Ezekɩyɛɛlɩ 23:1-49
23 Yehowa tɔm tasɩ-m talʋʋ se:
2 «Ɛyʋ pɩyalʋ, halaa nabɛyɛ 2 kaawɛɛ, paakɛ ɖoyo kʋɖʋm pɛlaa.+
3 Papɩsɩ hayitu laɖaa Ejipiti;+ kpaɣnɩ pɛ-pɛlɛtʋ taa papaɣzɩ hayitu labʋ. Peeɖe patakɩ pa-hɩla, nɛ pasaɣyɩ pa-hɩla yɔɔ alɩwaatʋ ndʋ pataatɩlɩtɩ abalʋ yɔ.
4 Payaɣaɣ sɔsɔ se Ohola,* nɛ payaɣ e-neu se Oholiba.* Paapɩsɩ man-pʋyʋ nɛ palʋlɩ abalɩbiya nɛ halɩbiya. Weyi payaɣ se Ohola yɔ, ɛnʋ lɛ Samaarii;+ piyele nɛ weyi payaɣ se Oholiba yɔ, ɛnʋ lɛ Yeruzalɛm.
5 «Ohola paɣzɩ labʋ hayitu,+ ŋgʋ ɛɛkɛ man-pʋyʋ. Ɛɛwɛnɩ kʋzʋʋ kɔɖɛyɩ mba paasɔɔlɩ-ɩ siŋŋ yɔ pɔ-yɔɔ,+ Asiirii ñɩma mba+ pɛkɛ ɛ-cɔlɔ ñɩma yɔ pɔ-yɔɔ.
6 Paakɛ komina ñʋndɩnaa mba posuu wondu ndʋ tɩwɛnɩ tɔlɩm pʋlɔɔ yɔ nɛ kaɖɩsɩ, pe-kpeekpe pɛkɛ evebiya mba peɖewa nɛ pacakɩ kpaŋnaŋ yɔɔ yɔ.
7 Ewobi pɩ-yɔɔ nɛ ɛlakɩ hayitu nɛ Asiirii ñɩma mba payɩ pakɩlɩ ɖeu yɔ, nɛ episi ɛ-tɩ+ nɛ mba pɔ-yɔɔ ɛɛwɛnɩ kʋzʋʋ kɔɖɛyɩ yɔ pa-sɩʋ kpelisi nzɩ sɩwɛ kiniŋ yɔ.*
8 Etiyele hayitu lakasɩ nzɩ ɛlakaɣ Ejipiti yɔ, mbʋ pʋyɔɔ yɔ paasʋnɩ-ɩ ɛ-pɛlɛtʋ taa, nɛ pasaɣyɩ ɛ-hɩla yɔɔ alɩwaatʋ ndʋ ɛtaatɩlɩtɩ abalʋ yɔ nɛ pohuti pa-kʋzʋʋ kɔɖɛyɩ* ɛ-yɔɔ.+
9 Pʋyɔɔ manɖʋzɩ-ɩ mba paasɔɔlɩ-ɩ siŋŋ yɔ pe-nesi tɛɛ, Asiirii ñɩma,+ mba pɔ-yɔɔ ɛɛwɛnɩ kʋzʋʋ kɔɖɛyɩ yɔ.
10 Pokuli ɛ-ndaakpeɖe yɔɔ+ nɛ pakpa ɛ-pɩyalaa nɛ ɛ-pɛlaa,+ nɛ pakʋ ɛ-maɣmaɣ nɛ laɣɖɛ. Ɛɛpɩsɩ weyi ɛ-hɩɖɛ sɛ halaa taa yɔ, nɛ pɔhɔm ɛ-nɩŋgbaŋʋʋ.
11 «E-neu Oholiba na mbʋ lɛ, ɛ-kʋzʋʋ kɔɖɛyɩ kpa ɖoŋ nɛ pɩkɩlɩ, nɛ ɛ-hayitu lakasɩ kɩlɩ ɛ-kɔɔ ñɩnzɩ.+
12 Ɛɛwɛnɩ kʋzʋʋ kɔɖɛyɩ ɛ-cɔlɔ ñɩma Asiirii mba yɔɔ,+ paakɛ komina ñʋndɩnaa nɛ kaɖɩsɩ nɛ posuu wondu ndʋ tiɖewa yɔ nɛ pacakɩ kpaŋnaŋ yɔɔ, pe-kpeekpe pɛkɛ evebiya mba peɖewa yɔ.
13 Episi ɛ-tɩ lɛ, mana se pa-naalɛ patɩŋ nʋmɔʋ kʋɖʋmʋʋ.+
14 Ɛlɛ ɛɖaɣnɩ labʋ hayitu lakasɩ nɛ pɩkɩlɩ. Ɛna palɩzɩ abalaa kɩlɛmɩŋ koloŋa yɔɔ, Kalɩdee mba kɩlɛmɩŋ weyi palɩzɩnɩ tɔlɩm kɩsɛɛmɩm yɔ,
15 patam tambala pa-tɩnzɩ taa, petem ñʋŋ kitemiŋ nɛ ɩfɛtɩɣ, pɛ-wɛtʋ wɛ ɛzɩ you laɖaa yɔ, pa-tɩŋa pɛwɛ ɛzɩ Babilɔɔnɩ mba yɔ; palʋlɩ-wɛ Kalɩdee mba ɛjaɖɛ taa.
16 Ɛtɩɩna-wɛ lɛ, ɛpaɣzɩ wɛnʋʋ kʋzʋʋ kɔɖɛyɩ pɔ-yɔɔ, nɛ etiyi ɛyaa pɔ-cɔlɔ Kalɩdee taa.+
17 Ðɩnɛ ɛlɛ Babilɔɔnɩ mba kɔŋaɣ ɛ-sɔɔlɩm kaɖʋ yɔɔ, nɛ pepisi-i nɛ pa-kʋzʋʋ kɔɖɛyɩ.* Pɛtɛmɩ-ɩ pisuu lɛ, pɔ-tɔm labɩ-ɩ* kiniŋ nɛ ɛha-wɛ siɣye.
18 «Alɩwaatʋ ndʋ ewobi pɩ-yɔɔ nɛ ɛlakɩ hayitu nɛ fɛyɛ ɛɛkpaɣ-ɩ nɛ ekuluu ɛ-ndaakpeɖe yɔɔ yɔ,+ ɛ-tɔm labɩ-m kiniŋ nɛ maha-ɩ siɣye, ɛzɩ ɛ-kɔɔ tɔm kaalabʋ-m* kiniŋ nɛ maha-ɩ siɣye yɔ.+
19 Nɛ ɛwɛɛ hayitu labʋ yɔɔ nɛ pɩkɩlɩɣ,+ nɛ ɛtɔzʋʋ ɛ-pɛlɛtʋ kɩyakɩŋ yɔɔ alɩwaatʋ ndʋ ɛlakaɣ hayitu Ejipiti ɛjaɖɛ taa yɔ.+
20 Ɛɛwɛnɩ kʋzʋʋ kɔɖɛyɩ pɔ-yɔɔ ɛzɩ abalaa mba pa-abalɩtʋ wɛ ɛzɩ kpaŋaɣ ñɩndʋ nɛ pa-kʋzʋʋ pilinzi wɛɛ ɛzɩ kpaŋnʋ kʋzʋʋ piliŋa yɔ pa-ɖaŋnaa wɛɣnʋʋ kʋzʋʋ kɔɖɛyɩ pɔ-yɔɔ yɔ.
21 Kʋzɔɔtʋ lakasɩ nzɩ ŋlakaɣ ñɛ-pɛlɛtʋ taa Ejipiti taa, alɩwaatʋ ndʋ pasaɣyaɣ ña-hɩla yɔɔ yɔ, ñɛ-pɛlɛtʋ hɩla yɔɔ yɔ,+ sɩɖaɣnaɣ-ŋ labʋ liu kpem.+
22 «Pʋyɔɔ lɛ, Oholiba, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Na, menseɣtiɣ ña-kʋsɔɔlaa+ mba pɔ-tɔm labɩ-ŋ* kiniŋ nɛ ŋha-wɛ siɣye yɔ se pakʋyɩ ñɔ-yɔɔ, nɛ mankaɣ-wɛ kʋsʋʋ nɛ hɔɔlɩŋ tɩŋa taa nɛ pɔkɔɔ ña-wayɩ,+
23 Babilɔɔnɩ mba+ nɛ Kalɩdee mba kpeekpe,+ Pekod,+ Sowa nɛ Kowaa abalaa, nɛ Asiirii mba kpeekpe. Pa-tɩŋa pɛkɛ evebiya mba peɖewa yɔ, komina ñʋndɩnaa nɛ kaɖɩsɩ, you laɖaa nɛ mba papalaa nɛ palɩzɩ yɔ,* pa-tɩŋa pacaɣ kpaŋnaŋ yɔɔ.
24 Pakaɣ ña-wayɩ kɔm nɛ you kɛɛkɛɛnaa sakɩyɛ mba pɛwɛnɩ pɔbɔla yɔ nɛ sɔɔjanaa sakɩyɛ, nɛ kpayɩŋ sɔsɔŋ nɛ kpayɩŋ cikpeŋ* nɛ ñɩɣtʋ hulasɩ. Pakaɣ-ŋ cɔʋ nɛ pata, nɛ mankaɣ-wɛ haʋ nʋmɔʋ se pahʋʋnɩ-ŋ tɔm, nɛ pakaɣ-ŋ tɔm hʋnʋʋ ɛzɩ pɩkɛdɩnʋʋ-wɛ yɔ.+
25 Mankaɣ lɩzʋʋ man-pana nɛ mawɩlɩ-ŋ, nɛ pakaɣ-ŋ wɩlʋʋ ñaŋ pa-pana taa. Pakaɣ sɛtʋʋ ñɔ-mɔɔʋ nɛ ña-nɩŋgbaaŋ, nɛ ñɛ-ɛyaa mba pɩkazaa yɔ pakaɣ-wɛ kʋʋ nɛ laɣɖɛ. Pakaɣ kpaɣʋ ña-pɩyalaa nɛ ñɛ-pɛlaa nɛ pɛɖɛna, nɛ ñɛ-ɛyaa mba pɩkazaa yɔ miŋ kaɣ-wɛ ñaɣʋ.+
26 Pakaɣ hɔzʋʋ ño-wondu+ nɛ pamʋ ña-ajana wondu ndʋ tɩwɛ kajʋka yɔ.+
27 Mankaɣ labʋ nɛ ña-kʋzɔɔtʋ lakasɩ nɛ ña-hayitu lakasɩ sɩɩ tɩnaɣ,+ nzɩ ŋpaɣzɩ-sɩ labʋ Ejipiti ɛjaɖɛ taa yɔ.+ Ŋkaɣ-wɛ yebu cɔnʋʋ, nɛ ŋŋkaɣ tasʋʋ tɔzʋʋ Ejipiti yɔɔ.”
28 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Na, mancaɣ-ŋ ɖʋzʋʋ mba ŋpaɖɩɣ-wɛ yɔ pe-nesi tɛɛ, mba pɔ-tɔm labɩ-ŋ* kiniŋ nɛ ŋha-wɛ siɣye yɔ.+
29 Pakaɣ-ŋ wɩlʋʋ ñaŋ nɛ pakpaɣ mbʋ payɩ ŋlabɩ kʋñɔŋ nɛ ŋhiɣ yɔ nɛ pɛɖɛna+ nɛ peyele ña-tɩŋa ndaakpeɖe. Pɩkaɣ kuluu ñe-wezuu kɩdɛkɛdʋʋ caɣʋ ndaakpeɖe fɛyɛ yɔɔ, ña-kʋzɔɔtʋ lakasɩ yɔɔ nɛ ña-hayitu yɔɔ.+
30 Pɩkaɣ-ŋ labʋ mbʋ, mbʋ pʋyɔɔ yɔ ŋɖʋ ajɛɛ wayɩ ɛzɩ hayitu laɖʋ yɔ,+ mbʋ pʋyɔɔ yɔ ŋpisi ña-tɩ nɛ pa-sɩʋ kpelisi nzɩ sɩwɛ kiniŋ yɔ.+
31 Ŋtɩŋ ñɔ-kɔɔ nʋmɔʋ,+ nɛ mankaɣ ɖʋzʋʋ ɛ-kɔpʋ ñe-nesi taa.”+
32 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Mbʋ pɩwɛ ñɔ-kɔɔ kɔpʋ ŋgʋ kɩ-taa limaa nɛ kɩwalaa yɔ kɩ-taa yɔ, ŋkaɣ-pʋ ñɔʋ,+Nɛ ŋkaɣ pɩsʋʋ woŋa pʋyʋ nɛ fɛyɛ pʋyʋ, mbʋ wɛnɩ kɔpʋ ŋgʋ kɩ-taa nɛ pɩɖɔɔ sakɩyɛ.+
33 Sʋlʋm kʋʋ nɛ laŋwɛɛkɩyɛ pakaɣ suu ña-taa,Sɔɔndʋ nɛ ɖɩzʋʋ kɔpʋ pakaɣ suu ña-taa,Ñɔ-kɔɔ Samaarii kɔpʋ.
34 Ŋkaɣ ñɔʋ mbʋ pɩwɛ cʋʋ kɔpʋ ŋgʋ kɩ-taa yɔ nɛ ŋsɔyɩ-pʋ caɣ caɣ+ nɛ ŋsalɩ kɩ-hɔɔlasɩNɛ pʋwayɩ lɛ ŋkpɛzɩ ña-hɩla.
‘Mbʋ pʋyɔɔ yɔ ma-maɣmaɣ mɔyɔɔdɩna,’ Kɩbaɣlʋ Kɩlɩm Yehowa yɔɔdʋʋna.”
35 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ŋsɔ mɔ-yɔɔ nɛ ŋtɩkpaɣ-m nɛ ŋyaa nabʋyʋ paa ññɩɩ,*+ pʋyɔɔ lɛ ŋkaɣ sɩɣlʋʋ mbʋ pɩlɩɣ ña-kʋzɔɔtʋ lakasɩ nɛ ña-hayitu lakasɩ taa yɔ.”»
36 Nɛ Yehowa heyi-m se: «Ɛyʋ pɩyalʋ, ŋkaɣ hʋnʋʋ tɔm Ohola nɛ Oholiba+ nɛ ŋwɩlɩ-wɛ pa-kʋzɔɔtʋ lakasɩ na?
37 Palabɩ acɛyɛ,*+ nɛ calɩm wɛ pe-nesi yɔɔ. Pɩtɩsɩɩna se palabɩ acɛyɛ nɛ pa-sɩʋ kpelisi nzɩ sɩwɛ kiniŋ yɔ, ɛlɛ pakpaɣ ɖɔɖɔ pa-pɩyalaa mba palʋlɩ-m yɔ nɛ pañaɣzɩ miŋ se pɩkɛnɩ pa-sɩʋ kpelisi tɔɔnaɣ.+
38 Pɩtasɩ lɛ, pʋnɛ palabɩ-m: Pepisi mon-kooka kiɖeɖeɣa kɩyakʋ ŋgʋ ki-wiye, nɛ pepisi ɖɔɖɔ man-sabaatɩwaa.
39 Pɛtɛm kʋʋ pa-pɩyalaa nɛ palaa-wɛ pa-sɩʋ kpelisi nzɩ sɩwɛ kiniŋ yɔ lɛ,+ pɔkɔɔ mon-kooka kiɖeɖeɣa taa se pepisi-kɛ+ kɩyakʋ ŋgʋ ki-wiye maɣmaɣ. Mbʋ palabɩ man-ɖɩɣa taa maɣmaɣ.
40 Halɩ petiyi ɛyʋ se ɛyaa abalaa nɛ ɖooo poliŋ taa nɛ pɔkɔɔ.+ Paawɛɛ nɛ pɔkɔŋ lɛ, ña Oholiba, ŋsɔ lɩm nɛ ŋɖʋ ñɛ-ɛsa ciyaʋ nɛ ŋcanɩ ña-tɩ nɛ ajana wondu.+
41 Nɛ ŋcaɣ kpelaɣ* kɩbaŋa taa,+ ŋŋsɩ taabɩlɩ kɛ-ɛsɩndaa,+ nɛ ŋsɩɩ kɩ-yɔɔ me-ŋgee tɩlaaɖɩ+ nɛ mo-num.+
42 Panɩɣaɣ abalaa samaɣ ŋga ka-paa fɛyɩnɩ natʋyʋ yɔ ka-taŋ peeɖe, sʋlʋm kpaŋɩyaa mba paalɩnɩ-wɛ nɛ kañɩmbusuu taa yɔ paawɛ pa-taa. Pɛlɛ kpayasɩ halaa nesi yɔɔ nɛ papa pa-ñʋŋ taa awiya hulasɩ kɩbanzɩ.
43 «Pʋwayɩ lɛ mɔyɔɔdɩ halʋ weyi acɛyɛ labʋ kaapʋʋzɩ-ɩ yɔ ɛ-tɔm se: “Paa mbʋ yɔ, ɛkaɣ wɛʋ ɛ-hayitu labʋ yɔɔ.”
44 Nɛ pɛwɛɛ ɛ-cɔlɔ wobu yɔɔ, ɛzɩ ɛyʋ wokuu hayitu laɖʋ cɔlɔ yɔ. Mbʋ powobi Ohola nɛ Oholiba cɔlɔ, paakɛ halaa mba palakɩ kʋzɔɔtʋ lakasɩ yɔ.
45 Ɛlɛ abalaa siɣsiɣ tɩnaa kaɣ-ɩ tɔm hʋnʋʋ nɛ pɩmʋnɩ ɛ-acɛyɛ+ nɛ ɛ-calɩm kpɛdʋʋ lakasɩ;+ mbʋ pʋyɔɔ yɔ halaa acɛyɛ laɖaa pɛkɛnaa, nɛ calɩm wɛ pe-nesi yɔɔ.+
46 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Pakaɣ tiyinuu sɔɔjanaa pa-wayɩ se pala nɛ papɩsɩ mbʋ pɩcaɣ sɔɔndʋ yɔ nɛ mbʋ ɛyaa lazɩɣ yɔ.+
47 Sɔɔjanaa kaɣ-wɛ yaɣʋ pɛɛ+ nɛ polom-wɛ pa-laɣla. Pakaɣ kʋʋ pa-pɩyalaa nɛ pɛ-pɛlaa+ nɛ pañaɣzɩ pa-ɖɩsɩ miŋ.+
48 Mankaɣ labʋ nɛ kʋzɔɔtʋ lakasɩ sɩɩ tɩnaɣ ɛjaɖɛ taa, nɛ halaa tɩŋa kaɣ kpɛlɩkʋʋ lɔŋ nɛ paakaɣ maɣzɩnʋʋ mɩ-kʋzɔɔtʋ lakasɩ.+
49 Pakaɣ kɔnʋʋ mɩ-yɔɔ mbʋ pɩlɩɣ mɩ-kʋzɔɔtʋ lakasɩ taa nɛ mbʋ pɩlɩɣ kɩwɛɛkɩm mbʋ ɩlabɩnɩ mɩ-sɩʋ kpelisi nzɩ sɩwɛ kiniŋ yɔ pɩ-taa yɔ; nɛ toovenim taa lɛ ɩkaɣ tɩlʋʋ se ma lɛ Kɩbaɣlʋ Kɩlɩm Yehowa.”»+
Pɩ-tɛɛ tɔm
^ Pʋ-tɔbʋʋ se «Men-kizinziku wɛ ɛ-taa.»
^ Pʋ-tɔbʋʋ se «E-kizinziku.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Yaa «pa-kʋzʋʋ kɩdɛkɛdʋʋ.»
^ Yaa «la ɛ-kalɩzaɣ.»
^ Yaa «pa-kʋzʋʋ kɩdɛkɛdʋʋ.»
^ Yaa «kaalabʋ man-kalɩzaɣ.»
^ Yaa «labɩ ña-kalɩzaɣ.»
^ Piye piye, «mba paya-wɛ yɔ.»
^ Ðoŋ ɖoŋ lɛ, tɔŋ tɔyaa ɖɔkaɣnɩ kpayɩŋ cikpeŋ.
^ Yaa «labɩ ña-kalɩzaɣ.»
^ Piye piye, «nɛ ŋkpaɣ-m nɛ ŋlɔnɩ ñe-siɣye wayɩ.»
^ Pʋ-tɔbʋʋ se fezuu taa acɛyɛ.
^ Yaa «kaɖʋ.»
