ nɛ pɩkɩlɩ!»
6 Nɛ cɔjɔ ha-ɩ kpɔnɔ kiɖeɖeu,+ mbʋ pʋyɔɔ yɔ kpɔnɔ nakʋyʋ taawɛɛ peeɖe nɛ pɩtasɩnɩ Ɛsɔ ɛsɩndaa kpɔnɔ, ŋgʋ paakʋsɩ Yehowa ɛsɩndaa se pɛlɛɣzɩ ki-lone taa kpɔnɔ kɩfalʋʋ kɩyakʋ ŋgʋ pakʋsɩ-kʋ yɔ.
7 Sɔɔlɩ lɩmɖʋyaa taa nɔɔyʋ kaawɛ peeɖe kɩyakʋ ŋgʋ, paakpa-ɩ nɛ pasɩɩ Yehowa ɛsɩndaa. Ɛ-hɩɖɛ lɛ Edom tʋ+ Dowɛɛgɩ;+ ɛɛkɛ Sɔɔlɩ ninɖiɣyaa ñʋʋdʋ.
8 Nɛ Daviid pɔzɩ Ahimelɛɛkɩ se: «Kɩgbɛzɛŋ yaa laɣɖɛ naɖɩyɛ wɛ ñɔ-cɔlɔ cɩnɛ? Mantɩkpɛndɩnɩ ma-maɣmaɣ ma-laɣɖɛ yaa mo-you wondu, mbʋ pʋyɔɔ yɔ tʋmɩyɛ nɖɩ wiyaʋ ɖʋ-m yɔ, pɩɩcɛyaa se palabɩ-ɖɩ kpɛdɛyɛ.»
9 Peeɖe cɔjɔ cosi-i se: «Filistii tʋ Gooliyaatɩ weyi ŋkʋ Elaa Fɛɛʋ* taa+ yɔ, ɛ-laɣɖɛ+ wɛ cɩnɛ, pɔhɔkɩ-ɖɩ pɩsaʋ nakʋyʋ taa nɛ pasɩɩ-ɖɩ efoodɩ+ wayɩ. Ye ŋcaɣ se ŋkpaɣ-ɖɩ yɔ, kpaɣ-ɖɩ; mbʋ pʋyɔɔ yɔ ɖi-ɖeke ɖɩwɛnɩ cɩnɛ.» Daviid tɔ se: «Naɖɩyɛ fɛyɩ ɛzɩ nɖɩ yɔ. Cɛlɩ-m ɖɩ.»
10 Daviid kʋyɩ kɩyakʋ ŋgʋ ki-wiye nɛ ɛɖaɣnɩ kpaɣʋ nʋmɔʋ nɛ eseɣ+ se Sɔɔlɩ etaahiɣ-i, nɛ ɛkɔɔ nɛ ɛtalɩ Gaatɩ+ wiyaʋ Akis cɔlɔ.
11 Akis lɩmɖʋyaa heyi-i se: «Pɩtɩkɛ Daviid weyi ɛkɛ ɛjaɖɛ taa wiyaʋ yɔ lɛ? Pɩtɩkɛ ɛnʋ peteɣaɣ hendu nɛ papaɣ nɛ pɔtɔŋ se:“Sɔɔlɩ kʋ ɛyaa kudokiŋ,Nɛ Daviid ñakʋ ɛyaa kudokiŋ hiŋ” na?»+
12 Daviid sɩɩ tɔm ndʋ ɛ-laŋɩyɛ taa, nɛ sɔɔndʋ paɣzɩ-ɩ kpaʋ siŋŋ+ nɛ Gaatɩ wiyaʋ Akis.
13 Pʋyɔɔ ɛlɛɣzɩ ɛ-wɛtʋ nɛ ɛpɩsɩ ɛzɩ kɩmɛlɛŋ yɔ+ pɛ-ɛsɩndaa, nɛ ɛlakɩ ɛzɩ kpaanzɩyʋ yɔ alɩwaatʋ ndʋ ɛwɛ pɛ-hɛkʋ taa* yɔ. Ɛhɛɣaɣ canzɩ nɔnɔɔ pɔɔyɩŋ yɔɔ nɛ eyeki nɛ ndaazola kpeŋ ɛ-tandaʋ yɔɔ.
14 Peeɖe Akis heyi ɛ-lɩmɖʋyaa se: «Ɩnawa se abalʋ ɛnɛ ɛkɛ kpaanzɩyʋ! Ɛbɛ yɔɔ ɩkɔŋnɩ-m ɩ?
15 Ɛzɩ kpaanzɩyaa mɛnfɛyɩna nɛ pɩpɔzʋʋ se ɩkɔnɩ-m ɛyʋ ɛnɛ yɔ se ɛlakɩ kpaanzɩyaa lakasɩ mɛ-ɛsɩndaa? Ɛbɛ yɔɔ pɩpɔzʋʋ se abalʋ ɛnɛ ɛsʋʋ man-ɖɩɣa taa?»
