Ejipiti Lɩʋ 19:1-25
19 Izrayɛɛlɩ mba lɩ Ejipiti nɛ pɩtalɩ fenaɣ 3 ñɩŋga taa, kɩyakʋ ŋgʋ ki-wiye ɖeyi ɖeyi lɛ, patalɩ Sinayii kañɩmbusuu taa.
2 Pakʋyɩnɩ Refidim+ nɛ patalɩ Sinayii kañɩmbusuu taa nɛ pacaɣ kañɩmbusuu taa. Izrayɛɛlɩ caɣ peeɖe pʋʋ ɛsɩndaa.+
3 Nɛ Moyizi kpa Ɛsɔ toovenim tʋ cɔlɔ, nɛ Yehowa yaa-ɩ nɛ pʋʋ taa+ nɛ eheyi-i se: «Tɔm tʋnɛ pɩwɛɛ se ŋheyi Yakɔɔb ɖɩɣa nɛ ŋsusi-tʋ Izrayɛɛlɩ mba:
4 “Mɩ-maɣmaɣ ɩna mbʋ malabɩ Ejipiti mba+ se pɩsa nɛ mankpaɣ-mɩ kpeluu* keŋ yɔɔ nɛ mɔnkɔnɩ-mɩ ma-maɣmaɣ mɔn-cɔlɔ yɔ.+
5 Lɛɛlɛɛyɔ, ye ɩñaŋ mɔ-nɔɔ taa tɔm ɖeyi ɖeyi nɛ ɩɖɔkɩ mɛ-ɛgbɛyɛ yɔ, pɩtʋʋ fɛyɩ se ɩkaɣ pɩsʋʋ me-ŋgee pʋyʋ* samasɩ kpeekpe taa,+ mbʋ pʋyɔɔ yɔ matɩnɩ tɛtʋ kpeekpe.+
6 Ɩkaɣ-m kɛʋ cɔjɔnaa kewiyaɣ nɛ ɛjaɖɛ kiɖeɖeye.”+ Tɔm ndʋ pɩwɛɛ se ŋheyi Izrayɛɛlɩ mba.»
7 Peeɖe Moyizi woba nɛ ɛyaa samaɣ taa ɛzʋtʋyaa nɛ ɛkɛdɩ-wɛ tɔm ndʋ payɩ Yehowa kaaheyi-i yɔ.+
8 Pʋwayɩ lɛ, samaɣ tɩŋa kpɛndɩ nɔɔ nɛ kocosi se: «Tɔm ndʋ payɩ Yehowa yɔɔdaa yɔ, ɖɩsɔɔlaa se ɖɩɖɔ tɩ-yɔɔ.»+ Kpaagbaa mbʋ lɛ Moyizi wolo nɛ eheyi Yehowa tɔm ndʋ samaɣ cosaa yɔ.
9 Nɛ Yehowa heyi Moyizi se: «Na! Menɖiɣni kɔm ñɔ-cɔlɔ mɩndʋ ndʋ tiyu kpimm yɔ tɩ-taa, se pɩsa nɛ samaɣ pɩzɩ nɛ kanɩɩ alɩwaatʋ ndʋ mɔyɔɔdʋʋnɩ-ŋ yɔ nɛ pɩsa nɛ kɛwɛɛnɩ tisuu ɖɔɖɔ ñɔ-yɔɔ paa ɛzɩmtaa.» Nɛ Moyizi kɛdɩ tɔm ndʋ samaɣ yɔɔdaa yɔ Yehowa.
10 Pʋwayɩ lɛ, Yehowa heyi Moyizi se: «Wolo ɛyaa samaɣ cɔlɔ nɛ ŋpɩsɩ-wɛ kiɖeɖema sɔnɔ nɛ cee, nɛ pɩwɛɛ se pɔcɔtɩ po-wondu kususutu.
11 Nɛ pɩwɛɛ se pɔñɔɔzɩ pa-tɩ nɛ paɖaŋ kɩyakʋ 3 ñɩŋgʋ, mbʋ pʋyɔɔ yɔ kɩyakʋ 3 ñɩŋgʋ wiye lɛ, Yehowa kaɣ tibu Sinayii Pʋʋ yɔɔ samaɣ kpeekpe ɛsɩndaa.
12 Pɩwɛɛ se ŋɖʋ ɛyaa samaɣ kamasɩ nɛ pɩcɔɔ pʋʋ nɛ pɩta nɛ ŋheyi-wɛ se: “Ɩkpa mɩ-tɩ nɛ ɩtaakpa pʋʋ yɔɔ yaa itaatukuni kɩ-kpɛnzɩ. Weyi etukuuni pʋʋ yɔ, pɩtʋʋ fɛyɩ se pakʋʋ-ɩ.
13 Nesi etaatukuni ɛyʋ ɛnʋ, ɛlɛ pakaɣ-ɩ pɛɛ yaɣʋ yaa pakaɣ-ɩ tʋlʋʋ pɔʋ.* Paa pɩtɩɩkɛ kpɩnɛ yaa ɛyʋ yɔ, pɩwɛɛ se ɛsɩ.”+ Ɛlɛ alɩwaatʋ ndʋ panɩɣ ɛyaʋ hɩlʋʋ taŋ yɔ,+ papɩzɩɣ nɛ pɔñɔtɩnɩ pʋʋ.»
14 Nɛ Moyizi lɩɩnɩ pʋʋ yɔɔ nɛ etii samaɣ cɔlɔ, nɛ ɛpaɣzɩ-kɛ pɩsʋʋ kiɖeɖeɣa, nɛ kɔcɔtɩ ko-wondu kususutu.+
15 Eheyi samaɣ se: «Ɩñɔɔzɩ mɩ-tɩ nɛ ɩɖaŋ kɩyakʋ 3 ñɩŋgʋ wiye. Ɩtaasʋʋnɩ mɩ-halaa.»*
16 Kɩyakʋ 3 ñɩŋgʋ wiye tanaŋ tɛɛ, tɛʋ nazaɣ nɛ kɩñɩlɩsɩɣ, nɛ mɩndʋ yuŋ ñɩndʋ natʋyʋ+ kaawɛ pʋʋ yɔɔ nɛ nɔndɔʋ nakʋyʋ wiɣ ɖoŋ, nɛ ɖigbeɣliye* taa samaɣ kpeekpe paɣzɩ seluu.+
17 Nɛ Moyizi lɩzɩ samaɣ ɖigbeɣliye* taa se kakatɩ Ɛsɔ toovenim tʋ, nɛ kasɩŋ pʋʋ liu tɛɛ.
18 Sinayii Pʋʋ tɩŋa ñɛyɩ ñɔsɩ, mbʋ pʋyɔɔ yɔ Yehowa tibi kɩ-yɔɔ miŋ taa;+ nɛ kɩ-ñɔsɩ kʋyaɣ ɛzɩ miŋ momoɖe* naɖɩyɛ taa ñɔsɩ yɔ, nɛ pʋʋ tɩŋa kaawɛɛ nɛ kiseliɣ ɖoŋ pɩŋŋ.+
19 Nɔndɔʋ wiɣaɣ nɛ pɩkpaɣ ɖoŋ kpaʋ yɔɔ lɛ, Moyizi yɔɔdʋʋ, nɛ Ɛsɔ toovenim tʋ nɔɔ cosuu-i.
20 Mbʋ Yehowa tibi Sinayii Pʋʋ ñʋʋ taa. Nɛ Yehowa yaa Moyizi pʋʋ ñʋʋ taa, nɛ Moyizi kpa.+
21 Nɛ Yehowa heyi Moyizi se: «Tii nɛ ŋpaɣ samaɣ se kataacɛzɩ kamaɣ ŋga paɖʋwa yɔ se kɔcɔŋnɩ Yehowa, pɩtɩkɛ mbʋ yɔ pa-taa sakɩyɛ kaɣ sɩbʋ.
22 Nɛ cɔjɔnaa mba pɔñɔtʋʋnɩ Yehowa ɖoŋ ɖoŋ yɔ, yele nɛ papɩsɩ pa-tɩ kiɖeɖema, se pɩtaala nɛ Yehowa kʋ-wɛ.»+
23 Nɛ Moyizi heyi Yehowa se: «Samaɣ ɛɛpɩzɩɣ nɛ kɔñɔtɩnɩ Sinayii Pʋʋ mbʋ pʋyɔɔ yɔ ŋtɛm-ɖʋ paɣʋ se: “Ðʋ kamasɩ nɛ pɩcɔɔ pʋʋ nɛ pɩta, nɛ ŋyele nɛ kɩkɛ kiɖeɖeu.”»+
24 Ɛlɛ, Yehowa kitini-i se: «Wolo, tii nɛ ŋpɩsɩ ŋkpa, ña nɛ Aarɔɔnɩ, ɛlɛ taayele nɛ cɔjɔnaa nɛ samaɣ pɛcɛzɩ kamasɩ nzɩ paɖʋwa yɔ se pɔñɔtɩnɩ Yehowa, se pɩtaala nɛ ɛkʋ-wɛ.»+
25 Peeɖe Moyizi tibi samaɣ cɔlɔ nɛ eheyi-kɛ tɔm ndʋ.
Pɩ-tɛɛ tɔm
^ Yaa «keziye.»
^ Yaa «man-pʋyʋ weyi ɛwɛ ñɩm mɛ-ɛsɩndaa yɔ.»
^ Pʋtɔma yɔ tɔʋ ñɩmɩyɛ patʋlʋʋnɩ-ɩ pɔʋ.
^ Piye piye, «Ɩtaañɔtɩnɩ halʋ.»
^ Yaa «maalika.»
^ Yaa «maalika.»
^ Miŋ momoɖe nɖɩ ɖɩwɛ ɛzɩ kpɔnɔ kpou yɔ.
