Samɩyɛɛlɩ takayaɣ naalɛ ñɩŋga 6:1-23
6 Daviid ɖaɣnɩ kpeɣluu Izrayɛɛlɩ taa sɔɔjanaa mba pɛwɛ niye you labʋ taa nɛ pɩkpaɖɩ yɔ pa-tɩŋa, pɛkpɛndɩ ɛyaa 30 000.
2 Nɛ Daviid nɛ ɛyaa mba paawɛ ɛ-cɔlɔ yɔ pa-tɩŋa palɩɩ nɛ pɛɖɛɛ Baale-Yuuda se pakpaɣ Ɛsɔ toovenim tʋ Aɖakaɣ peeɖe nɛ pakpana;+ kɛ-ɛsɩndaa samaɣ yaɣ yoyaa tɛ Yehowa hɩɖɛ,+ weyi ɛcaɣ e-kewiyaɣ kpelaɣ taa kerebimwaa ñʋʋ yɔɔ yɔ.*+
3 Ɛlɛ, paasɩ Ɛsɔ toovenim tʋ Aɖakaɣ kɛɛkɛɛ kɩfalʋʋ yɔɔ,+ se pakpaɣ-kɛ nɛ Abinadaabɩ ɖɩɣa taa+ nɛ pɛɖɛna. Abinadaabɩ ɖɩɣa ŋga kaawɛ piyaɣ yɔɔ; nɛ Abinadaabɩ pɩyalaa Uuza nɛ Ahiyo peɖiyaɣni naŋ weyi ɩhɔŋaɣ kɛɛkɛɛ kɩfalʋʋ ŋgʋ yɔ.
4 Nɛ pakpaɣ Ɛsɔ toovenim tʋ Aɖakaɣ Abinadaabɩ ɖɩɣa taa piyaɣ yɔɔ, nɛ Ahiyo wɛɛ nɛ ɛɖɔŋ Aɖakaɣ ɛsɩndaa.
5 Daviid nɛ Izrayɛɛlɩ ɖɩɣa kpeekpe paawɛɛ nɛ palakɩ kazandʋ Yehowa ɛsɩndaa nɛ pamakɩ minziiki wondu ndɩ ndɩ ndʋ palabɩnɩ jenevriyee ɖasɩ yɔ, cɩmɩŋ, cɩmʋʋ wondu lɛɛtʋ ndʋ tɩ-yɔɔ wɛ nimasɩ yɔ,+ nesi tɛɛ soo,*+ cɩmɩŋ wondu ndʋ payaɣ se sisɩtɩrɩwaa yɔ nɛ ŋgbamɛɛ.+
6 Ɛlɛ pɔkɔm nɛ patalɩ Nakɔɔnɩ tɔɔnaɣ ɖɩmaɖɛ lɛ, Uuza sezi e-nesi Ɛsɔ toovenim tʋ Aɖakaɣ yɔɔ nɛ ɛɖɔkɩ-kɛ,+ mbʋ pʋyɔɔ yɔ naŋ weyi ɩɩwɛɛ nɛ ɩhɔŋ kɛɛkɛɛ ŋgʋ yɔ, ɩlaba nɛ Aɖakaɣ caɣaɣ tɔlʋʋ.
7 Peeɖe Yehowa taa wɩnɩ Uuza siŋŋ, nɛ Ɛsɔ toovenim tʋ kʋ-ɩ peeɖe+ ɛ-kaañamtʋ lakasɩ nzɩ sɩ-yɔɔ.+ Uuza sɩbɩ peeɖe, Ɛsɔ toovenim tʋ Aɖakaɣ cɔlɔ.
8 Ɛlɛ Daviid kɔ pana,* mbʋ pʋyɔɔ yɔ Yehowa pana tibi Uuza yɔɔ; nɛ payaa lone nɖɩ se Perɛɛzɩ-Uuza* halɩ nɛ sɔnɔ.
9 Pʋyɔɔ Daviid paɣzɩ seu sɔɔndʋ Yehowa+ kɩyakʋ ŋgʋ ki-wiye nɛ ɛtɔ se: «Ɛzɩma Yehowa Aɖakaɣ pɩzɩɣ nɛ kɔkɔɔ mɔn-cɔlɔ?»+
10 Daviid tɩtasɩ sɔɔlʋʋ se ewoni Yehowa Aɖakaɣ Daviid Tɛtʋ taa ɖenɖe ɛɛwɛɛ yɔ.+ Ɛlɛ eyele nɛ powoni-kɛ Gaatɩ tʋ Obɛɛdɩ-Edom ɖɩɣa taa.+
11 Yehowa Aɖakaɣ wɛɛ Gaatɩ tʋ Obɛɛdɩ-Edom ɖɩɣa taa fenasɩ 3, nɛ Yehowa wɛɛ nɛ ɛwazɩɣ Obɛɛdɩ-Edom nɛ ɛ-ɖɩɣa taa mba kpeekpe.+
12 Pɔkɔɔ nɛ peheyi Wiyaʋ Daviid se: «Ɛsɔ toovenim tʋ Aɖakaɣ yɔɔ lɛ, Yehowa wɛɛ nɛ ɛwazɩɣ Obɛɛdɩ-Edom ɖɩɣa nɛ mbʋ payɩ ɛwɛna yɔ pɩ-yɔɔ.» Peeɖe Daviid woba se ɛkpaɣ Ɛsɔ toovenim tʋ Aɖakaɣ Obɛɛdɩ-Edom ɖɩɣa taa nɛ ɛkpanɩ-kɛ Daviid Tɛtʋ taa nɛ amɛya.+
13 Mba pakpaɣ+ Yehowa Aɖakaɣ yɔ pɛkpɛzɩ nɩŋgbanzɩ 6 lɛ, Daviid laa nɔ abalɩñɩnʋ nɛ kpɩnɛ nɖɩ ɖɩɖʋ num yɔ.
14 Daviid paɣaɣnɩ e-ɖoŋ kpeekpe nɛ ɛcɔʋ Yehowa ɛsɩndaa; efoodɩ ŋgʋ palʋnɩ pɩsatʋ fɛlɛ fɛlɛ ñɩndʋ yɔ eesuwa.*+
15 Daviid nɛ Izrayɛɛlɩ ɖɩɣa kpeekpe paawɛɛ nɛ pakpaɣnɩ Yehowa Aɖakaɣ+ nɛ taa leleŋ kubusi+ nɛ nɔndɔʋ hʋlʋʋ.+
16 Ɛlɛ Yehowa Aɖakaɣ talɩ Daviid Tɛtʋ taa lɛ, Sɔɔlɩ pɛlɛ Miikaalɩ+ cɔnɩnɩ mondoɖebɔʋ nɛ ɛna Wiyaʋ Daviid wɛɛ nɛ ɛmaɣ nɛ ɛpaɣ nɛ ɛcɔʋ Yehowa ɛsɩndaa; nɛ ɛpaɣzɩ-ɩ nim ɛ-laŋɩyɛ taa.+
17 Nɛ pasʋnɩ Yehowa Aɖakaɣ nɛ pasɩɩ-kɛ ko-lone taa kizinziku ŋgʋ Daviid kaasiɣaa se pasɩɩ-kɛ kɩ-tɛɛ yɔ.+ Pʋwayɩ lɛ, Daviid laa kɩlaŋ kɩñaɣzɩŋ+ nɛ laŋhɛzɩyɛ kɩlaŋ+ Yehowa ɛsɩndaa.+
18 Daviid tɛm kɩlaŋ kɩñaɣzɩŋ nɛ laŋhɛzɩyɛ kɩlaŋ laʋ lɛ, ɛwazɩ samaɣ yoyaa tɛ Yehowa hɩɖɛ taa.
19 Pɩtasɩ lɛ, ɛtayɩ samaɣ kpeekpe, Izrayɛɛlɩ samaɣ kpeekpe, abalaa nɛ halaa, paa weyi lɛ kpɔnɔ ŋgʋ kɩwɛ kulukulu kokooye tɩyɛ yɔ kɩ-hɔɔlaɣ, daatɩ kakayaɣ, nɛ viiñi pee kɩwɩlɛɛ kakayaɣ; nɛ pʋwayɩ lɛ samaɣ kpeekpe ɖɛɛ, paa weyi lɛ ɛpɩsɩ ɛ-ɖɩɣa taa.
20 Daviid pɩsaa se ɛwazɩ ɛ-maɣmaɣ ɛ-ɖɩɣa taa mba lɛ, Sɔɔlɩ pɛlɛ Miikaalɩ+ lɩɩ nɛ ɛkatɩ-ɩ. Miikaalɩ yɔɔdɩ se: «Samtʋ sɔsɔtʋ ndʋ lɛ mbʋ yɔ Izrayɛɛlɩ wiyaʋ samnɩ ɛ-tɩ alɩwaatʋ ndʋ elem ɛ-tɩ ɛ-lɩmɖʋyaa tɛ yomaa halɩñɩma ɛsɩndaa sɔnɔ, ɛzɩ ɛyʋ weyi ɛ-ñʋʋ taa fɛyɩ yɔ eleŋuu ɛ-tɩ kaɣlaa yɔ!»+
21 Peeɖe Daviid cosi Miikaalɩ se: «Yehowa ɛsɩndaa malabɩ kazandʋ, ɛnʋ weyi ɛlɩzɩ-m nɛ eyele ña-caa nɛ ɛ-ɖɩɣa taa mba kpeekpe, nɛ ɛlɩzɩ-m se mɛnkɛ Yehowa samaɣ Izrayɛɛlɩ ɖiyiyu yɔ.+ Pʋyɔɔ lɛ, mankaɣ labʋ kazandʋ Yehowa ɛsɩndaa,
22 nɛ halɩ mankaɣ man-tɩ luzuu nɛ pɩkɩlɩ mbʋ nɛ halɩ mentisi man-tɩ ma-maɣmaɣ mɛ-ɛsɩndaa. Ɛlɛ yomaa halɩñɩma mba pɔ-tɔm ŋyɔɔdaa yɔ, pakaɣ-m ɖʋʋ hɩɖɛ.»
23 Pʋyɔɔ Sɔɔlɩ pɛlɛ Miikaalɩ+ tɩlʋlɩ pɩɣa pɩkɔɔ pɩtalɩ ɛ-sɩm wiye.
Pɩ-tɛɛ tɔm
^ Pɩpɩzɩɣ pɩkɛ, «kerebimwaa hɛkʋ taa yɔ.»
^ Pɩkɛ soo cikpena wena pɔɖɔkʋʋ nesi tɛɛ nɛ pamakɩ yɔ.
^ Yaa «Daviid caɣ kʋñɔŋ.»
^ Pʋ-tɔbʋʋ se «Pana tibi Uuza yɔɔ.»
^ Piye piye, «ɛɛtama.»
