Yohanɛɛsɩ takayaɣ kajalaɣ ñɩŋga 5:1-21
5 Weyi etisiɣ se Yesu kɛnɩ Krɩstʋ yɔ ɛkɛ Ɛsɔ pɩɣa,+ nɛ weyi ɛsɔɔlɩ Ɛsɔ yɔ, ɛsɔɔlɩ ɖɔɖɔ Ɛsɔ piya.
2 Pʋnɛ ɖɩnaɣna se ɖɩsɔɔlɩ Ɛsɔ piya:+ ye ɖɩsɔɔlɩ Ɛsɔ nɛ ɖɩɖɔŋ ɛ-paɣtʋ yɔɔ yɔ.
3 Mbʋ pʋyɔɔ yɔ Ɛsɔ sɔɔlɩm tɔbʋʋ lɛ se ɖɩɖɔ ɛ-paɣtʋ yɔɔ;+ nɛ ɛ-paɣtʋ fɛyɩ yuŋ,+
4 mbʋ pʋyɔɔ yɔ weyi* Ɛsɔ lʋlɩ-ɩ yɔ ɛwakɩ ɛjaɖɛ.+ Mbʋ pɩsɩnɩ-ɖʋ nɛ ɖɩwa ɛjaɖɛ yɔ, mbʋ lɛ ɖe-tisuu.+
5 Apɩzɩɣ nɛ ɛwa ɛjaɖɛ?+ Pɩtɩkɛ weyi ɛwɛnɩ tisuu se Yesu kɛ Ɛsɔ Pɩyalʋ yɔ?+
6 Ɛnʋ kɛnɩ weyi ɛtɩŋnɩ lɩm nɛ calɩm yɔɔ nɛ ɛkɔɔ yɔ, Yesu Krɩstʋ; pɩtɩkɛ lɩm ɖeke yɔɔ ɛtɩŋnaa,+ ɛlɛ ɛtɩŋnɩ lɩm nɛ calɩm yɔɔ.+ Nɛ fezuu ɖiɣni aseɣɖe lɩzʋʋ,+ mbʋ pʋyɔɔ yɔ fezuu kɛ toovenim.
7 Mbʋ pʋyɔɔ yɔ aseɣɖe lɩzɩyaa naadozo wɛna:
8 fezuu,+ lɩm+ nɛ calɩm;+ nɛ pa-naadozo pɛwɛnɩ lɩmaɣza kʋɖʋma.
9 Ye ɖɩmʋʋ aseɣɖe nɖɩ ɛyaa lɩzɩɣ yɔ yɔ, aseɣɖe nɖɩ Ɛsɔ lɩzɩɣ yɔ ɖɩkɩlaa. Mbʋ pʋyɔɔ yɔ aseɣɖe ɖɩnɛ Ɛsɔ lɩzɩɣ, aseɣɖe nɖɩ ɛlɩzɩ ɛ-Pɩyalʋ yɔɔ yɔ.
10 Ɛyʋ weyi ɛwɛnɩ tisuu Ɛsɔ Pɩyalʋ yɔɔ yɔ, ɛwɛnɩ aseɣɖe nɖɩ ɛ-taa. Ɛyʋ weyi ɛfɛyɩnɩ tisuu Ɛsɔ yɔɔ yɔ ɛpɩsɩ-ɩ cɛtɩyʋ,+ mbʋ pʋyɔɔ yɔ ɛfɛyɩnɩ tisuu aseɣɖe nɖɩ Ɛsɔ lɩzɩ ɛ-Pɩyalʋ yɔɔ yɔ ɖɩ-yɔɔ.
11 Nɛ aseɣɖe nɖɩ yɔ: Ɛsɔ ha-ɖʋ wezuu maatɛŋ,+ nɛ wezuu ŋgʋ kɩwɛ ɛ-Pɩyalʋ taa.+
12 Weyi ɛwɛnɩ Pɩyalʋ yɔ, ɛwɛnɩ wezuu ŋgʋ; weyi ɛfɛyɩnɩ Ɛsɔ Pɩyalʋ yɔ, ɛfɛyɩnɩ wezuu ŋgʋ.+
13 Mamaɣ-mɩ tɔm ndʋ se pɩsa nɛ ɩtɩlɩ se ɩwɛnɩ wezuu maatɛŋ,+ mɩ mba ɩwɛnɩ tisuu Ɛsɔ Pɩyalʋ hɩɖɛ yɔɔ yɔ.+
14 Nɛ tɔm tʋnɛ ɖa-taa tɛmnaa,+ se paa ɛbɛ ɖɩpɔzʋʋ Ɛsɔ nɛ pɩlakɩ nɔɔ kʋɖʋmaɣ nɛ ɛ-sɔɔlɩm yɔ, Ɛsɔ welisiɣni-ɖʋ.+
15 Nɛ ye ɖɩsɩm mbʋ se ewelisiɣni-ɖʋ mbʋ payɩ ɖɩpɔzʋʋ-ɩ yɔ pɩ-taa yɔ, ɖɩsɩm mbʋ ɖɔɖɔ se ɖɩkaɣ wɛnʋʋ mbʋ ɖɩpɔzʋʋ yɔ, mbʋ pʋyɔɔ yɔ ɖɩpɔzɩ-ɩ pʋ.+
16 Ye nɔɔyʋ ɛna e-koobu, eɖiɣni labʋ kɩwɛɛkɩm mbʋ pɩɩkɔŋnɩ sɩm yɔ yɔ, ɛtɩmɩ ɛ-yɔɔ, nɛ Ɛsɔ kaɣ ɛlɛ haʋ wezuu;+ ɛɛɛ, ɛhaɣ wezuu mba paalakɩ kɩwɛɛkɩm mbʋ pɩkɔŋnɩ sɩm yɔ. Kɩwɛɛkɩm nabʋyʋ wɛɛ lɛ pɩkɔŋnɩ sɩm.+ Pɩtɩkɛ kɩwɛɛkɩm mbʋ pɩ-yɔɔ meheyiɣ-i se ɛtɩmɩ.
17 Lakasɩ nzɩ payɩ sɩfɛyɩ siɣsiɣ yɔ sɩkɛ kɩwɛɛkɩm,+ ɛlɛ kɩwɛɛkɩm nabʋyʋ wɛɛ lɛ pɩɩkɔŋnɩ sɩm.
18 Ðɩsɩm mbʋ se ɛyʋ weyi ɛkɛ Ɛsɔ pɩɣa yɔ, eeyeki nɛ kɩwɛɛkɩm labʋ malɩnɩ-ɩ;* ɛlɛ weyi ɛkɛ Ɛsɔ pɩɣa yɔ,* ɛɖaŋɩɣ ɛyʋ ɛnʋ ɛ-yɔɔ, nɛ kañatʋ tʋ ɛɛpɩzɩɣ nɛ ɛwɛɛnɩ ɖoŋ ɛ-yɔɔ.+
19 Ðɩsɩm mbʋ se ɖɩlɩnɩ Ɛsɔ cɔlɔ, ɛlɛ ɛjaɖɛ kpeekpe wɛ kañatʋ tʋ nesi taa.*+
20 Ɛlɛ ɖɩsɩm mbʋ se Ɛsɔ Pɩyalʋ kɔma,+ nɛ ɛha-ɖʋ lɛɣtʋ* se pɩsa nɛ ɖɩtɩlɩ weyi ɛkɛ toovenim tʋ yɔ. Nɛ weyi ɛkɛ toovenim tʋ yɔ, ɛ-Pɩyalʋ Yesu Krɩstʋ yɔɔ lɛ, ɖa nɛ ɩ ɖɩwɛ nɔɔ kʋɖʋmaɣ.+ Ɛnʋ lɛ Ɛsɔ toovenim tʋ nɛ wezuu maatɛŋ.+
21 Piya cikpesi, ɩkpa mɩ-tɩ nɛ sɩʋ kpelisi.+
Pɩ-tɛɛ tɔm
^ Piye piye, «mbʋ payɩ.»
^ Yaa «ɛɛsɔɔlʋʋ kɩwɛɛkɩm labʋ.»
^ Pʋ-tɔbʋʋ se Yesu Krɩstʋ, Ɛsɔ Pɩyalʋ.
^ Yaa «ɖoŋ tɛɛ.»
^ Piye piye, «tɔm taa nɩʋ lɛɣtʋ.»
