Awiya takayaɣ kajalaɣ ñɩŋga 7:1-51
7 Salomɔɔ kpaɣ pɩnzɩ 13 pʋcɔ nɛ ɛtɛ ɛ-maɣmaɣ ɛ-ɖɩɣa*+ tɩŋa maʋ.+
2 Nɛ ɛma Libaŋ Laʋ Ðɩɣa,+ ka-ɖaɣlɩkɩŋ kɛ nuŋgolonzi* 100, ka-walanzɩ nuŋgolonzi 50, ka-kʋkʋyɩŋ nuŋgolonzi 30, sɛɛdrɩ tilima canzɩ 4 yɔɔ; nɛ sɛɛdrɩ kpandaadɩla+ kaawɛ tilima ana a-yɔɔ.
3 Pakam Sɛɛdrɩ ɖasɩ sɔsɔsɩ kpandaadɩla wena patɩnɩ tilima yɔɔ yɔ a-ñʋʋ yɔɔ; pɩɩkpɛndɩ 45, nɛ 15 wɛɛ paa caŋa ŋga lɛ kɔ-yɔɔ.
4 Palabɩ ɖɔɖɔ mondoɖebɔŋ weyi ɩwɛnɩ hʋyɩŋ yɔɔ kpoŋgbolonaa yɔ canzɩ 3; caŋa lɛɛka wɛ lɛɛka ñʋʋ yɔɔ. Nɛ paa mondoɖebɔʋ ŋgʋ lɛ, kɩha ɛsa nɛ mondoɖebɔʋ lɛɛkʋ hɔɔlʋʋ lɛɛkʋ yɔɔ.
5 Nɔnɔsɩ nɛ nɔnɔsɩ tilima tɩŋa wɛnɩ hɔɔlɩŋ 4 weyi ɩwɛ kɩmaŋ yɔ, ɛzɩ mondoɖebɔŋ weyi ɩha ɖama nɛ ɛsa canzɩ 3 yɔɔ yɔ ɩ-ɛsɩndaa wɛʋ yɔ.
6 Nɛ ɛma Tilima Kpaaŋ;* kɩ-ɖaɣlɩkɩŋ kaakɛ nuŋgolonzi 50 nɛ kɩ-walanzɩ nuŋgolonzi 30. Nɛ kʋjɔŋ nakʋyʋ kaawɛ kɩ-ɛsɩndaa, paalabɩ-kʋ nɛ tilima nɛ pɔlɔbɩ-kʋ.
7 Ɛma ɖɔɖɔ Kewiyaɣ Kpelaɣ Kpaaŋ,*+ ɖenɖe ɛkaɣ tɔm hʋʋ yɔ—Tɔm Hʋʋ Kpaaŋ+—nɛ ɛpɔ kɩ-yɔɔ sɛɛdrɩ kpoŋgbolonaa, kpaɣnɩ tataa nɛ pɩkpa lɔbɩtʋ ɖasɩ.
8 Ðɩɣa* ŋga ka-taa ɛsʋʋ yɔ, paama-kɛ Kpaaŋ* wayɩ, kadaɣ lɛɛka taa,+ kɛ-wɛtʋ kaawɛ ɖɔɖɔ ɛzɩ lɛɛka yɔ. Ɛma ɖɔɖɔ ɖɩɣa ŋga kɛwɛ ɛzɩ Kpaaŋ kʋnɛ yɔ Farawɔɔ pɛlɛ, weyi Salomɔɔ kaakpaɣaa nɛ ɛkɛ ɛ-halʋ yɔ.+
9 Paalabɩ pɩtɩŋa nɛ pɛɛ wena awɛ liidiye yɔ,+ wena pamaɣzaa nɛ pasaɣ-yɛ yɔ, nɛ pakpaɣ kela sɩsɩ nɛ pɔñɔɔzɩ-yɛ pɩ-taa nɛ pɩ-wayɩ, kpaɣnɩ tigiɖe nɛ pɩkpa ñʋʋ taa, nɛ awayɩ nɛ piwolo pɩtalɩ ɖooo kadaɣ sɔsɔɔ taa.+
10 Pɛɛ wena apaɣlɩ pɩdɩɩfɛyɩ nɛ awɛɛ liidiye yɔ paasɩnɩ tigiɖe; pɛɛ ana a-taa naayɛ paɣlɩka kaakɛ nuŋgolonzi hiu, nɛ pɛɛ lɛɛna paɣlɩka ñɛkɛ nuŋgolonzi lutozo.
11 Nɛ a-ñʋʋ yɔɔ lɛ, paalabɩnɩ tʋmɩyɛ pɛɛ wena aawɛ liidiye, nɛ pamaɣzɩ-yɛ nɛ pasaɣ-yɛ yɔ, pɩ nɛ sɛɛdrɩ ɖasɩ.
12 Papɩlɩ pɛɛ wena pasaɣ-yɛ yɔ canzɩ 3 nɛ sɛɛdrɩ ɖasɩ caŋa kʋɖʋmaɣ nɛ pɩcɔɔ kadaɣ sɔsɔɔ nɛ pɩta, ɛzɩ palabʋ Yehowa ɖɩɣa tɛ pɩ-taa kadaɣ+ nɛ ɖɩɣa kʋjɔŋ+ yɔ.
13 Wiyaʋ Salomɔɔ tiyi se powolo nɛ pɔkɔnɩ Hiram,+ nɛ powolo Tiirɩ nɛ pɔkɔnɩ-ɩ.
14 Hiram kaakɛ Naftalii cejewiye taa halʋ lelu nɔɔyʋ pɩyalʋ, nɛ ɛ-caa kaakɛ ñɩɣyʋʋ kɩsɛɛmʋʋ wondu luɖu+ weyi ɛ-tɛ wɛ Tiirɩ yɔ; nɛ Hiram kaawɛ niye siŋŋ, ɛɛwɛnɩ tɔm taa nɩʋ lɛɣtʋ,+ nɛ ɛɛwɛnɩ lɛɣtʋ ɖɔɖɔ paa ñɩɣyʋʋ kɩsɛɛmʋʋ* wondu ndʋ lɛ ti-lubu taa. Nɛ ɛkɔɔ Wiyaʋ Salomɔɔ cɔlɔ nɛ ɛla ɛ-tʋma tɩŋa.
15 Elubi ñɩɣyʋʋ kɩsɛɛmʋʋ tilima 2;+ paa tilimiye nɖɩ lɛ, ɖɩ-kʋkʋyɩŋ kaakɛ nuŋgolonzi 18, nɛ pɩɩpɔzɩ nimiye nɖɩ ɖɩ-ɖaɣlɩkɩŋ kɛ nuŋgolonzi 12 yɔ pʋcɔ nɛ pamaɣzɩ paa tilimiye nɖɩ lɛ nɛ pɩcɔɔ pɩta.*+
16 Nɛ ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ hokiŋ 2 nɛ ɛɖʋ tilima ana a-ñʋŋ taa. Hokuu kʋɖʋmʋʋ kʋkʋyɩŋ kaakɛ nuŋgolonzi 5, nɛ hokuu lɛɛkʋ kʋkʋyɩŋ ñaakɛ nuŋgolonzi 5.
17 Hokiŋ weyi ɩwɛ paa tilimiye nɖɩ ɖɩ-ñʋʋ taa yɔ, ɩ-yɔɔ nɛ giriyaazɩ ŋgʋ palʋnɩ kpasɩ yɔ;+ hokuu kʋɖʋmʋʋ yɔɔ 7 nɛ hokuu lɛɛkʋ yɔɔ 7.
18 Nɛ ɛla girenaadɩ pee canzɩ 2 nɛ pɩcɔɔ giriyaazɩ nɛ pɩta se ehuuzi hokiŋ weyi ɩwɛ tilima ñʋŋ taa yɔ ɩ-yɔɔ; mbʋ ɛlabɩ hokiŋ ɛnɩ ɩ-naalɛ.
19 Paalabɩ hokiŋ weyi ɩwɛ tilima ñʋŋ taa kʋjɔŋ cɔlɔ yɔ nɛ ɩwɛɛ ɛzɩ hɛtʋ ndʋ payaɣ se lii yɔ; ɩ-kʋkʋyɩŋ kɛ nuŋgolonzi naanza.
20 Hokiŋ kaawɛ tilima ana a-naalɛ a-yɔɔ, ɖenɖe hɔɔlʋʋ ŋgʋ kɩwɛ pom yɔ kitukuuni giriyaazɩ yɔ, pɩ-ñʋʋ yɔɔ pazɩ; nɛ paakpaɣ girenaadɩ pee 200 nɛ papɩlɩ canzɩ nɛ pɩcɔɔ paa hokuu ŋgʋ nɛ pɩta.+
21 Esiɣ templo* kʋjɔŋ+ tilima. Esiɣ nɩwaŋ yɔɔ* tilimiye nɛ ɛyaa-ɖɩ se Yakiini,* nɛ pʋwayɩ lɛ esiɣ nɩmɩyɛ yɔɔ* tilimiye nɛ ɛyaa-ɖɩ se Bowaazɩ.*+
22 Nɛ paalabɩ tilima ñʋŋ taa nɛ pɩwɛɛ ɛzɩ hɛtʋ ndʋ payaɣ se lii yɔ. Mbʋ tilima tʋmɩyɛ tɛma.
23 Nɛ eyolisi ñɩɣtʋ nɛ ɛlabɩnɩ Teŋgu.*+ Kɩɩwɛ kulukulu; kpaɣ nɔɔ hɔɔlʋʋ nɛ ŋwolo nɔɔ hɔɔlʋʋ lɛɛkʋ lɛ, pɩkɛ nuŋgolonzi 10, nɛ kʋkʋyɩŋ kɛ nuŋgolonzi 5, nɛ pɩɩpɔzɩ nimiye nɖɩ ɖɩ-ɖaɣlɩkɩŋ kɛ nuŋgolonzi 30 yɔ pʋcɔ nɛ pamaɣzɩ nɔɔ ŋga nɛ pɩcɔɔ pɩta.*+
24 Paalabɩ ɖɔɖɔ ajana kɩlɛmɩŋ kɩ-nɔɔ tɛɛ nɛ ɩwɛɛ ɛzɩ kama yɔ+ nɛ pɩcɔɔ kɩ-tɩŋa nɛ pɩta, kama 10 nuŋgoloŋa kʋɖʋmaɣ taa, nɛ pala mbʋ canzɩ 2 nɛ pɩcɔɔ Teŋgu nɛ pɩta. Pɛkpɛndɩ kama nɛ Teŋgu nɛ pala tam kʋɖʋm.
25 Teŋgu kaacaɣ naŋ abalɩñɩŋ 12 yɔɔ,+ 3 ha ɛsa nɛ hayo kiŋ, 3 ha ɛsa nɛ wɩsɩ ɖɩɖʋyɛ, 3 ha ɛsa nɛ hadɛ kiŋ, nɛ 3 ha ɛsa nɛ wɩsɩ ɖɩlɩyɛ; nɛ Teŋgu caɣ ɩ-yɔɔ, nɛ ɩ-tɔbɩŋ wɛɛnɩ hɛkʋ taa kiŋ.
26 Nɛ ɛzɩma kɩkpɩndaa yɔ pɩɩkɛ niwee 4 walanzɩ;* nɛ paalabɩ kɩ-nɔɔ nɛ kɛwɛɛ ɛzɩ kɔpʋ nɔɔ yɔ, ɛzɩ hɛɖʋʋ ŋgʋ payaɣ se lii yɔ. Papɩzɩɣ nɛ papɩyɩ kɩ-taa lɩm batwaa* 2 000.
27 Pʋwayɩ lɛ, ɛkpaɣ ñɩɣyʋʋ kɩsɛɛmʋʋ nɛ ɛlabɩnɩ kɛɛkɛɛnaa*+ 10. Paa kɛɛkɛɛ ŋgʋ lɛ kɩ-ɖaɣlɩkɩŋ kaakɛ nuŋgolonzi 4, kɩ-walanzɩ nuŋgolonzi 4, nɛ kɩ-kʋkʋyɩŋ nuŋgolonzi 3.
28 Nɛ ɛzʋnɔ palabɩ kɛɛkɛɛnaa mba: Paawɛnɩ hʋyɩŋ yɔɔ kpatanaa, nɛ hʋyɩŋ yɔɔ kpatanaa mba, paawɛ ñɩɣyʋʋ kɩsɛɛmʋʋ ɖaŋ weyi ɩlɛdɩ ɖama taa yɔ ɩ-hɛkɩŋ taa.
29 Nɛ palɩzɩ mʋʋzɩŋ,+ naŋ abalɩñɩŋ, nɛ kerebimwaa+ hʋyɩŋ yɔɔ kpatanaa mba pɛwɛ ñɩɣyʋʋ kɩsɛɛmʋʋ ɖaŋ weyi ɩlɛdɩ ɖama taa yɔ ɩ-hɛkɩŋ taa yɔ ɩ-yɔɔ, nɛ pala mbʋ ɖɔɖɔ ñɩɣyʋʋ kɩsɛɛmʋʋ ɖaŋ weyi ɩlɛdɩ ɖama taa yɔ ɩ-yɔɔ. Palɩzɩ ajana hɛtʋ ndʋ palʋ-tʋ ɛzɩ sabɩŋ yɔ mʋʋzɩŋ nɛ naŋ abalɩñɩŋ ñʋŋ yɔɔ nɛ ɩ-tɛɛ.
30 Paa kɛɛkɛɛ ŋgʋ lɛ, kɩwɛnɩ ñɩɣyʋʋ kɩsɛɛmʋʋ pɔbɔla 4 nɛ ñɩɣyʋʋ kɩsɛɛmʋʋ ñɩma, nɛ ñɩɣtʋ ɖaŋ 4 weyi ɩɩwɛ kɔnanaa 4 taa yɔ ɛnɩ ɖɔkɩnɩ pɔbɔla ana nɛ ñɩma ana. Palabɩ nɩŋgbanzɩ ñanaɣ sɔsɔɔ tɛɛ, nɛ ñɩɣyʋʋ poyolisaa nɛ pala ajana hɛtʋ ndʋ palʋ-tʋ ɛzɩ sabɩŋ yɔ paa nɩŋgbaŋaɣ ŋga lɛ kɔ-hɔɔlʋʋ yɔɔ.
31 Kɔ-nɔɔ kaawɛ ñɩɣlɩm hulaɣ taa; kpaɣnɩ kɛ-tɛɛ nɛ piwolo pɩkatɩ ñɩɣlɩm hulaɣ lɛ, pɩɩkɛ nuŋgoloŋa kʋɖʋmaɣ; nɛ kɔ-nɔɔ kaawɛ kulukulu; nɛ kpaɣnɩ nɩŋgbanzɩ nɛ pɩkpa ñɩɣlɩm hulaɣ tɩnaɣ yɔɔ lɛ, pɩɩkɛ nuŋgoloŋa kʋɖʋmaɣ nɛ hɔɔlʋʋ, nɛ palɩzɩ kɩlɛmɩŋ kɔ-nɔɔ yɔɔ. Nɛ ka-hʋyɩŋ yɔɔ kpatanaa kaawɛnɩ hɔɔlɩŋ 4 weyi ɩwɛ kɩmaŋ yɔ, nɛ pataawɛɛ kulukulu.
32 Pɔbɔla ana a-naanza aawɛ hʋyɩŋ yɔɔ kpatanaa tɛɛ, nɛ nɩŋgbanzɩ nzɩ sɩɖɔkʋʋ pɔbɔla yɔ paatam-sɩ nɛ kɛɛkɛɛ, nɛ paa pɔbɔɖɛ nɖɩ lɛ, ɖɩ-kʋkʋyɩŋ kaakɛ nuŋgoloŋa kʋɖʋmaɣ nɛ hɔɔlʋʋ.
33 Nɛ palabɩ pɔbɔla ana ɛzɩ you kɛɛkɛɛ pɔbɔla yɔ. Ñɩɣyʋʋ poyolisaa nɛ polubini a-nɩŋgbanzɩ, a-kpayasɩ, kpayasɩ yɔɔ ñɩma, nɛ kpayasɩ yɔɔ ñɩma ɖɩgbɛndɩyɛ.
34 Nɩŋgbanzɩ 4 kaawɛ paa kɛɛkɛɛ ŋgʋ lɛ kɩ-kɔnanaa 4 taa; paalubi nɩŋgbanzɩ nɛ sɩ nɛ kɛɛkɛɛ pɩkpɛndɩ nɛ pɩkɛ pʋyʋ kʋɖʋm.
35 Palabɩ kɛɛkɛɛ ñʋʋ taa ñɩɣyʋʋ nakʋyʋ kpɛɛɛ nɛ pɩcɔɔ pɩta, nɛ kɩ-kʋkʋyɩŋ kaakɛ nuŋgoloŋa hɔɔlʋʋ; kɛɛkɛɛ ñʋʋ taa lɛ, kɩ-hʋyɩŋ yɔɔ kpatanaa nɛ mbʋ pɩɖɔkʋʋ-wɛ yɔ nɛ kɛɛkɛɛ pɩkpɛndaa nɛ pɩkɛ pʋyʋ kʋɖʋm.
36 Elubi kerebimwaa, mʋʋzɩŋ, nɛ paŋ kɩlɛmɩŋ kɩ-hʋyɩŋ yɔɔ kpatanaa nɛ mbʋ pɩɖɔkʋʋ-wɛ yɔ pɔ-yɔɔ, ɛzɩ lona walanzɩ pɔzʋʋ yɔ, nɛ ɛla ajana hɛtʋ ndʋ palʋ-tʋ ɛzɩ sabɩŋ yɔ nɛ pɩcɔɔ pɩta.+
37 Mbʋ ɛlabɩ kɛɛkɛɛnaa mba pɛ-tɛ 10;+ elubi pa-tɩŋa nɛ panɩɣzɩnɩ ɖama,+ nɛ pɛwɛɛ kɩmaŋ nɛ pɛ-wɛtʋ kɛ kʋɖʋmtʋ.
38 Ɛkpaɣ ñɩɣyʋʋ kɩsɛɛmʋʋ nɛ ɛla ñanzɩ sɔsɔsɩ+ 10; paa ŋga lɛ, kapɩzaɣ se kamʋ batwaa 40. Paa ñanaɣ sɔsɔɔ ŋga lɛ, kaakɛ nuŋgolonzi 4.* Kɛɛkɛɛnaa 10 mba pa-taa paa ŋgʋ lɛ, kɩɩwɛnɩ ñanaɣ sɔsɔɔ kʋɖʋmaɣ.
39 Pʋwayɩ lɛ, ɛkpaɣ kɛɛkɛɛnaa 5 nɛ ɛsɩɩ ɖɩɣa nɩwaŋ yɔɔ nɛ ɛsɩɩ 5 ɖɩɣa nɩmɩyɛ yɔɔ, nɛ ɛsɩɩ Teŋgu ɖɩɣa nɩwaŋ hɔɔlʋʋ yɔɔ, hadɛ kiŋ wɩsɩ ɖɩlɩyɛ hɔɔlʋʋ taa.+
40 Hiram+ labɩ ɖɔɖɔ ñanzɩ sɔsɔsɩ, pɛɛlɩnaa,+ nɛ ñanzɩ kulam ñɩnzɩ.+
Nɛ Hiram tɛ tʋma wena payɩ Wiyaʋ Salomɔɔ ɖʋ-ɩ se ɛla Yehowa ɖɩɣa taa yɔ:+
41 Ɛlabɩ tilima 2+ nɛ hokiŋ weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-naalɛ a-ñʋŋ taa yɔ; ɛlabɩ giriyaazɩwaa+ 2 se pohuuzi hokiŋ 2 weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-ñʋŋ taa yɔ ɩ-yɔɔ;
42 ɛlabɩ girenaadɩ pee+ 400 wena palaba se awɛɛ giriyaazɩwaa mba pa-naalɛ pɔ-yɔɔ yɔ, girenaadɩ pee canzɩ 2 nzɩ palaba se sɩwɛɛ paa giriyaazɩ ŋgʋ lɛ kɩ-yɔɔ yɔ, se pohuuzi hokiŋ 2 weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-naalɛ a-ñʋŋ taa yɔ ɩ-yɔɔ;
43 ɛlabɩ kɛɛkɛɛnaa+ 10 nɛ ñanzɩ sɔsɔsɩ+ 10 nzɩ patɩnɩɣ kɛɛkɛɛnaa yɔɔ yɔ;
44 ɛlabɩ Teŋgu+ nɛ naŋ abalɩñɩŋ 12 weyi ɩwɛ Teŋgu tɛɛ yɔ;
45 nɛ tɔkasɩ, pɛɛlɩnaa, ñanzɩ kulam ñɩnzɩ, nɛ wondu tɩŋa, ndʋ Hiram kpaɣ ñɩɣyʋʋ kɩsɛɛmʋʋ ŋgʋ kɩñɩlɩsɩɣ yɔ nɛ ɛlabɩnɩ Yehowa ɖɩɣa tʋma Wiyaʋ Salomɔɔ yɔ.
46 Wiyaʋ yolisi ñɩɣtʋ cʋʋ muulinaa taa Yɔɔrdaŋ egeetiye taa, Sukɔɔtɩ nɛ Zarɩtaanɩ pɛ-hɛkʋ taa nɛ elubini wondu ndʋ.
47 Wondu ndʋ payɩ palabɩnɩ tʋmɩyɛ yɔ, Salomɔɔ tɩmaɣzɩ ti-yuŋ, mbʋ pʋyɔɔ yɔ tɩɩɖɔwa pɩdɩɩfɛyɩ. Patɩtɩlɩ ñɩɣyʋʋ kɩsɛɛmʋʋ yuŋ.+
48 Salomɔɔ labɩ Yehowa ɖɩɣa taa wondu kpeekpe: sika altaaru;+ sika taabɩlɩ+ ŋgʋ kɩ-yɔɔ pasɩɣ Ɛsɔ ɛsɩndaa kpɔnɔnaa yɔ;
49 sika kele kele ñɩŋga kanɖʋnaa ɖɩzɩyɛ,+ paasɩ 5 nɩwaŋ yɔɔ nɛ 5 nɩmɩyɛ yɔɔ ɖooo pɩ-taa kuduyuu ɛsɩndaa; nɛ ɛkpaɣ sika+ nɛ ɛlabɩnɩ hɛtʋ,+ kanɖʋnaa, nɛ kpɩɖɩŋ;*
50 ɛkpaɣ sika kele kele ñɩŋga nɛ ɛlabɩnɩ ñanzɩ sɔsɔsɩ, wondu ndʋ paɖɩzɩɣnɩ miŋ yɔ,+ ñanzɩ kulam ñɩnzɩ, kɔpʋnaa,+ miŋ ñanzɩ;+ nɛ ɛkpaɣ sika nɛ ɛlabɩnɩ pɩ-taa ɖɩɣa,+ pʋ-tɔbʋʋ se Lone Kiɖeɖeye nɖɩ ɖɩkpaɖaa yɔ ɖɩ-pɔɔyɩŋ ɖɩdɩnɩyɛ lona, nɛ templo ɖɩɣa pɔɔyɩŋ+ ɖɩdɩnɩyɛ lona.
51 Nɛ Wiyaʋ Salomɔɔ tɛ Yehowa ɖɩɣa tʋma wena payɩ pɩɩwɛɛ se ɛla yɔ. Pʋwayɩ lɛ, Salomɔɔ sʋnɩ wondu ndʋ ɛ-caa Daviid kaapɩsɩ-tʋ kiɖeɖetu yɔ+ ka-taa, nɛ ɛkpaɣ liidiye ñɩɣtʋ, sika nɛ wondu lɛɛtʋ nɛ ɛsɩɩ Yehowa ɖɩɣa ñɩm ɖɩzɩyɛ taa.+
Pɩ-tɛɛ tɔm
^ Yaa «ɛ-awiya ɖɩɣa.»
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Yaa «Kʋjɔŋ.»
^ Yaa «Kʋjɔŋ.»
^ Yaa «Awiya ɖɩɣa.»
^ Piye piye, «Kpaaŋ ɖɩɣa.»
^ Yaa «brɔɔnzɩ ñɩɣyʋʋ.» Mayaɣ kanɛ ka-taa nɛ ñʋʋ kʋnɛ kɩ-taa, ɖenɖe pɔyɔɔdʋʋ ñɩɣyʋʋ kɩsɛɛmʋʋ tɔm yɔ, brɔɔnzɩ ñɩɣyʋʋ tɔm pɔyɔɔdʋʋ.
^ Yaa «nɛ tilima 2 ana, a-taa paa nɖɩ kikiŋ kaakɛ nuŋgolonzi 12.»
^ Cɩnɛ lɛ Lone Kiɖeɖeye tɔm pɔyɔɔdʋʋ.
^ Yaa «hadɛ kiŋ.»
^ Pʋ-tɔbʋʋ se «Ɛla [pʋ-tɔbʋʋ se Yehowa ɛla] nɛ pɩka camɩyɛ.»
^ Yaa «hayo kiŋ.»
^ Pʋ-tɔbʋʋ pɩzɩɣ pɩkɛ «Ðoŋ taa.»
^ Yaa «nɛ kɩ-walanzɩ kaakɛ nuŋgolonzi 30.»
^ Yaa «lɩm ɖɩɖʋyɛ.»
^ Yaa «pɩɩkɛ palɩm kʋɖʋmʋʋ.» Palɩm kʋɖʋmʋʋ maɣnɩ ɛzɩ santimɛtawaa 7 nɛ hɔɔlʋʋ mbʋ yɔ (santimɛtawaa 7,4). Cɔnɩ Tɔm kɩsɔzɩtʋ B14.
^ Bat kʋɖʋmʋʋ tɔkaɣ litrinaa 22. Cɔnɩ Tɔm kɩsɔzɩtʋ B14.
^ Yaa «lɩm kɛɛkɛɛnaa.»
^ Yaa «ka-walanzɩ kaakɛ nuŋgolonzi 4.»
^ Cɔnɩ Tɔm pee sɔsɔna tɔbʋʋ lɩzʋʋ.
