Ejipiti Lɩʋ 17:1-16
17 Izrayɛɛlɩ mba samaɣ kpeekpe kʋyɩ Sinɩ kañɩmbusuu taa+ nɛ pɔɖɔŋnɩ caɣʋ lona ndɩ ndɩ taa ɛzɩ Yehowa ɖʋʋ paɣtʋ yɔ,+ nɛ patalɩ pacaɣ Refidim.+ Ɛlɛ lɩm taawɛɛ se samaɣ ɛñɔɔ.
2 Peeɖe samaɣ paɣzɩ yonuu Moyizi+ nɛ kɔtɔŋ se: «Ha-ɖʋ lɩm nɛ ɖɩñɔɔ.» Ɛlɛ Moyizi kitini-wɛ se: «Ɛbɛ yɔɔ ɩwɛɛ nɛ iyouni-m? Ɛbɛ yɔɔ ɩwɛɛ nɛ ɩtakɩɣ Yehowa?»+
3 Ɛlɛ lɔkɔtʋ kaaɖɛ samaɣ peeɖe siŋŋ, nɛ kɛwɛɛ kemidiɣni Moyizi+ nɛ kɔtɔŋ se: «Ɛbɛ yɔɔ ŋlɩzɩ-ɖʋ Ejipiti se ŋyele nɛ lɔkɔtʋ kʋ ɖa nɛ ɖe-piya nɛ ɖa-kpɩna nɛ ɖɩsɩ?»
4 Pɩtɛmna se Moyizi mabɩ kubuka nɛ eheyi Yehowa se: «Ɛbɛ pɩwɛɛ se mala samaɣ kanɛ? Pɩkazɩ pazɩ kakaɣ-m yaɣʋ pɛɛ!»
5 Ðɩnɛ ɛlɛ Yehowa heyi Moyizi se: «Ðɛɛ samaɣ ɛsɩndaa, nɛ ŋkpɛndɩnɩ Izrayɛɛlɩ ɛzʋtʋyaa taa nabɛyɛ nɛ ña-ɖaʋ ŋgʋ ŋŋmabɩnɩ Niili Pɔɔ yɔ.+ Ðɔkɩ-kʋ ñe-nesi taa nɛ ŋɖɛɛ.
6 Na! Mankaɣ sɩŋʋʋ ñɛ-ɛsɩndaa kaaʋ yɔɔ Orɛɛbʋ peeɖe. Pɩwɛɛ se ŋma kaaʋ, nɛ lɩm kaɣ lɩnʋʋ kɩ-taa nɛ samaɣ kaɣ-pʋ ñɔʋ.»+ Moyizi la mbʋ Izrayɛɛlɩ ɛzʋtʋyaa ɛsɩndaa.
7 Nɛ ɛyaa lone nɖɩ se Masaa*+ nɛ Meriba,*+ mbʋ pʋyɔɔ yɔ Izrayɛɛlɩ mba yoni-i, nɛ pɩtasɩ lɛ, patakɩ Yehowa+ nɛ pɔtɔ se: «Yehowa wɛ ɖɛ-hɛkʋ taa yaa ɛfɛyɩ?»
8 Pʋwayɩ lɛ Amalɛɛkɩ mba+ kɔɔ nɛ poyouni Izrayɛɛlɩ mba Refidim.+
9 Peeɖe Moyizi heyi Yozuwee+ se: «Lɩzɩ abalaa nɛ ŋwolo ŋyooni Amalɛɛkɩ mba. Cee mankaɣ sɩŋʋʋ piyaɣ ñʋʋ taa, mɔnɖɔkʋʋ Ɛsɔ toovenim tʋ ɖaʋ me-nesi taa.»
10 Nɛ Yozuwee la ɖeyi ɖeyi ɛzɩ Moyizi heyuu-i yɔ,+ nɛ eyooni Amalɛɛkɩ mba. Nɛ Moyizi, Aarɔɔnɩ, nɛ Huuri+ pakpa piyaɣ ñʋʋ taa.
11 Alɩwaatʋ ndʋ Moyizi nesi wɛɣ ɛsɔdaa yɔ, Izrayɛɛlɩ mba wakaɣ, ɛlɛ etiiyeki e-nesi nɛ sitii lɛ, Amalɛɛkɩ mba wakɩna.
12 Pɩnɩ Moyizi nesi* lɛ, pakpaɣ pɩyɛ nɛ pasɩɩ ɛ-tɛɛ nɛ ɛcaɣ ɖɩ-yɔɔ. Nɛ Aarɔɔnɩ nɛ Huuri pasɩŋ ɛ-cɔlɔ ceemenje, nɛ peteɣli e-nesi, nɛ piyele nɛ e-nesi wɛɛ ɛsɔdaa mbʋ nɛ wɩsɩ kɔɔ nɛ sɩɖʋ.
13 Mbʋ pɩlaba nɛ Yozuwee wa Amalɛɛkɩ nɛ ɛ-samaɣ nɛ laɣɖɛ.+
14 Nɛ Yehowa heyi Moyizi se: «Ma tɔm tʋnɛ takayaɣ taa nɛ pɩkɛ mbʋ pɩ-yɔɔ pɔtɔzʋʋ yɔ* nɛ ŋtasɩ-tʋ heyuu Yozuwee: “Mankaɣ Amalɛɛkɩ hɩzʋʋ caɣ caɣ tɛtʋ kpeekpe yɔɔ nɛ paakaɣ ɛ-yɔɔ tɔzʋʋ wiɖiyi.”»+
15 Nɛ Moyizi ma altaaru nakʋyʋ nɛ ɛyaa-kʋ se Yehowa-Nisi,*
16 nɛ ɛtɔ se: «Ɛzɩma Amalɛɛkɩ nesi kaɖɩɣnɩ Yah+ kewiyaɣ kpelaɣ yɔ pʋyɔɔ lɛ, Yehowa wɛɣ-ɩ yonuu yɔɔ kpaɣ kpaɖʋʋ nɛ piwolo kpaɖʋʋ.»+
Pɩ-tɛɛ tɔm
^ Pʋ-tɔbʋʋ se «You.»
^ Pʋ-tɔbʋʋ se «Takɩm.»
^ Yaa «Moyizi nesi sʋ yuŋ.»
^ Yaa «pɩkɛ mbʋ pɩtɔzʋʋ ɛyʋ yɔ.»
^ Pʋ-tɔbʋʋ se «Yehowa kɛnɩ ma-yʋsaɣ sizika.»
